Leveleseni 14 - The Keyagana NT and 25 OT books

Miya faino hatu maeno apateʼniya vayaʼmogimo yokemo huʼnaya gemae

¹ Halate ageʼnovana, ageyo, huno, aikeli sipisipimo Saiyoni avefiʼmo he tino maiʼnigeʼapaeʼmo vani hataleti foti fo tauseniʼa vayaʼai hapanileʼmo agaiʼa agiʼe afoʼamo agiʼeʼmo avoʼmo kae maleʼniya vayaʼmo agaeʼeʼmo magokepi lokaeʼa he tiʼa maiʼnageʼna apakeʼnove.

² Apaketeʼnaeʼmo afiʼnovana kokuʼnapatiʼmo apakemo aiʼnaya apakemoʼmo alopa ani haʼyamoʼmo age aigekana huʼa alopa gefatiʼmo hakalu hakalu hugekana agufa apakemo aiʼnageʼna afiʼnove. Apakemo aiʼnaya apakemoʼmo vayaʼmogimo gitamo amagiʼnageno age aigekana agufa apakemo aiʼnae.

³ Vani hataleti foti fo tauseniʼa vayaʼmogimo yagaino neʼapateya vekamo siya aulagalenagi loleʼe loleʼe vayaʼai apaulagalenagi vayatama vayaʼai apaulagalenagi huʼa he tiʼa maiʼneʼapaeʼmo saufa yokemo huʼnae. Apakaemo ma mopafi vayapatiʼmo miya faino hatu maeno apateʼniya vayaʼamogigeʼmo afiʼnaya yokemo huʼnae.

⁴ Apakaemo aʼneʼeʼmo magokepi lokaeʼa ohavaeʼnaya vayaʼmo yaveyave apaipa vayaʼageʼmo maiʼnae. Apakaemo aikeli sipisipimo haiyategamo uʼnifi akame huʼa neʼvae. Agaemo ma mopafi vayapatiʼmo miya faino hatu maeno apateʼniye. Yu vayaʼmogimo hoyafatiʼmo hogoteno leʼniya neʼyaʼmo aliʼa Gotiʼa amiʼnageno Gotiʼa neʼyaʼmo haneʼniya kava huʼa apakaemo Gotiʼe aikeli sipisipi vekaʼeʼmo vayaʼanimo maiʼnae.

⁵ Aigofe gemo nosaya vayaʼmo maiʼnayanageʼa vaiʼmo afaʼa oʼapamigae.

Loleʼe magoʼe enisole vayaʼmogimo ge huʼnaya gemae

⁶ Halate ageʼnovana mago enisole vekamoʼmo alagepa faigoko gemo hanege hanege huno hanesiya gemo alu kotega alu kotegamo maiʼnaya vayanagi muki alu nofi vaya alu nofi vayanagi muki alu apake alu apakemo neʼaiya vayanagi muki alu apakufaʼe alu apakufaʼe vayanagi huno aeno hakalo huno hapa paisiyafeʼmo kokuʼnaʼmo folagateʼmo halelino uʼniye.

⁷ Halelino neʼunoʼaeʼmo alopa gefatiʼmo hunoʼaeʼmo, Gotiʼa agoti huno apatesiya afinaʼmo ago afole aiʼniyaʼmofeʼmo Gotifeʼmo koli hutetapa agiʼaleʼmo alita asaga hutapa ateyo. Kokuʼnanagi ma mopagi solovala aninagi ma mopafiʼmo uno nelamiya aniʼmogi huno alo huʼniya vekaekeʼmo mono hiyo, huno huʼniye.

⁸ Huteno uʼnigenoʼaeʼmo mago napa tu enisole vekamo akame huno eno, Alopa taonimo Mamiloni kotegamo atamo leno sagalino hano huʼniye, he, leno sagalino hano huʼniye. Ani taonimoʼa kumai kavaʼamoʼmo lokiya aniʼmo nofi alagafati anikana huno haneʼnigeno muki vayaʼmo apamitenoʼaeʼmo neyo, huno huʼniye, huno huʼniye.

^9-10 Inagi napa tali enisole vekamoʼmo anakae anakame huno eno alopa gefatiʼmo hunoʼaeʼmo, Gotiʼa muki vayaʼmogimo afela afulefeʼmo mono huge auneʼaeʼmo mono huge nehuʼapaeʼmo hapanileʼmofi apayateʼmofi huʼa alagena yaʼamo aliʼnaya vayaʼaifeʼmo Gotiʼa aipamo leno neʼapate. Gotiʼa aipamo leno neʼapateya kavaʼamoʼmo mago lokiya anikana huno haneʼniyanageno apamisigeʼa negae. Gotiʼa anilafaʼmo nofi alagafati anipiʼmo olakiʼnifa lokiya aniʼmo aipamo leno neʼapateya kavaʼmo agaiʼa kapufiʼmo laki maleʼniyanageno apamisigeʼa negae. Apakaemo apaote enisole vayaʼai apaulagaleʼe aikeli sipisipimo aulagaleʼeʼmo yafapiʼmo neleya atafiʼmo maisageno lusi kava huno apakafu kigiye.

¹¹ Atafiʼmo maisageno apakafu nekisigenoʼaeʼmo halinamo aino hano osuno aige aige huno maigiye. Afela afulefeʼmo mono huge aune yatefeʼmo mono huge agiʼalefeʼmo alagena yaʼamo alige huʼnisaya vayaʼmogimo felugaʼe haniʼilagaʼeʼmo maiʼa haga olegayanageno apakafu kige kige huno maigiye, huno huʼniye.

¹² Huno huʼniyaʼmofeʼmo apaote vayaʼmogi Goti keʼaepa geʼamo akame huteʼa Yesuʼmo oʼataleʼa agaefeʼmo apakesamo afiʼa fatago nehaya vayaʼmogimo oʼataleʼa lokiya vaiʼa maiyo.

¹³ Inagi afiʼnovana mago vekamoʼmo kokuʼnapatiʼmo ge hunoʼaeʼmo, Avoʼmo kao. Ani afinatetiʼmo Ala kava nepiʼmo maiʼneʼa falisaya vayaʼmogimo Goti aulena vayaʼamo maiʼnae, huno huʼnigeno Goti Aunemeʼamoʼmo hunoʼaeʼmo, he, faliteʼapaeʼmo alagepa kavaʼmo huʼnaya anonaʼapimo aliniʼa ugayaʼmofeʼmo lokiya aliʼyaʼapimo ataleʼa maiʼa haga legae, huno huʼniye.

Ma mopafiʼmo neʼyaʼmo leʼnigenoʼaeʼmo hatagauno aliʼniya gemae

¹⁴ Hutegeʼna ageʼnovana yaveyave hiyaʼmo haneʼnigeno vemo mafaʼnemo ani hiyateʼmo fai maiʼnigeno agenopale kakolitamo aeʼa apakaseʼnaya vayaʼmogi neʼmalaya agufa kakolitamo haneʼnigeno ayapiʼmo ave nege nege naipemo aino fagagiʼniya naipemo aliʼnigeʼna ageʼnove.

¹⁵ Ageʼnogenoʼaeʼmo mago alu enisole vekamoʼmo aote mono nopatiʼmo eno hiyateʼmo fai maiʼniya vekaeʼmo alopa gefatiʼmo hunoʼaeʼmo, Ma mopafiʼmo neʼyaʼmo leʼnigenoʼaeʼmo neʼyaʼmo alisana afinaʼmo afole aiʼniyanagi naipekamo alinikuka hatagauka aliyo, huno ha paiʼniye.

¹⁶ Ha paiʼnigenoʼaeʼmo hiyateʼmo fai maiʼniya vekamo mopafiʼmo uno lamino neʼyaʼmo hatagaulino uneno hutenoʼaeʼmo ma mopafatiʼmo neʼyaʼmo aliʼniye.

¹⁷ Mago alu enisole vekamo kokuʼnapi aote mono nopatiʼmo agaeʼeʼmo eno aino fagagiʼniya naipemo aliʼniye.

¹⁸ Mago alu enisole vekamo ofalinimo neʼmalaya hiʼyalamuteʼmo haneʼniya ataleʼmo neʼyagaiya vekamoʼmo eno aino fagagiʼniya naipemo aliʼniya enisole vekaeʼmo alopa gefatiʼmo hunoʼaeʼmo, Nofi alagamo ago afu leʼniyanagi ave nege nege naipemo aino fagagiʼniya naipekamo alinikuka ma mopafi nofi alagamo hatagauka aliyo, huno ha paiʼniye.

¹⁹ Enisole vekamoʼmo aino fagagifa naipeʼaletiʼmo ma mopafi nofi alagamo hatagaulino uneno huteno nofi alagamo aliteno alopa yafa yuvapafiʼmo yaga auno maleʼniye. Gotiʼa aipamo leno apateʼniyanageno aliʼyaʼamo neʼaliya vekamoʼmo aiyaletiʼmo aeno lata paisiyafeʼmo yuvapafiʼmo maleʼniye.

²⁰ Taonimo malagamo alopa yuvapafiʼmo aiyaletiʼmo aeno latapaiʼnigeno kola aniʼmo uno nelamiya anikana huno uno lamiʼniye. Lamiʼniya kolaʼmoʼa hosi afumo avayafi nofiteʼmo haineno magoke aiyaya huʼnigeno tali hataleti kilomita yatala yakana huno haneʼniye.