Himulu 6 - The Keyagana NT and 25 OT books

Aepa faita afiʼnona gemo ataleta uta haita hapaigetao, huno huʼniya gemae

^1-2 Lagaemo agava maiʼnona vekamo Kalaisi vekaeʼmo ava gemo aepa faita afiʼnona gemo afiʼnone. Aepa faita afiʼnona gemo haneʼniyana lokiya ovaiʼniya kavatefeʼmo lapaipamo alita afe leyo, huʼa huʼnageta afige Gotifeʼmo lapakesamo afita fatago hiyo, huʼa huʼnageta afige sese nehaya kavafeʼmo aliʼa laya maleʼnageta afige aliʼa apaya neʼmalaya gemo afige faliʼnaya vayaʼmo he tisaya kavafeʼmo ava gemo afige agoti huno apatesiya kavafeʼmo ava gemo afige huʼnone. Ani aepa faita afiʼnona gemoʼmo noʼmo faiʼa neʼataya yakana huno haneʼniye. Fiku yanageta halate alita faita ategaunanagi ataleta uta haita hapaigetao.

³ Gotiʼa he, kanalene, huno hisigetaeʼmo ataleta uta hano hugune.

⁴ Gotiʼa mago vayaʼmo kokuʼnapatiʼmo ha le yaʼamo fikumo neʼapamiya yaʼamo ago apamiʼnigeʼa neʼa afigeʼnae. Goti Aunemeʼamoʼmo neʼapamiya himamuʼamo alige

⁵ Goti alagepa geʼamo afiteʼa neʼa afige saufa afinaʼmo himamu kavaʼamo ageteʼa neʼa afige huʼnae.

⁶ Ageteʼapaeʼmo alagi ataleʼa asagauʼa aiʼnayaʼmofeʼmo halate apaipamo aliʼa afe lesaya kaʼmo alagi ohaneʼniye. Apakaemo Goti Mafaʼneʼamo malipu yosaleʼmo nili aiʼnaya kava huʼa apaipafiʼmo halate ani agufa kavaʼmo nehuʼapaeʼmo vayaʼai apaulagaleʼmo agiʼaleʼmo aliʼa afepi neʼatayaʼmofeʼmae.

⁷ Koʼmo mopafiʼmo aino uno nelamigenoʼaeʼmo neʼyaʼmo nehageya mopamoʼmo hoyamo neʼvaiya vayaʼmo hapa maeʼnigeno Gotiʼa, ani agufa mopaeʼmo alino auleno neʼate.

⁸ Neʼateyaʼmonanafa mago mopafatiʼmo aufe nofiʼe aufe inoʼeʼmo aesigenoʼaeʼmo ina agufa mopamo haneʼniyanageno aise afinaʼmo utesigeno Gotiʼa lifana huno atesigeno atafiʼmo alino kaeno sagalino atalegaiye.

⁹ Lahauʼniya vayaʼmogitapae, huta, mani gemo nehunaʼmonanafa hosu mopagana hutapa oʼmaiʼnae, huta lagesamo neʼafune. Gotiʼa apakufamo alino katino neʼapateya vayaʼai apaipafiʼmo alino neʼmaleya yaʼmo hogote yaʼmo lapaipafiʼmo ago alino maleʼniya vayaʼmo maiʼnae, huta lokiya vaita lagesamo neʼafune.

¹⁰ Lapakaemo aliʼyaʼmo alige Gotifeʼmo lapau lapayamopafiʼmo lapauʼnigeta aliʼyaʼamo alige nehutapa apaote vayaʼamo hapa maeʼnayanageta hapa neʼmae. Gotiʼa hosu kavaʼmo huno alino fako huno noʼapateyaʼmofeʼmo alagepa kavatapieʼmo alagi age okanigiye.

¹¹ Lahauʼniyanagetapa mukiʼamogitapa ani kavaʼmo hutetapa magoke lapaipa lapakesamo alitetapa lapavayagunagu hutapa agava maime maime neʼvisageʼapaeʼmo atupa afinaʼmo he tisayafeʼmo lapayamukiki hugae.

¹² Alagaʼmo olapaeʼninagetapa Gotiʼa polomasi gemo hunoʼaeʼmo, lapamiguve, huno hu maleʼniya yaʼmo aliʼnaya vayaʼai apaiyakamo aliyo. Apakaemo oʼataleʼa apakesamo afiʼa fatago huʼneʼa atafauʼa alagi huʼa maime maime neʼeʼapaeʼmo aliʼnae.

Gotiʼa lapa maegauve, huno polomasi gemo hu maleʼniya gemae

¹³ Akeyaʼvilagamo Gotiʼa Emalehamufeʼmo hunoʼaeʼmo, fikumo kaha maeʼna kamiguve, huno polomasi gemo huno ha paiʼniye. Mago vekamoʼmo Gotiʼa aeno agaseʼniya vekamo alagi oʼmaiʼniyaʼmofeʼmo Gotiʼa agaiʼa agiʼaletiʼmo agoʼyamo ataleteno hu maleʼniye.

¹⁴ Gotiʼa hunoʼaeʼmo, alagi lama gemo kaha nepauve, huno, aliʼna auleʼna kategauve. Nagaemo muki kaginago vayaʼmo kamiteʼna aliʼna auleʼna apategauve, huno ha paiʼniye.

¹⁵ Huno ha paiʼnigeno Emalehamuʼa oʼataleno agesamo afino fatago huʼneno agava maime maime neʼegenoʼaeʼmo Gotiʼa hu maleʼniya gemo afole aiʼnigeno aliʼniye.

¹⁶ Mago vayaʼmo ago aeno apakaseʼniya vekamo agiʼaletiʼmo lokiya gefatiʼmo huʼnageʼa afiteʼapaeʼmo, vae, huʼa, alagi lama gemo nehae, huteʼa ge noʼnae.

¹⁷ Ani kavakana huno Gotiʼa lapa maegauve, huno hapa paiʼniya vayaʼmogi huʼapaeʼmo, Gotiʼa halate alu gemo osugiye, huteʼa alagepa huʼa afisayafeʼmo agaiʼa agiʼaletiʼmo agoʼyamo ataleteno huʼniya geʼalefeʼmo agesamo afitenoʼaeʼmo, ani kavaʼmo afaʼa afole aigiye, huno hu maleʼniya geleʼmo alino lokiya vaino ateʼniye.

¹⁸ Ani lole gemo haneʼniyana polomasi geʼe agiʼaletiʼmo alagi lama gemo huʼniya geʼeʼmo huʼniyanageno agaemo alu gemo afaʼa osugiye. Ani geletiʼmo lagaemo laune heta uta fala kita neʼmauna vayaʼmogita laulagaleʼmo alino afole aino ateʼniya yateʼmo agava maiʼneta lavayagunagu hisuna kavateʼmo alagi atafaisunafeʼmo alino he tino lateʼniye.

¹⁹ Lavayagunagu huta agava neʼmauna yaʼmo lokiya yaʼmo afaʼa hanesiya yaʼmo haneʼniye. Aeniletiʼmo sipimo anipiʼmo aeʼa atafauʼa neʼataya yakana huno haneʼneno lagupi mafaʼnemo atafauno neʼate.

²⁰ Yesuʼa lavayagunagu huta agava neʼmauna vekamo laha maesiyafeʼmo hogoteno Gotiʼa neʼmaiya yateʼmo aeno asai maleʼniya kenafatiʼmo uno haino aote nopiʼmo neʼmaiye. Agaemo Melikisetekigana huno maiʼneno hogote vekamo mono huno neʼapateya vekamo hamaleʼniyanageno muki afinaʼmo maige maige huno maigiye.