Leveleseni 16 - The Keyagana NT and 25 OT books

Gotiʼa aipamo leno neʼapateya kavaʼmo ageʼniya gemae

¹ Hutegeʼnaeʼmo afiʼnovana aote mono nopatiʼmo alopa gefatiʼmo seveniʼa enisole vayaʼaifeʼmo, Gotiʼa aipamo leno neʼapateya kayoʼmo seveniʼa yuvapafiʼmo haneʼniyanagi alinitutapa ma mopafiʼmo aitapa lakiyo, huno hapa paiʼnigeʼna afiʼnove.

² Hogote enisole vekamoʼmo yuvapaʼamo alinino uno ma mopafiʼmo aino lakiʼniye. Lakiʼnigeno afela afumo alagena yaʼamo aliteʼa afela afumo auneʼalefeʼmo mono huʼnaya vayaʼai apakufaleʼmo lusi apamuʼmo apaleʼnigeno apakafu kiʼniye.

³ Napa tu enisole vekamoʼmo yuvapaʼamo alinino uno solovala anipiʼmo aino lakiʼnigeno faliʼniya vekamo agufafati kolakana agufa kola aniʼmo alino hamaleʼnigeʼapaeʼmo muki anipiʼmo maiʼnaya yaʼmo faliʼnae.

⁴ Napa tali enisole vekamoʼmo yuvapaʼamo alinino uno alopa aniʼmo uno nelamiya anipiʼe aise aniʼmo nelamiya anipiʼeʼmo aino lakiʼnigeno kola aniʼmo alino hamaleʼniye.

⁵ Aniteʼmo neʼyagaiya enisole vekamoʼmo hunoʼaeʼmo, O Ala kava nene, huno, Kagaemo fatago vekamo maiʼnane. Hogoteka maiʼneka hemeniʼeʼmo neʼmainanageka henagaʼaʼeʼmo alagi maisana vekamo maiʼnane. Kagaemo kavaʼapimo alika fako huka apatetekaeʼmo fatago kavaʼmo nehane.

⁶ Apakaemo apaote vayakamo kamitimo apamagiʼnageno kolaʼapimo asagauno aiʼniyaʼmofeʼmo hosu kavaʼapimo anonaʼapileʼmo kolaʼmo nesayafeʼmo apamiʼnane. Kolaʼmo nesaya vayaʼmo maiʼnayaʼmofeʼmae, huno huʼnigeʼna afiʼnove.

⁷ Hutegeʼna afiʼnovana ofalinimo neʼmalaya hiʼyalamutetiʼmo hunoʼaeʼmo, He, Ala kava neʼmo Gotigamae. Lokiya vekamae. Alagepa huka alika fako huka apatetekaeʼmo fatago kavakamo nehane, huno huʼnigeʼna afiʼnove.

⁸ Hutegeno napa fo enisole vekamoʼmo yuvapaʼamo alinino uno yegeleʼmo aino lakiʼnigenoʼaeʼmo Gotiʼa yegemoʼmo leno pasagalisiya himamuʼamo amiʼnigeno yegemoʼmo leno pasagaliʼniye.

⁹ Yegemoʼmo leno pasagaliʼnigeʼapaeʼmo ma mopafi vayaʼmogimo Gotiʼa ani kayoʼmo apamiʼniya kavaʼmo afoʼamo agiʼaleʼmo huʼa faipa huʼa ateʼnae. Apaipamo aliʼa afe oleʼnayaʼmofeʼmo agiʼaleʼmo aliʼa asaga huʼa oʼateʼnae.

¹⁰ Napa faefu enisole vekamoʼmo yuvapaʼamo alinino uno afela afumo maiʼneno yagaino neʼapateya siyaʼaleʼmo aino lakiʼnigeno muki haopalegamo afela afumoʼa yagaino neʼapateya haopalegamo hani huʼnigeno lusi kava huno apakafu kiʼnigeʼapaeʼmo apavenafuʼnafiʼmo haniʼa alagi huteʼa maiʼnae.

¹¹ Huʼnagenoʼaeʼmo lusi apamuʼmo apaleʼnigeno apakafu kiʼniyaʼmofeʼmo kokuʼnapi neʼmaiya Goti agiʼaleʼmo huʼa faipa huʼa ateʼnayaʼmonanafa apaipamo aliʼa afe leteʼa hosu kavaʼapimo oʼataleʼnae.

¹² Napa sigisi enisole vekamoʼmo yuvapaʼamo alinino uno alopa aniʼmo uno nelamiya aniʼmo agiʼamo Yufaletisi anipiʼmo aino lakiʼnigeno yegemo haine neʼeya kotegamo yagaiʼa neʼapataya kini vayaʼmo esaya kaʼmo valino apatesiyafeʼmo aniʼmo leno laneʼniye.

¹³ Hutegeʼna ageʼnovana mago hosu aune vekamo alopa nagaloʼyavemo avayafatiʼmo emiʼnege mago alu hosu aune vekamo afela afumo avayafatiʼmo emiʼnege mago hosu aune vekamo aigofe aune vekamo avayafatiʼmo emiʼnege huʼnae. Ani loleʼe magoʼe hosu apaune vayaʼmo esokana huʼa maiʼnageʼna apakeʼnove.

¹⁴ Apakaemo hosu apaune vayaʼmo maiʼneʼapaeʼmo noʼagaya agufa aune kavaʼmo huʼnae. Apakaemo muki yagaiʼa neʼapataya kini vayaʼaitegaʼeʼmo u eʼa huʼa alopa afinaʼmo muki lokiyaʼaʼe Gotiʼa lekana pai maleʼniya afinaʼmo kamemo hisayafeʼmo aliʼa anupa huʼa apateʼnae.

¹⁵ Yesuʼa hunoʼaeʼmo, Afiyo, huno, kumayaʼmo neʼaliya vayaʼmo neʼaya kava huʼna emiʼnesugeʼapaeʼmo hapau aigae. Apakufalagaʼageʼmo maiʼnisageno apavagage osisiyafeʼmo apau okaleʼa kukena yaʼapimo alagepa huʼa hu maleteʼa yagaiʼa neʼmaisaya vayaʼmogi Goti aulena vayaʼmo maiʼnae, huno huʼniye.

¹⁶ Hutegeʼapaeʼmo hosu apaune vayaʼmogimo kini vayaʼmo mago mopamo agiʼamo Himulu gefatiʼmo Amaketoni kotegamo aliʼa anupa huʼa apateʼnae.

¹⁷ Napa seveni enisole vekamoʼmo yuvapaʼamo alinino uno hiya kokuʼnapiʼmo aino lakiʼnigenoʼaeʼmo mago vekamo aote mono nopatiʼmo yagaino neʼapateya vekamo siyaʼaletiʼmo alopa gefatiʼmo hunoʼaeʼmo, muki kavaʼmo alagi hano huʼniye, huno huʼniye.

¹⁸ Huno hutegeno hafosamoʼmo alino alave alave huʼnigeno alopa agemo aiteno hakalu hakalu huʼnigenoʼaeʼmo lusi imimaʼmo aliʼniye. Ani lusi imimaʼmo vayaʼmo ma mopafiʼmo maiʼnagenoʼaeʼmo neʼaliya agufa imimaʼmo oʼaliʼnifa aeno agaseʼniya agufa imimaʼmo aliʼniye.

¹⁹ Lusi imimaʼmo aliteno alopa taonifi mopamo alino aino akaka vaeʼnigeno alino fako huno loleʼe magoʼe atupamo hamaleʼniye. Muki alu kotega alu kotegamo haneʼniya taonimo asagauno aiʼniye. Gotiʼa alopa taonimo Mamiloni taonieʼmo age okanino agesamo afiteno nofi alagafati aniʼmo kapufiʼmo havai teʼniya aniʼmo alino amiʼniya kava huno aipamo leno apateteno lusi kayoʼmo apamiʼniye.

²⁰ Muki ani agoʼnanenaʼmo aune heʼnigeno muki aveʼeʼmo aune heno uno lageso hisiyafeʼmo uʼniye.

²¹ Kokuʼnapatiʼmo lusi ko mopa koʼmo ma mopafi vayaʼaitegamo aiʼniye. Magoke magoke ko mopa koʼmo kana huʼniya yaʼamo lole laisi kukana huno kanaʼamo haneʼniye. Gotiʼa lusi ko mopa ko kayotetiʼmo apamagiʼniyaʼmofeʼmo Goti agiʼaleʼmo huʼa faipa huʼa ateʼnae.