Himulu 8 - The Keyagana NT and 25 OT books

¹ Inagi mani avoʼmo nekaona gemo aepaʼamo haneʼniyana agaemo ani agufa hogote vekamo mono huno nelateya vekamo maiʼniye. Agaemo ala kini vekamo yagaino neʼapateya siyaʼaleʼmo lamaga haopaleʼmo kokuʼnapiʼmo fai maiʼniye.

² Agaemo mago aune seli nopiʼmo aliʼyaʼmo noʼalifa aote mono nopiʼmo lama ge aote seli mono nopiʼmo aliʼyaʼmo neʼaliye. Ma mopafi vayaʼmogi ani seli mono noʼmo okiʼnafa Ala kava neʼmokeʼmo kiʼniye.

³ Gotiʼmo fiku neʼamiya yaʼmo amige afumo heʼa ofalinimo amige hisayafeʼmo muki hogote vayaʼmo mono huʼa apatesaya vayaʼmo lekana paino apateʼniye. Ani kava huno mani vekamoʼmo ofalinimo amisiya yaʼmo haneʼniye.

⁴ Mono huʼa neʼapataya vayaʼmogimo keʼaepa gelefeʼmo fikumo amiʼnae. Apakaemo hemenimo aliʼyaʼmo neʼaliyaʼmofeʼmo agaemo hemenimo ma mopafiʼmo maiʼniyesinana mono huno nelateya vekamo oʼmaiʼniyesine.

⁵ Moseseʼa ani seli mono noʼmo kisiyafeʼmo nehigenoʼaeʼmo Gotiʼa, aveleʼmo maiʼnanageʼnaeʼmo ago aliʼna kave liʼnovanagi ani kava huka ageka alagepa huka aune yaʼmo alo huvo, huno ha paiʼniye. Apakaemo kokuʼnapi haneʼniya mono nokana huno haneʼniya agufa aune nopiʼmo aliʼyaʼmo neʼaliye.

⁶ Neʼaliyaʼmonanafa hemenimo agaemo aeno agaseʼniya aliʼyaʼmo aliteno kotalakemo folagapi vekamo maiʼniye. Ani kotalakemoʼa atafa kotalakemo ago aeno agaseʼniye. Gotiʼa, lapa maegauve, huno hu maleʼniya polomasi geʼaletiʼmo saufa kotalakemo alino he tino ateʼniye. Saufa kotalakemo lapa maegauve, huno hu maleʼniya polomasi geʼamoʼmo atafa kotalakemo lapa maegauve, huno hu maleʼniya polomasi gemo ago aeno agaseʼniye.

⁷ Hogote kotalakemoʼa alagepa huno hapa maeʼniyesinana henaga kotalakemo aliʼyaʼamo ohaneʼniyesinaʼmonanafa

⁸ kotalakeʼamo ago amagiʼa ataleʼnayaʼmofeʼmo Ala kava neʼmo Gotiʼa hunoʼaeʼmo, Afiyo, huno, mago afinaʼmo afole aisigeʼnaeʼmo saufa kotalakemo Isaleli vayaʼe Yuta vayaʼeʼmo hu malegauve.

⁹ Apakinago vayaʼmo Isipi kotegatiʼmo apayate aliʼna apavaleliʼna eʼnova afinaʼmo hu maleʼnova agufa kotalakemo osuguve. Apakaeʼeʼmo hu maleʼnova kotalakemo akame osuʼa amagiʼa ataleʼnageʼnaeʼmo yagaiʼna oʼapateʼna afaʼa apataleʼnove.

¹⁰ Inagi ani afinaʼmo hano hutesigeʼnaeʼmo Isaleli vayaʼeʼmo kotalakemo hu maleteʼnaeʼmo keʼaepa geʼnimo aliʼna apakesafiʼmo maleteʼna apaipafiʼmo avoʼmo kae malegauve. Gotiʼapimoʼnamo maisugeʼa nagaiʼni vayaʼnimo maigae.

¹¹ Ani afinaʼmo muki ala apaki vayaʼe aise apaki vayaʼmogiʼeʼmo nagaemo nageʼa alagepa hugayaʼmofeʼmo muki vayaʼamogimo apao vayaʼe konagaʼapimogiʼeʼmo, Ala kava neʼmo agetapa aeto hiyo, huʼa aliʼa apaya oʼmalegae.

¹² Hosu kavaʼapieʼmo nahau huʼna apateteʼna hosu kavaʼapiʼe keʼaepa geʼnimo amagiʼa neʼatalaya kavaʼapileʼefeʼmo nagesamo oʼafiʼna nage kaniʼna atalegauve, huno huʼniye.

¹³ Gotiʼa mani kotalakeeʼmo hunoʼaeʼmo, saufa kotalakeʼnimae, huno huʼniyaʼmofeʼmo hogote kotalakemo atafa heʼnigeno aliʼyaʼamo ago hano huʼniyanageno aise afinaʼmo haneteno alagi hano hugiye.