Leveleseni 4 - The Keyagana NT and 25 OT books

Kokuʼnapi Gotitefeʼmo mono nehaya kavafeʼmo huʼniya gemae

¹ Ani gemo afiteʼna ageʼnovana kokuʼnapi kitamo naulagaleʼmo yaki maleʼnigeʼna ageʼnove. Hogoteʼna afiʼnovana pikuli huʼnageno age aigekana agufa gefatiʼmo naha painoʼaeʼmo, Manileʼmo haikeno. Henagaʼamo afole aisiya kavaʼmo aliʼna kaveliguve, huno naha paiʼniye.

² Malage huʼna Goti Aunemeʼafiʼmo maiʼneʼnaeʼmo naune kavaʼmo huʼna ageʼnovana mago vekamo kokuʼnapiʼmo fai maiʼneno yagaino neʼapateya siyateʼmo maiʼnigeʼna ageʼnove.

³ Fai maiʼniya vekafatiʼmo mago yafaʼmo agiʼamo yasipa yafaʼmo alu agufa alu agufamo kaliʼniya yafakana huno haesa yafaʼmo agiʼamo koniliyani yafakana huno alave alave huʼniye. Mago fugagiʼnaʼmoʼa yafaʼmo agiʼamo emalolimoʼa hegafatalili yafakana huno haneʼnigeno fugagiʼnaʼmoʼa siyateʼmo aino ku aiʼniye.

⁴ Tuveti foʼa vayaʼmogi yagaiʼa apatesayafeʼmo siyamoʼa faino ku aiʼnigeʼa tuveti foʼa vayatama vayaʼmo ani siyateʼmo fai maiʼnae. Yaveyave kukena yaʼmo vaiʼa aliteʼa apakenopaleʼmo goli yafatetiʼmo alo huʼnaya kakolitamo kamemo huʼa aeʼa neʼapakasaya vayaʼmogi neʼmalaya agufa kakolitamo maleʼa aliʼnae.

⁵ Yagaino neʼapateya vekamo siyaʼafatiʼmo hafosamo haiʼnigeno alino alave alave huteno aeno alopa atiʼnigeno hakalu huʼnigeʼna ageʼnove. Yagaino neʼapateya vekamo siyaʼamo aulagaleʼmo seveniʼa kaniʼmo aeʼniye. Ani seveniʼa kaniʼmo haneʼniya kava huno Goti Aunemeʼamoʼmo seveniʼa himamuʼamo haneʼniye.

⁶ Yagaino neʼapateya vekamo siyamo aulagamo mago ani kotuʼmoʼa aeno ha leʼnigeʼa neʼagaya kalasigana huno haneʼniye. Loleʼe loleʼe vayaʼmogi apaulagaʼe apakamelegaʼeʼmo asole apaulagamo haneʼniya vayaʼmogi yagaino neʼapateya vekamo siyaʼaleʼmo faiʼa ku aiʼa ateʼnae.

⁷ Hogote vekamo laiyonigana huno maige napa tu vekamo ve pulumakagana huno maige napa tali vekamo augosamoʼmo ve kanomo augosagana huno hanege napa fo vekamo halelitata nehiya hilo namagana huno maige huʼniye.

⁸ Loleʼe loleʼe vayaʼmogimo sigisiʼa hapakumo haneʼnigeno muki apakufafiʼmo apaulagamo haneʼniye. Muki afinaʼmo felugaʼe haniʼilagaʼeʼmo maiʼa haga oleʼa huʼapaeʼmo, Ala kava neʼmo Gotiʼa muki himamuʼamo aliʼniya vekamo aote vekamae aote vekamae aote vekamo maiʼniye. Hogoteno maiʼniyanageno hemeniʼeʼmo neʼmaiyanageno henagaʼamo alagi maige maige huno maigiye, huʼa huʼnae.

⁹ Loleʼe loleʼe vayaʼmogimo maige maige huno neʼmaiya vekamoʼmo yagaino neʼapateya siyateʼmo fai maiʼniya vekaeʼmo mono huteʼa ala agiʼamo amige agiʼaleʼmo aliʼa asaga huʼa atege hao ke hege huʼa mono nehae.

¹⁰ Mono nehageʼapaeʼmo tuveti foʼa vayatama vayaʼmogimo maige maige huno neʼmaiya vekamo yagaino neʼapateya siyateʼmo maiʼniya vekalefeʼmo asagau aiʼneʼapaeʼmo mono nehae. Apakaemo kamemo huʼa aeʼa apakaseteʼa aliʼnaya kakolitamo asagiʼa yagaino neʼapateya vekamo siya aulagamo yaga auʼnae.

¹¹ Maleteʼapaeʼmo, Ala kava nene, huʼa, Muki yaʼe vayaʼeʼmo alo huʼnane. Kahauʼnigeka alo huteka afaʼa maisaya yaʼmo apamiʼnanageʼa hanege maige huʼnae. Kagaemo ha le konali yakamo alige ala kagikamo alige kayamufakamo alige hisana vekamo maiʼnane, huʼa huʼnae.