Leveleseni 13 - The Keyagana NT and 25 OT books

Solovala anipatiʼmo afole aiʼniya afela afueʼmo huʼniya gemae

¹ Uʼna solovala ani agiʼnaleʼmo he tiʼna maiʼneʼna ageʼnovana mago afela afumo solovala anipatiʼmo afole aiʼnigeʼna ageʼnove. Naya loleʼa lokiyaʼamo haneʼnigeno seveniʼa agenopamo haneʼnigeno kakolitaʼamo kini vayaʼmogi neʼmalaya agufa kakolitamo lokiyaʼaleʼmo haneʼniye. Muki agenopaʼaleʼmo Goti agiʼagana agufa agimo Goti agiʼaleʼmo huno faipa huno ateʼniya agiʼamo avoʼmo kae maleʼniye.

² Ageʼnova afela pusimo agiʼamo lepatigana huno maiʼnigeno aiyaʼalaʼmo afela afumo agiʼamo meyamo aiyagana huno haneʼnigeno avayaʼamo laiyonimogi apavayagana huno haneʼniye. Nagaloʼyavemoʼmo afela afumo lokiyaʼamo amiteno yagaino apatesiyafeʼmo alino ateʼnigeno himamuʼamo aliteno maiʼniye.

³ Afela afumo magoke agenopaleʼmo amagiʼnageno falisiya agufa amuʼmo aleʼniyaʼmonanafa ago aleno hateʼnigeʼapaeʼmo muki ma mopafi vayaʼmogimo ani afela afuekeʼmo hapau aiteʼa akame huʼnae.

⁴ Nagaloʼyavemoʼmo afela afuʼaiteʼmo yagaino apatesiya himamuʼamo alino amiʼniyaʼmofeʼmo vayaʼmogimo nagaloʼyavelefeʼmo mono huʼnae. Ani kava huʼa afela afulefeʼmo mono huteʼapaeʼmo, Ina laʼmo afela afugana huno maiʼniye. Ina laʼmo afaʼa kame huno ategaiye, huʼa huʼnae.

⁵ Afela afumoʼa agaiʼa agiʼaleʼmo alino asaga huno atetenoʼaeʼmo, ala vekamo maiʼnove, huno huteno Goti agiʼaleʼmo huno faipa huno ateʼniyaʼmofeʼmo foti tuʼa kaimo agaemo afaʼa yagaino apatesiyafeʼmo Gotiʼa afaʼa ageno ataleʼniye.

⁶ Agaemo Gotifeʼmo huno faipa huno atege Goti agiʼaleʼmo alino afepi atege Gotiʼa maiʼniya kotegaeʼmo huno faipa huno atege kokuʼnapi maiʼnaya vayaʼaifeʼmo huno faipa huno apatege huʼniye.

⁷ Agaemo Goti vayaʼaeʼmo kame huno apateteno aeno apakaseno muki nofi vayaʼaitenagi muki alu apakufaʼe alu apakufaʼe vayaʼaitenagi muki alu apake alu apakemo neʼaiya vayaʼaitenagi muki alu kotega alu kotegamo maiʼnaya vayaʼaitenagi huno yagaino apatesiyafeʼmo Gotiʼa afaʼa ategeno maiʼniye.

⁸ Muki ma mopafi vayaʼmo afaʼa maisaya yaʼmo aliʼnisaya vayaʼai apakiʼapimo avoʼmo kae maleʼniya mukufiʼmo apakiʼapimo avoʼmo okaeʼnisiya vayaʼmogimo afela afulefeʼmo mono hugae. Ani mukumo ma mopamo faino ateʼniya afinaʼmo kamiti amagiʼnaya sipisipi vekamo mukuʼamo haneʼniye.

⁹ Apakesamo haneʼnisiya vayaʼmogimo mani gemo alagepa huʼa afiyo.

¹⁰ Gotiʼa hunoʼaeʼmo, kalavusi huʼa apateʼnisaya vayaʼaina kalavusi huʼa apategae. Naipeletiʼmo apaiʼnageʼa faliʼnaya vayaʼaina naipeletiʼmo apaisageʼa faligae, huno huʼniyaʼmofeʼmo Goti aote vayaʼamogimo hosu afinaʼmo oʼataleʼa atafauʼa alagi huʼa maisaya kavaʼmo haneʼniye.

Alu afela afumo ma mopafatiʼmo afole aiʼniya afueʼmo huʼniya gemae

¹¹ Inagi ageʼnovana mago alu afela afumo ma mopafatiʼmo afole aiʼnigeʼna ageʼnove. Lole lokiyaʼamo aikeli sipisipimo lokiyaʼalakana huno haneʼnigeno nagaloʼyavemoʼa nehiya agufa gemo huʼniye.

¹² Agaemo hogote afela afumoʼa aliʼniya agufa himamuʼamo aliteno hogote afela afumo himamuʼaletiʼmo ge huʼniye. Agaemo ma mopa vayaʼmo alino he tino apateʼnigeʼapaeʼmo hogote afela afumo falisiya agufa amuʼmo aleʼniyaʼmonanafa ago aleno hateʼniya afela afulefeʼmo mono huʼnae.

¹³ Napa tu afela afumoʼa noʼagaya agufa aune kavaʼmo magoʼe kavaʼmo huʼniye. Mago kavaʼmo huʼniya kavaʼmoʼa muki vayaʼai apaulagaleʼmo kokuʼnapifeʼmo ataeʼmo ge huʼnigeno emineno ma mopafiʼmo leʼniye.

¹⁴ Gotiʼa afaʼa ateʼnigeno maiʼneno hogote afela afumo himamuʼaletiʼmo noʼagaya agufa aune kavaʼmo magoʼe kavaʼmo huʼniyaʼmofeʼmo ma mopafi vayaʼmo humi apateʼniye. Agaemo naipeletiʼmo agenopafiʼmo aiʼnigeno falisiya agufa amuʼmo aleʼniyaʼmonanafa ago aleno hateʼniya afela afumo agiʼaleʼmo aliʼa asaga huʼa atesayafeʼmo, auneʼamo alo hutapa maleyo, huno huʼniye.

¹⁵ Gotiʼa afaʼa ateʼnigeno maiʼnigenoʼaeʼmo aune yaʼmo alo hu maleʼnaya yaʼmo afaʼa maisiya yaʼmo amiʼnigeno age aiʼniye. Agaemo aune yafeʼmo mono osugune huʼa nehaya vayaʼaifeʼmo apamagiyo, huno hapa paiʼnigeʼa apamagiʼnae.

¹⁶ Agaemo afa vayanagi ala apaki vayanagi kagemi yaʼapiʼe vayanagi kagemi yaʼapimo ohaneʼnisiya vayanagi kalavusi aliʼyaʼmo neʼaliya vayanagi afaʼa maiʼnaya vayaʼaifenagi huno lamaga lapayateʼmofi lapanileʼmofi hutapa alagena yaʼamo hu maleyo, huno hapa paiʼniye.

¹⁷ Afela afumo alagena yaʼamofi agiʼamofi napaʼamofi huʼa oʼaliʼnisaya vayaʼmogimo afaʼa miya ofaige maketi osuge huʼnae.

¹⁸ Alagepa huʼa ageteʼa afiʼnaya vayaʼmogimo mani gemo afaʼa afisaya gemo haneʼniye. Alagepa lapakesamo haneʼnisiyana afela afumo napamo afaʼa lekana paiyo. Ani napamo mago vekamo napamo haneʼniye. Ani vekamo napaʼamo sigisi hataleti sigisiti sigisi napamo haneʼniye.