Kolosi 4 - The Keyagana NT and 25 OT books

¹ Aliʼyaʼmo afoʼamogitapae, huʼna, yagaitapa neʼapataya vayaʼmo maiʼnaya kava huno Ala kava netapimo kokuʼnapiʼmo maiʼniye, huta ago afiʼnayaʼmofeʼmo aliʼyatapimo neʼaliya vayaʼaitegamo fatago kavaʼmo hutapa alagepa yaʼmo apamiyo.

Nunumuʼmo nehutapaeʼmo alagepa kavaʼmo hiyo, huno huʼniya gemae

² Nunumuʼmo nehutapaeʼmo oʼataleta alagepa huta kava yagaiʼnetapa Gotifekeʼmo hao ke hetapa nunumuʼmo huge huge hutapa maiyo.

³ Nunumuʼmo nehutapaeʼmo Goti geʼamo aeta hakalo huta hapa paisuna kaʼmo valino latesigeta Kalaisifeʼmo ava gemo hogoteno alino fala ki maleʼneno hemenimo alino lave liʼniya geʼamo hapa paisunafeʼmo nunumuʼmo hutapa lateyo. Mani gelefeʼmo kalavusi huʼa nateʼnae.

⁴ Gotiʼa alagepa huʼna aeʼna hakalo huʼna hapa paisuvafeʼmo hauʼniye. Ani kavaʼmo hisuvafeʼmo nunumuʼmo hutapa nateyo.

⁵ Lapakaemo malaga vayaʼaifeʼmo alagepa huta lapakesamo afitetapa alagepa kavaʼmo hiyo. Lapakaemo alagepa kavaʼmo hisaya afinaʼmo ago hano hugiyanagi alagepa kavaʼmo hutapa alagepa aliʼyaʼmo aliyo.

⁶ Haga gemo nehane, huʼa hisayafeʼmo ge hugefeʼmo alagepa geʼageʼmo hiyo. Geʼapileʼmo aeta atagaina hutapa hapa paisayafeʼmo alagepa huta lapakesamo afitetapa hapa paiyo.

Poloʼa lole vekalaʼmo alino anateʼnigeʼana uʼnaʼa gemae

⁷ Tikikasiʼa lahau layamopafiʼmo lahauʼniya konagatimoʼmo oʼataleno muki afinaʼmo Ala kava neʼmo aliʼyaʼamo lagaeʼeʼmo lokaeno neʼaliya vekamoʼmo uno muki kavafeʼmo nava gemo huno lapa paigiye.

⁸ Agaemo uno haiya agufa kava hutapa maiʼnafi huno lapaketenoʼaeʼmo lapaipamo alino lokiya vaino lapatesiya gemo lapa paisiyafeʼmo aliʼna atesugeno ugiye.

⁹ Avagi huno visiya vekamo Onesimasifeʼmo lahau layamopafiʼmo lahauʼniya konagatimoʼmo aliʼyaʼamo oʼataleno muki afinaʼmo alagepa aliʼyaʼmo neʼaliya vekamo lapakaepati vekamo maiʼniye. Anakaemo uʼanaeʼmo manileʼmo muki afole aiʼniya kavafeʼmo ava gemo huʼana lapa paigaʼae.

Kolosi vayaʼaifeʼmo ge apamamaeʼnaya gemae

¹⁰ Alisitakasiʼa nagaeʼeʼmo kalavusimo huʼniya vekamoʼmo ge lapamamaeʼniye. Makiʼa Manamasi avuʼamoʼmo ge lapamamaeʼniye. Agaefeʼmo, esigetapaeʼmo alita falu fala huta atetetapa neʼyaʼmo amiyo, huʼna lapa paiʼnove.

¹¹ Yesuʼa mago agiʼamo Yasitasiʼa ge lapamamaeʼniye. Mani loleʼe magoʼe vayaʼmo Yu nofi vayaʼmo maiʼneʼa Gotiʼa yagaino apatesiya kavaʼmo afole aisiyafeʼmo nagaeʼeʼmo lokaeʼa aliʼyaʼmo neʼaliye. Alagepa huʼa naha maeʼnageno naipamoʼmo falu huʼniye.

¹² Epafalasiʼa lapakaepati vekamoʼmo Kalaisi aliʼyaʼmo neʼaliya vekamoʼmo ge lapamamaeʼniye. Lapakaemo alopa Kalisitini vayaʼmo hamaletetapa oʼataleta lokiya vaita maiʼnetapa Gotiʼa hauʼniya kavaʼmo agetetapa akame hisayafeʼmo lusi kava huno nunumuʼmo huno nelapate.

¹³ Agaemo lapakaetegamogi Leyotisiya taonifiʼmo maiʼnaya vayaʼaitegamogi Hilapolisi taonifiʼmo maiʼnaya vayaʼaitegamogi huno lokiya kavaʼmo huno agesa afifi huno aliʼyaʼmo neʼaligeʼnaeʼmo lapa nepauve.

¹⁴ Lukiʼa lahau layamopafiʼmo lahauʼniya lota vekaʼe Nimasiʼeʼmo ge lapamamaeʼnaʼae.

¹⁵ Lagaefeʼmo Leyotisiya konagatimogiʼe Nipaʼeʼmo siosi vayaʼmo noʼafiʼmo aliʼa anupa huʼa maiʼnaya vayaʼaifeʼmo ge apamamaetapa hapa paiyo.

¹⁶ Mani avoʼmo alitapa lekana paitetapaeʼmo Leyotisiya siosi vayaʼmogi lekana paisayafeʼmo apamiyo. Ani kavaʼmo huʼa Leyotisiya konagatimogitapamo mago avoʼmo lapamisagetapa lekana paiyo.

¹⁷ Lapakaemo Akipasifeʼmo Ala kava neʼmoʼa kamiʼniya aliʼyakamo alika hano huvo, hutapa ha paiyo.

¹⁸ Ani gemo huteʼnaeʼmo hemenimo nagaemo avoʼmo nekaeya vekamo ayapatiʼmo avo kayoʼmo aliʼna avoʼmo kaeʼnaeʼmo, Poloʼnamo ge lapamamaeʼnove, huʼna avoʼmo nekaove. Kalavusifiʼmo maiʼnovanagi lapake okanino. Gotiʼa fikumo lapa maeno lapamino. He lama ge.