Leveleseni 17 - The Keyagana NT and 25 OT books

Kumai kavaʼmo huʼniya a kanoeʼmo ava gemo huʼniya gemae

¹ Mago enisole vekamo seveniʼa yuvapamo aliʼnaya enisole vayapati vekamoʼmo nagaefeʼmo hunoʼaeʼmo, Eno, huno, Gotiʼa kumai a kanomo alopa aniʼmo agotofuleʼmo fai maiʼniya a kanomo kayoʼmo amisiya kavaʼmo aliʼna kave liguve.

² Ma mopafiʼmo ala kini vayaʼmogimo agaeʼeʼmo kumai kavaʼmo huʼnae. Vayaʼmogi aniʼmo neteʼapaeʼmo negi nagi nehaya kava huʼa muki ma mopafi vayaʼmogimo ani a kanoʼeʼmo kumai kavaʼmo huteʼa negi nagi kavaʼmo huʼnae, huno naha paiʼniye.

³ Nagaemo Goti Aunemeʼafiʼmo maiʼneʼna naune kavaʼmo huʼna maiʼnogenoʼaeʼmo ani enisole vekamoʼmo kaʼme kotega navalelino uʼniye. Ageʼnovana mago a kanomoʼa haesa afela afuleʼmo fai maiʼniye. Afela afumo agufaleʼmo asole agimo Goti agiʼagana agufa agimo Goti agiʼaleʼmo huno faipa huno ateʼniya agimo haneʼniye. Afela afumoʼmo seveniʼa agenopamo haneʼnigeno naya loleʼa lokiyaʼamo haneʼniye.

⁴ Ani a kanomoʼmo lusi moniletiʼmo miya nefaiya agufa kukenamo oko kukena yaʼe haesa kukena yaʼeʼmo vaino aliʼnigeno goli konali yanagi lusi moniletiʼmo miya nefaiya konali yafanagi alagepa sesugi huno agufaleʼmo vaino aliʼnigeno agufaletiʼmo alave alaveʼageʼmo huʼniye. Agaemo goli kapumo ayapiʼmo aliʼnigeno ani kapufiʼmo alagi hosu faipa yaʼe kumai kavaʼmo nehaya kavaʼeʼmo havai teʼniye.

⁵ Hanileʼmo haneʼniya agimo aepaʼamo fala ki agiʼamo avoʼmo kae maleʼniya agimo Alopa Mamiloniʼae. Kumai aʼne anagaʼmogi itaʼapimoʼmo maiʼniye. Huʼa faipa huʼa neʼataya vayaʼai itaʼapimoʼmo maiʼniye, huno huʼniye.

⁶ Ani a kanomoʼmo asole apaote vayaʼmo nefaliya kavaʼmo aepa a kanomo maiʼnenoʼaeʼmo Yesu agiʼalefeʼmo faliʼnaya vayaʼai kolaʼapimo neteno negi nagi huʼnigeʼna ageʼnove. Ageteʼnaeʼmo lusi kava huʼna nahau aiʼnove.

⁷ Nahau aiʼnogenoʼaeʼmo enisole vekamoʼmo, na kava higekaeʼmo kahau neʼaine, huno ge huno nafi geʼniye. Nagaemo a kanomoʼmo fala kiʼniya aepaʼaʼe afela afuleʼmo fai maiʼnigeno afela afumoʼmo seveniʼa agenopamo haneʼnigeno naya loleʼa lokiyaʼamo haneʼniya afela afumoʼmo fala kiʼniya aepaʼaʼeʼmo aliʼna kave liguve.

⁸ Ageʼnana afela afumo hogoteno maiʼniyana hemenimo oʼmaiʼniyanageno henagaʼamo ive kelifatiʼmo afole aisigeno alagi alino agoʼya lagauno atalegaiye. Ma mopafi vayaʼmo Gotiʼa ma mopamo alo osuʼniya afinaʼmo afaʼa maisaya yaʼmo aliʼnisaya vayaʼai apakiʼapimo haneʼniya mukufiʼmo avoʼmo okaeʼnisiya vayaʼmogimo afela afumo ageteʼapaeʼmo hapau aigae. Hogoteno maiʼniyana hemenimo oʼmaiʼniyanageno halate henagaʼamo afole aigiyaʼmofeʼmo hapau aigae.

⁹ Alagepa huʼa afisayafeʼmo alagepa huʼa afisaya agufa apakesamo haneno. Seveniʼa agenopamo haneʼniya kava huno a kanomoʼmo seveniʼa avefiʼmo itopaleʼmo maiʼniya avemo haneʼniye. Ani kava huno seveniʼa agenopamo haneʼniya kava huʼa seveniʼa kini vayaʼmo maiʼnae.

¹⁰ Faefuʼa kini vayaʼmo hano hutageno magoke kini vekamo maiʼnigeno mago alu kini vekamo hemenimo afole oʼaiʼniye. Afole aitenoʼaeʼmo aise afinaʼmo maigiye.

¹¹ Afela afumo hogoteno maiʼniyanageno hemenimo oʼmaiʼnigeno napa eiti kini vekamo maiʼniye. Agaemo seveniʼa kini vayapati vekamo maiʼniyanageno alino agoʼya lagauno atalegaiye.

¹² Ageʼnana afela afumo lokiyaʼamo naya loleʼa lokiyaʼamo haneʼniya kava huʼa naya loleʼa kini vayaʼmo maiʼnae. Hemenimo yagaiʼa noʼapatayanageno himamuʼapimo apamisigeʼapaeʼmo afela afuʼeʼmo magokepi lokaeʼa magoke aovafiʼmo aise afinaʼmo yagaiʼa apategae.

¹³ Apakaemo magoke apaipa apakesamo aliteʼa afela afumo himamuʼapimo amiteʼa aiyafiʼmo maigae.

¹⁴ Apakaemo aikeli sipisipiʼeʼmo kamemo hisayana sipisipimoʼmo ago huno aeno apakasegaiye. Agaemo ala kava vayaʼai ala kava vekaʼapimo maiʼneno kini vayaʼaiteʼmo yagaino neʼapateya kini vekamo maiʼniyaʼmofeʼmo huno aeno apakasegaiye. Lekana paino apateʼneno keya aeno ge huʼniyanageʼa oʼataleʼa akame nehaya vayaʼmogimo agaeʼeʼmo magokepi lokaeʼa maigae, huno huʼniye.

¹⁵ Enisole vekamoʼmo hunoʼaeʼmo, Kumai a kanomoʼa monimo neʼaliya a kanomo aniʼmo agotofuleʼmo maiʼniya aniʼmo haneʼniya kava huʼa vayaʼmo maiʼnae. Ani vayaʼmo muki alu apakufaʼe alu apakufaʼe vayanagi muki asole vayanagi muki alu kotega alu kotegamo maiʼnaya vayanagi muki alu apake alu apakemo neʼaiya vayanagi huʼa maiʼnae.

¹⁶ Afela afu naya loleʼa lokiyaʼamo haneʼniya kava huʼa naya loleʼa kini vayaʼmogi maiʼnae. Apakaemo kumai kavaʼmo huteno monimo neʼaliya a kanoeʼmo apaini hugae. Apakaemo kukena yaʼamo asagiʼa atalesageno agufalagaʼageʼmo maiʼnisigeʼapaeʼmo ame heʼa neteʼa atafiʼmo kaeʼa sagaliʼa atalegae.

¹⁷ Na kava hinageʼapaene. Gotiʼa ani kavaʼmo hugae, huno hu maleʼniya kavaʼmo hisayafeʼmo ani agufa apaipamo apamiʼnigeʼa magoke apaipamo aliteʼa yagaisaya himamuʼapimo afela afumo amiteʼa aiyafiʼmo maime maime neʼagenoʼaeʼmo Goti geʼamo afole aiʼniye.

¹⁸ Ageʼnana a kanomo maiʼniya kava huno alopa taonimoʼmo yagaiʼa neʼapataya kini vayaʼaiteʼmo yagaino neʼapateya taonimo Mamiloni taonimo haneʼniye, huno naha paiʼniye.