Leveleseni 3 - The Keyagana NT and 25 OT books

Satisi taonifiʼmo maiʼnaya siosi vayaʼaifeʼmo hapa paiʼniya gemae

¹ Kagaemo Satisi taonifiʼmo maiʼnaya siosi vayaʼaiteʼmo yagaino neʼapateya apa vekalegamo mani kaha nepauva gemo avoʼmo kaeka atalegeno vino. Nagaemo Goti Aunemeʼamoʼmo seveniʼa himamuʼamo aliteʼna seveniʼa kanefiteʼmo atafauʼna maiʼnova vekamoʼnamo mani gemo lapa nepauve. Nehaya kavatapimo ago lapakeʼnove. Vayaʼmogimo lapakitapimo lapamiʼapaeʼmo, Afaʼa neʼmaiyategamo maiʼnaya vayane, huʼa nehayaʼmonanafa oʼalitapa nefaliya kavategamo neʼmaiya vayaʼmo maiʼnae.

² Lapaupatiʼmo he titapa maiyo. Mago alagepa kavatapimo alagi hano hugefe hiyanagi alita lokiya vaita ateyo. Kavatapimoʼmo Gotiʼnimo aulagaleʼmo uno haino metaleʼnigeʼna ageʼnove.

³ Haino metaleʼniyaʼmofeʼmo afitetapa aliʼnaya geeʼmo lapake okanitapa kanale huta akame hutetapa lapaipamo alita afe leyo. Lapaupatiʼmo he otiʼnisageʼnaeʼmo kumayaʼmo neʼaliya vekamo neʼeya kava huʼna fiku kesi katetiʼmo esugetapaeʼmo hainu afinaʼmo esufigetapa oʼnagegae.

⁴ Mago Satisi taonifiʼmo maiʼnaya siosi vayaʼamogitapamo kukenatapileʼmo oʼaniʼyamo ofaiʼniye. Lapakaemo yaveyave kukenamo vaitetapa nagaeʼeʼmo umenitata hisaya vayaʼmo maiʼnae.

⁵ Kamemo huʼa aeʼa neʼapakasaya vayaʼmogi yaveyave kukenamo vaisageʼna afaʼa maisaya yaʼmo aliʼnisaya vayaʼai apakiʼapimo Goti mukufiʼmo avoʼmo kae maleʼniyanageʼna aeʼna kalo paeʼna oʼatalegauve. Nagaemo afoʼnimo aulagaleʼe enisole vayaʼai apaulagaleʼeʼmo apakiʼapimo aegauve.

⁶ Agesamo haneʼnisiya vekamoʼmo Goti Aunemeʼamoʼmo siosiʼafi siosiʼafiʼmo maiʼnaya vayaʼaifeʼmo hapa nepaiya gemo afino.

Filatefiya taonifiʼmo maiʼnaya siosi vayaʼaifeʼmo hapa paiʼniya gemae

⁷ Kagaemo Filatefiya taonifiʼmo maiʼnaya siosi vayaʼaiteʼmo yagaino neʼapateya apa vekalegamo mani kaha nepauva gemo avoʼmo kaeka atalegeno vino. Nagaemo naote vekamo lama geʼageʼmo nehuva vekamoʼnamo Neviniʼa yagaino neʼapateya kava huʼna yagaiʼna apatesuva kiʼmo aliʼnova vekamoʼnamo mani gemo lapa nepauve. Kitamo yakiʼna apateʼnisugeʼapaeʼmo mago vayaʼmogi eʼa kitamo kiʼa oʼapategae. Kitamo ki maleʼnisugeʼapaeʼmo mago vayaʼmogi eʼa kitamo yakiʼa oʼapategae.

⁸ Nehaya kavatapimo ago lapakeʼnove. Ageyo, huʼna, Lapaulagaleʼmo ago kitamo yakiʼna lapateʼnovanageʼa mago vayaʼmogi eʼa kitamo kiʼa olapategae. Lapakeʼnovana lokiyatapimo aiseʼamo haneʼniyaʼmonanafa geʼnimo akame hutetapaeʼmo nagiʼnilefeʼmo oʼaliʼnone, hutapa hega oʼaeʼnageʼna lapakeʼnove.

⁹ Mago vayaʼmogimo Sataniʼeʼmo aliʼa anupa huʼa maiʼneʼapaeʼmo, Yu vayaʼmo maiʼnone, huʼa nehayaʼmonanafa aigofeʼmo nehae. Lama gemo lapa nepauve, huno, nagaemo apavaleliʼneʼna lapaiyafiʼmo apatesugeʼapaeʼmo Kalaisiʼa lapakaefeʼmo hau ayamopafiʼmo hauʼniya vayaʼmo maiʼnae, huʼa hugae.

¹⁰ Nagaemo huʼnaeʼmo, oʼataletapa atafauta alagi hutapa maime maime viyo, huʼna lapa paiʼnova geleʼmo yagaitapa ateʼnayaʼmofeʼmo yagaiʼna lapatesugeʼa muki ma mopafi vayaʼmogimo lapamalageka hisaya afinaʼmo faita kasalo paetapa afaʼa maigae.

¹¹ Aise afinaʼmo utesigeʼna emiʼnegauve. Aeʼa neʼapakasaya vayaʼmogi neʼaliya agufa kakolitatapimo aligae. Fiku yanageʼa mago alu vayaʼmogimo lapakaemo alisaya kakolitatapimo aligayanagi aliʼnaya yateʼmo atafauta alagi hutapa maiyo.

¹² Nagaemo kamemo huʼa aeʼa neʼapakasaya vayaʼmo apavaleʼna Gotiʼnimo aote mono noʼafiʼmo posi yosagana huʼna apategauve. Nopiʼmo maiʼneʼapaeʼmo halate kumatagamo uʼa olamigae. Nagaemo apakaeteʼmo Gotiʼnimo agiʼamo avoʼmo kaege Gotiʼnimo saufa Yulusalemu taonimo agiʼamo avoʼmo kaege saufa nagiʼnimo avoʼmo kaege huguve.

¹³ Agesamo haneʼnisiya vekamoʼmo Goti Aunemeʼamoʼmo siosiʼafi siosiʼafiʼmo maiʼnaya vayaʼaifeʼmo hapa nepaiya gemo afino.

Leyotisiya taonifiʼmo maiʼnaya siosi vayaʼaifeʼmo hapa paiʼniya gemae

¹⁴ Kagaemo Leyotisiya taonifiʼmo maiʼnaya siosi vayaʼaiteʼmo yagaino neʼapateya apa vekalegamo mani kaha nepauva gemo avoʼmo kaeka atalegeno vino. Gotiʼa geʼamo naha paiʼnigeʼna he lama gemo nehuva vekamo maiʼnove. Gotifeʼmo fatago gemo alagi lama geʼamo aeʼna hakalo huʼna hapa nepauva vekamo maiʼnove. Muki yaʼamo Gotiʼa alo huʼniya yaʼmo aepa faiʼnova vekamo maiʼneʼnaeʼmo mani gemo lapa nepauve.

¹⁵ Nehaya kavatapimo ago lapakeʼnove. Lapakeʼnovana lanitani anikana hutapa oʼmaige amuko anikana hutapa oʼmaige huʼnageʼna lapakeʼnove. Lanitani anikana hutapa maiʼnafi amuko anikana hutapa maiʼnafi huno afaʼa nahauʼniye.

¹⁶ Nahauʼniyesinaʼmonanafa lanitani anikana hutapa oʼmaige amuko anikana hutapa oʼmaige huʼnetapa aiseʼamo amuko huʼniya anikana hutapa maiʼnayaʼmofeʼmo navayafatiʼmo mu valiʼna lapatalegauve.

¹⁷ Lapakaemo hutapaeʼmo, Kagemi yatimo haneʼniya vayaʼmogeta muki yatimo haneʼniye. Mago yafeʼmo kafu osuʼnona vayaʼmo maiʼnone, hutapa nehayaʼmonanafa lapakaemo hutapaeʼmo, lagaemo hosu kavapiʼmo maige hapau huʼa latesaya kopiʼmo maige kagemi yatimo ohaneʼniya vayaʼmo maige laulagamo ali huʼniya vayaʼmo maige lagufaʼalagaʼageʼmo maige huʼnone, hutapa oʼageʼnae.

¹⁸ Ani kavaʼmo hutapa maiʼnayaʼmofeʼmo kagemi yatapimo hanesiya vayaʼmo maisayafeʼmo goli yafaʼmo atafiʼmo kaeʼna aliʼna alagepa hu maleʼnova goli yafaʼmo nagaetetiʼmo miya faiyo. Lapakufaʼalagaʼageʼmo maiʼnayanageno lapavagage osisiyafeʼmo nagaetetiʼmo yaveyave kukena yaʼmo miya faita vaiyo. Lapaulagaletiʼmo ageta alagepa hutapa agesayafeʼmo lapaulagaleʼmo falesaya malasinimo nagaetetiʼmo miya faiyo.

¹⁹ Muki nahau nayamopafiʼmo nahauʼniya vayaʼaifeʼmo, hosu kavaʼmo nehae, huʼna huteʼna aliʼna api aiʼna neʼapatovaʼmofeʼmo lapayamukiki hutapa lapaipamo alita afe leyo.

²⁰ Nageyo, huʼna, kipateʼmo he tiʼna maiʼneʼna hakalu hakalu huge huge huʼna neʼmauve. Mago vekamoʼmo geʼnimo afiteno kitamo yakino natesigeʼnaeʼmo uʼna haiʼna agaeʼeʼmo neʼyaʼmo nesugeno nagaeʼeʼmo neʼyaʼmo negaiye.

²¹ Nagaemo kamemo huʼa aeʼa neʼapakasaya vayaʼmo apamisugeʼa fai maiʼneʼna yagaiʼna neʼapatova siyateʼmo nagaeʼeʼmo fai maigae. Nagaemo kamemo huʼna aeʼna apakaseʼnogeno afoʼnimoʼmo fai maiʼneno yagaino neʼapateya siyaʼamo namiʼnigeʼna fai maiʼnova kava huʼa nagaeʼeʼmo fai maigae.

²² Agesamo haneʼnisiya vekamoʼmo Goti Aunemeʼamoʼmo siosiʼafi siosiʼafiʼmo maiʼnaya vayaʼaifeʼmo hapa nepaiya gemo afino, huno hapa paiʼniye.