Himulu 4 - The Keyagana NT and 25 OT books

¹ Inagi Gotiʼa ani kavaʼmo huguve, huno hu maleʼniya gemo hano osuno afaʼa haneʼnigeno hemeniʼeʼmo hunoʼaeʼmo, nagaeʼeʼmo maiʼa haga leʼa maisayapiʼmo alagi u haiʼa maigae, huno laha nepaiye. Fiku yanageta lapakaepatiʼmo mago vayaʼmo uta haitapa metalegayanagi koli higetao.

² Gotiʼa alagepa faigoko geʼamo hapa paiʼnigeʼa afiʼnaya kava huno laha paiʼnigeta afiʼnone. Afiʼnayaʼmonanafa apakesamo afiʼa fatago osuʼnayaʼmofeʼmo afiʼnaya gemoʼmo hapa oʼmaeʼniye.

³ Lagesamo afita fatago huʼnona vayaʼmogitamo uta haita Gotiʼeʼmo magokepi lokaeta maita haga legaune. Gotiʼa ma mopamo alo huno hano hu maleʼniyaʼmofeʼmo maiʼa haga lesaya kavaʼmo haneʼniye. Haneʼniyaʼmonanafa Gotiʼa hunoʼaeʼmo, Naipamo leʼnigeʼna nagoʼyamo ataleteʼna lokiya gefatiʼmo huʼnaeʼmo, nagaeʼeʼmo maiʼa haga leʼa maisayapiʼmo alagi u haiʼa oʼmaigae, huʼna huʼnove, huno huʼniye.

⁴ Goti mukufiʼmo mago gemoʼmo seveni afinafeʼmo hunoʼaeʼmo, Gotiʼa muki yaʼamo alo huno hano huteno seveni afinaʼmo maino haga leʼniye, huno huteno

⁵ magoʼe gemo hunoʼaeʼmo, nagaeʼeʼmo maiʼa haga leʼa maisayapiʼmo alagi u haiʼa oʼmaigae, huno huʼniye.

⁶ Hogoteʼa alagepa gemo afiʼnaya vayaʼmogi apakesamo afiʼa fatago osuʼnayaʼmofeʼmo maiʼa haga leʼa maisayapiʼmo u haiʼa oʼmaiʼnae. Oʼmaiʼnayaʼmofeʼmo alu vayaʼmogi maiʼa haga leʼa maisayapiʼmo u haiʼa maigae.

⁷ Asole kafugamo ago utegeno Gotiʼa halate magoʼe afinaʼmo hu maletenoʼaeʼmo, Hemenimo u haitapa maita haga legae, huno hu maleʼniye. Gotiʼa mani gemo Nevini avayafatiʼmo, hemenimo Goti geʼamo neʼafitapaeʼmo lapaipamo alita lokiya vaitapa oʼateyo, huno huʼniye.

⁸ Yasuvaʼa Isaleli vayaʼmo apavalelino uʼnigeʼapaeʼmo maiʼa haga leʼa maisayapiʼmo u haiʼa oʼmaiʼnayaʼmofeʼmo Gotiʼa henagaʼamo alu afinaʼmo maiʼa haga lesaya afinafeʼmo halate ani agufa gemo huʼniye.

⁹ Gotiʼa muki yaʼamo alo huno hano hutenoʼaeʼmo maino haga leʼniya kava huno Kalaisiʼa aliʼyaʼamo ago alino hano huʼniyanageno Gotiʼeʼmo magokepi lokaeno maino haga legaiye.

¹⁰ Aliʼyaʼamo alino hano huʼniyaʼmofeʼmo Goti vayaʼamo maiʼa haga lesaya sapati afinaʼmo hano osuno afaʼa haneʼniye.

¹¹ Goti geʼamo amagiʼa ataleteʼa asagauʼa aiʼnaya kava huta asagauta aigayanagi uta haita maita haga lesunafeʼmo layamukiki higetao.

¹² Goti geʼamo aunemeʼe gemo haneʼneno himamuʼaletiʼmo aliʼyaʼmo neʼaliye. Ani gemoʼa aluga alugaʼamo aveʼmo neʼneya naipemo ago aeno agaseno aveʼmo lusi kava huno neʼne. Agaemo geʼaletiʼmo apagupi mafaʼnefinagi apauneʼapamepinagi apayamufafinagi apatupinagi huno aeteno alino fako nehiye.

¹³ Lagaemo hutaeʼmo, ani kavaʼmo huʼnove, ina kavaʼmo huʼnove, huta ha paisuna vekamo aulagaleʼmo muki nehuna kavatimo alagi fala okino afole neʼaiye. Muki vayaʼmo aulagaleʼmo alagi fala okigayanageno apakegaiye.

Yesuʼa hogote vekamo mono huno nelateya ala vekatimo maiʼniya gemae

¹⁴ Yesuʼa Goti Mafaʼneʼamo hogote ala vekatimo mono huno nelateya vekamo maiʼnenoʼaeʼmo uno haino kokuʼnaʼmo aeno agaseno Gotitegamo uno haino maiʼniyaʼmofeʼmo lagesamo afita fatago huteta aeta hakalo huta hapa nepauna geleʼmo atafauta alagi huta maigetao.

¹⁵ Hogote ala vekatimo mono huno nelateya vekatimoʼmo himamutimo ohaneʼniya vayaʼmogitaeʼmo hau huno nelate. Muki alu hosu kava alu hosu kavaʼmo hisunafeʼmo lamalageka nehaya kava huʼa amalageka huʼnayaʼmofeʼmo hau huno nelate. Amalageka huʼnayaʼmonanafa hosu kavaʼmo alagi osuʼniye.

¹⁶ Inagi atete osuta Gotiʼa yagaino neʼapateya siyaʼaleʼmo fai maiʼnenoʼaeʼmo fikumo laha maeno nelamiya kavategamo vigetao, kana yaʼmo alisuna afinaʼmo hau huno lateteno fikumo laha maeno lamigiyaʼmofeʼmae.