Leveleseni 11 - The Keyagana NT and 25 OT books

Lole vekalaʼanifeʼmo huʼniya gemae

¹ Mago hopa kayokana agufa kayoʼmo lekana paisuvafeʼmo namitenoʼaeʼmo, He tikuka Goti aote mono noteʼe ofalinimo nehaya hiʼyalamuteʼeʼmo alika maleka agege agege huka lekana paitekaeʼmo aote mono nopiʼmo mono nehaya vayaʼmo lekana paiyo.

² Lekana paiganaʼmonanafa hogote kegiʼyamo malagamo haneʼniya mopaleʼmo kayotetiʼmo lekana opaiyo. Ani mopamo malaga vayaʼmo apamiʼniyanageʼa aote taonifiʼmo foti tuʼa kaileʼmo umenitata huʼa aliʼa hosu huʼa ategae.

³ Nagaemo lole vekalaʼmoganimo nava gemo hisaʼafeʼmo himamuʼnimo anamiʼnisugeʼana nagaetegati gemo alini uʼana vani tauseni tu hataleti sigisitiʼa afinaʼmo ani kavaʼmo huʼana foti tuʼa kaileʼmo aeʼana hakalo huʼana hapa paigaʼae. Ma mopafi vayaʼmogimo hosu kavaʼmo nehayaʼmofeʼmo hosu kukenamo laisi kukana agufa kukenamo vaigaʼae, huno naha paiʼniye.

⁴ Ani lole vekalaʼmoganimo lole alifi yosalakana huʼana maiʼneʼana lole lamulaʼmo neʼmalaya hiʼyalamutalakana huʼana maiʼnaʼae. Ma mopafiʼmo maiʼnaya vayaʼaiteʼmo yagaino neʼapateya Goti aulagaleʼmo he tiʼana maiʼnaʼae.

⁵ Mago vayaʼmogimo kame huʼa anatesayafeʼmo nehisagenoʼaeʼmo anavayafatiʼmo atamoʼmo leno pasaga ligiye. Ani kava huʼa kame huʼa anatesayafeʼmo nehisaya vayaʼeʼmo faligae.

⁶ Ani lole vekalaʼmoganimo Goti geʼamo aeʼana hakalo huʼana hapa nepaiʼa afinaʼmo himamuʼaniletiʼmo kokuʼnaʼmo atafauʼana atesaʼageno koʼmo oʼaigiye. Anakaemo aniteʼmo yagaiʼneʼana kolakana aniʼmo aliʼana hamaleʼana ategaʼae. Hanauʼnisigeʼanaeʼmo ma mopafi vayaʼmo muki alu kayo alu kayotetiʼmo afaʼa apamagite apamagite hugaʼae.

⁷ Gotiʼa anamiʼniya gemo aeʼana hakalo huʼana hapa paiʼana hano nehisaʼagenoʼaeʼmo afela afumo ive kelifatiʼmo eno hainesiya afumoʼmo kamemo huno aeno anakaseno kamitimo hanaegaiye.

⁸ Anakufaʼamo alopa taonimo auneʼamo agiʼamo Sotomi kotegamo haneʼnifi Isipi kotegamo haneʼnifi huʼnisiya taonifiʼmo Ala kava neʼanimo malipu yosaleʼmo nili aiʼnaya taonimo kateʼmo hanegaiye.

⁹ Faliʼnisaʼageʼapaeʼmo muki alu apakufaʼe alu apakufaʼe vayanagi muki alu nofi vaya alu nofi vayanagi alu apake alu apakemo neʼaiya vayanagi alu kotega alu kotegamo maiʼnaya vayaʼmogimogi huʼa loleʼe magoʼe afinaʼe mago atupa afinaʼeʼmo anakufaʼaleʼmo aulu haeʼa anaketeʼapaeʼmo kitapa oʼanateyo, huʼa hugae.

¹⁰ Muki ma mopafi vayaʼmo lole vekalaʼmoganimo apakafu yaʼmo aliʼana apamiʼnaʼa vekalaʼmo faliʼnaʼaʼmofeʼmo amuse huʼapaeʼmo apamogaga aiteʼa mago yaʼmo fikumo hapa maeʼa apamiʼnageʼapaeʼmo aliʼa apamiʼnae.

¹¹ Loleʼe magoʼe afinanagi mago atupa afinanagi huno utegeno Gotiʼa fu huteno halate afaʼa maisaʼa yaʼmo anamiʼnigeʼana he tiʼana afaʼa maiʼnaʼageʼa anaketeʼapaeʼmo lusi kava huno apamoʼya aiʼniye.

¹² Kokuʼnapatiʼmo alopa gefatiʼmo ge hunoʼaeʼmo, manileʼmo haiteʼao, huno huʼnigeʼana afiteʼanaeʼmo uʼa haiʼana hiyapiʼmo faleteʼana kokuʼnapiʼmo uʼa haiʼnaʼageʼapaeʼmo kame vayaʼanimogimo anakeʼnae.

¹³ Anakeʼnagenoʼaeʼmo lusi imimaʼmo aliʼnigenoʼaeʼmo naya loleʼa taonifatiʼmo magoke taonimo magokayaga atupalega asagauno aiʼnigeʼapaeʼmo seveni tauseniʼa vayaʼmo faliʼnae. Faliʼnageʼapaeʼmo afaʼa maiʼnaya vayaʼmogimo lusi kava huno apamoʼya aiʼnigeʼa kokuʼnapi Goti agiʼaleʼmo aliʼa asaga huʼa ateʼnae.

¹⁴ Napa tu kage kage kavaʼmo hano hutegeno napa tali kage kage kavaʼmo malage huno afole aigiye.

Napa seveni enisole vekamoʼmo pikulimo huʼniya gemae

¹⁵ Napa seveni enisole vekamoʼmo pikuli huʼnigeʼapaeʼmo kokuʼnapatiʼmo alopa gefatiʼmo ge huʼapaeʼmo, Hemenimo ma mopafi vayaʼaiteʼmo yagaiʼa neʼapataya vayaʼai apaimuʼyaleʼmo Ala kava netiʼe lekana paino ateʼniya vekamo Kalaisi vekaʼeʼmo maigaʼae. Agaemo yagaino apateno hano osuno yagaino apateme apateme ugiye, huʼa huʼnageʼapaeʼmo

¹⁶ tuveti foʼa vayatama vayaʼmo Goti aulagaleʼmo maiʼneʼa yagaiʼa neʼapataya vayaʼmogi siyaʼapileʼmo fai maiʼnaya vayatama vayaʼmo asagau aiteʼapaeʼmo apaugosalegatiʼmo mopaleʼmo aiʼa ati kaeʼneʼa Gotifeʼmo mono huʼnae.

¹⁷ Mono huʼapaeʼmo, Ala kava neʼmo Gotigae, huʼa, lokiyakaʼe vekamo maiʼnane. Hogoteka maiʼneka hemeniʼeʼmo neʼmainanageka henagaʼamo maisana vekamo maiʼnane. Kagaemo magoʼe himamukaletiʼmo aepa faika yagaika apateʼnanaʼmofeʼmo kahao ke nehone.

¹⁸ Kaipamo leka neʼapatana kavakamo afole yateʼmo afole aisigekaeʼmo faliʼnaya vayaʼmo agoti huka apatesana afinaʼmo afole neʼaiyaʼmofeʼmo malaga vayaʼmogimo lusi kava huʼa apaipamo leʼa kateʼnae. Kagaemo aliʼyakamo neʼaliya vayaʼmogimo kagaetegati gemo alini eʼa aeʼa hakalo huʼa hapa nepaiya vayanagi muki apaote vayakagi muki vayaʼmogi kagaefeʼmo koli nehaya vayanagi ala apakiʼapimo oʼaliʼnisaya vayanagi ala apaki vayanagi huka miyaʼapimo apamisana afinaʼmo ago afole aiʼniye. Ma mopafi vayaʼmo aliʼa hosu huʼa neʼapataya vayaʼmo alika hosu huka apatesana afinaʼmo ago afole aiʼniye, huʼa huʼnae.

¹⁹ Goti aote mono noʼamo kokuʼnapiʼmo haneʼniya noʼmo yakiʼnigeʼa ageʼnayana ani mono nopiʼmo kotalakemo yafateʼmo avoʼmo kae maleʼniya keʼaepa gemo kesifiʼmo haneʼnigeʼa ageʼnae. Hafosa lamiʼnigeno alino alave alave huteno hakalu hakalu huʼnigeno imimaʼmo aliʼnigeno lusi ko mopa koʼmo aiʼniye.