Leveleseni 15 - The Keyagana NT and 25 OT books

Mago enisole vayaʼmogi henagaʼamo afole aisiya afinafeʼmo kayoʼmo aliʼnaya gemae

¹ Ageteʼnaeʼmo ageʼnovana magoʼe aune kavafeʼmo lusi kava huʼa hapau neʼaiya agufa aune kavaʼmo haneʼniyana seveniʼa enisole vayaʼmogi seveniʼa kayoʼmo aliʼnae. Ani kayoʼmo Gotiʼa aipamo leno neʼapateyanageno apamagisigeno hano hugiyaʼmofeʼmo henagaʼamo ani kayoʼmo afole aisiyafeʼmo haneʼniye.

² Ageʼnovana mago ani kotuʼmoʼa kalasigana huno aeno ha neleya ani kotuteʼmo atamo nelegeʼna ageʼnove. Ani ani kotuʼmo agiʼnaleʼmo mago vayaʼmogimo afela afumo aeʼa apakasege aune yaʼmo aeʼa agasege napamo agiʼamo aeʼa agasege huʼnaya vayaʼmo he tiʼa maiʼnae. Gotiʼa mago alopa gitagana agufa yaʼmo apamiʼnigeʼa amagiʼnae.

³ Apakaemo Moseseʼa Goti aliʼyaʼamo neʼaliya vekamo yokemo aikeli sipisipimo yokeʼamo huʼnae. Ani yokemo huʼapaeʼmo, Ala kava neʼmo kayamufaʼage Gotigae, huʼa, Magoʼe kavaʼmo nehanageʼapaeʼmo hapau neʼaiye. Apaote vayaʼaiteʼmo yagaika neʼapatana ala kini vekaʼapimogae, huʼa, nehana kavakamo kanale kavaʼageʼmo haneʼnigeka lama ge kavaʼmo nehane.

⁴ O Ala kava nene, huʼa, kagaikageʼmo kaote vekamo maiʼnanaʼmofeʼmo ina lagimo kagaefeʼmo koli osuʼa kagikaleʼmo aliʼa asaga osugae. Kagaemo anonaʼapilefeʼmo alagepa huka alika fako huka apateteka neʼapamina kavakamo ago afole aiʼniyaʼmofeʼmo muki alu nofi vaya alu nofi vayaʼmogimo eʼa kaulagaleʼmo kagaetefeʼmo mono hugae, huʼa huʼnae.

⁵ Hutageʼnaeʼmo ageʼnovana kokuʼnapi aote mono nopiʼmo kitaʼamo aote aote huno yaki maleʼnigeʼapaeʼmo

⁶ seveniʼa enisole vayaʼmogimo seveniʼa kayoʼmo aliʼnaya vayaʼmo aote mono nopatiʼmo emi eʼnae. Alagepa kukenamo alave alaveʼage nehiya kukenamo vaiʼa aliʼnaya vayaʼmogimo hapaifiʼyaleʼmo goliletiʼmo alo huʼnaya kukenamo vaiʼa aliʼnae.

⁷ Mago vekamo loleʼe loleʼe vayapati vekamoʼmo seveniʼa goli yuvapamo alino seveniʼa enisole vayaʼmo apamiʼniye. Gotiʼa maige maige huno maiʼneno maino hano osuno neʼmaiya Gotiʼa aipamo leno neʼapateya kavaʼmo yuvapafiʼmo havaiteʼniye.

⁸ Gotiʼa ha le konali yaʼaʼe ayamufaʼamoʼeʼmo ata legekana huno nelegeno halinamo ailino aote mono nopiʼmo uno haino havai teʼnigeʼapaeʼmo muki vayaʼamo afaʼa uʼa haiʼa oʼuʼnisageʼapaeʼmo seveniʼa enisole vayaʼmogimo seveniʼa kayotetiʼmo apamagime apamagime uʼa apamagiʼa hano hutesageʼapaekeʼmo afaʼa uʼa haigae.