Himulu 12 - The Keyagana NT and 25 OT books

Yesufekeʼmo lagesamo afigetao, huno huʼniya gemae

¹ Ani asole vayaʼmogi apakesamo afiʼa fatago huʼnaya kavaʼmo aliʼa lave liʼnaya vayaʼmo faliteʼapaeʼmo hiyakana huʼa maiʼneʼa faiʼa vego huʼa lateʼa maiʼnageta folagapiʼmo maiʼnonageʼapaeʼmo aulu lahaeʼa lageʼa maiʼnae. Aulu lahaeʼa lageʼa maiʼnayaʼmofeʼmo lagaemo aliʼnona kana yaʼmo atalege latafausiya hosu kavaʼmo hatu maeta atalege huteta lesisi agufa kavaʼmo huta oʼataleta atafauta alagi huta maiʼneta laulagaleʼmo valino lateʼniya kateʼmo nagu nagu huta vigetao.

² Yesufekeʼmo aulu haelita nagu nagu huta vigetao. Agaekeʼmo lagesamo afita fatago nehuna kavaʼmo alino aepa failino uʼniyanageno alino hano huno atesiya vekamo maiʼniye. Agaemo, lusi kava huʼna namogaga aiguve, huno agesamo afitenoʼaeʼmo malipu yosaleʼmo falisiya kavatefeʼmo oʼataleno atafauno alagi huno maiʼneno faliʼniye. Malipu yosaleʼmo falisiya kavafeʼmo lusi kava huno navagage hugiye, huno huteno agesa alaʼamo oʼafiʼnifa, kanalene, huteno falitenoʼaeʼmo uno haino Gotiʼa yagaino neʼapateya siyaʼaleʼmo lamaga haopaleʼmo fai maiʼniye.

³ Hosu vayaʼmogimo apaini huʼa ateʼnaya kavafeʼmo lapakesa afifi hutapa maiyo fiku yanageno alagaʼmo lapaesigeno lapaipamoʼmo kana hisigetapa atalegae.

⁴ Hosu kavafeʼmo kame nehageʼapaeʼmo kamitimo olapamagiʼnayaʼmofeʼmo oʼataleta kamemo hutapa ateyo.

⁵ Lapakaemo Goti mafaʼneʼamo maiʼnagenoʼaeʼmo Gotiʼa lapaipamo alino lokiya vaino atesiya agufa gemo hiyo huno huʼniya gemo ago lapa paiʼniyana lapake kaniʼniye. Ani geeʼmo hunoʼaeʼmo, Mafaʼneʼnimogae, huno, Ala kava neʼmoʼa alino api aino katesiyafeʼmo kayoʼmo kamisigekaeʼmo, ina agufa kavane, huka kagesamo oʼafiyo. Ani kava huno ge kahausigekaeʼmo kaipamoʼmo kana osino.

⁶ Ala kava neʼmoʼa muki vayaʼaifeʼmo hau ayamopafiʼmo nehaiya vayaʼaina kayoʼmo neʼapamiye. Agaemo muki vayaʼmo agaetegamo eʼnagenoʼaeʼmo alino falu fala huno apateteno, mafaʼneʼnimo maiʼnae, huno hapa nepaiya vayaʼaina kayoʼmo neʼapamiye, huno huʼniye.

⁷ Lapakaemo kana yaʼmo aliʼnetapaeʼmo oʼataletapa atafauta alagi huʼnetapa uʼnisayaʼmoʼmo agaiʼa mafaʼneʼalegamo nehiya agufa kavaʼmo nehiye. Afoʼapimogimo muki mafaʼne anagaʼapimo kayoʼmo neʼapamiye.

⁸ Gotiʼa muki mafaʼne anagaʼamo kayoʼmo neʼapamiyaʼmofeʼmo kayoʼmo nolapamisiyana mafaʼneʼamo oʼmaiʼnafa kumai mafaʼnegana hutapa maiʼnae.

⁹ Ma mopafi afotimogimo aliʼa api aiʼa lateʼnagetaeʼmo apaiyafiʼmo maiʼnone. Launelameʼmo Afotimoʼmo magoʼe huta aiyafiʼmo maigetao alagepa huta maigune.

¹⁰ Ma mopafi afotimogimo apakesafatiʼmo afiʼa aise afinaʼmo kayoʼmo lamiʼnayaʼmonanafa agaemo aote kavaʼamo aliteta alagepa kavaʼageʼmo huta agaekana huta laote vayaʼamo maisunafeʼmo laha maeteno kayoʼmo nelamiye.

¹¹ Gotiʼa kayoʼmo nelamigetaeʼmo, lamogaga neʼauna kavaʼmo ohaneʼnifa lagafu nekiya kavaʼmo haneʼniye, huta lagesamo neʼafunaʼmonanafa Gotiʼa kayotetiʼmo alino laya malesigetaeʼmo henagaʼamo laipafatiʼmo fatago kavaʼmoʼa alagagana huno aesigeta laipamoʼmo falu hugiye.

¹² Inagi lapayaʼmoʼmo alagaʼmo nehaegeno lapaiyamoʼmo atete nehiyanagi alitapa lokiya vaita ateyo.

¹³ Api kateʼmo vigenoʼao lapaiyamo afe leʼniya lapaiya auʼamo alino api aino alagepa huno lapateteno alino lokiya vaino lapateno.

¹⁴ Lapakaemo muki vayaʼeʼmo alagepa hutapa magokepi lokaeta maiʼnetapa aote kavaʼmo alisayafeʼmo nagu nagu hutapa vegala aeyo. Aote kavaʼmo oʼaliʼnisaya vayaʼmogimo Ala kava neʼmo oʼagegayaʼmofeʼmae.

¹⁵ Fiku yanageʼa mago konagatapimogimo Gotiʼa fikumo hapa maeno neʼapamiya kavateʼmo uʼa haiʼa metalegayanagi kava yagaitapa maiyo. Fiku yanageno hafuʼyafatiʼmo ausisi aeteno hosu atu neheya yaʼmo afole aiteno hanageke yaʼmo alino lapamiteno asole vayaʼmo alino hosu huno apategaiyanagi yagaitapa maiyo.

¹⁶ Isoʼa kumai kavaʼmo huge mono osuno aote kavafeʼmo, afa kavaʼmo haneʼniye, huno huge huʼniye. Isokana huno maiʼnisiya vekamo lapakaeʼeʼmo oʼmaisiyafeʼmo kava yagaitapa maiyo. Isoʼa yege mafaʼnemo maiʼniyaʼmonanafa aise neʼyaʼmo miya faisiyafeʼmo yege mafaʼnemogi neʼaliya yaʼmo ha maesiya yaʼamo maketi huno fiku ago ataleʼniye.

¹⁷ Henagaʼamo afoʼamoʼmo yege mafaʼnemo alino auleno neʼapateya gemo Gotiʼa alino auleno kateno, huno ha paisiyafeʼmo hauʼniyaʼmonanafa afoʼamoʼmo ha opaiʼniye. Ha opaiʼnigenoʼaeʼmo aviʼyaʼmo nehunoʼaeʼmo haoke heno ge huʼniyaʼmonanafa aipamo alino afe lesiya kaʼmo alagi ohaneʼniye.

Lole kotalakelafeʼmo huʼniya gemae

^18-19 Akeyaʼvilagamo Isaleli vayaʼmogi atafa kotalakemo afisayafeʼmo avemo agiʼamo Sainai avemo aiyafiʼmo uʼa maiʼnayana lapakaemo ame oʼalisaya aveleʼmo etapa maiʼnae. Ani avefiʼmo alopa atamo kaeʼnigeno lusi haniʼmo huʼnigenoʼaeʼmo lusi yasimo aliʼnigeno pikulimo huʼnigeno lokiya gefatiʼmo huʼniye. Ani gemo huʼnigeʼa Isaleli vayaʼmogi afiteʼapaeʼmo, kahao ke honanagi, magoʼe huno ani gemo laha opaino, huʼa ha paiʼnae.

²⁰ Gotiʼa hunoʼaeʼmo, mani aveleʼmo mago vekamoʼmo eno ame alige afumoʼmo eno ave aiyafiʼmo ame alige nehisigetapaeʼmo yafa kayotetiʼmo amagisageno falige keveletiʼmo haesageno falige hino, huno hapa paiʼniyaʼmofeʼmo lusi kava huʼa koli huʼnae.

²¹ Ageteʼapaeʼmo lusi kava huʼa koli huteʼa apamoʼya aiʼnigenoʼaeʼmo Moseseʼa hunoʼaeʼmo, lusi kava huʼna atete huteʼna koli nehuve, huno huʼniye.

²² Lapakaemo Sainai aveleʼmo oʼmeʼnafa Saiyoni kotega avemo kokuʼnapi Yulusalemu taonifiʼmo yalagisa Gotiʼa neʼmaiya taonifiʼmo tauseni tauseniʼa enisole vayaʼmo neʼmaiya taonifiʼmo etapa maiʼnae.

²³ Gotiʼa yege mafaʼneʼamogi apakiʼapimo kokuʼnapiʼmo avoʼmo kae maleʼniya vayaʼmo aliʼa anupa huʼa maiʼneʼa apamogaga neʼaiyategamo etapa maiʼnae. Lapakaemo Gotiʼa muki vayaʼmo alino fako huno neʼapateya vekalegamo eʼnae. Fatago vayaʼmo alino alagepa huno apateʼniya vayaʼai apauneʼapametegamo eʼnae.

²⁴ Yesuʼa folagapi vekamo saufa kotalakemo hu maleʼniya vekalegamo eʼnae. Kolaʼaletiʼmo aino fuli fuli huno faleno apateʼniya kolaʼalegamo eʼnae. Ani kolaʼmoʼa Evo kolaʼmo ago aeno agaseʼniyaʼmofeʼmo hosu kavafeʼmo ge nosifa alagepa kavafekeʼmo ge nehiye.

²⁵ Inagi ehetapiye, huʼna, ge nehisigetapaeʼmo geʼamo amagita oʼataletapa geʼamo alagepa hutapa afiyo. Gotiʼa ma mopafi Sainai aveletiʼmo ge huʼnigeʼapaeʼmo geʼamo oʼafiʼa amagiʼa ataleʼnaya vayaʼmo faiʼa kasalo opaeʼnayaʼmofeʼmo kokuʼnapatiʼmo ge nehisigetaeʼmo oʼafita lakameʼyamo neʼamisunana haiya kava huta faita kasalo paegaune.

²⁶ Gotiʼa akeyaʼvilagamo ge huʼnigenoʼaeʼmo imima aliʼnigeno ma mopamoʼmo kanage kanage huʼniyaʼmonanafa hemeni afinafeʼmo lapa maegauve, huno hu maleʼniya gemoʼmo hunoʼaeʼmo, halate mopaʼageʼmo aliʼna kanage kanage osugufa kokuʼnaʼeʼmo aliʼna kanage kanage huguve, huno hu maleʼniye.

²⁷ Agaemo hunoʼaeʼmo, halate, huʼniya gemo aepaʼamo haneʼniyana alino kanage kanage osisiya kavaʼmo oʼageʼnona kavaʼmo hanesiyafeʼmo alino kanage kanage hisiya kavaʼmo apayatetiʼmo alo huʼnaya yaʼmo ageʼnona yaʼmo alino ataleʼniye, huno alino lave liʼniye.

²⁸ Lagaemo yagaiʼnaya kini vayaʼmogi nehaya kavaʼmo lateʼnigeta aliʼnonanageta alagepa huta maige maige huta maigune. Ani kavaʼmoʼa kanage kanage osugiyaʼmonanafa hanege hanege huno haneʼneno haneno hano osuno afaʼa hanegaiye. Ago lamiʼniyaʼmofeʼmo hao ke heteta Goti aiyafiʼmo maiʼneta koli huʼneta mono higetao.

²⁹ Gotitimoʼmo atafiʼmo kaeʼnageno leno saga neliya atagana huno maiʼniyaʼmofeʼmae.