Kolosi 3 - The Keyagana NT and 25 OT books

¹ Gotiʼa Kalaisiʼeʼmo magokepi alino he tino lapateʼniyaʼmofeʼmo kokuʼnapi haneʼniya yafeʼmo lapaʼye huʼninagetapa kahauya hiyo. Anileʼmo Kalaisiʼa Goti lamaga haopaleʼmo siyaʼaleʼmo maiʼniye.

² Ma mopafi yafeʼmo lapakesamo oʼafitapa muga anaga kotegamo nehaneya yafekeʼmo lapakesamo afiyo.

³ Lapakaemo faliʼnageno afaʼa neʼmaiya yaʼmo alino fala kino ateʼnigeno Kalaisiʼeʼmo magokepi lokaeno Gotipiʼmo nehaneyaʼmofeʼmae.

⁴ Kalaisiʼa afaʼa neʼmauna yaʼmo afoʼamoʼmo vekamo afole aisigetapaeʼmo ha le konali yaʼamo agaeʼeʼmo alisageʼa lapakegae.

⁵ Aligayaʼmofeʼmo ma mopafi haneʼniya lapakufafiʼmo alu ya alu yatapiletiʼmo nehaya kavaʼmo amagita falita ataleyo. Kumai kavanagi oʼaniʼya kavanagi hosu lapaipa nekaliya kavanagi hosu kavafeʼmo lapaka neteya kavanagi ma mopafi yafeʼmo lapaʼye nehiya kavanagi hutapa amagitapa falita ataleyo. Ma mopafi yafeʼmo hapaʼye nehisiya vayaʼmogi aigofe gotitefeʼmo mono nehae.

⁶ Goti geʼamo akame nosaya vayaʼmogi ani agufa kavaʼmo nehayaʼmofeʼmo aipamo leno neʼapateyanageno kayoʼmo apamigiye.

⁷ Hogotetapa ani agufa hosu kateʼmo neʼutapaeʼmo hosu kavapiʼmo maiʼnayaʼmonanafa

⁸ hemenimo muki mani agufa hosu kavaʼmo ataleyo. Lapaipamo olege lapai vaitapa oʼapatege hanageke yaʼmo alita oʼapamige huta faipa huta oʼapatege hosu kigi yokalo gemo osuge lapaʼye hisiya kavaʼmo alino afole aino atesiya agufa gemo osuge hutapa maiyo.

^9-10 Lapakaemo atafa vekatapimoʼmo atalege atafa vekatapimoʼa nehiya kavaʼmo atalege hutetapa saufa vekatapimo alita vaiʼnayaʼmofeʼmo konagatapieʼmo aigofe gemo osiyo. Gotiʼa saufa vekatapimo alo huʼniyanagetapa Gotina ageta aeto nehutapaeʼmo agaekana hutapa maisayafeʼmo saufa vekatapimo alino saufa vekamo hamaleno nelapate.

¹¹ Nelapateyaʼmofeʼmo saufa vayaʼmo maiʼnetapaeʼmo Yu nofi vayapatiʼmo oʼmaiʼnaya vayanagi Yu nofi vayapatiʼmo maiʼnaya vayanagi apakufamo olagauʼnaya vayanagi apakufamo lagauʼnaya vayanagi alu apake neʼaiya vayanagi kahaufilaga vayanagi kalavusi aliʼyaʼmo neʼaliya vayanagi afaʼa neʼmaiya vayanagi huʼa hailami salami huʼa noʼmaifa Kalaisiʼa agaiʼageʼmo muki kavaʼmo afoʼamoʼmo maiʼnenoʼaeʼmo muki alu vaya alu vayaʼai apaipafiʼmo neʼmaiye.

¹² Gotiʼa lapakaefeʼmo hau ayamopafiʼmo hauʼnigeno ago lekana paino lapateteno lapavaleno lapaote lapateʼniyaʼmofeʼmo lapau huta apatege alitapa lapao yaʼmo huge ina agufa vayaʼmo maiʼnone, hutapa lapakesamo afige yagu yaga kavaʼmo hutapa apatege lapakaetegamo hosu kavaʼmo nehisagetapaeʼmo afaʼa maiʼnetapa falu fala lapaipamo kalita apatege hiyo.

¹³ Hosu kavaʼmo lapakaepatiʼmo hisagetapaeʼmo konagatapilegamo afalu afalu kavaʼmo hutapa vase kavaʼmo huge hosu kavaʼapimo alita atalege hutetapa magokepiʼmo lokaetapa maiyo. Mago konagatapimoʼmo konagaʼaeʼmo, nagaetegamo hosu kavaʼmo huʼniye, huno agesamo afiʼnisiyaʼmoʼmo Ala kava neʼmoʼa hosu kavatapimo alino ataleʼniya kava hutapa hosu kavaʼamo alita ataleyo.

¹⁴ Mani kavaʼmo nehutapaeʼmo hogote kavaʼmo hutapa lapau lapayamopafiʼmo lapainageno alagepa huno magokepi alino lokaeno lapateno.

¹⁵ Gotiʼa lapaipamo alino falu huno lapateʼniya kavaʼmoʼa lapaipaleʼmo yagaino lapateno. Gotiʼa magoke vayaʼmo maisageno lapaipamoʼmo falu hisiyafeʼmo keya aeno ge huʼniye. Ani kavaʼmo hutapa maiʼnetapaeʼmo Gotifeʼmo hao ke heyo.

¹⁶ Lapaipamo alo higenoʼao Kalaisifeʼmo ava gemo lapaipafiʼmo magoʼe huno hanege hanege huno alagi haneno. Alagepa huta lapakesamo afiʼnetapa konagatapimo afalu afalu kavaʼmo hutapa alita apaya maletapaeʼmo hosu kavaʼmo osisayafeʼmo ehetapiye, huta hapa paiyo. Lapaipafiʼmo Gotifeʼmo hao ke nehetapaeʼmo samu yokemo huge mono yokemo huge Ala kava neʼmo agiʼaleʼmo aliʼa neʼasagaya yokemo huge hutapa maiyo.

¹⁷ Muki agufa kavaʼmo huge muki agufa gemo huge nehisayana Ala kava neʼmo Yesu agiʼalefeʼmo hutetapa agaetetiʼmo afotimo Gotifeʼmo hao ke heta maiyo.

Afamo anagaʼmogimo hisaya kavafeʼmo huʼniya gemae

¹⁸ Aʼnemogitapae, huʼna, Ala kava nepiʼmo maiʼnisaya aʼnemogimo hisaya agufa kavaʼmo hutapa anautapimogi apaiyafiʼmo maiʼnetapa geʼapimo afiyo.

¹⁹ Anauʼapimogitapae, huʼna, aʼnetapilegamo lokiya kavaʼmo osutapa apakaefeʼmo lapau lapayamopafiʼmo lapaino.

²⁰ Mafaʼnemogitapae, huʼna, muki kavatefeʼmo itatapi afotapimogi geʼapimo afisagenoʼaeʼmo Ala kava neʼmoʼa lusi kava huno amuse huno lapategaiyaʼmofeʼmo ani kavaʼmo hiyo.

²¹ Afoʼapimogitapae, huʼna, mafaʼnetapimogimo apaipamo lesiya agufa kavaʼmo osiyo fiku yanageno apaipamoʼmo kana hugiyanagi.

²² Aliʼyaʼmo neʼaliya vayaʼmogitapae, huʼna, fiku yanagetapa aliʼyaʼmo afoʼamogimo amuse huʼa lapatesayafeʼmo apaulagaleʼmo maiʼnetapaeʼmo geʼapimo neʼafiye. Gotifeʼmo koli hutetapa muki afinaʼmo lapaipafatiʼmo geʼapimo afiyo.

²³ Muki alu aliʼya alu aliʼyaʼmo neʼalitapaeʼmo vayaʼaitefeʼmo aliʼyaʼmo noʼalufa Ala kava netefeʼmo mani aliʼyaʼmo neʼaluve, huteta lapayamukiki hutapa aliʼyaʼmo aliyo.

²⁴ Ala kava neʼmo Kalaisi aliʼyaʼamo neʼaliyaʼmofeʼmo ago afiʼnayana Ala kava neʼmoʼa alo hu maleʼniya yapatiʼmo miyatapimo lapamigiye.

²⁵ Gotiʼa hosu kavaʼmo nehisaya vayaʼmo agaiʼa aulagaleʼmo haiya agufa vayaʼmo maiʼnafi huno agesamo oʼafigifa anonaʼapilefeʼmo hosu miyaʼapimo apamigiye. Gotiʼa muki vayaʼmo magoke agufa kavatetiʼmo alino fako huno neʼapate.