Himulu 9 - The Keyagana NT and 25 OT books

Ma mopafi seli mono nopiʼmo mono huʼnaya kavafeʼmo huʼniya gemae

¹ Hogote kotalakemo Gotiʼa apamiʼnigeʼa mono nehaya kavatefeʼmo keʼaepa gemo hanege ma mopafi mono noʼmo hanege huʼniye.

² Mago seli mono nopiʼmo kenaletiʼmo aeʼa akani maleʼnageno lole noʼmo haneʼniye. Afelaga noʼmo agiʼamo aote mono none. Ani nopiʼmo lamu hanege hiʼyalamuʼmo hanege huʼniye. Hiʼyalamuteʼmo peleti mayamo Gotina neʼamiya peleti mayamo haneʼniye.

³ Kenaletiʼmo aeʼa akani maleʼnaya noʼmo agiʼamo alagi aote mono noʼmo haneʼniye.

⁴ Ani nopiʼmo hiʼyalamuʼmo goli yafatetiʼmo alo huʼnaya hiʼyalamuʼmo haneʼniye. Ani hiʼyalamuteʼmo alagepa atumo neʼaiya yaʼmo kaeʼnae. Mago kesimo agiʼamo kotalake kesimo yosaletiʼmo alo huteʼa goli yafatetiʼmo yosaleʼmo fale aiʼa ati kae maleʼnaya kesimo ani nopiʼmo haneʼniye. Ani kesifiʼmo goli yafa yuvapamo hanege Eloni hayopa kayoʼafatiʼmo ausisi aeʼniya hayopa kayoʼmo hanege lole yafatalateʼmo kotalakemo avoʼmo kae maleʼniya yafatalaʼmo hanege huʼniye. Yuvapafiʼmo mago neʼyaʼmo kokuʼnapatiʼmo emineʼniya neʼyaʼmo agiʼamo manamo haneʼniye.

⁵ Lole enisole vekalaʼmo ha le vekalaʼmogani anauneʼalaʼmo kesileʼmo he tiʼana anateʼnaʼae. Gotiʼa aipamo falu huno apatesiyafeʼmo afumo kolatetiʼmo aiʼa fuli fuli nehaya yateʼmo hanakumo ataleʼana yagaiʼnaʼae. Hemenimo ani kavafeʼmo magoʼe huta alagi ava gemo afaʼa osugune.

⁶ Inagi muki ani yakoʼmo alo huʼa maleʼnageʼapaeʼmo mono huʼa neʼapataya vayaʼmogi muki afinaʼmo afelaga nopikeʼmo uʼa haiʼa aliʼyaʼmo alite alite huʼnae.

⁷ Huʼnayaʼmonanafa hogote vekamo mono huno neʼapateya vekamokeʼmo ani anaga nopiʼmo muki kafugaʼae kafugaʼaeʼmo magoke afinaʼmo uno haite haite huʼniye. Afaʼa uno ohaiʼnifa afumo amagino kolaʼamo yuvapafiʼmo lakino alinino uno haino agaiʼa hosu kavateʼe muki vayaʼai hosu kavaʼapileʼefeʼmo Gotiʼmo amiʼniye.

⁸ Goti Aunemeʼamoʼmo ani kavaʼmo aepaʼaeʼmo hunoʼaeʼmo, hogote seli mono noʼmo afaʼa haneʼniya afinaʼmo anaga aote mono nopiʼmo vayaʼmo uʼa haisaya kaʼmo afole yateʼmo ohaneʼniye, huno huʼniye.

⁹ Ani agufa aune kavaʼmo hemeni afina kavafeʼmo huʼniye. Alino apave linoʼaeʼmo, fikumo neʼamiya kavaʼmoʼe afumo amagiʼa neʼamiya kavaʼmoʼeʼmo mono nehaya vayaʼai apakupi mafaʼnemo alagi alino alagepa huno oʼategaiye.

¹⁰ Ani agufa kavaʼmo amega apakufale kavaʼmo haneʼniyana neʼyanagi aninagi sese nehaya kavanagi huno haneʼniye. Ani kavaʼmo haneme haneme neʼesigenoʼaeʼmo saufa afinaʼmo Gotiʼa alino alagepa huno apatesiya afinaʼmo afole aisigenoʼaeʼmo hano hugiye.

¹¹ Ani kavaʼmo haneʼniyaʼmonanafa Kalaisiʼa alagepa kavaʼmo afole aisiya kavatefeʼmo hogote vekamo mono huno neʼapateya vekamoʼmo ago aeno agaseʼniya alagepa seli mono nopiʼmo afole aiʼniye. Vayaʼmogimo ani seli mono noʼmo okige Gotiʼa ma mopamo alo huʼniya afinaʼmo okige huʼniye.

¹² Agaemo mememo kolaʼaletiʼe aikeli pulumakamo kolaʼaletiʼeʼmo aote mono nopiʼmo uno ohaiʼnifa agaiʼa kolaʼaletiʼmo muki afinatefeʼmo magoke afinaʼmo alagi uno haitenoʼaeʼmo maige maige huta maisunafeʼmo alagi hatu maeno lateteno uno haiʼniye.

¹³ Mono huʼa neʼapataya vayaʼmogimo pulumakamo kolaʼmo alige mememo kolaʼmo alige aikeli pulumakamo amagiʼa atafiʼmo kaeʼnaya laʼnefamo alige huʼneʼa vayaʼai apakufaleʼmo aiʼa fuli fuli huʼa faleʼa apateteʼapaeʼmo mono hisayafeʼmo apakufaletiʼmo aeʼa kalo paeʼa apateʼnae.

¹⁴ Afumo kolaʼmoʼa vayaʼmogi amega apakufaleʼmo aeno kalo paeno apaeʼniyaʼmonanafa afaʼa neʼmaiya yaʼmo neʼapamiya Goti aliʼyaʼamo alisayafeʼmo Kalaisi kolaʼamoʼa magoʼe huno lapakupi mafaʼnemo falisaya kavaʼmo aliʼyaʼalefeʼmo aeno kalo paeno lapategaiye. Agaemo hosu kavaʼamo alagi ohaneʼniya vekamo maige maige huno neʼmaiya Aunemeʼaletiʼmo agaiʼa agufamo Gotiʼmo amiʼniye.

¹⁵ Ani kavaʼmo huʼniyaʼmofeʼmo saufa kotalakemo folagapi vekamo maiʼniye. Agaemo Gotiʼa keya aeno ge huʼniya vayaʼaifeʼmo polomasi gemo hunoʼaeʼmo, lapamiguve, huno huʼniya alagepa yaʼmo hanege hanege huno hanesiya yaʼmo mafaʼneʼapimogi muki afoʼapimogi yaʼmo neʼaliya kava huʼa alisayafeʼmo atafa kotalakemo amagiʼa ataleʼnaya vayaʼai hosu kavaʼapifatiʼmo miya faino hatu maeno apatesiyafeʼmo faliʼniye.

¹⁶ Mago vayaʼmogi manu gemo huʼapaeʼmo, kagemi yaʼnimo aliyo, huʼa hapa paiteʼa falisageʼapaeʼmo afaʼa aligayaʼmonanafa ofaliʼa afaʼa maiʼnisageʼapaeʼmo oʼaligae.

¹⁷ Afaʼa neʼmaiya afinaʼmo manu gemo hu maleʼnaya gemo afaʼa nehaneyaʼmonanafa falisagenoʼaekeʼmo ani hu maleʼnaya manu gemo afole aigiye.

¹⁸ Ani kavaʼmo huno Gotiʼa atafa kotalakemo afaʼa fikumo osuʼnifa kotalakemo afole aisiyafekeʼmo kolatetiʼmo ani kavaʼmo huʼniye.

¹⁹ Ani kavatefeʼmo Moseseʼa muki keʼaepa geʼamo muki vayaʼaifeʼmo hapa paiteno aikeli pulumakaʼe memeʼeʼmo amagiteno kolaʼamo anipiʼmo laki maleʼneno sipisipimo haesa ayokaʼmo yosa akopamo agiʼamo hisopu akopaleʼmo maleno ki maleʼneno kolapiʼmo aeteno keʼaepa gemo haneʼniya mukuleʼe muki vayaʼai apakufaleʼeʼmo aino fuli fuli huʼniye.

²⁰ Agaemo hunoʼaeʼmo, mani kolaʼmoʼa Gotiʼmo akame hiyo, huno hu maleʼniya kotalakemo alino afole aino ateʼniye, huno hapa paiʼniye.

²¹ Ani kava huno mono nehaya yateʼe seli mono noteʼeʼmo aino fuli fuli huʼniye.

²² Vayaʼmogi keʼaepa gemo akame hisayafeʼmo alagi hogoʼamo muki hosu kavaʼapimo afumo kolatetiʼmo aeʼa kalo paeʼa atalesaya kavaʼmo huʼnae. Kolaʼmo aino olakiʼnisiyaʼmoʼmo Gotiʼa vayaʼai hosu kavaʼapimo alino oʼatalegaiye.

Kalaisiʼa faliteno hosu kavaʼapimo alino ataleʼniya gemae

²³ Ani kavaʼmo haneʼniyaʼmofeʼmo apakaemo afumo kolatetiʼmo ma mopafi mono kavaʼmo huteʼa kokuʼnapi aune kavatefeʼmo aeʼa kalo paeʼa ataleʼnayaʼmonanafa kokuʼnapi yaʼmoʼa aeno kalo paeno atalesiyafeʼmo afumo amagiʼa amiʼnaya ofalinimo ago aeno agaseʼniya ofaliniletiʼmo aeno kalo paeno ataleʼniye.

²⁴ Ani kavatefeʼmo Kalaisiʼa aote seli mono noʼmo vayaʼmogi ki maleʼnaya mono nopiʼmo lama ge aune mono nopiʼmo uno ohaiʼnifa laha maesiyafeʼmo kokuʼnapiʼmo Goti haopaleʼmo uno haiʼniye.

²⁵ Yu vayaʼaiteʼmo hogote vekamo mono huno neʼapateya vekamoʼmo muki kafugaʼae kafugaʼaeʼmo agaiʼa kolaʼmo alinino uno ohaiʼnifa afu kolaʼmo alininuno alagi aote mono nopiʼmo uno haite haite huʼniye.

²⁶ Huʼniyaʼmonanafa Kalaisiʼa ani kavaʼmo osuʼnifa muki afinaʼae afinaʼaeʼmo ofalinimo amisiyafeʼmo kolaʼamo aliteno uno ohaiʼniye. Muki afinaʼae afinaʼaeʼmo agaiʼamo ofalini amisiyafeʼmo ma mopamo alo huʼniya afinatetiʼmo falite falite hume hume neʼeyesine. Huʼniyesinaʼmonanafa hemeni atupa afinaʼmo agaiʼa agufamo ofalini huteno hosu kavaʼapimo alagi alino atalesiyafeʼmo magoke afinaʼmo emineno vayaʼai apaulagaleʼmo afole aiʼniye.

²⁷ Gotiʼa hunoʼaeʼmo, muki vayaʼmo magoke afinaʼmo falitesageʼna agoti huʼna apategauve, huno hu maleʼniye.

²⁸ Ani gelefeʼmo Kalaisiʼa asole vayaʼai hosu kavaʼapimo alino kofisiyafeʼmo magoke afinaʼmo agaiʼa agufamo Gotina amiʼniye. Agaemo henagaʼamo asole vayaʼai hosu kavaʼapimo alino kofisiyafeʼmo ma mopafiʼmo emiʼnoʼmegaifa agaefeʼmo agava neʼmaiya vayaʼai apakufamo alagi alino katino apatesiyafeʼmo apaulagaleʼmo eminegaiye.