Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Leveleseni 12 - The Keyagana NT and 25 OT books


A kanoʼe alopa nagaloʼyaveʼefeʼmo anava gemo huʼniya gemae

1 Magoʼe huno lusi kava huno noʼagaya aune kavaʼmo kokuʼnate afole aiʼniyana mago a kanomo agufaleʼmo yegegana agufa kukena vailiʼnigeno aiyafiʼmo kaimo haneʼnigeno kakolitaʼamo aeʼa apakaseʼnaya vayaʼmogi aliʼa neʼmalaya agufa kakolitamo tuolofuʼa kanefiʼmoʼa faino ku aino ateʼnigeno kanefi kakolitamo agenopaleʼmo haneʼniye.

2 Aipaguʼeʼmo maiteno mafaʼnemo alino atesiyafeʼmo huʼnigeno agafu kiʼnigenoʼaeʼmo lusi kava huno yulagefa aiʼniye.

3 Inagi mago alu noʼagaya aune kavaʼmo kokuʼnate afole aiʼniyana alopa haesa nagaloʼyavemoʼmo seveniʼa agenopamo haneʼnigeno naya loleʼa lokiyaʼamo haneʼnigeno agenopaleʼmo seveniʼa kakolitamo ala kini vayaʼmogi neʼmalaya agufa kakolitamo haneʼniye.

4 Aigoʼyaletiʼmo kokuʼnatetiʼmo loleʼe magoʼe kanefipatiʼmo magokayaga atupalega kanefiʼmo amagino aino atafaino mopafiʼmo yaga auno ataleʼniye. Alopa nagaloʼyavemoʼmo mafaʼnemo alino atesiyafe huʼniya a kanomo aulagaleʼmo he tino maiʼnenoʼaeʼmo mafaʼnemo alino neʼatesigenoʼaeʼmo haeno nesiyafeʼmo he tino maiʼniye.

5 Ani a kanomoʼmo ve mafaʼnemo alino ateʼnigeno muki alu kotega alu kotegamo maiʼnaya vayaʼaiteʼmo aeni kayotetiʼmo yagaino apatesiya mafaʼnemo alino ateʼnigenoʼaeʼmo Gotiʼa a kanomo mafaʼneʼamo ha faleno agaetegamo avalelino haino yagaino neʼapateya siyaʼaleʼmo ateʼniye.

6 Ani a kanomo Gotiʼa kaʼme koʼmo mago alo huno ateʼniya kotegamo vani tauseni tu hataleti sigisitiʼa afinaʼmo ha maeno yagaino atesiyafeʼmo kaʼme kotegamo aune heno uʼniye.

7 Utegeʼapaeʼmo kokuʼnapiʼmo kamemo huʼnae. Maikoʼagi yagaino neʼapateya enisole vayaʼagi huʼa nagaloʼyaveʼeʼmo kamemo huʼnae. Kame huteʼapaeʼmo nagaloʼyavemoʼmo yagaino neʼapateya enisole vayaʼamogiʼe apakaeʼeʼmo kamemo huʼnayaʼmonanafa

8 Maikoʼagi yagaino neʼapateya enisole vayaʼagi huʼa kamemo huteʼa huʼa aeʼa apakaseʼnageʼa kokuʼnapiʼmo magoʼe huʼa oʼmaiʼnae.

9 Aliʼa hapa faiʼa apataleteʼa alopa nagaloʼyavemo akeyaʼvilaga maiʼniya nagaloʼyavemoʼmo aigofe geʼaletiʼmo muki ma mopafi vayaʼmo apakesamo nefaiya nagaloʼyavemo aliʼa hafaiʼa ataleʼnageno ma mopafiʼmo asagauno aiʼniye. Mago agiʼamo Nevoʼae ani agimo aepaʼamo haneʼniyana huno faipa huno neʼapateya vekamae. Mago agiʼamo Sataniʼae ani agimo aepaʼamo haneʼniyana kame vekamae. Apakaemo agaeʼe enisole vayaʼaʼeʼmo aliʼa hapafaiʼa apataleʼnageʼa ma mopafiʼmo asagauʼa aiʼnae.

10 Aliʼa hapafaiʼa apataleʼnageʼnaeʼmo afiʼnovana kokuʼnapatiʼmo alopa gefatiʼmo ge huʼapaeʼmo, Goti aulagaleʼmo felugaʼe haniʼilagaʼeʼmo he tiʼneno konagatimogifeʼmo huno faipa huno neʼapateya vekamo kokuʼnapatiʼmo ago aliʼa hafaiʼa ataleʼnayaʼmofeʼmo hemenimo Gotiʼa vayaʼamogi apakufamo alino katino apatege ala kini vekamo himamuʼaletiʼmo huge Gotitimoʼa yagaino apatege lekana paino ateʼniya Kalaisi vekamo himamuʼamo afole aige hugiye.

11 Konagatimogimo aikeli sipisipimo kolaʼaletiʼmo lama geʼamo aeʼa hakalo huʼa hapa paiʼnaya geʼaletiʼmo aeʼa agaseʼnae. Apakaemo apakaiʼapi apakufaeʼmo apakesamo oʼafiʼa afaʼa faligune, huʼa huʼnae.

12 Huʼnayaʼmofeʼmo kokuʼnaʼe kokuʼnapi maiʼnaya vayaʼmogitapaʼeʼmo lapamogaga aiyo. Nevoʼmo ma mopafiʼe solovala aniteʼeʼmo maiʼnaya vayaʼaitegamo ago uno lamiʼniyaʼmofeʼmo lapakaefeʼmo vaehae, huta nehune. Agaiʼa afinafeʼmo aise afinaʼmo haneʼniye, huno agesamo afiʼniyaʼmofeʼmo lusi kava huno aipamo nele, huʼa huʼnae.

13 Nagaloʼyavemo aliʼa hafaiʼa ma mopafiʼmo ataleʼnagenoʼaeʼmo ago aliʼa nahafaiʼa nataleʼnae, huno agetenoʼaeʼmo mafaʼnemo alino ateʼniya a kanomo uno vegala aeʼniye.

14 A kanomo uno kaʼme kotegamo maisiyafeʼmo alo huno ateʼniya kotegamo halelino visiyafeʼmo lole hakulaʼmo alopa namamo hilomo hakumo amiʼnigeno aliʼniye. Nagaloʼyavemoʼmo ohaesiyafeʼmo loleʼe magoʼe kafugafiʼe atupa kafugafiʼeʼmo yagaino atesigeno alagepa huno maisiya kotegamo halelino visiyafeʼmo hakumo amiʼniye.

15 Hakumo aliʼnigenoʼaeʼmo nagaloʼyavemoʼa aniʼmo alinino visiyafeʼmo alopa anikefamo uno nelamiya anikana huno avayafatiʼmo aeno apakaeno ataleʼniye.

16 Aniʼmo aeno apakaeno ataleʼniyaʼmonanafa mopamoʼmo a kanomo ha maesiyafeʼmo avayamo aka huʼneno aniʼmo alino nakaiʼniye.

17 Nagaloʼyavemoʼmo a kanoeʼmo lusi kava huno aipamo leno ateteno a kanomo mafaʼneʼamogimo Goti geʼamo akame huteʼa Yesuʼmo alino apave liʼniya gemo oʼataleʼa atafauʼa alagi nehaya vayaʼaitegamo kame huno apatesiyafeʼmo uʼniye.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ