Leveleseni 19 - The Keyagana NT and 25 OT books

¹ Hutegeʼna afiʼnovana asole vayaʼmogimo neʼaiya agufa apakemo aiʼnageʼna afiʼnove. Kokuʼnapiʼmo maiʼneʼa Himulu gefatiʼmo huʼapaeʼmo, Haleluya, huʼa huʼnae. Ani gemo aepaʼamo Goti agiʼaleʼmo alitapa asaga hiyo. Gotitimoʼmo apakufamo alino katino neʼapateya vekamae. Agaiʼageʼmo himamuʼaʼe vekamo maiʼniyaʼmofeʼmo agiʼaleʼmo aliʼa asaga huʼa ateyo.

² Alagi lama ge huno fatago kavaʼmo huno alino fako huno neʼapate. Agaemo magoʼe huno kumai kavaʼmo huteno monimo neʼaliya a kanomo agoti huno ateʼniye. Ani a kanomoʼa kumai kavaʼmo hutenoʼaeʼmo muki ma mopafi vayaʼmo alino hosu huno apateteno Goti aliʼyaʼamo neʼaliya vayaʼamo kamitimo apamagiʼnigenoʼaeʼmo anonaʼalefeʼmo kayoʼmo amiʼniye, huʼa huʼnae.

³ Halate alopa gefatiʼmo ge huʼapaeʼmo, Haleluya, Atamoʼmo leno saga liʼnigenoʼaeʼmo halinaʼamoʼmo muki afinaʼmo aino hano osuno ailino eno haine neʼe, huʼa huʼnae.

⁴ Tuveti foʼa vayatama vayaʼe loleʼe loleʼe vayaʼmogiʼeʼmo asagau aiʼa yagaino neʼapateya vekamo siyaʼaleʼmo fai maiʼniya Gotifeʼmo mono huteʼapaeʼmo, Lama ge Haleluya, huʼa huʼnae.

Sipisipi vekamoʼmo aʼmo alisiya afinaʼmo neʼyaʼmo nesaya kavafeʼmo huʼniya gemae

⁵ Hutageno mago vekamoʼmo yagaino neʼapateya vekamo siyaʼaletiʼmo ge hunoʼaeʼmo, Muki vayaʼamogitapamo aliʼyaʼamo neʼaliya vayanagi agaefeʼmo koli nehaya vayanagi apaki ohaneʼnisiya vayanagi apaki haneʼnisiya vayanagi hutapa Goti agiʼaleʼmo alitapa asaga hiyo, huno huʼniye.

⁶ Hutegeʼnaeʼmo afiʼnovana asole vayaʼmogimo apake aiʼnaya apakemoʼmo alopa ani haʼyamoʼmo hakalu hakalu huno age aigekana huʼa apakemo aiʼnageʼna afiʼnove. Apakaemo, Haleluya, huʼa, Ala kava netimo Gotiʼa muki lokiyaʼaʼe vekamoʼmo yagaino neʼapate.

⁷ Amuse huta lamogaga aiteta agiʼaleʼmo alita asaga higetao. Na kava hinagetaene. Sipisipi vekamoʼmo aʼmo alisiya afinaʼmo ago afole aiʼnigeno aʼamo agaiʼamo alo huno ateʼniyaʼmofeʼmae.

⁸ Alagepa huno yaveyave huteno aeno ha leʼniya kukenamo oʼaniʼya ofaiʼniya kukenamo vaisiyafeʼmo amiʼniye, huʼa huʼnae. Ani alagepa kukenamo haneʼniya kava huno Gotiʼa fatago kavaʼamo apaote vayaʼamo apamiʼnigeʼa vaiʼa aliʼnaya kavaʼmo haneʼniye.

⁹ Huʼa hutageno enisole vekamoʼmo hunoʼaeʼmo, Sipisipi vekamoʼmo aʼmo alisiya afinaʼmo neʼyaʼmo nesayafeʼmo eyo, huno ge huʼniya vayaʼmo Goti aulena vayaʼamo maiʼnae, huka avoʼmo kao. Mani gemo Goti lama geʼamo haneʼniye, huno naha paiʼniye.

¹⁰ Naha paiʼnigeʼna agaefeʼmo mono hisuvafeʼmo aiyafiʼmo asagauʼna aiʼnogenoʼaeʼmo, Nagaefeʼmo mono osuvo. Kagaeʼe konagakamogiʼeʼmo Yesufeʼmo ava geleʼmo atafauʼa alagi huʼnaya konagakamogiʼeʼmo magoke agufa aliʼyaʼmo neʼalune. Gotifekeʼmo mono huvo. Goti Aunemeʼamoʼmo Gotitegati gemo alini eʼa aeʼa hakalo huʼa hapa nepaiya vayaʼmo ani gemo apamiʼnigeʼa Yesufeʼmo ava gemo nehae, huno naha paiʼniye.

Yaveyave hosileʼmo fai maiʼniya vekaeʼmo huʼniya gemae

¹¹ Ageʼnovana kokuʼnaʼmo halo aiʼnigeno naulagaleʼmo yaveyave hosimo maiʼnigeno ani hosileʼmo fai maiʼniya vekamo agiʼamo aliʼyaʼmo alagi oʼataleno alige gemo oʼataleno huge nehiya vekamae. Mago alu agiʼamo alagi lama geʼageʼmo nehiya vekamae. Agaemo fatago kavaʼaletiʼmo vayaʼai kavaʼapimo alino fako huno apatege kame huno apatege nehiye.

¹² Aulagalaʼmoʼa ata legekana huno nelegeno agenopaleʼmo asole kakolitamo kini vayaʼmogi maleʼa neʼaliya agufa kakolitamo maleno aliʼniye. Agaiʼa agufaleʼmo agiʼamo avoʼmo kae maleʼniya agimo agaiʼageʼmo afiʼniyana muki vayaʼmogi oʼafiʼnae.

¹³ Yatala kukena yaʼaleʼmo kolaʼmo haneʼniye. Agiʼamo Goti geʼagana huno neʼmaiya vekamae.

¹⁴ Kokuʼnapiʼmo asole ati vayaʼmogimo yaveyave kukenamo vaiʼa aliteʼa yaveyave hosileʼmo fai maiʼneʼa akame huʼa uʼnae.

¹⁵ Avayafatiʼmo emineʼniya naipemo ave nege nege naipeʼaletiʼmo alu kotega alu kotegamo maiʼnaya vayaʼmo kame huno apatesiya naipemo avayafatiʼmo emineʼniye. Agaemo aeni kayotetiʼmo yagaino apategaiye. Gotiʼa muki lokiyaʼaʼe vekamoʼmo lusi kava huno aipamo leno neʼapateyanageno agaemo alopa yuvapafiʼmo aiyalatetiʼmo aeno latapaisigeno kolaʼapimoʼmo anikana huno heno lamigiye.

¹⁶ Kukena yaʼalenagi alutenagi huno agiʼamo avoʼmo kae maleʼniye. Kini vayaʼaiteʼmo yagaino neʼapateya kini vekamo maiʼneno ala kava vayaʼaite ala kava vekaʼapimae.

¹⁷ Ageʼnovana mago enisole vekamo yegemo neleya yaʼaleʼmo he tino maiʼneno muki nama anagaʼmo kokuʼnaʼmo folagateʼmo halelitata nehaya nama anagaʼaifeʼmo, Gotiʼa asole neʼyaʼmo lapamigiyanagi eyo, huno huʼniye.

¹⁸ Lapakaemo kini vayaʼai apakufafatiʼmo apameʼamo nege ati vayaʼaiteʼmo yagaiʼa neʼapataya vayaʼai apakufafatiʼmo apameʼamo nege lokiya vayaʼai apakufafatiʼmo apameʼamo nege hosi anagaʼai apakufafatiʼmo apameʼamo nege hosileʼmo fai maiʼnaya ati vayaʼai apakufafatiʼmo apameʼamo nege muki vayaʼmo afaʼa maiʼnaya vayanagi kalavusi aliʼyaʼmo neʼaliya vayanagi hutapa apakufafatiʼmo apameʼamo nege apaki haneʼniya vayaʼai apakufafatinagi apaki ohaneʼniya vayaʼai apakufafatinagi hutapa eta apameʼamo nege hugae, huno hapa paiʼniye.

¹⁹ Huno hutegeʼnaeʼmo apakeʼnovana afela afugi ma mopafi kini vayanagi ati vayaʼapigi huʼa hosileʼmo fai maiʼniya vekaʼe ati vayaʼapiʼeʼmo kamemo hisyafeʼmo aliʼa anupa huʼa maiʼnageʼna apakeʼnove.

²⁰ Agaemo afela afuʼe aigofe aune vekaʼeʼmo anatafauno kalavusi huno anateʼniye. Aigofe aune vekamoʼmo afela afumo agiʼalefeʼmo aeto agufa noʼagaya aune kavaʼmo huteno afela afumo alagena yaʼamo aliteʼa afela afumo auneʼalefeʼmo mono nehaya vayaʼaifeʼmo hogoteno humi apateʼniye. Lole vekalaʼmo ofaliʼana afaʼa maiʼnaʼagenoʼaeʼmo ata kotuʼmo sofa yafapiʼmo neleya ata kotupiʼmo alino yaga auno anataleʼnigeʼana maiʼnaʼae.

²¹ Hosileʼmo fai maiʼniya vekamoʼmo avayafatiʼmo emineʼniya naipeletiʼmo mago vayaʼmo apaiʼnigeʼa faliʼnageno nama anagaʼmogimo eʼa apakufafatiʼmo apameʼamo neʼa apamu huʼnae.