Leveleseni 22 - The Keyagana NT and 25 OT books

Afaʼa neʼmaiya yaʼmo neʼapamiya aniʼe yosaʼefeʼmo huʼniya gemae

^1-2 Inagi enisole vekamoʼmo afaʼa neʼmaiya yaʼmo neʼapamiya aniʼmo alopa aniʼmo uno nelamiya aniʼmoʼa aeno ha neleya aniʼmo nave liʼniye. Ani aniʼmo Gotiʼa yagaino neʼapateya siyaʼafatiʼe aikeli sipisipimoʼa yagaino neʼapateya siyaʼafatiʼeʼmo emineno alopa kaʼmo taoni folagapiʼmo haneʼniya kateʼmo uno lamiʼniye. Nelamiya aniʼmo aluga aluga ani agiʼnaleʼmo afaʼa neʼmaiya yaʼmo neʼapamiya yosamo hanege hanege huno haneʼneno magoke kafugafiʼmo tuolofuʼa afinaʼmo muki kaiʼaʼe kaiʼaʼeʼmo alagamo neʼae. Yosa haitaʼamoʼmo alu kotega alu kotegamo maiʼnaya vayaʼmo alino hapageno apatesi yosa haitamo haneʼniye.

³ Gotiʼa mago hosu yafeʼmo ohauʼniya yaʼmo alagi ohanegaiye. Gotiʼa yagaino neʼapateya siyaʼe aikeli sipisipimoʼa yagaino neʼapateya siyaʼeʼmo taonifiʼmo haneʼnisigeʼapaeʼmo Goti aliʼyaʼamo neʼaliya vayaʼamogimo Gotifeʼmo mono hugae.

⁴ Apakaemo Goti augosafiʼmo agesagenoʼaeʼmo agiʼamo hapanileʼmo avoʼmo kaegaiye.

⁵ Halate magoʼe huno hani osugiye. Ala kava neʼmo Gotiʼa ha le yaʼmo apamigiyaʼmofeʼmo lamumoʼmo aeno ha neleya yaʼmo alagi ohanegaiye. Apakaemo yagaime yagaime uʼa yagaiʼa hano osuʼa maigae.

⁶ Inagi enisole vekamoʼmo hunoʼaeʼmo, Mani geletiʼmo apakesamo afiʼa fatago hisaya gemo lama gemo haneʼniye. Ala kava neʼmo Gotiʼa agaetegati gemo alini eʼa aeʼa hakalo huʼa hapa nepaiya apaote vayaʼmogimo geʼamo hapa paisiyafeʼmo enisole vekaʼamo alino ateʼnigeno emineʼniye. Gotiʼa aliʼyaʼamo neʼaliya vayaʼmogimo malage huno afole aisiya kavaʼmo alino apave lisiyafeʼmo alino ateʼnigeno emineʼniye, huno naha paiʼniye.

⁷ Afiyo, huno, Aise afinaʼmo utesigeʼna emiʼnegauve. Mani mukufiʼmo avoʼmo kae maleʼniya gemo aune gemo akame nehaya vayaʼamo Goti aulena vayaʼamo maiʼnae, huno huʼniye.

⁸ Nagaemo Yoniʼnamo ani gemo afiteʼnaeʼmo ani kavaʼmo ageʼnove. Afige agege huteʼnaeʼmo agaefeʼmo mono hisuvafeʼmo alino nave liʼniya enisole vekamo aiyafiʼmo asagauʼna aiʼnovaʼmonanafa

⁹ agaemo, afaʼa ato. Nagaemo kagaeʼeʼmo aliʼyaʼamo neʼaluʼa vekaʼalaʼmo maiʼnoʼae. Nagaemo konagakamogimo Gotitegati gemo alini eʼa aeʼa hakalo huʼa hapa nepaiya vayanagi muki vayaʼmogimo mani mukufiʼmo haneʼniya gemo afiteʼa akame nehaya vayanagi huʼna apafaluʼapimoʼnamo maiʼnovaʼmofeʼmo aliʼyaʼamo neʼaluna vayaʼmo maiʼnone. Gotifekeʼmo mono huvo.

¹⁰ Alagi afole aisiya afinaʼmo hogo nehiyaʼmofeʼmo mani gemo mukufiʼmo avoʼmo kae maleʼnana gemo aeka ati okaegeʼa agegae.

¹¹ Hosu kavaʼmo nehaya vayaʼmo afaʼa apataleʼnegeʼapao ani hosu kavaʼmo magoʼe huʼa huʼa maiyo. Oʼaniʼya kavaʼmo nehaya vayaʼmo afaʼa apataleʼnegeʼapao ani oʼaniʼya kavaʼmo magoʼe huʼa huʼa maiyo. Alagepa kavaʼmo nehaya vayaʼmo afaʼa apataleʼnegeʼapao ani alagepa kavaʼmo magoʼe huʼa huʼa maiyo. Apaote kavaʼmo nehaya vayaʼmo afaʼa apataleʼnegeʼapao ani apaote kavaʼmo magoʼe huʼa huʼa maiyo, huno naha paiʼniye.

¹² Afiyo, huno, aise afinaʼmo utesigeʼna emiʼnegauve. Nagaemo miyaʼapimo aliniʼna emiʼneʼna muki vayaʼmogimo huʼnaya kavaʼapilefeʼmo apamiguve.

¹³ Nagaemo aepa fai maleʼnovanageʼna aliʼna hano huʼna atesuva vekamo maiʼnove. Hogoteʼna maiʼneʼna hemeniʼeʼmo neʼmauvanageʼna henagaʼaʼeʼmo alagi maisuva vekamo maiʼnove. Aliʼna aepa faiʼna neʼatova vekamo maiʼneʼnaeʼmo aliʼna hano huʼna neʼatova vekamo maiʼnove.

¹⁴ Gotiʼa ani kavaʼmo hiyo, ina kavaʼmo osiyo, huno huʼniya gemo akame nehaya vayaʼmogimo Goti aulena vayaʼamogimo taoni lafi kate kipatetiʼmo uʼa haiʼa afaʼa neʼmaiya yaʼmo neʼapamiya yosa alagamo negae.

¹⁵ Negayaʼmonanafa kalagana vayanagi Satani himamuʼaletiʼmo noʼagaya agufa aune kavaʼmo nehaya vayanagi kumai kavaʼmo nehaya vayanagi vayaʼmo neʼapamagiya vayanagi aigofe gotiʼapimogitefeʼmo mono nehaya vayanagi muki vayaʼmogimo aigofe kavafeʼmo hapauʼnigeʼapaeʼmo aigofe gemo nehaya vayanagi huʼa ani taonimo malagamo maigae.

¹⁶ Nagaemo Yesuʼnamo siosiʼafi siosiʼafiʼmo maiʼnaya vayaʼaifeʼmo mani gemo hapa paisiyafeʼmo enisole vekaʼnimo aliʼna ateʼnogeno emineʼniye. Nagaemo Nevini hafuʼyaʼagana huʼna maige aginagoʼamo maige huʼneʼna netepiʼmo lusi kava huno aeno ha neleya kanefikana huʼna maiʼnove, huʼna ha paiʼnogeno hapa paiʼniye.

¹⁷ Goti Aunemeʼamoʼe sipisipi vekaleʼmo maisiya a kanomoʼeʼmo, Neʼeyo, huʼana huʼnaʼae. Ani gemo afiʼnisaya vayaʼmogimo, neʼeyo, huʼa hiyo. Anifeʼmo lapauʼnisiya vayaʼmogimo neʼeyo, huʼa nehae. Hapauʼnisiya vayaʼmogimo afaʼa neʼmaiya yaʼmo neʼapamiya aniʼmo fikumo negae, huno hapa paiʼniye.

¹⁸ Nagaemo Yesuʼnamo muki vayaʼmogi mani mukufatiʼmo aune gemo neʼafiya vayaʼaifeʼmo, ehetapiye, huʼna lokiya gemo nehuve. Mago vayaʼamogimo mani geʼe mago alu geʼeʼmo aliʼa magokepi lokaeʼa malesagenoʼaeʼmo Gotiʼa mani mukufiʼmo ava gemo huʼniya agufa kayotetiʼmo apamagigiye.

¹⁹ Mago vayaʼamogimo mani mukufatiʼmo mago gemo aliʼa ataleʼnisagenoʼaeʼmo Gotiʼa hetamaʼapimo alino atalesigeʼa aote taonifiʼmo uʼa haiʼa oʼmaige afaʼa neʼmaiya yaʼmo neʼapamiya yosa alagamo oʼnege hugae. Ani taoniʼe yosaʼefeʼmo anava gemo mani mukufiʼmo haneʼniye.

²⁰ Ani kavafeʼmo ava gemo huʼna hapa nepauva vekamoʼnamo, He, huʼna, aise afinaʼmo utesigeʼna emiʼnegauve, huʼna hapa paiʼnove, huno hapa paiʼnigeʼa, He, lama ge. Ala kava neʼmo Yesugamo emikeno, huʼa ha paiʼnae.

²¹ Ala kava netimo Yesuʼa mukiʼamogitapamo fikumo lapa maeno lapamino. He lama ge.