Kolosi 2 - The Keyagana NT and 25 OT books

¹ Nagaemo lapakaeʼe Leyotisiya taonifiʼmo maiʼnaya vayaʼe oʼnageʼnaya vayaʼefeʼmo naipafiʼmo nahausoli huʼneʼna nayamukiki huʼna aliʼyaʼmo neʼaluva aliʼyafeʼmo nava gemo afisayafeʼmo nahauʼniye.

² Lapaipamoʼmo atete osuno lokiya vaino haneʼnisigetapa lapau lapayamopafiʼmo lapauʼnisigetapa magoke lapaipa lapakesamo alita maisayafeʼmo aliʼyaʼmo neʼaluve. Ani kavaʼmo huta maiʼnetapaeʼmo Gotiʼa hogoteno alino fala kino ateʼneno alino lapaveliʼniya vekamo Kalaisiʼmo alagepa hutapa ageta aeto hutetapa lole lapakesamo oʼafitapa lusi kava huta magoke lapakesamo afisayafeʼmo nahauʼniye.

³ Hogote kagemi yaʼapimo aliʼa fala kiʼa neʼmalaya kava huno Kalaisipiʼmo muki alagepa huʼa afiteʼa agesaya kavaʼe afisaya kavaʼeʼmo fala kino haneʼniye.

⁴ Mago vayaʼmogimo haga lapausiya agufa gemo huteʼapaeʼmo lapakesamo faiteʼa humi olapatesayafeʼmo mani gemo lapa nepauve.

⁵ Nagufaʼamo lapakaeʼeʼmo lokaeʼna oʼmaiʼnovaʼmonanafa nauneʼnameʼamoʼmo lapakaeʼeʼmo magokepi lokaeno maiʼnigeʼnaeʼmo lapakeʼnovana Kalaisifeʼmo lokiya vaitapa lapakesamo afita fatago nehutapaeʼmo magokepi lokaeta maiʼnageʼna lapaketeʼnaeʼmo namogaga neʼauve.

Kalaisipiʼmo alagepa huʼa neʼmaiya kavafeʼmo huʼniya gemae

⁶ Lapakaemo Kalaisi Yesufeʼmo hutapaeʼmo, Ala kava netimo maiʼniye, hutetapa aliʼnaya kavaʼmo hutapa agaepiʼmo mailita mailita viyo.

⁷ Maiʼnetapaeʼmo yosamoʼmo hafuʼyamo neʼaeya kava hutapa agaeteʼmo atafauta alagi hutapa maiyo. Yafateʼmo noʼmo faiʼa neʼataya kava hutapa Kalaisiʼmo atafauta alagi huʼnetapaeʼmo alita lapaya maleʼnona geleʼmo lokiya vaitapa maiʼnetapaeʼmo magoʼe magoʼe hutapa lusi kava huta hao ke hetapa maiyo.

⁸ Fiku yanageʼa mago vayaʼmogimo ma mopafi vayaʼmogi ageteʼa afiʼnaya agufa gemo huge afa aigofe gemo huge huʼa humi lapategayanagi ehetapiye. Mani gemo Kalaisitegatiʼmo noʼmefa apakinago vayaʼmogi nehaya agufa gemo ma mopafi kavaʼmo ani kavaʼmo huno afole aiʼniye, huʼa nehaya geeʼmo apakesamo neʼafiya yaʼapifatiʼmo neʼe.

⁹ Muki Goti aipa agesamo Kalaisi aipa agesafiʼmo alagi lama ge huno hanege hanege huno nehane.

¹⁰ Agaemo muki apauneʼapameʼe vayaʼmo yagaiʼa neʼapataya vayaʼaiteʼe ala kava vayaʼaiteʼeʼmo yagaino neʼapateya vekamo maiʼnigetapaeʼmo agaepiʼmo maiʼnageno agaepiʼmo haneʼniya yaʼamo lapakaepiʼmo havai teʼniye.

¹¹ Kalaisipiʼmo maiʼnagenoʼaeʼmo vayaʼmogi lapakufamo lagauʼa olapateʼnafa Kalaisiʼa lapakufamo lagaugekana huno hosu kavaʼmo nehiya atafa lapaipa lapakesamo alino ataleʼniye.

¹² Ani kavaʼmo haneʼnigeʼa aniʼmo faleʼa nelapatagenoʼaeʼmo Gotiʼa lapakesamo afita fatago nehaya kavatetiʼmo Kalaisiʼeʼmo kanolufiʼmo kino lapateteno Kalaisiʼeʼmo magokepi alino he tino lapateʼniye. Gotiʼa Kalaisiʼmo alino he tino ateʼniya vekamo himamuʼaletiʼmo lapaipafiʼmo aliʼyaʼmo aliʼnigetapa lapakesamo afita fatago huʼnae.

¹³ Hosu lapakufamo olagautapa hosu kavapiʼmo maiʼnetapaeʼmo faliʼnaya vayakana huta maiʼnagenoʼaeʼmo Kalaisiʼeʼmo alino he tino lapateʼniye. Gotiʼa muki hosu kavatimo alino ataletenoʼaeʼmo

¹⁴ anonatilefeʼmo avoʼmo kae maleʼniya gemo ani kavaʼmo hiyo ina kavaʼmo osiyo, huno huʼniya keʼaepa gemo aeno kalo paeno ataleʼniye. Gotiʼa ani gemoʼmo aeno lagaseno kame huno lateʼniya gemo alino ataleteno malipu yosaleʼmo nili aiʼniye.

¹⁵ Kalaisiʼa falitenoʼaeʼmo yagaiʼa neʼapataya vayaʼe ala kava vayaʼeʼmo agaiʼamo ago aeno apakaseteno kamemo hisaya yaʼapimo apayapatiʼmo hapafaleno nofi kino apateteno vayaʼai apaulagaleʼmo heno apavayu hulino uʼniye.

¹⁶ Ani kavaʼmo huʼniyaʼmofeʼmo vayaʼmogimo, ani neʼyaʼmo neyo, ina neʼyaʼmo oʼneyo, huʼa huteʼapaeʼmo, hopa afinafeʼmofi saufa kaile hopa afinafeʼmofi sapati afinaʼmo maiʼa haga nelaya afinafeʼmofi, huʼa, alita aote hu maletetapa akame hiyo, huʼa lapa paisagetapaeʼmo akame hisaya kavaʼmo ohaneʼniye.

¹⁷ Mani agufa kavaʼmo afole aisiya kavafeʼmo aune kavaʼmo haneʼniyaʼmonanafa Kalaisi auneʼamo ageʼnayana agufaʼamo ago afole aiʼniye.

¹⁸ Mago vayaʼmogimo amega apakufaletiʼmo apakaiʼapi apakiʼapileʼmo aliʼa afepi neʼapataya kavafeʼmo amuse huteʼa enisole vayaʼaifeʼmo mono nehae. Apakaemo kavatapimo aliʼa fako huʼa lapateteʼapaeʼmo, hosu kavaʼmo nehae, huʼa hisaya gemo oʼafiyo. Oʼageʼnaya kavaʼmo agesayafeʼmo apakaiʼapimo fikumo himuʼnamu kavaʼmo nehae. Atafa apaipafatiʼmo, ala vayaʼmo maiʼnone, huʼa fikumo apakesamo neʼafiye.

¹⁹ Apakaemo agufamo agenopagana huno maiʼniya vekamo Kalaisiʼmo oʼatafauʼa afaʼa ataleʼnae. Kalaisiʼa agufaleʼmo yagaino neʼategenoʼaeʼmo aeno hapaiʼniya yaʼaʼe aganunaʼeʼmo aeno haniteno alino magokepi lokaeno ateʼnigeno Goti himamuʼaletiʼmo ko nesiye.

^20-21 Lapakaemo ma mopafiʼmo hogoteʼa aepa faiʼnaya gelefeʼmo faliʼnisayaʼmoʼmo na kava higetapa ani ya oʼaliyo, ina neʼyaʼmo oʼneyo, ani yateʼmo ame oʼaliyo, huʼa nehaya gemo ma mopafi vayakana hutapa ma mopafi vayaʼai keʼaepa geʼapimo akame nehae.

²² Mani keʼaepa gemo neʼa hano hisayafeʼmo haneʼniye. Ma mopafi vayaʼai keʼaepa gemo aliʼa apaya neʼmalaya keʼaepa gegeʼmo haneʼniye.

²³ Mani agufa keʼaepa gemoʼa mono hisayafeʼmo alino he tino neʼapate. Aigofe gemo huteʼa apakufamo aliʼa afepi apateteʼa apakafu kisiya yaʼmo aliʼa apakufamo amisayafeʼmo alino he tino neʼapate. Neʼapateyaʼmofeʼmo afiteta ageʼnona kavaʼmo haneʼniye, huʼa apakesamo neʼafiyaʼmonanafa mani agufa keʼaepa gemoʼmo apakufamoʼmo hauʼniya kavateʼmo yagaiʼa atesayafeʼmo hapa noʼmae.