Leveleseni 1 - The Keyagana NT and 25 OT books

¹ Gotiʼa alino fala ki maleʼniya gemo Goti aliʼyaʼamo neʼaliya vayaʼmo malage huno afole aisiya kavaʼmo alino apave lisiyafeʼmo Yesu Kalaisiʼmo alino amiʼniye. Kalaisiʼa agaiʼa enisole vekamo alino ateʼnigeno aliʼyaʼamo neʼaliya vekamo Yonitegamo emineʼniye.

² Yoniʼa muki ageʼniya kavafeʼmo avoʼmo kae maleʼniye. Mani gemo Yesu Kalaisiʼa Gotitegati alagi lama geʼamo alino ave liʼniya kavaʼmo haneʼniye.

³ Mani aune gemo lekana paiteʼa siosi vayaʼaifeʼmo aeʼa hakalo huʼa hapa nepaiya vayaʼe afiteʼa akame nehaya vayaʼeʼmo Goti aulena vayaʼamo maiʼnae. Afole aisiya afinaʼmo alagi hogo nehiyaʼmofeʼmae.

Yoniʼmo seveniʼa siosifiʼmo maiʼnaya vayaʼaifeʼmo avoʼmo kae maleʼniya gemae

⁴ Nagaemo Yoniʼnamo Esiya kotega haneʼniya seveniʼa siosifiʼmo maiʼnaya vayaʼmogitapaeʼmo mani gemo avoʼmo kaeʼnove. Gotiʼa hogoteno maiʼniyanageno hemeniʼeʼmo neʼmaiyanageno henagaʼamo alagi maisiya vekamoʼmo fikumo lapa maeno lapamisigeno lapaipamoʼmo falu hino. Goti Aunemeʼamoʼmo muki lokiya himamuʼamo seveniʼa himamuʼamo aliʼniya vekamo Gotiʼa yagaino neʼapateya siyamo aulagamo maiʼniya vekamoʼmo fikumo lapa maeno lapamisigeno lapaipamoʼmo falu hino.

⁵ Yesu Kalaisiʼa Gotifeʼmo lama ge ava gemo nehiya vekamoʼmo faliʼnaya vayapatiʼmo hogoteno alino he tino ateʼniya yege mafaʼneʼamo maiʼniye. Agaemo ma mopafi ala kini vayaʼaiteʼmo yagaino neʼapateya vekaʼapimoʼa fikumo lapa maeno lapamisigeno lapaipamoʼmo falu hino. Agaemo lagaefeʼmo hau ayamopafiʼmo hauʼnigenoʼaeʼmo hosu kavatimo kolaʼaletiʼmo aeno kalo paeno ataleʼniye.

⁶ Agaemo afoʼamo Goti aliʼyaʼamo alisunafeʼmo yagaita apatesuna ala kini vayaʼe mono huta neʼapatona vayaʼeʼmo alino hamaleno lateʼniye. Yesu Kalaisiʼa ha le konali yaʼaʼe himamuʼaʼeʼmo aliteno muki afinaʼmo maige maige huno maino. He, lama ge.

⁷ Afiyo, huʼna, Hiyapiʼmo eminesigeʼa muki vayaʼmogimo agesageʼapaeʼmo agufafiʼmo nili aige faiteʼa atege huʼnaya vayaʼmogiʼeʼmo agegae. Muki ma mopafi alu nofi vaya alu nofi vayaʼmogimo ageteʼapaeʼmo yulagefa aigae. He, alagi lama ge, huno ani kavaʼmo afole aigiye.

⁸ Ala kava neʼmoʼa hunoʼaeʼmo, Nagaemo aliʼna aepa fai maleteʼna aliʼna hano huʼna atesuva vekamo maiʼnove. Hogoteʼna maiʼneʼna hemeniʼeʼmo maiʼnovanageʼna henagaʼaʼeʼmo alagi maiguve. Nagaemo muki lokiyaʼniʼe vekamo maiʼnove, huno huʼniye.

Yoniʼa Kalaisiʼmo ageʼniya kavafeʼmo huʼniya gemae

⁹ Nagaemo Yoniʼnamo konagatapimoʼnamo maiʼnove. Yesupiʼmo maiʼnetaeʼmo magokepi lagafu kige Yesuʼa yagaino nelateyategamo maige oʼataleta atafauta alagi huta maige nehune. Nagaemo Goti alagi lama geʼe Yesufeʼmo ava geʼeʼmo aeʼna hakalo huʼna hapa paiʼnovaʼmofeʼmo aliʼa nahafaitalageʼna eʼna Patamosi ani agoʼnanenafiʼmo maiʼnove.

¹⁰ Ala kava neʼmo afinaʼmo afole aiʼnigeʼna Goti Aunemeʼafiʼmo maiʼneʼnaeʼmo naune kavaʼmo huʼna maiʼnogenoʼaeʼmo nakamelegatiʼmo alopa gefatiʼmo pikuli hugekana agufa gemo huʼnigeʼna afiʼnove.

¹¹ Ani gemoʼmo hunoʼaeʼmo, Nagaemo aliʼna aepa faiʼna ateteʼna aliʼna hano huʼna atalesuva vekamo maiʼnove. Agesana kavafeʼmo avoʼmo kaetekaeʼmo seveniʼa siosimo Efasasi siosifinagi Simena siosifinagi Pegamamu siosifinagi Taiyataila siosifinagi Satisi siosifinagi Filatefiya siosifinagi Leyotisiya siosifiʼmogi huʼa maiʼnaya vayaʼaitegamo ani avoʼmo atalesanageno ugiye, huno naha paiʼniye.

¹² Naha paiʼnigeʼna agesuvafeʼmo nakamelegamo aiʼna afe leʼna ageʼnovana seveniʼa aise hiʼyalamuteʼmo magoke magoke lamumo maleʼnaya hiʼyalamuʼmo goli yafatetiʼmo alo huʼnaya hiʼyalamuʼmo haneʼnigeʼna ageʼnove.

¹³ Mago vekamo vemo mafaʼnegana vekamo hiʼyalamu folagapiʼmo maiʼneno yatala kukenamo vaitalegeno aiyalega uno lamiʼnigeno goli yafatetiʼmo alo huʼnaya kenamo haifiʼyaleʼmo vaino aliteno maiʼniye.

¹⁴ Agenopamoʼe ayokaʼmoʼeʼmo yaveyave sipisipi ayokakana huno yaveyaveʼage huʼniye. Aulagalaʼmoʼa ata vaikana huno leʼniye.

¹⁵ Aiyalaʼmoʼa haesa yafaʼmo sitopufi kaeʼnageno aeno ha neleya kava huno aeno ha nele. Nagaemo agemo afiʼnovana alopa ani haʼyamoʼmo age aigekana huno ge huʼniye.

¹⁶ Agaemo lamaga ayapiʼmo seveniʼa kanefiʼmo aliʼnigeno avayafatiʼmo aluga alugaʼamo ave neʼneya naipemo emineʼniye. Augosafatiʼmo yegemo haineno feluga kuku huteno neleya kava huno leʼnigeʼna ageʼnove.

¹⁷ Ageteʼnaeʼmo faliʼniya vekagana huʼna aiyafiʼmo asagauʼna aiʼna maiʼnogenoʼaeʼmo lamaga ayatetiʼmo nagufaleʼmo maleʼnenoʼaeʼmo, Koli osuvo. Hogote vekamo maiʼneʼnaeʼmo henaga vekamo maiʼnove.

¹⁸ Afaʼa neʼmauva vekamo maiʼnove. Afiyo, huno, faliʼnovanageʼna maige maige huʼna maiʼna hano osuʼna afaʼa maiguve. He, lama ge. Nagaemo kitamo yakiʼna apatesuva kiʼmo aliʼnovaʼmofeʼmo falisayafeʼmofi afaʼa maisayafeʼmofi huʼna muki vayaʼaiteʼmo yagaiʼna neʼapatove.

¹⁹ Kagaemo ageʼnana kavafenagi hemenimo haneʼniya kavafenagi henagaʼamo afole aisiya kavafeʼmogi huka avoʼmo kao.

²⁰ Seveniʼa kanefiʼmo lamaga nayapiʼmo haneʼnigeka ageʼnana kanefiʼe seveniʼa goli yafatetiʼmo alo huʼnaya hiʼyalamuʼefeʼmo aepaʼamo haneʼniyana alino fala ki maleʼniya kavafeʼmo aepaʼamo kaha paiguve. Seveniʼa kanefiʼmo haneʼniya kava huʼa seveniʼa siosifiʼmo apa vayaʼmo maiʼnae. Seveniʼa aise hiʼyalamuteʼmo magoke magoke lamumo maleʼnaya hiʼyalamuʼmo haneʼniya kava huno seveniʼa siosiʼamo haneʼniye.