Leveleseni 20 - The Keyagana NT and 25 OT books

Vani tauseniʼa kafugamo yagaino apatesiya kavaʼmo ageʼniya gemae

¹ Ageʼnovana mago enisole vekamo kokuʼnapatiʼmo emineʼniya vekamo ayapiʼmo kiʼmo ive keli avayale kitale kiʼe alopa seli nofiʼeʼmo aliteno emineʼnigeʼna ageʼnove.

² Agaemo alopa nagaloʼyavemo akeyaʼvilaga maiʼniya nagaloʼyavemo agiʼamo Nevoʼae huno hanege mago alu agiʼamo Sataniʼae huno hanege huʼniya vekamo atafauno seli nofitetiʼmo kino ateʼnigeno vani tauseniʼa kafugamo maiʼniye.

³ Atafauno ive kelifiʼmo yaga auno ateʼneno alagi yakino oʼatesiyafeʼmo loki ae maleteno kameletiʼmo faleno akani maleʼniye. Enisole vekamoʼmo nagaloʼyavemoʼmo alu kotega alu kotegamo maiʼnaya vayaʼmo apayateʼmo oʼalisiyafeʼmo ive kelifiʼmo yaga auno ateʼnigeno maime maime neʼviyanageno vani tauseniʼa kafugamo hano hutesigenoʼaeʼmo aise afinaʼmo afaʼa maisiyafeʼmo hatu maeno ategaiye.

⁴ Ani kavaʼmo ageteʼnaeʼmo magoʼe kavaʼmo ageʼnovana agoti huʼa apatesaya himamuʼapimo aliʼnaya vayaʼmo siyateʼmo maiʼnageʼna apakeʼnove. Ageʼnovana naipeletiʼmo lugoʼapimo heʼa hatagauʼnageʼa faliʼnaya vayaʼai apauneʼapameʼamo apakeʼnove. Ani vayaʼmogimo Goti geʼamo Yesufeʼmo ava gemo hapa paiʼnayaʼmofeʼmo lugoʼapimo heʼa hatagauʼnae. Apakaemo afela afulefeʼmo mono osuge auneʼaeʼmo mono osuge huteʼa hapanileʼe apayateʼeʼmo afela afumo alagena yaʼamo oʼaliʼnae. Apakaemo afaʼa maisaya yaʼmo aliteʼa Kalaisiʼeʼmo vani tauseniʼa kafugamo magokepi maiʼneʼa yagaiʼa apateʼnayaʼmonanafa

⁵ mago alu vayaʼmo faliʼnaya vayaʼmo ani afinaʼmo he otiʼnayanageʼa vani tauseniʼa kafugamo hano hutesigeʼapaeʼmo he tigae.

⁶ Hogoteno alino he tino apateʼniya vayaʼmo apaote vayaʼamo maiʼneʼa Goti aulena vayaʼamo maiʼnae. Napa tu falisaya kavaʼmoʼa afaʼa aeno oʼapakasesigeʼa Gotiʼe Kalaisiʼefeʼmo mono huʼa neʼapataya vayaʼmo maiʼneʼapaeʼmo Kalaisiʼeʼmo vani tauseniʼa kafugamo magokepi lokaeʼa yagaiʼa apategae.

Sataniʼmo alino agoʼya faino ataleʼniya gemae

⁷ Vani tauseniʼa kafugamo ago utesigenoʼaeʼmo enisole vekamoʼmo Sataniʼmo kalavusifatiʼmo hatu maeno ategaiye.

⁸ Uno muki alu kotega alu kotegamo maiʼnaya vayaʼmo Gogi nofi vayaʼe Megogi nofi vayaʼeʼmo humi apateteno kamemo hisayafeʼmo asole vayaʼmo ani kahaepamo lekana opaisuna agufa vayaʼmo alino anupa huno apategaiye.

⁹ Atagu faeʼa uʼa haiʼa Gotiʼa hauʼniya taonifiʼmo maiʼnaya vayaʼmo faiʼa ku aiʼa apateʼnayaʼmonanafa kokuʼnapatiʼmo atamo emineno leno pasaga litegeno

¹⁰ Nevoʼmo apayate aliʼniya vekamo yafapiʼmo neleya sofa ata kotupiʼmo alino yaga auno ataleʼniye. Afela afuʼe aigofe aune vekaʼeʼmo maiʼnaʼa kopiʼmo alino yaga auno ataleʼniye. Apakaemo felugaʼe haniʼilagaʼeʼmo alagi apakafu kino hano osuno apakafu kige kige huno maigiye.

Agoti huno apatesiya kavaʼmo ageʼniya gemae

¹¹ Hutegeʼnaeʼmo ageʼnovana alopa yaveyave siyamo yagaino neʼapateya vekamo siyaʼamo haneʼnigeno mago vekamo ani siyateʼmo fai maiʼnigeʼna ageʼnove. Ma mopaʼe kokuʼnaʼeʼmo ani vekamo augosamo neʼageʼanaeʼmo anaune heʼana uʼana alagi lageso huʼnaʼae.

¹² Uʼna ageʼna apakeʼnovana faliʼnaya vayaʼmo apaki haneʼniya vayanagi apaki ohaneʼniya vayanagi huʼa yagaino neʼapateya vekamo siya aulagamo he tiʼa maiʼnageno muki mukuʼamo alino vaka leteno mago alu mukumo afaʼa maisaya yaʼmo aliʼnaya vayaʼai apakiʼapimo haneʼniya mukumo alino vaka leʼniye. Agaemo faliʼnaya vayaʼmogi huʼnaya kavaʼapimo muki asole mukufiʼmo avoʼmo kae maleʼniya kavaʼapilefeʼmo agoti huno apateʼniye.

¹³ Solovala anipiʼmo faliʼnaya vayaʼmo solovala anipatiʼmo he tige kiʼa apateʼnaya vayaʼmo kanolufatiʼmo he tige faliʼnageno apakupi mafaʼnemo uno maiʼniyatetiʼmo he tige huʼa maiʼnageno agoti huno apateʼniye.

¹⁴ Gotiʼa nefaliya kavaʼe vayaʼmo faliʼnageno apakupi mafaʼneʼamo uno neʼmaiya kotegaʼeʼmo alino hano huno ataleʼniye. Ata kotupiʼmo maiʼnaya kavaʼmo agiʼamo napa tu afinaʼmo nefaliya kavaʼmae.

¹⁵ Mukufiʼmo afaʼa maisaya yaʼmo aliʼnaya vayaʼai apakiʼapimo haneʼniya mukufiʼmo agetenoʼaeʼmo apakiʼapimo avoʼmo okaeʼniya vayaʼmo ata kotupiʼmo alino yaga auno apataleʼniye.