Leveleseni 21 - The Keyagana NT and 25 OT books

Yoniʼa saufa kokuʼnaʼe mopaʼeʼmo ageʼniya gemae

¹ Agovana saufa kokuʼnaʼe mopaʼeʼmo haneʼnigeʼna ageʼnove. Hogote kokuʼnaʼe mopaʼeʼmo alagi uʼana lageso hisaʼategamo haneʼnaʼagenoʼaeʼmo solovala aniʼmo hano huʼniye.

² Ageʼnovana aote taonimo saufa Yulusalemu taonimo Gotitegatiʼmo kokuʼnapatiʼmo emineʼnigeʼna ageʼnove. Ani taonimoʼmo mago saufa aʼmafaʼnemo veleʼmo maisiyafeʼmo hauʼnigeno alagepa kukena yaʼe alagepa konali yaʼaʼeʼmo vaino aliteno maiʼniya aʼmafaʼnegana huno haneʼniye.

³ Yagaino neʼapateya vekamo siyaʼaletiʼmo alopa gefatiʼmo ge hunoʼaeʼmo, Ageyo, huno, Gotiʼa hemenimo ma mopafi vayaʼeʼmo magokepi lokaeno maigiye. Agaemo apakaeʼeʼmo magokepi lokaeno maisigeʼapaeʼmo vayaʼamo maigae. Gotiʼa agaiʼamo apakaeʼeʼmo magokepi lokaeno maiʼneno Gotiʼapimoʼmo maigiye.

⁴ Agaemo apaulagafatiʼmo apaunumo alagi alino laneno atalegaiye. Muki vayaʼamo halate magoʼe huʼa ofalige magoʼe huʼa yulagefa oʼaige magoʼe huʼa aviʼyaʼmo osuge magoʼe huno apakafu okige hugiye. Muki kavaʼamo atafa kavaʼmogeno alagi hano huʼniye, huno huʼnigeʼna afiʼnove.

⁵ Inagi yagaino neʼapateya siyateʼmo fai maiʼniya vekamoʼmo hunoʼaeʼmo, Hemenimo muki yaʼamo saufa yaʼageʼmo alo nehuve. Ani gemo lama gemo apakesamo afiʼa fatago hisaya agufa gemo haneʼniyaʼmofeʼmo avoʼmo kao, huno naha paiʼniye.

⁶ Naha paiteno magoʼe gemo hunoʼaeʼmo, Aliʼyaʼnimo aliʼna hano huʼnove. Nagaemo aepa fai maleʼnovanageʼna aliʼna hano huʼna atalesuva vekamo maiʼnove. Hogoteʼna maiʼnovanageʼna hemeniʼeʼmo neʼmauvanageʼna henagaʼaʼeʼmo alagi maiguve. Anifeʼmo hapauʼnisiya vayaʼmogimo miya ofaigayanageʼa meti aniʼmoʼa afaʼa maisaya yaʼmo neʼapamiya aniʼmo afaʼa fikumo hefiʼna apamiguve.

⁷ Aeʼa neʼapakasaya vayaʼmogimo muki yaʼmo alisageʼna Gotiʼapimoʼnamo maisugeʼapaeʼmo mafaʼneʼnimo maigae.

⁸ Maigayaʼmonanafa vayaʼaifeʼmo koli huteʼa Goti geʼamo neʼatalaya vayanagi apakesamo afiʼa fatago nosaya vayanagi alagi faipa vayanagi vayaʼmo neʼapamagiya vayanagi kumai kavaʼmo nehaya vayanagi Satani himamuʼaletiʼmo noʼagaya agufa apaune kavaʼmo nehaya vayanagi aigofe gotiʼapimogitefeʼmo mono nehaya vayanagi muki agufa aigofe gemo nehaya vayanagi huʼa ata kotuʼmo sofa yafapiʼmo neleya ata kotupiʼmo maigae. Ata kotupiʼmo maisaya kavaʼmo agiʼamo napa tu afinaʼmo falisaya kavaʼmae.

Saufa Yulusalemu taonimo ageʼniya gemae

⁹ Mago enisole vekamoʼmo seveniʼa yuvapafatiʼmo henagaʼamo apamagisiya kayoʼmo havai teʼniya yuvapamo aliʼnaya enisole vayapatiʼmo mago enisole vekamoʼmo enoʼaeʼmo, Sipisipi vekaleʼmo maisiya a kanomo aliʼna kave liguvanagi eno, huno naha paiʼniye.

¹⁰ Goti Aunemeʼafiʼmo naune kavaʼmo huʼna maiʼnogeno navalelino yatala avefiʼmo uno haino nateʼnigeʼna maiʼnogeno aote Yulusalemu taonimo Gotitegatiʼmo kokuʼnapatiʼmo emiʼneʼnigeno alino nave liʼniye.

¹¹ Ani taonifatiʼmo Goti ha le konali yaʼamo aeno ha leʼniya yaʼmo mago alopa moniletiʼmo miya nefaiya yafaʼmo agiʼamo yasipamoʼa aeno ha neleya yafakana huno alino alave alave huʼniye.

¹² Lusi yatala yafa lafi kegiʼyamo haneʼnigeno tuolofuʼa lafi kate kitamo haneʼnigeno tuolofuʼa enisole vayaʼmogimo lafi kate kitaleʼmo yagaiʼnae. Lafi kegiʼya kate kitaleʼmo tuolofuʼa Isaleli nofi vayaʼai apakiʼapimo avoʼmo kae maleʼnigeno haneʼniye.

¹³ Loleʼe magoʼe lafi kegiʼya kate kitamo yegemo haine neʼeya kotegamo hanege loleʼe magoʼe lafi kegiʼya kate kitamo yegemo uno lamino nefaleya kotegamo hanege loleʼe magoʼe lafi kegiʼya kate kitamo magayaga hanege loleʼe magoʼe lafi kitamo mugagayaga hanege huʼniye.

¹⁴ Yafa kegiʼyamo faino ateʼniya yafaʼmo tuolofuʼa yafaʼmo haneʼnigeno ani yafateʼmo sipisipi vekamo tuolofuʼa apa vayaʼamogi apakiʼapimo avoʼmo kae maleʼniye.

¹⁵ Ani naha paiʼniya enisole vekamoʼmo goli yafa kanipa kayotetiʼmo taonifinagi lafi kegiʼya kate kitalenagi kegiʼyalenagi huno maleno agege agege hisiya kayoʼmo aliʼniye.

¹⁶ Ani taonimo kesigana huno haneʼnigeno aluga aluga atupaʼamoʼmo hailami salami osuno magoke aiyaya huʼniye. Agaemo kanipa kayotetiʼmo maleno agege agege huʼnigeno yatalaʼamo tu tauseni fo hataletiʼa kilomita haneʼnigeno ani kava huno aluga aluga atupaʼamo haneʼnigeno ani kava huno anagaʼaʼeʼmo haneʼniye.

¹⁷ Agaemo kanipa kayotetiʼmo maleno agege agege huʼnigeno yafa kegiʼyamo tu hataletiʼa agufa yaʼmo vayaʼmogi apaiyamo yatalaʼagana huno haneʼniye.

¹⁸ Kegiʼya yafaʼmo agiʼamo yasipae huno haneʼnigeno taoniʼamo goli yafaʼmo aeno ha neleya goli yafatetiʼmo alo huʼniye.

¹⁹ Yafa kegiʼyamo faino ateʼniya yafateʼmo lusi miyatetiʼmo miya nefaiya konali yafaʼmo malete malete huʼniye. Hogoteno faino ateʼniya yafaʼmo agiʼamo yasipaletiʼmo faino atege napa tumo faino ateʼniya yafaʼmo agiʼamo sapaiyaletiʼmo faino atege napa talimo faino ateʼniya yafaʼmo agiʼamo agetiletiʼmo faino atege napa fomo faino ateʼniya yafaʼmo agiʼamo emaloliletiʼmo faino atege huʼniye.

²⁰ Napa faefumo faino ateʼniya yafaʼmo agiʼamo satonikisiletiʼmo faino atege napa sigisimo faino ateʼniya yafaʼmo agiʼamo koniliyaniletiʼmo faino atege napa sevenimo faino ateʼniya yafaʼmo agiʼamo kalisolaitiletiʼmo faino atege napa eitimo faino ateʼniya yafaʼmo agiʼamo peliletiʼmo faino atege napa naenimo faino ateʼniya yafaʼmo agiʼamo topasiletiʼmo faino atege napa tenimo faino ateʼniya yafaʼmo agiʼamo kalisopesiletiʼmo faino atege napa levenimo faino ateʼniya yafaʼmo agiʼamo haiyasiniletiʼmo faino atege napa tuolofumo faino ateʼniya yafaʼmo agiʼamo ametisiletiʼmo faino atege huʼniye.

²¹ Tuolofuʼa lafi kegiʼya kate kitaleʼmo tuolofuʼa sesumo lusi miyatetiʼmo miya nefaiya agufa sesumo haneʼniye. Magoke sesuletiʼmo vaino vego hu malefa sesu yafatetiʼmo magoke lafi kegiʼya kate kitamo alo huʼniye. Taonifi kateʼmo goli yafatetikeʼmo alo hu maleʼnigeno aeno ha neleya yafakana huno haneʼniye.

²² Ala kava neʼmo Gotiʼa muki lokiyaʼaʼe vekaʼe aikeli sipisipi vekaʼeʼmo aote taonifi mono nokana huʼana maiʼnaʼaʼmofeʼmo mono noʼmo oʼageʼnove.

²³ Gotiʼa ha le konali yaʼamoʼmo aeno ha leʼnigeno aikeli sipisipimoʼa lamugana huno aeno ha neleyaʼmofeʼmo yegemoʼe kaimoʼeʼmo aeʼana ha lesaʼa aliʼyaʼanimo alagi ohaneʼniye.

²⁴ Taonimoʼa aeno ha nelegeʼapaeʼmo alu kotega alu kotegamo maiʼnaya vayaʼmogimo aeno ha neleya yateʼmo umenitata hugae. Ma mopafi vayaʼaiteʼmo yagaiʼa neʼapataya kini vayaʼmogimo taonifiʼmo konali yaʼapimo aliniʼa egae.

²⁵ Muki afinaʼmo alagi hani osugiyaʼmofeʼmo lafi kegiʼya kate kitamo alagi yaki maleteno mago afinaʼmo kitamo alagi okigiye.

²⁶ Alu kotega alu kotegamo maiʼnaya vayaʼai konali yaʼapiʼe kagemi yaʼapiʼeʼmo alini uʼa haiʼa taonifiʼmo malegae.

²⁷ Oʼaniʼya faiʼnisiya yaʼmo ani taonifiʼmo ohanegaiye. Apavagage hisiya kavaʼmo nehaya vayaʼmofi aigofe gemo nehaya vayaʼmofi huʼa uʼa ohaigayaʼmonanafa afaʼa maisaya yaʼmo aliʼnisaya vayaʼai apakiʼapimo mukufiʼmo avoʼmo kae maleʼniya vayaʼageʼmo uʼa haigae.