Himulu 2 - The Keyagana NT and 25 OT books

Gotiʼa lusi kava huno laha maeʼniya kavafeʼmo huʼniya gemae

¹ Ani kavaʼmo huno maiʼniyaʼmofeʼmo aniʼmoʼa mago yaʼmo alinino neʼviya kava huno fiku yanageno lavalelino visigeta agaetetiʼmo afiʼnona gemo ataleta ugunanagi magoʼe huta afita alagepa huta afigetao.

² Gotiʼa enisole vayaʼai apavayafatiʼmo laginago vayaʼaifeʼmo huno hapa paiʼniye. Ani gemo asagauno oʼaino lokiya vaino haneʼnigeʼapaeʼmo muki vayaʼmogi akame osuʼa ago amagiʼa ataleʼnaya vayaʼai anonaʼapileʼmo alagepa huno alino fako huno apateteno kayoʼmo apamiʼniye.

³ Apamiʼniyaʼmofeʼmo Ala kava neʼmo Gotiʼa lusi kava huno vayaʼai apakufamo alino katino neʼapateya kavafeʼmo ava gemo ago hapa paiʼnigeʼa afiʼnaya vayaʼmogimo, lama gemo haneʼniye, huʼa laha paiʼnaya gemo oʼafita afaʼa maisunana haiya kava huta faita kasalo paegaune.

⁴ Gotiʼa alagena kavaʼaletinagi noʼagaya himamu kavaʼaletinagi ageʼa hapau neʼaiya kavaʼaletinagi huno ha maeno faigoko gemo huno ani gemo alino lokiya vaino ateʼniye. Gotiʼa agesamo afiteno hauʼnigenoʼaeʼmo Aunemeʼamoʼmo himamuʼamo apamete apamete huno apamiʼniye.

Yesuʼa laha maesiyafeʼmo ma mopafi vekamo hamaleʼniya kavafeʼmo huʼniya gemae

⁵ Nagaemo henagaʼamo afole aisiya saufa kavafeʼmo ava gemo huʼna avoʼmo nekaova kavateʼmo Gotiʼa enisole vayaʼmogimo yagaisayafeʼmo lekana paino oʼapateʼniye.

⁶ Lekana paino oʼapateʼniyaʼmonanafa mago vekamoʼmo Goti mukufiʼmo avoʼmo kae maleʼniya gemoʼa hunoʼaeʼmo, Gotiyo, huno, ma mopafi vayaʼmo ina agufa vayanagi na kava higekaeʼmo apakaefeʼmo kagesamo neʼafine. Vemo Mafaʼnemo na agufa vekamo maiʼnigeka ha maeka yagaika neʼatane.

⁷ Kagaemo aise afinaʼmo enisole vayaʼai apaiyafiʼmo maisiyafeʼmo alika ateʼnane. Ha le konali yaʼaʼe ala agiʼaʼeʼmo amiteka alo huʼnana yateʼmo yagaisiyafeʼmo alika ateʼnane.

⁸ Muki yaʼe vayaʼeʼmo alika aiyafiʼmo ateʼnane, huno huʼniye. Gotiʼa muki yateʼmo yagaisiyafeʼmo alino ateʼniyaʼmofeʼmo magoke yateʼmo noʼyagaiya yaʼmo ohaneʼniyaʼmonanafa muki yaʼamo alino aiyafiʼmo ateʼniye. Ateʼniyaʼmonanafa hemenimo ma mopafi vayaʼmogimo muki yateʼmo yagaiʼnageta oʼapakeʼnonaʼmonanafa

⁹ Gotiʼa Yesuʼmo ha le konali yaʼaʼe ala agiʼaʼeʼmo amiʼniya vekamo ago ageʼnone. Gotiʼa, fikumo hapa maeʼna apamiguve, huno huteno Yesuʼmo muki vayaʼaitefeʼmo falisiyafeʼmo aise afinaʼmo enisole vayaʼai apaiyafiʼmo alino ateʼniye.

¹⁰ Gotiʼa muki yateʼe vayaʼaiteʼeʼmo afoʼamoʼmo maiʼnigeno agaetefeʼmo hanege maige nehaya afoʼamoʼmo asole mafaʼne anagaʼamogimo ha le konali yaʼamo alisayafeʼmo Gotiʼa agaiʼa agiʼaletiʼmo fatago kavaʼamo hunoʼaeʼmo, Yesuʼa afaʼa agafu kigiye, huno huʼniye. Gotiʼa apakufamo alino katino apatesiya vekamo maisiyafeʼmo agafu kiʼniya kavatetiʼmo alino alagepa huno ateʼniye.

¹¹ Yesuʼa apavaleno apaote apateʼniya vekamoʼe apavaleno apaote apateʼniya vayaʼaʼeʼmo magoke agufa yaʼmo aliʼnayaʼmofeʼmo naganaʼnimogitapae, huno hapa paisiyafeʼmo avagage nosiye.

¹² Agaemo hunoʼaeʼmo, Nagaemo naganaʼnimogifeʼmo ala kagikaeʼmo kava gemo huʼna aeʼna hakalo huʼna hapa paiguve. Aliʼa anupa huʼa maiʼnisaya siosi vayaʼai folagapatiʼmo yokemo huʼna kagikaleʼmo aliʼna asaga huʼna kategauve, huno huteno

¹³ magoʼe gemo hunoʼaeʼmo, Nagaemo agaefeʼmo aliʼna amufa amiguve, huno huteno halate magoʼe gemo hunoʼaeʼmo, Gotiʼa mafaʼneʼamo apavalelineno namiʼnigeʼna manileʼmo apakaeʼeʼmo magokepi lokaeta maiʼnone, huno huʼniye.

¹⁴ Mafaʼnemogi apakufaʼe kolaʼeʼmo neʼaliya kava huno falisiyafeʼmo agufaʼe kolaʼaʼeʼmo aliʼniye.

¹⁵ Alitenoʼaeʼmo nefaliya kavaʼmo afoʼamoʼmo Nevoʼmo aeno agaseno himamuʼamo alino atalesiyafeʼmo faliʼniye. Falisaya kavafeʼmo koli huteʼa kanamo neʼaliya vayaʼmo hatu maeno apatesiyafeʼmo faliʼniye.

¹⁶ Agaemo ani kavatetiʼmo enisole vayaʼmo hapa noʼmaeyaʼmonanafa Emalehamu aginago vayaʼageʼmo hapa neʼmae.

¹⁷ Hogote mono vekamo Gotitefeʼmo mono aliʼyaʼmo aliteno mono huno neʼapateya vekamoʼmo hau huno apateteno aliʼyaʼamo oʼataleno alagepa aliʼyaʼmo alisiyafeʼmo aganaʼamogigana huno alino hamaleno ateʼniye. Hosu kavaʼapimo alino atalesigeno Gotiʼa aipamo leno oʼapatesiyafeʼmo muki kavatefeʼmo magoke aiyaya vekamo hamaleʼniye.

¹⁸ Amalageka huʼnigeno agafu kiʼniyaʼmofeʼmo apamalageka nehiya vayaʼmo afaʼa hapa maegaiye.