Himulu 3 - The Keyagana NT and 25 OT books

Yesu ala agiʼamoʼmo Mosese ala agiʼamo ago aeno agaseʼniya kavafeʼmo huʼniya gemae

¹ Gotiʼa lapakaefeʼmo kokuʼnapiʼmo uta haitapa magokepi lokaeta maisayafeʼmo keya aeno ge huʼniya lapaote konagaʼnimogitapae, huʼna, Yesufekeʼmo lapakesamo afifi hutapa maiyo. Lagaemo lagesamo afita fatago hutaeʼmo, Goti apa vekaʼamo maiʼneno hogote mono vekamo mono huno nelateya vekamo maiʼniye, huta aeta hakalo nehune.

² Moseseʼa Goti nopiʼmo aliʼyaʼmo aliteno Goti afamo anaga vayaʼaiteʼmo aliʼyaʼamo oʼataleno alagepa huno aliʼniya kava huno Yesuʼa lekana paino ateʼniya Gotitefeʼmo aliʼyaʼamo oʼataleno alagepa huno aliʼniye.

³ Afamo anaga vayaʼai afoʼapimoʼmo no kigekana huno maiʼniya vekamoʼmo ala agimo haneʼnigeno afamo anaga vayaʼmo aeno apakaseno maiʼniyaʼmofeʼmo ani kava huno Yesuʼa Moseseʼmo ago aeno aga seʼniyaʼmofeʼmo magoʼe huno ala agi alisiya vekamo maiʼniye.

⁴ Muki noʼamo agaiʼamo afaʼa afole noʼaifa vayaʼmogigeʼmo nekiye. Inagi Gotiʼa muki yaʼmo afoʼamoʼmo maiʼniye.

⁵ Moseseʼa Goti nopiʼmo Goti afamo anaga vayaʼalefeʼmo aliʼyaʼamo oʼataleno alagepa huno aliʼyaʼmo aliteno afole aisiya vekaeʼmo ava gemo huno hapa paiʼniye.

⁶ Hapa paiʼniyaʼmonanafa Kalaisiʼa afamo anaga vayaʼai afoʼapimoʼmo Mafaʼneʼamoʼmo Goti afamo anaga vayaʼaleʼmo yagaino neʼapate. Lagaemo alagepa huta maige maige huta maigune, huta lole lagesamo oʼafita lavayagunagu huteta koli osuta lamogaga neʼaitaeʼmo oʼataleta atafauta alagi huta maime maime neʼuta atupa afinaʼeʼmo ani kavaʼmo huta maiʼnisunaʼmoʼmo Goti afamo anaga vayaʼamo maiʼnone.

Goti vayaʼamo maiʼa haga lesaya kavafeʼmo huʼniya gemae

^7-8 Ani kavatefeʼmo Goti Aunemeʼamo aote Aunemeʼamo geʼamo alagepa hutapa afiyo. Agaemo hunoʼaeʼmo, Hemenimo lapakaemo Goti geʼamo neʼafisayana lapaipamo alita lokiya vaita oʼateyo. Lapakinago vayaʼmogimo kaʼme kotegamo nata neʼa neʼuʼapaeʼmo namalageka huʼnae. Geʼnimo ago amagiʼa ataleʼnaya kava hutapa geʼnimo amagitapa oʼataleyo.

⁹ Nagaemo lusi alagepa kavaʼmo huʼna fotiʼa kafugamo hapa maeʼnogeʼa alagepa kavaʼnimo ago nageʼnayaʼmonanafa hosu kavakeʼmo nehuʼapaeʼmo, na agufa kavaʼmo hisifi, huʼa namalageka huʼnae.

¹⁰ Huʼnayaʼmofeʼmo ani afinaʼmo muki maiʼnaya vayaʼaifeʼmo naipamo leʼna apateteʼnaeʼmo, muki afinaʼaeʼmo hosu apaipa apakesageʼmo afiteʼapaeʼmo nataleʼnae. Geʼnimo alagi alagepa huʼa noʼafiye.

¹¹ Naipamo leʼnigeʼnaeʼmo nagoʼyamo ataleteʼna lokiya gefatiʼmo huʼnaeʼmo, nagaeʼeʼmo maiʼa haga leʼa maisayapiʼmo alagi u haiʼa oʼmaigae, huʼna huʼnove, huno huʼniye.

¹² Konagaʼnimogitapae, huʼna, ehetapiye, fiku yanagetapa mago vayaʼamogitapamo hosu lapaipamo kalitetapa lapakesamo afita fatago osutapa afaʼa neʼmaiya kavaʼmo afoʼamoʼmo Gotiʼa lapakameʼya amiteta ataletapa ugayanagi.

¹³ Hosu kavaʼmoʼa humi lapateteno alino lokiya lapaipamo kalino lapategaiyanagi muki afinaʼae afinaʼaeʼmo konagatapieʼmo hutapaeʼmo, atafauta alagi hiyo, hutapa alita lokiya vaita apateyo. Akeyaʼvilagamo Gotiʼa hunoʼaeʼmo, hemenimo afiyo, huno huʼniya gemo hemeni kanatapimo hano osuno afaʼa haneʼniyaʼmofeʼmo hemenigeʼmo konagatapimo alita he titapa apateyo.

¹⁴ Hogoteta lokiya vaita lagesamo afitaeʼmo, lama gemo huʼniyanageno alagi afole aigiye, huta huteta oʼataleta atafauta alagi huta maime maime neʼutaeʼmo atupa afinaʼeʼmo ani kavakeʼmo huta maiʼnisunaʼmoʼmo Kalaisiʼa alita laipafiʼmo ateʼnonageno neʼmaiye.

¹⁵ Goti mukufiʼmo avoʼmo kae maleʼniya gemoʼmo hunoʼaeʼmo, Hemenimo Goti geʼamo neʼafisayana lapaipamo alita lokiya vailiʼnetapa oʼafiyo. Geʼnimo amagiʼa ataleʼnaya kava hutapa geʼnimo amagitapa oʼataleyo, huno huʼniye.

¹⁶ Haiya vayaʼmogimo Goti geʼamo afiʼnayaʼmonanafa amagiʼa ataleʼnae. Moseseʼa Isipi kotegatiʼmo muki apavalelino uʼniya vayaʼmogimae.

¹⁷ Gotiʼa haiya vayaʼaifeʼmo fotiʼa kafugamo aipamo leno apatege apatege huno maiʼniye. Hosu kavaʼmo huteʼa kaʼme kotegamo faliʼnaya vayaʼaifeʼmae.

¹⁸ Gotiʼa haiya vayaʼaifeʼmo lokiya gefatiʼmo hunoʼaeʼmo, Nagaeʼeʼmo maiʼa haga leʼa maisayapiʼmo alagi u haiʼa oʼmaigae, huno huʼniye. Geʼamo amagiʼa ataleʼnaya vayaʼaifeʼmo huʼniye.

¹⁹ Inagi ago afiʼnonana apakesamo afiʼa fatago osuʼnayaʼmofeʼmo afaʼa uʼa ohaiʼnae.