Leveleseni 2 - The Keyagana NT and 25 OT books

Efasasi taonifiʼmo maiʼnaya siosi vayaʼaifeʼmo hapa paiʼniya gemae

¹ Kagaemo Efasasi taonifiʼmo maiʼnaya siosi vayaʼaiteʼmo yagaino neʼapateya apa vekalegamo mani kaha nepauva gemo avoʼmo kaeka atalegeno vino. Nagaemo seveniʼa kanefiʼmo lamaga nayapiʼmo aliʼneʼna seveniʼa goli yafatetiʼmo alo huʼnaya hiʼyalamuteʼmo lamumo maleʼnaya hiʼyalamuʼmo folagapiʼmo umenitata nehuva vekamoʼnamo lapa nepauve.

² Nehaya kavatapimo ago lapakeʼnove. Lapakaemo lokiya aliʼyaʼmo alitetapa oʼataletapa atafauta alagi huta maiʼnageʼna lapakeʼnove. Lapakeʼnovana hosu vayaʼaifeʼmo olapauʼnigetapaeʼmo apa vayaʼmo maiʼnone, huʼa huʼnaya vayaʼmo alita fako hutapa apatetetapaeʼmo aigofe gemo nehae, hutapa huʼnae.

³ Nagiʼnilefeʼmo hanageke yaʼmo aliʼnetapaeʼmo alagaʼmo olapaeʼnigetapa oʼataleta atafautapa alagi hutapa maiʼnayaʼmonanafa

⁴ mago geletiʼmo aliʼna api aiʼna lapatesuva gemo haneʼniye. Hogotetapa nagaefeʼmo lapau lapayamopafiʼmo lapauʼniya kavaʼmo ago ataletetapa olapauʼnigetapa lapayalo falo huʼnae.

⁵ Lapakaemo muga anaga alagepa kavategatiʼmo ataleta asagautapa aiʼnayanagi hogoteta huʼnaya kavafeʼmo halate lapakesamo afita ho hiyo. Lapaipamo alita afe letetapaeʼmo hogoteta huʼnaya agufa kavaʼmo hiyo. Lapaipamo alita afe olesayana emineʼnaeʼmo aise hiʼyalamutapileʼmo lamumo neʼmalaya hiʼyalamuʼmo aliniʼna uguve.

⁶ Ani hosu kavaʼmo nehayaʼmonanafa mago alagepa kavaʼmo nehae. Nikolasi mono vayaʼmogi nehaya kavafeʼmo oʼnahauʼniya kava huno olapauʼniye.

⁷ Apakesamo haneʼnisiya vayaʼmogi Goti Aunemeʼamoʼmo siosiʼafi siosiʼafiʼmo maiʼnaya vayaʼaifeʼmo hapa nepaiya gemo afiyo. Nagaemo kamemo huʼa aeʼa neʼapakasaya vayaʼaifeʼmo, Afaʼa maisaya yaʼmo neʼapamiya yosa alagamo Goti hoyamo agiʼamo Palanaisi hoya folagapiʼmo haneʼniya yosa alagamo etapa afaʼa lagita neyo, huʼna hapa paiguve, huno naha paiʼniye.

Simena taonifiʼmo maiʼnaya siosi vayaʼaifeʼmo hapa paiʼniya gemae

⁸ Kagaemo Simena taonifiʼmo maiʼnaya siosi vayaʼaiteʼmo yagaino neʼapateya apa vekalegamo mani kaha nepauva gemo avoʼmo kaeka atalegeno vino. Nagaemo hogote vekamo maiʼneʼna henaga vekamo maiʼnove. Faliteʼna halate he tiʼnova vekamoʼnamo mani gemo lapa nepauve.

⁹ Lapakeʼnovana aliʼyatapimogi kana yaʼmo neʼaliya kavatapigi kafu nehaya kavatapimogi huʼna ago lapakeʼnove. Kafu huʼnayaʼmonanafa kagemi yatapimo haneʼniya vayaʼmo maiʼnae. Huʼa faipa huʼa nelapataya vayaʼmogimo, Yu vayaʼmo maiʼnone, huʼa nehayaʼmonanafa Yu vayaʼmo oʼmaiʼnae. Yu mono kavaʼmo osuʼa Satani mono kavakeʼmo nehageʼna apakeʼnove.

¹⁰ Aise afinaʼmo utesigeta kana yaʼmo aligayaʼmofeʼmo koli osiyo. Afiyo, huʼna, Sataniʼa lapamalageka huteno kalavusi huno lapatesigetapa naya loleʼa afinaʼmo hanageke yaʼmo aligae. Lapakesamo afita fatago huʼnaya kavatapileʼmo atafauta alagi huta maime maime utapa faliyo. Nehisageʼnaeʼmo aeʼa neʼapakasaya vayaʼmogi neʼaliya agufa kakolitagana yaʼmo maige maige hutapa maisaya yaʼmo lapamiguve.

¹¹ Agesamo haneʼnisiya vekamoʼmo Goti Aunemeʼamoʼmo siosiʼafi siosiʼafiʼmo maiʼnaya vayaʼaifeʼmo hapa nepaiya gemo afino. Napa tu afinaʼmo nefaliya kavaʼmoʼa kamemo huʼa aeʼa neʼapakasaya vayaʼmo afaʼa ohapaegaiye.

Pegamamu taonifiʼmo maiʼnaya siosi vayaʼaifeʼmo hapa paiʼniya gemae

¹² Kagaemo Pegamamu taonifiʼmo maiʼnaya siosi vayaʼaiteʼmo yagaino neʼapateya apa vekalegamo mani kaha nepauva gemo avoʼmo kaeka atalegeno vino. Nagaemo aluga alugaʼalegatiʼmo ave neʼneya naipemo aliʼnova vekamoʼnamo mani gemo lapa nepauve.

¹³ Lapakeʼnovana Sataniʼa yagaino neʼapateya koteʼmo maiʼnageʼna lapakeʼnove. Nagiʼnimo oʼataletapa atafauta alagi hutapa maiʼnae. Mago vayaʼmogimo lama ge nava gemo huʼniya vekamo agiʼamo Anitipasiʼa Sataniʼmo neʼmaiya kotegamo lapakae folagapiʼmo kamitimo amagiʼnayaʼmonanafa lapakaemo oʼnataletapa nagaefeʼmo magoʼe hutapa lapakesamo afita fatago nehae.

¹⁴ Nehayaʼmonanafa mago gemo aliʼna api aiʼna lapatesuva gemo haneʼniye. Akeyaʼvilaga Melamiʼa Melekiʼmo alino aya maleʼnigeno Isaleli vayaʼmogi hosu kavaʼmo hisayafeʼmo Melekiʼa apayateʼmo aliʼnigeʼapaeʼmo aigofe gotiʼapimogimo apamiʼnaya ofalini afumo ameʼamo neteʼa kumai kavaʼmo huʼnae. Mago lapakaepati vayaʼmogimo Melamiʼa alino aya maleʼniya agufa gemo akame nehae.

¹⁵ Lapakaepatiʼmo mago vayaʼmogimo Nikolasi mono vayaʼmogi aliʼa apaya neʼmalaya agufa gemo akame nehayaʼmofeʼmo

¹⁶ lapaipamo alita afe leyo. Lapaipamo alita afe olesayaʼmoʼmo malage huʼna lapakaetegamo emineʼna navayafiʼmo haneʼniya naipeʼniletiʼmo lapakaemo kamemo lahapaegauve.

¹⁷ Agesamo haneʼnisiya vekamoʼmo Aunemeʼamoʼmo siosiʼafi siosiʼafiʼmo maiʼnaya vayaʼaifeʼmo hapa nepaiya gemo afino. Nagaemo kamemo huʼa aeʼa apakasaya vayaʼmo kokuʼnapi fala kino haneʼniya neʼyaʼmo agiʼamo mana neʼyaʼmo apamiguve. Apamiteʼna yaveyave yafateʼmo saufa agiʼamo avoʼmo kaeʼna apamiguve. Ani saufa agiʼamo muki vayaʼmogimo oʼafisageʼa ani yafaʼmo aliʼnisaya vayaʼamogigeʼmo afigae.

Taiyataila taonifiʼmo maiʼnaya siosi vayaʼaifeʼmo hapa paiʼniya gemae

¹⁸ Kagaemo Taiyataila taonifiʼmo maiʼnaya siosi vayaʼaiteʼmo yagaino neʼapateya apa vekalegamo mani kaha nepauva gemo avoʼmo kaeka atalegeno vino. Nagaemo Goti mafaʼneʼamoʼna naulagalaʼmo ata vaikana huno nelegeno naiyalaʼmo haesa yafaʼmo oʼaniʼyaʼmo aeʼa kalo paeʼnaya yafakana huno haneʼniya vekamoʼnamo mani gemo lapa nepauve.

¹⁹ Lapakeʼnovana nehaya kavatapimogi lapau lapayamopafiʼmo nelapaiya kavatapimogi lapakesamo afita fatago nehaya kavatapigi aliʼyaʼmo neʼaliya kavatapigi oʼataletapa atafauta alagi hutapa maiʼnaya kavatapigi huʼna ago lapakeʼnove. Hogoteta huʼnaya kavaʼmo aeta agasetapa magoʼe alagepa kavaʼmo hutapa maiʼnae.

²⁰ Maiʼnayaʼmonanafa mago gemo aliʼna api aiʼna lapatesuva gemo haneʼniye. Lapakaefeʼmo mago a kanomo Yesemeliʼa, Gotitegati gemo aliniʼneʼna aeʼna hakalo huʼna hapa nepauva a kanomo maiʼnove, huno nehiya a kanomo alitapa ha faita oʼataletapa afaʼa ateʼnae. Agaemo alino apaya maleteno apayate aliʼnigeʼapaeʼmo aliʼyaʼnimo neʼaliya vayaʼmogimo kumai kavaʼmo huteʼapaeʼmo aigofe gotiʼapimogi neʼapamiya ofalini neʼyaʼmo neʼnae.

²¹ Hosu kavaʼmo nehana kavakamo atalo, huʼna huteʼna aipamo alino afe lesiya afinaʼmo amiʼnovaʼmonanafa aipamo alino afe lesiyafeʼmo ohauʼnigeno kumai kavakeʼmo nehiye.

²² Nehiyaʼmofeʼmo ageyo, huʼna, hipaʼaleʼmo aliʼna yaga auʼna atesugeno lusi kana yaʼmo aligiye. Agaeʼeʼmo kumai kavaʼmo huʼnaya vayaʼmogimo agaeʼeʼmo hosu kavaʼmo huʼnaya kavaʼapieʼmo apaipamo aliʼa afe olesageʼnaeʼmo hosu yaʼmo apamisugeʼa lusi kava huʼa kana yaʼmo aligae.

²³ Ani kavaʼmo huteʼna mafaʼne anagaʼamo apamagisugeʼa faligae. Inagi siosiʼafi siosiʼafiʼmo maiʼnaya vayaʼmogimo nagaemo hisuva kavaʼmo ageteʼapaeʼmo, agaemo vayaʼai apaipa apakesafiʼmo neʼageya vekamo maiʼniye, huʼa nagegae. Na agufa kavaʼmo huʼnisafigeʼna anonatapilefeʼmo lapamete lapamete huʼna lapamiguve.

²⁴ Lapamiguvaʼmonanafa mago Taiyataila taonifiʼmo maiʼnaya siosi vayaʼmogitapamo ani agufa hosu gemo afitetapa akame nosae. Mago vayaʼmogi mani geeʼmo, Sataniʼa alino fala ki maleʼniya gemo haneʼniye, huʼa huʼnaya gemo lapakaemo oʼafiʼnae. Nagaemo huʼnaeʼmo, magoʼe huʼna kana yaʼmo aliʼna olapamiguvaʼmonanafa

²⁵ afiʼnaya gelekeʼmo atafauta alagi huta maime maime neʼvigeʼna emineno.

²⁶ Nagaemo kamemo huʼa aeʼa apakaseteʼa afiʼnaya geleʼmo oʼataleʼa atafauʼa alagi huʼa maime maime neʼvisageno hano hisiya afinaʼmo afole aisigeʼnaeʼmo muki alu nofi vaya alu nofi vayaʼaiteʼmo yagaiʼa apatesaya himamuʼnimo apamiguve.

²⁷ Afoʼnimoʼmo yagaiʼna apatesuva himamuʼamo namiʼniya kava huʼna himamuʼnimo apamisugeʼa Aeni kayotetiʼmo yagaiʼa apategae. Vayaʼmogimo mopa samoleʼmo kayotetiʼmo amaginageno aino nakupaeno aise aise nehiya kava huʼa yagaiʼa apategae.

²⁸ Himamuʼnimo apamiteʼna netepiʼmo magoke kanefiʼmo haneʼneno aeno ha neleya kanefiʼmo apamiguve.

²⁹ Agesamo haneʼnisiya vekamoʼmo Goti Aunemeʼamoʼmo siosiʼafi siosiʼafiʼmo maiʼnaya vayaʼaifeʼmo hapa nepaiya gemo afino.