Himulu 7 - The Keyagana NT and 25 OT books

Mono huno neʼapateya vekamo Melikisetekifeʼmo huʼniya gemae

¹ Ani vekamo Melikisetekiʼa akeyaʼvilagamo Selemi taonifiʼmo maiʼnaya vayaʼaiteʼmo yagaino neʼapateya kini vekamo maiʼniye. Agaemo hogote vekamo anaga Goti vekaʼamo mono huno neʼapateya vekamo maiʼniye. Emalehamuʼa mago kini vayaʼeʼmo kamemo huteʼa huno aeno apakasetenoʼaeʼmo atagineno eno Melikisetekiʼeʼmo fotu huʼnaʼae. Melikisetekiʼmo hunoʼaeʼmo, Gotiʼa alino auleno kateno, huno ha paiʼniye.

² Emalehamuʼa kamemo huno aeno apakaseteno kagemi yaʼapimo aliʼniya kagemiyapatiʼmo alino fako huno teniʼa hetamamo maleteno ani hetamafatiʼmo magoke hetamamo taisimo Melikisetekiʼa amiʼniye. Inagi Melikisetekiʼae agimo hogote aepaʼamo haneʼniyana fatago kavaʼageʼmo nehiya kini vekamae. Selemi taonifiʼmo maiʼnaya vayaʼaiteʼmo yagaino neʼapateya kini vekamo maiʼniyaʼmofeʼmo agiʼafiʼmo lole aepaʼamo haneʼniyana alagepa huʼa magokepi lokaeʼa maiʼnaya taonifiʼmo yagaino neʼapateya kini vekamo maiʼniye.

³ Ita afoʼalaʼmoganimo oʼmaige lotoʼamogimo oʼmaige huʼnae. Alino ateʼniya afinafeʼmo ava gemo ohanege faliʼniya afinafeʼmo ava gemo ohanege huʼnigeno Goti Mafaʼneʼagana huno maiʼneno mono huno neʼapateya vekamo ofalino afaʼa maige maige huno maiʼniye.

⁴ Ala agi vekamo maiʼniye, hutapa lapakesamo afitetapa lapakesa afifi hutapa maiyo. Emalehamuʼa hogote laginago vekamo maiʼniyaʼmonanafa kame huno aeno apakaseteno aliʼniya kagemi yapatiʼmo alino fako huno taisimo amiʼniye.

⁵ Livai nofi vayapatiʼmo mono huʼa neʼapataya vayaʼmogimo Yu vayaʼai taisimo aliʼnae. Keʼaepa gemoʼmo hunoʼaeʼmo, Livai nofi vayaʼaina taisi ofalinimo apamiyo, huno huʼnigeʼa Livai nofi vayaʼmogi konagaʼapimogi taisimo aliʼnae. Konagaʼapimogimo Emalehamu aginago vayaʼmo maiʼnayaʼmonanafa apakaetetiʼmo taisimo aliʼnae.

⁶ Aliʼnayaʼmonanafa Melikisetekiʼa Livai nofi vekamo oʼmaiʼniyaʼmonanafa Emalehamu taisimo alitenoʼaeʼmo, Gotiʼa alino auleno kateno, huno ha paiʼniye. Melikisetekiʼa Gotiʼmo hunoʼaeʼmo, aliʼna auleʼna kategauve, huno ha paiʼniya vekaeʼmo ani gemo huʼniye.

⁷ Muki vayaʼamogitamo ago afiʼnonana Gotiʼa hunoʼaeʼmo, aliʼna auleʼna kategauve, huno huʼniya vekamoʼmo hapa paiʼnigeʼa afiʼnaya vayaʼmo ago aeno apakaseʼniye.

⁸ Mono huʼa neʼapataya vayapatiʼmo magoke vekamo falite falite huʼnayaʼmonanafa Goti mukufiʼmo avoʼmo kae maleʼniya gemoʼmo hunoʼaeʼmo, afaʼa maiʼniye, huno ava gemo huʼniya vekamo agiʼamo Melikisetekiʼa taisimo aliʼniye.

^9-10 Melikisetekiʼe Emalehamuʼeʼmo fotu huʼnaʼa afinaʼmo Livaiʼa alino oʼateʼnigeno Emalehamu agufafiʼmo Livaiʼa maiʼniyaʼmofeʼmo Emalehamuʼa taisimo amiʼnigenoʼaeʼmo Livaiʼa taisimo aliʼniya vekaʼeʼmo magokepi amiʼniye, huta afa gemo hugune.

¹¹ Livai nofi vayaʼmogi mono huʼa neʼapataya vayaʼaitefeʼmo Isaleli vayaʼmogi Goti keʼaepa geʼamo aliʼnae. Livai nofi vayaʼmo mono huʼa neʼapataya vayaʼmogi vayaʼmo hapa maeʼnageʼa uʼa haiʼa hapaiʼnaesinana alu nofi vekamo mono huno apatesiya vekamo afole oʼaiyesinaʼmonanafa agaemo Livai aginagomo Eloni nofi vekamo oʼmaiʼnifa Melikisetekigana huno maiʼniye.

¹² Gotiʼa mono huʼa neʼapataya vayaʼmo ago apataleʼniya apaimuʼyaleʼmo saufa vekamo afole aiʼniyaʼmofeʼmo keʼaepa gemo aimuʼyaleʼmo saufa keʼaepa gemo afole aiʼniye.

¹³ Ani ge huta ava gemo huʼnona vekamo alu nofi vekamo maiʼniye. Ani nofi vayapatiʼmo magoke vekamoʼa ofalini hiʼyalamuteʼmo aliʼyaʼmo oʼaliʼniye.

¹⁴ Lapakaemo ago afiʼnayana Ala kava netimo Yuta nofi vayapatiʼmo afole aiʼnigeno Moseseʼa ani nofi vayaʼaifeʼmo hunoʼaeʼmo, mono huʼa neʼapataya vayaʼmo maigae, huno osuʼniye.

Mono huno neʼapateya vekamo Melikisetekigana huno maiʼniya gemae

¹⁵ Alu vekamo mono huno neʼapateya vekamo Melikisetekigana huno maiʼniya vekamo ago afole aiʼniyaʼmofeʼmo magoʼe huta ago afita alagepa huʼnonana saufa gemo afole aiʼniye.

¹⁶ Agaemo amega apakufalefeʼmo keʼaepa geʼaletiʼmo afole oʼaiʼnifa ofalino afaʼa maige maige huno maiʼneno maino hano osuno neʼmaiya himamuʼaletiʼmo mono huno neʼapateya vekamo afole aiʼniye.

¹⁷ Gotiʼa ani kavafeʼmo hunoʼaeʼmo, Melikisetekigana huka mono huka neʼapatana vekamo maige maige huka maiʼneka maika hano osuka maigane, huno hu maleʼniye.

¹⁸ Inagi atafa keʼaepa gemoʼa vayaʼmo hapa maesiya lokiyaʼamo ohaneʼnigeno hapa oʼmaeʼniyaʼmofeʼmo Gotiʼa ani gemo ago ataleʼniye.

¹⁹ Keʼaepa gemoʼa uʼa haiʼa hapaisaya kaʼmo valino oʼapateʼniyaʼmonanafa hemenimo ago aeno agaseʼniya kavaʼmo hu maleʼnigeta lavayagunagu huta agava neʼmauna kavatetikeʼmo Goti haopaleʼmo neʼune.

²⁰ Gotiʼa aliʼyaʼaleʼmo afaʼa avaleno oʼateʼnifa agoʼyamo ataleteno lokiya gemo hu maleʼniya geʼaletiʼmo avaleno ateʼniye.

²¹ Gotiʼa mono huʼa neʼapataya vayaʼmo aliʼyaʼapileʼmo apavaleno apatetenoʼaeʼmo agaiʼa agiʼaletiʼmo agoʼyamo ataleteno lokiya gemo osuʼniyaʼmonanafa agaefekeʼmo agaiʼa agiʼaletiʼmo lokiya gemo hunoʼaeʼmo, Ala kava vekamoʼnamo nagaiʼni nagiʼniletiʼmo nagoʼyamo ataleteʼna lokiya gemo huʼnaeʼmo, Mono huka neʼapatana vekamo Melikisetekigana huka maige maige huka maiʼneka maika hano osuka muki afinaʼmo maigane, huʼna hu maleʼnovanageʼna mago alu nagesamo alagi oʼafiguve, huno hu maleʼniye.

²² Huno hu maleʼniyaʼmofeʼmo Yesuʼa saufa kotalakemo aeno agaseʼniya kotalakeletiʼmo anonale apakae apaimuʼyaleʼmo maisiya vekamo afole aiʼniye.

²³ Mono huʼa neʼapataya vayapatiʼmo falime falime neʼeʼapaeʼmo aliʼyaʼapimo alagi ataleme ataleme eʼnayaʼmofeʼmo asole vayaʼmo maiʼnae.

²⁴ Faliʼnayaʼmonanafa agaemo ofalino afaʼa maige maige huno maigiyaʼmofeʼmo mago alu vekamoʼmo eno agae aimuʼyaleʼmo aliʼyaʼmo oʼaligiye.

²⁵ Agaemo muki afinaʼmo nunumuʼmo huno apatesiyafeʼmo alagi maige maige huno neʼmaiyaʼmofeʼmo agaiʼaletiʼmo Gotitegamo neʼaya vayaʼai apakufamo alagi alino katino apateteno apakaetefeʼmo aliʼyaʼamo afaʼa alino hano huno hugiye.

²⁶ Inagi Yesuʼa ani hogote vekamo mono huno nelateya vekamo maiʼniyaʼmofeʼmo afaʼa laha maegaiye. Agaemo Gotitegamo alagepa kavaʼmo huge vayaʼaitegamo hosu kavaʼmo osuge hosu kavaʼamo ohanege huʼnigeno ma mopafi vayakana huno oʼmaiʼnifa aote vekamo maiʼniye. Gotiʼa kokuʼnapiʼmo alino asaga huno ateʼnigeno kokuʼnapi neʼmaiya vayaʼmo ago aeno apakaseno maiʼniye.

²⁷ Mono huʼa neʼapataya vayaʼmogi muki afinaʼae afinaʼaeʼmo apakaiʼapi hosu kavaʼapileʼe muki vayaʼai hosu kavaʼapileʼefeʼmo afumo heʼa Gotiʼmo ofalinimo amiʼnayaʼmonanafa agaemo muki afinatefeʼmo magoke afinaʼmo vayaʼai hosu kavaʼapilefeʼmo agaiʼa agufamo Gotiʼmo ago amiʼniye.

²⁸ Vayaʼmogi Mosese keʼaepa gelefeʼmo mono huʼa neʼapataya aliʼyaʼmo alisayafeʼmo uʼa haiʼa metaleʼnaya vayaʼmo lekana paiʼa apateʼnayaʼmonanafa henagaʼamo Gotiʼa keʼaepa gemo agoʼyamo ataleteno Mafaʼneʼamo lekana paino ateʼniye. Aliʼyaʼamo alisiyafeʼmo alino ateʼniyanageno muki afinaʼmo alagepa huno maige maige huno maisiya Mafaʼneʼamo lekana paino ateʼniye.