Himulu 13 - The Keyagana NT and 25 OT books

Ani kavaʼmo hiyo, huno huʼniya gemae

¹ Konagatapieʼmo nelapaiya kavaʼmo oʼataletapa magoʼe huno lapau lapayamopafiʼmo lapaino.

² Nata vayaʼmo esagetapaeʼmo lapake okanitapa hapa maeta yagaitapa apateyo. Mago vayaʼmogimo ani agufa kavaʼmo huʼa enisole vayaʼmo hapa maeʼa yagaiʼa apateʼnayana, enisole vayaʼmo hapa maeʼnone, huʼa oʼapakeʼnae.

³ Kalavusi huʼnaya vayaʼaifeʼmo lapake kanitapa oʼapataletapa lapakesamo afiyo. Apakaeʼeʼmo magokepiʼmo lokaeta kalavusi huʼnegekana hutapa apakaefeʼmo lapakesamo afiyo. Kalaisitefeʼmo hanageke yaʼmo neʼaliya vayaʼaifeʼmo lapake kanitapa oʼapataletapa lapakesamo afiyo, apakaeʼeʼmo ma mopafi maiʼnetapaeʼmo hanageke yaʼmo alisaya vayaʼmo maiʼnayaʼmofeʼmae.

⁴ Muki vayaʼmogimo aʼmo alige veleʼmo maige nehaya kavaʼmoʼa oʼaniʼya kavaʼmo ohaneʼnifa ala agi kavaʼmo haneʼniye. Haneʼniyaʼmonanafa Gotiʼa kumai kavaʼmo nehaya vayaʼe yafaʼmo nehavaya vayaʼeʼmo agoti huno apategaiye

⁵ Lapaʼye osino. Aliʼnaya yafekeʼmo hutapaeʼmo, alagi haiʼmo aliʼnone, hutapa lapakesamo afitetapa lapaipamoʼmo falu hino. Na kava higetapaene. Agaiʼamo hunoʼaeʼmo, muki afinaʼmo olapataleʼna lapakaeʼeʼmo magokepi lokaeʼna maige maige huʼna maiʼneʼna lapa maegauve, huno huʼniyaʼmofeʼmae.

⁶ Huno huʼniyaʼmofeʼmo koli osuta lokiya gemo hutaeʼmo, Ala kava neʼmoʼa laha neʼmaeya vekamo maiʼniye. Koli osugune. Ma mopafi vayaʼmogi lagaetegamo na agufa kavaʼmo hugae, huta hugune.

⁷ Yagaiʼa lapateʼneʼa Goti geʼamo lapa paiʼnaya vayaʼaifeʼmo lapakesamo afiyo. Alagepa kavaʼmo huteʼa uʼa atupaleʼmo avaʼyi huʼnae, hutapa lapakesamo afifi nehutapaeʼmo apakesamo afiʼa fatago huʼnaya kavaʼmo apakame hutapa hiyo.

⁸ Yesu Kalaisiʼa alu afina alu afinaʼmo alu kavaʼmo huno noʼmaifa akeyaʼvilaga maiʼniya kavakeʼmo huno neʼmaiyanageno henagaʼamo ani agufa kavakeʼmo huno maigiye.

⁹ Fiku yanageʼa mago vayaʼmogi aeto aeto agufa geletiʼmo lapayateʼmo heʼa lapavayu huliʼa ugayanagi ehetapiye. Alagepa kavanageno Gotiʼa fikumo lapa maeno nelapamiya gemoʼa lapaipa lapakesamo alino lokiya vaino lapategaiye. Neʼyafeʼmo, neyo, huʼa huge oʼneyo, huʼa huge nehaya gemoʼa lapaipa lapakesamo alino lokiya vaino olapategaiye. Ani gemo akame nehaya vayaʼmo hapa oʼmaeʼniye.

¹⁰ Lagae ofalinimo haneʼniye. Inagi lagae ofalinimo hiʼyalamutetiʼmo alita neʼnonaʼmonanafa mono huʼa neʼapataya vayaʼmogi seli nopiʼmo aliʼyaʼmo neʼaliya vayaʼmogimo lagae hiʼyalamutetiʼmo afaʼa aliʼa oʼnegae.

¹¹ Na agufa kavaʼmo nehayaʼmofeʼmae. Mono huʼa neʼapataya vayaʼmogimo hosu kavaʼapilefeʼmo afumo amagiteʼa kolaʼmo lakiʼa aliniʼa mono nopiʼmo uʼa haiʼnayaʼmonanafa afumogi apakufaʼamo alini uʼa taonimo lafi kegiʼya malagamo atafiʼmo nekae.

¹² Ani kavaʼmo nehagenoʼaeʼmo Yesuʼa vayaʼamo kolaʼaletiʼmo apavaleno alino apaoteʼmo apatesiyafeʼmo taonimo lafi kegiʼya malagamo uno faliʼniye.

¹³ Apakameʼyamo amiʼnageno hosu vekagana huno maiʼnigeʼapaeʼmo lafi kegiʼya malagamo avaleliʼuʼa amagiʼnayaʼmofeʼmo apakameʼyamo lamisayafeʼmo agaetegamo lafi kegiʼya malagamo vigetao.

¹⁴ Hanege hanege huno hanesiya taonimo ma mopafiʼmo ohaneʼniyaʼmonanafa afole aisiya taonifiʼmo maisunafeʼmo agava neʼmaune.

¹⁵ Inagi lagaemo agaetetiʼmo muki afinaʼmo Gotiʼmo ofalinimo amitetaeʼmo agiʼaleʼmo alita asaga huta atetetaeʼmo hao ke hegetao. Lavayafatikeʼmo ani ofalinimo amigetao.

¹⁶ Amitetapaeʼmo alagepa kavaʼmo huge hapa maetapa apamige hisayafeʼmo lapake okanino. Gotiʼa ani agufa ofalinimo neʼamiya kavafeʼmo lusi kava huno nehaiye.

¹⁷ Lapakaemo yagaiʼa nelapataya vayaʼai apaiyafiʼmo maiʼnetapa geʼapimo afiyo. Apakaemo lapakupi mafaʼneleʼmo yagaiʼa neʼataya aliʼyaʼapilefeʼmo Gotifeʼmo ha paigae. Geʼapimo afigenoʼao apaipamoʼmo kana osuʼnisigeʼa apamogaga aiʼa aliʼyaʼmo aliyo. Apaipamoʼmo kana hisiya kavaʼmoʼa lapa oʼmaegaiye.

¹⁸ Nunumuʼmo hutapa lateyo. Lagaemo muki kavatefeʼmo hutaeʼmo, lole lagesamo oʼafita alagepa kavaʼmo hugesune, huta magoke lagesamo afiʼnetaeʼmo, lagupi mafaʼnemoʼa hosu kavaʼmo nehae, huno laha nopaigeta alagepa huta neʼmaune.

¹⁹ Aise afinaʼmo utesigeʼna lapakaetegamo visuvafeʼmo nunumuʼmo hutapa lateyo, huʼna lokiya gemo huʼna lapa nepauve.

Nunumuʼmo huʼniya gemae

²⁰ Gotiʼmo Ala kava netimo Yesuʼa hogote vekamo sipisipileʼmo yagaino neʼapateya vekamo kolaʼaletiʼmo hanege hanege huno hanesiya kotalakemo hu maleʼniya kolaʼaletiʼmo faliʼniyatetiʼmo ago alino he tino ateʼniye. Nagaemo Gotiʼa alino nanu aeno lateʼniya vekaeʼmo nunumuʼmo huʼnaeʼmo,

²¹ Muki alagepa kavafeʼmo kahauʼnisiya kavaʼmo hisayafeʼmo alagi alika alagepa huka apato. Yesu Kalaisitetiʼmo apaipafiʼmo aliʼyaʼmo aligeʼapao kahauʼnisiya kavaʼmo hiyo. Kagikaleʼmo alita asaga huta katesunageka ala kagi vekamo maige maige huka maiyo. He, lama ge.

Ge atupa gemo huʼniya gemae

²² Konagaʼnimogitapae, huʼna, yatala gemo avoʼmo okaeʼnovana lapaipamo alino lokiya vaino lapatesiya gemo afitetapaeʼmo alagaʼmo olapaeʼninagetapa lapaipamoʼmo falu hino.

²³ Afiyo, huʼna, konagatimo Timotiʼmo kalavusifatiʼmo ago hatu maeʼa ateʼnae. Agaemo nagaetegamo malage huno esigeʼna lapakaetegamo avaleliʼna utaʼa lapakegauʼae.

²⁴ Lapakaemo yagaiʼa nelapataya vayaʼe muki Goti apaote vayaʼaeʼmo ge apamamaeyo. Itali kotega vayaʼmogimo ge lapamamaeʼnae.

²⁵ Gotiʼa muki vayaʼamo fikumo lapa maeno lapamino. He, lama ge.