Himulu 5 - The Keyagana NT and 25 OT books

¹ Gotiʼa hogote vayaʼmo mono huʼa neʼapataya vayaʼmo apakaepatiʼmo konagaʼapimo lekana paino apateʼniye. Apakaemo konagaʼapimogitefeʼmo Gotiʼmo amigune, huʼa huʼnaya yaʼmo amige konagaʼapimogi hosu kavaʼapilefeʼmo afumo amagiʼa Gotiʼmo ofalinimo amige huteʼa mono aliʼyaʼmo alisayafeʼmo lekana paino apateʼniye.

² Himamuʼapimo ohaneʼniyaʼmofeʼmo afiteʼa oʼageʼnaya vayaʼaitegaʼe alagepa kaʼmo ataleʼa uʼnaya vayaʼaitegaʼeʼmo vase vase kavaʼmo afaʼa hugae.

³ Himamuʼapimo ohaneʼniyaʼmofeʼmo alu vayaʼai hosu kavaʼapilefeʼmo afumo amagiʼa ofalinimo oʼamiʼnayaʼmonanafa apakaiʼapi hosu kavaʼapileʼefeʼmo amiʼnae.

⁴ Mago vayaʼmogi apakaiʼapimo huʼapaeʼmo, ani aliʼyaʼmo afaʼa aligune, huʼa osugafa Gotikeʼmo Elonifeʼmo keya aeno ge huʼniya kava huno keya aeno ge huʼniya vayaʼamogigeʼmo ani aliʼyaʼmo afaʼa aligae.

⁵ Ani kavaʼmo huno Kalaisiʼa hogote vekamo mono huno nelateya vekamoʼmo lusi aliʼyaʼmo alisiyafeʼmo agaiʼa agufamo avalelino ohaiʼniye. Haʼao, Gotiʼa agaefeʼmo hunoʼaeʼmo, Mafaʼneʼnimo maiʼnane. Hemenimo aliʼna kateʼnove, huno huteno

⁶ magoʼe gemo aote mukufiʼmo hunoʼaeʼmo, Melikisetekiʼa mono huno neʼapateya vekamo maiʼniya kava huka mono huka neʼapatana vekamo maiʼneka oʼataleka muki afinaʼmo aliʼyaʼmo alige alige huka maigane, huno hu maleʼniye.

⁷ Kalaisiʼa ma mopafiʼmo maiʼnenoʼaeʼmo falisiya kavategatiʼmo agufamo alino katino atesiya Gotifekeʼmo alopa gefatiʼmo keya aeno ge huge haoke huge aviʼyaʼmo huge huno nunumuʼmo huʼniye. Gotifeʼmo koli huʼneno mono huʼniyaʼmofeʼmo Gotiʼa geʼamo afiʼniye.

⁸ Agaemo Goti Mafaʼneʼamo maiʼniyaʼmonanafa geʼamo afiteno akame hisiyafeʼmo lusi kava huno agafu kiʼniya kayotetiʼmo amagino alino aya maleʼnigeno alagepa huno ge afiʼniye.

⁹ Gotiʼa aliʼyaʼamo alisiyafeʼmo avaleno aote ateʼnigenoʼaeʼmo agaemo geʼamo akame nehaya vayaʼai apakufamo alino katino neʼapateya kavaʼmo afoʼamoʼmo hamaleʼniye.

¹⁰ Hamaleʼnigeno Gotiʼa hunoʼaeʼmo, Melikisetekiʼa hogote vekamo mono huno neʼapateya vekamo maiʼniya kava huka maiʼnane, huno huʼniye.

Nute mafaʼnegana hutapa oʼmaiyo, huno huʼniya gemae

¹¹ Ani kavafeʼmo magoʼe gemo lapa paigunaʼmonanafa lapau maiʼmai hutapa neʼmaiyaʼmofeʼmo haiya kava huta alita lapaya malegaune.

¹² Yatala afinaʼmo Goti geʼamo ago afiʼnayaʼmofeʼmo aliʼa apaya neʼmalaya vayaʼmo maisaya yaʼmo haneʼniyaʼmonanafa Gotiʼa geʼamo aepa faiʼniya gemo magoʼe huʼa aliʼa lapaya malesaya kavaʼmo haneʼniye. Lapakaemo lokiya neʼyaʼmo afaʼa oʼnetapa nuʼageʼmo nesaya agufa kavaʼmo haneʼniye.

¹³ Nuʼageʼmo neʼnaya vayaʼmogimo nute mafaʼnegana huʼa maiʼneʼapaeʼmo fatago kavafeʼmo ava gemo alagepa huʼa noʼafiye.

¹⁴ Alopa vayaʼmogimo lokiya neʼyaʼmo neʼnae. Muki afinaʼae afinaʼaeʼmo afime afime neʼayaʼmofeʼmo alagepa geʼe hosu geʼeʼmo alagepa huʼa afaʼa aliʼa fako huʼa neʼafiye.