Leveleseni 18 - The Keyagana NT and 25 OT books

Mamiloni taonimo atamoʼmo leno hano huno ataleʼniya gemae

¹ Hutegeʼnaeʼmo ageʼnovana mago alu enisole vekamo kokuʼnapatiʼmo emineʼnigeʼna ageʼnove. Lusi himamuʼamo aliʼnigeno ha le konali yaʼamoʼmo ma mopafiʼmo aeno ha leʼniye.

² Alopa gefatiʼmo ge hunoʼaeʼmo, Alopa taonimo Mamiloni taonimo atamoʼmo leno hano huʼniye. He, leno hano huʼniye. Hosu enisole vayanagi muki hosu apaune vayanagi muki oʼne namagi alagi hosu faipa namagi huʼa ani taonimo no atufaʼaleʼmo maiʼnae.

³ Ani taonifiʼmo haneʼniya kumai kavaʼmoʼmo nofi alagafati aniʼmo lokiya anikana huno haneʼnigeʼapaeʼmo muki alu kotega alu kotegamo maiʼnaya vayaʼmogimo neʼnae. Ma mopafi kini vayaʼmogimo agaeʼeʼmo kumai kavaʼmo huʼnae. Agaemo lusi kava huno haʼye huʼnigeʼapaeʼmo ma mopafi misinisi vayaʼmogimo aliʼa maketi huteʼa asole kagemi yaʼapimo haneʼniya vayaʼmo hamaleʼnae, huno huʼniye.

⁴ Huno hutegeno mago alu vekamoʼmo kokuʼnapatiʼmo hunoʼaeʼmo, Vayaʼnimogitapae, huno, kumai kavaʼmo nehiya a kanomo ataletapa eyo. Fiku yanagetapa agaeʼeʼmo magokepi lokaeta hosu kavaʼmo vaiʼamo alige amisuva kayoʼmo alige hugae.

⁵ Agaemo hosu kavaʼmo huno maleme maleme uno haiʼnigeno kokuʼnapiʼmo uno haiʼnigeno Gotiʼa hosu kavaʼaeʼmo age okanino agesa afifi nehiye.

⁶ Lapamiʼniya kava hutapa amiyo. Hosu kavaʼamo anonaʼalefeʼmo lole yaʼmo alita maleta lokaetapa amiyo. Agaiʼa kapufiʼmo lapamiʼniya anitefeʼmo loleʼmo maleta lokaetapa amiyo.

⁷ Agaemo konali yafeʼmo haʼye huʼnigeno aliʼniya yatefeʼmo agafu kisigeno kage kage hisiyafeʼmo amiyo. Agaiʼaeʼmo hunoʼaeʼmo, Muki vayaʼaiteʼmo yagaiʼna neʼapatova a kanomo maiʼnove. Kogu aʼmo oʼmaiʼnove. Afaʼa yulagefa oʼaiʼna alagepa huʼna maige maige huʼna maiguve, huno nehiyaʼmofeʼmo

⁸ asole kayoʼmo magoke afinaʼmo aligiye. Kaita haisigeno yulagefa aitenoʼaeʼmo lusi kava huno aga tegaiye. Ala kava neʼmo Gotiʼa agoti huno neʼateya vekamo muki lokiyaʼaʼe vekamo maiʼniyaʼmofeʼmo atamoʼmo leno sagalino hano huno atalegaiye, huno huʼniye.

⁹ Ma mopafi kini vayaʼmogimo agaeʼeʼmo kumai kavaʼmo huge hapaʼye huge agaeʼeʼmo hapaʼye huʼnigeʼapaeʼmo alopa kagemi yaʼmo alige huʼnaya vayaʼmogimo ageʼnayana taonimo ata leʼnigeno halinamo aiʼnigeʼa ageteʼapaeʼmo yulagefa aiʼa aviʼyaʼmo hugae.

¹⁰ Agafu kisigeʼapaeʼmo lusi kava huʼa apamoʼya aiteʼa afagitega maiʼneʼapaeʼmo, kage kage huteʼa, alopa taonimo Mamiloniyo, huʼa, himamu taoniyo. Aise afinaʼmo magoke aovafiʼmo hosu kavakamo anonakalefeʼmo aliʼnane, huʼa hugae.

¹¹ Kagemi yaʼapimo miya faisaya vayaʼmo oʼmaigayaʼmofeʼmo ma mopafi misinisi vayaʼmogimo aviʼyaʼmo huʼa yulagefa aigae.

¹² Mago vayaʼmogi goli yafanagi siluva yafanagi konali yafanagi sesugi alagepa kenagi oko kenagi silika kenagi haesa kenagi muki alu alagepa atu alu alagepa atuʼmo neʼaiya yosagi afela afumo avetetiʼmo alo huʼnaya yanagi alopa miyatetiʼmo miya nefaiya yosagi haesa kapaletiʼmo alo huʼnaya yanagi aeni kapaletiʼmo alo huʼnaya yanagi lapasa lapase yafanagi

¹³ kimamufagi neʼyateʼmo neʼmalaya yanagi atafi kaeʼnageno alagepa atuʼmo neʼaiya yanagi masave malasinigi apakufaleʼmo faleʼnageno alagepa atuʼmo neʼaiya uveligi nofi alagafati aninagi neʼnaya uveligi peleti maya falaovagi laisigana neʼyaʼmo agiʼamo vitigi pulumakagi sipisipigi hosigi hosimo talalagi afa aliʼyaʼmo neʼaliya vayanagi huʼa miya ofaigae.

¹⁴ Misinisi vayaʼmogimo agaefeʼmo huʼapaeʼmo, Muki yafeʼmo kahaʼye huʼnigeka alisanafeʼmo kahauʼniya yaʼmo ago hano huʼniye. Muki kagemi yakaʼe konali yakaʼeʼmo alagi hano huʼniyanageka halate oʼaligane, huʼa hugae.

¹⁵ Misinisi nehaya vayaʼmogimo ani taonifiʼmo maketi huteʼa alopa kagemi yaʼapimo aliʼnaya vayaʼmo afagitega maigae. Agaeʼeʼmo magokepi apakafu kisiyafeʼmo apamoʼya aiteʼa afagitega maiʼneʼa aviʼyaʼmo huʼa yulagefa aiʼa ategae.

¹⁶ Kage kage nehuʼapaeʼmo, Alopa taonimoʼa alagepa kenagi oko kukenagi haesa kukenamogi huno vaino aliʼniye. Goli konali yanagi alagepa yafa konali yanagi sesumogi huno vaino aliʼniyaʼmonanafa

¹⁷ magoke afinaʼmo muki yaʼamo ataleʼnigeno alagi lageso huʼniye, huʼa hugae. Muki vayaʼmo sipileʼmo neʼaliya vayanagi sipifiʼmo uʼnaya vayanagi sipifi aliʼyaʼmo neʼaliya vayanagi huʼa muki vayaʼamogimo solovala aniteʼmo misinisi nehaya vayaʼmogi huʼa afagitega he tiʼa maiʼnae.

¹⁸ He tiʼa maiʼneʼa ageʼnayana ata leʼnigeno halinamo aiʼnigeʼa ageteʼapaeʼmo, haiya taonimoʼa ani taonigana huno haneʼniye, huʼa hugae.

¹⁹ Mumusopamo aliʼa apakenopafiʼmo yaga auʼa faleteʼa aviʼyaʼmo huʼa yulagefa aiʼa ateteʼapaeʼmo kage kage nehuʼa, muki sipimo solovala aniteʼmo neʼvaya sipimo afoʼamogimo taonifiʼmo haneʼniya kagemi yaʼaletiʼmo kagemi yaʼapiʼe vayaʼmo hamaleʼnayana magoke afinaʼmo alopa taonimo hano huʼniye, huʼa hugae.

²⁰ Kokuʼnapi vayanagi lapamogaga aitapa ateyo. Lapaote vayanagi apa vayanagi Gotitegati gemo alinita etapa aeta hakalo hutapa hapa nepaiya vayanagi hutapa lapamogaga aiyo. Lapakaetegamo hosu kavaʼmo huʼnigeno Gotiʼa kavaʼamo alino fako huno ateteno kayoʼmo amiʼniye, huno hapa paiʼniye.

²¹ Hapa paitegeno lokiya enisole vekamoʼmo alopa yafaʼmo monu yafakana agufa yafatetiʼmo vitimo lata nepaiya agufa yafakana huno alino solovala anipiʼmo yaga auno ataletenoʼaeʼmo, ani kava huno ayamukiki huno alopa Mamiloni taonimo alino yaga auno atalesigeʼapaeʼmo halate magoʼe huʼa oʼagegae.

²² Gitamoʼmo age aige alu yoke alu yokemo huge feliyopa huge pikulimo huge nehiya gemo halate kagaetegatiʼmo magoʼe huʼa oʼafigae. Alu aliʼya alu aliʼyateʼmo ageʼnisaya vayaʼmogimo halate kagaetegamo aliʼyaʼmo alisageʼa oʼapakegae. Monu yafaʼmoʼa viti alagamo lata nepaigeno age neʼaiya agemo halate kagaetegatiʼmo age aisigeʼa oʼafigae.

²³ Mago lamumoʼmo halate kagaetegamo aeno ha olegaiye. Aʼmo aliʼnisaya ve anagaʼe veleʼmo maiʼnisaya aʼmafaʼnemogiʼeʼmo veyalavemogimo halate kagaefeʼmo amuse nehaya gemo hisageʼa oʼafigae. Kagae misinisi vayakamogimo ala apakiʼapimo ma mopafi vayaʼai apaulagaleʼmo hogote apakiʼapimo aliʼnae. Kagaemo Satani himamuʼaletiʼmo noʼagaya aune kavaʼmo hutekaeʼmo muki alu kotega alu kotegamo maiʼnaya vayaʼai apakesamo faiʼnane.

²⁴ Agaemo Gotitegati gemo alini eʼa aeʼa hakalo huʼa hapa nepaiya vayaʼe apaote vayaʼeʼmo kamitimo apamagiʼniye. Muki ani apamagiʼniya vayaʼai kolaʼapimo ani taonifiʼmo haneʼnigeno Gotiʼa kahauya huno ageʼniye, huno huʼniye.