Leveleseni 10 - The Keyagana NT and 25 OT books

Enisole vekamoʼmo alino kafage ki maleʼniya apepamo aliʼniya gemae

¹ Hutegeʼna ageʼnovana lokiya enisole vekamo kokuʼnapatiʼmo emineʼnigeʼna ageʼnove. Hiya kukenamoʼa yatala kukenamo vailiʼnigeno fugagiʼnaʼmoʼa agenopaleʼmo kino ku aino ateʼniye. Augosafatiʼmo yegegana huno leʼnigeno aiyalaʼmoʼa ata neleya posigana huno haneʼniye.

² Agaemo mago aise mukutomo alino kafage ki maleʼniya mukutomo ayapiʼmo aliʼnigeno aino ata leno haneʼniye. Lamaga aiyamo solovala aniteʼmo aeteno hoga aiyamo mopaleʼmo aeʼnenoʼaeʼmo

³ alopa gefatiʼmo laiyonimoʼa kaekae hugekana agufa gemo huno ge huʼniye. Ge huʼnigenoʼaeʼmo seveniʼa afinaʼmo hakalu hakalu hugekana huno age aiʼniya vekamoʼmo lusi kava huno age aiʼniye.

⁴ Age aiʼnigeʼna aepa faiʼna avoʼmo kaegefeʼmo nehugenoʼaeʼmo mago vekamoʼmo kokuʼnapatiʼmo hunoʼaeʼmo, seveniʼa afinaʼmo hakalu hakalu hugekana huno age aiʼniya vekamoʼmo huʼniya gemo avoʼmo okaeka kagesafiʼmo afaʼa haneno, huno naha paiʼniye.

⁵ Naha paiʼnigenoʼaeʼmo enisole vekamo solovala aniteʼe mopaleʼeʼmo he tino maiʼnigeʼna ageʼnova enisole vekamoʼmo lamaga ayaʼmo kokuʼnategamo alino asagauliʼneno

⁶ apagoʼyamo ataleʼa ge nehaya kavakana huno Goti agiʼaletiʼmo ge huʼniye. Agaemo maige maige huno maiʼneno kokuʼnaʼe muki kokuʼnateʼmo haneʼniya yaʼenagi ma mopaʼe muki ma mopafiʼmo haneʼniya yaʼenagi solovala aniʼe muki solovala anipiʼmo maiʼnaya yaʼeʼmogi huno alo huʼniya vekamo agiʼaletiʼmo lokiya gemo hunoʼaeʼmo, afinaʼapimo ago hano hugiye, huno huʼniye.

⁷ Afinaʼamo afaʼa ohaneʼniyaʼmonanafa napa seveni enisole vekamoʼmo pikulimo nehisigenoʼaeʼmo Gotiʼa ani kavaʼmo huguve, huno huteno alino fala ki maleʼniya kavaʼmo afole aigiye. Aliʼyaʼamo neʼaliya vayaʼmogi agaetegati gemo alini eʼa aeʼa hakalo huʼa hapa nepaiya vayaʼaifeʼmo hapa paiʼniya kavaʼmo afole aigiye.

⁸ Kokuʼnapatiʼmo naha paiʼniya vekamoʼmo halate magoʼe huno naha painoʼaeʼmo, uka alino kafage ki maleʼniya mukumo solovala aniteʼe mopaleʼeʼmo he tino maiʼniya enisole vekamoʼmo ayapiʼmo aliʼniya mukumo aliyo, huno naha paiʼniye.

⁹ Inagi uʼna ani aise mukutomo alino kafage ki maleʼniya mukutoeʼmo namiyo, huʼna huʼnogenoʼaeʼmo, alika no. Kavayafiʼmo lume anugana huno haga kahaugiyaʼmonanafa neka nakaisanategageʼmo kaipafilagamo atu kahaegaiye, huno naha paiʼniye.

¹⁰ Nagaemo ayapatiʼmo ani aise mukutomo alino kafage ki maleʼniya mukutomo aliʼna neʼnogeno navayafilagamo lume anugana huno haga nahauʼniyaʼmonanafa neʼna nakaiʼnogenoʼaeʼmo naipafilagamo atu nahaeʼniye.

¹¹ Naha painoʼaeʼmo, Halate Goti geʼamo muki alu apakufaʼe alu apakufaʼe vayaʼaitegagi muki alu kotega alu kotegamo maiʼnaya vayaʼaitegagi alu apake alu apakemo neʼaiya vayaʼaitegagi yagaiʼa neʼapataya ala kini vayaʼaitegamogi huka afole aisiya kavafeʼmo ava gemo aeka hakalo huka hapa paiyo, huno naha paiʼniye.