Himulu 11 - The Keyagana NT and 25 OT books

Apakesamo afiʼa fatago huʼnaya vayaʼaifeʼmo huʼniya gemae

¹ Lagesamo afita fatago nehuna kavaʼmo afole aisiya kavatefeʼmo lavayagunagu huta agava neʼmauna kavaʼmo oʼageʼnona kavaʼmo alino lave neligeta alagi ago ageʼnone.

² Akeyaʼvilaga vayaʼmogimo apakesamo afiʼa fatago huʼnaya kavatetiʼmo Gotiʼa hunoʼaeʼmo, naulagaleʼmo fatago vayaʼmo maiʼnae, huno hapa paiʼnigeʼa alagepa apakiʼapimo aliʼnae.

³ Lagaemo lagesamo afita fatago nehuna kavatetiʼmo hutaeʼmo, Gotiʼa geʼaletiʼmo ma mopagi kokuʼnanagi muki neʼagona yanagi huno oʼageʼnona yatetiʼmo alo hu maleʼniye, huta afita aeto nehune.

⁴ Evoʼa agesamo afino fatago huʼniya kavatetiʼmo alagepa ofalinimo Keni ofalinimo ago aeno agaseʼniya ofalinimo Gotina amiʼniye. Gotina amiʼniya ofalinieʼmo agesamo afinoʼaeʼmo, naulagaleʼmo fatago vekamo maiʼnane, huno ha paiʼniye. Evoʼa ago faliʼniyaʼmonanafa hemenimo agesamo afino fatago huʼniya kavatetiʼmo ge nehiye.

⁵ Inokiʼa agesamo afino fatago huʼniya kavatetiʼmo ofalino afaʼa maiʼniye. Gotiʼa kokuʼnapiʼmo ago avalelino uno haiʼniyaʼmofeʼmo kahauya huʼnayana oʼageʼnae. Gotiʼa kokuʼnapiʼmo avalelino ohaiʼniya afinaʼmo hogoteno Inokifeʼmo amuse huno ateʼniyaʼmofeʼmae, huno huʼniye.

⁶ Amuse huno ateʼniyaʼmonanafa apakesamo afiʼa fatago nosaya vayaʼaifeʼmo Gotiʼa amuse huno apatesiyafeʼmo magoke alagepa kavaʼmo alagi afaʼa osugae. Na kava hinageʼapaene. Gotitegamo neʼvaya vayaʼmogimo huʼapaeʼmo, Gotiʼa maiʼniye, huteʼa agaefeʼmo apayamukiki huʼa kahauya huʼa agesayafeʼmo nehaya vayaʼaina alagepa yaʼmo neʼapamiye, huʼa apakesamo afiʼa fatago nehae.

⁷ Gotiʼa muki vayaʼmogimo oʼageʼnaya kavafeʼmo Noafeʼmo hunoʼaeʼmo, ehekae, huno, hosu vayaʼmo alagi aliʼna hano huʼna apatalegauve, huno ha paiʼnigeno Noaʼa lusi kava huno amoʼyamo aliʼnigeno agesamo afino fatago huʼniyaʼmofeʼmo afamo anagaʼamogi apakufamo alino katino apatesiyafeʼmo mago alopa sipimo alo huʼniye. Ani kavaʼmo huʼniya kavatetiʼmo ma mopafi vayaʼaifeʼmo, lapakaemo hosu kavaʼmo nehayanagetapa faligae, huno alino apave liʼniye. Agaemo Gotitegatiʼmo fatago kavaʼmo apakesamo afiʼa fatago nehageno neʼapamiya agufa fatago kavaʼmo aliʼniye.

⁸ Gotiʼa Emalehamuʼmo amiʼniya kotegamo visiyafeʼmo keya aeno ge huʼnigeno Emalehamuʼa agesamo afino fatago huʼniya kavatetiʼmo ani gemo afiteno koʼamo ago ataleno oʼageʼniya kotegamo uʼniye.

⁹ Agesamo afino fatago huʼniya kavatetiʼmo Gotiʼa polomasi gemo ha painoʼaeʼmo, mago mopamo kamiguve, huno ha paiʼniya kotegamo alu nofi vayaʼai mopaleʼmo kalaga vekamo seli nopiʼmo maiʼniye. Gotiʼa Emalehamufeʼmo, fikumo kaha maeʼna kamiguve, huno ha paiʼniya polomasi gemo hana paiʼniya vekalaʼmo Aisikiʼe Yekopuʼeʼmo seli noʼapifi noʼapifiʼmo magokepi lokaeʼa maiʼnae.

¹⁰ Agaemo Gotiʼa agesamo afino alo huno faino ateʼniya taonifiʼmo maisiyafeʼmo agava maiʼniye.

¹¹ Selaʼa agesamo afino fatago huʼniya kavatetiʼmo lokiyaʼamo aliteno aipaguʼeʼmo maiteno mafaʼnemo alino atesiya afinaʼmo ago hano huʼniyaʼmonanafa mafaʼnemo alino ateʼniye. Agaemo mafaʼnemo kamiguve, huno polomasi gemo huno ha paiʼniya Gotifeʼmo afaʼageʼmo ge hugeno oʼatalegaifa alagikeʼmo geʼamo akame hugiya vekamae, huno agesamo afiʼniye.

¹² Huʼniyaʼmofeʼmo magoke vekamo alagi ago hogoʼamo falisiyafeʼmo huʼniya vekafatiʼmo asole aginago vayaʼmo kokuʼnate asole kanefiʼmo haneʼniyanageta lekana opaige ani kahaepamo lekana opaige hisuna agufa aginago vayaʼmo afole aiʼnae.

¹³ Ani muki vayaʼamogimo apakesamo afiʼa fatago hume hume eʼa faliʼnae. Gotiʼa polomasi gemo hunoʼaeʼmo, fikumo lapa maeʼna lapamiguve, huno hu maleʼniya yaʼmo oʼaliʼnayaʼmonanafa muga afagiʼaleʼmo haneʼnigeʼa ageteʼapaeʼmo, aligune, huʼa magoke apakesamo afiteʼa ani geleʼmo atafauʼa anukiʼa alagi huʼa maigekana huʼa atafauʼa alagi huʼa maiʼnae. Ani kavaʼmo huʼa maiʼneʼapaeʼmo, nata vayaʼmo alu kotega vayaʼmo maiʼnone, huʼa huʼnae.

¹⁴ Ani gemo nehaya vayaʼmogimo, Afotimo kotegamo uta haita alagi maisunafeʼmo lavayagunagu huta agava neʼmaune, huteʼa huʼa ha leʼa hapa nepaiye.

¹⁵ Apakaemo ataleʼa eʼnaya kotegaeʼmo apakesamo afiʼnaesinana halate aiʼa atagi neʼa uʼnaesinaʼmonanafa

¹⁶ alagepa koʼmo aeno agaseʼniya kokuʼna kotefeʼmo hapauʼniye. Gotiʼa maisaya taonimo alo huno apateʼniyaʼmofeʼmo Gotitimoʼmo maiʼniye, huʼa agi neʼaya gelefeʼmo avagage nosiye.

¹⁷ Gotiʼa Emalehamuʼmo amalageka huʼnigenoʼaeʼmo agesamo afino fatago huʼniya kavatetiʼmo mafaʼneʼamo Aisikiʼmo amagino ofalinimo amiʼniye. Polomasi gemo afiʼniya vekamoʼa magoke mafaʼneʼamo amagino ofalinimo amiʼniye.

¹⁸ Gotiʼa ani mafaʼnefatikeʼmo hunoʼaeʼmo, Aisiki vayapatiʼmo kaginago vayaʼmo maigae, huno hu maleʼniye.

¹⁹ Agaemo hunoʼaeʼmo, Gotiʼa himamuʼaletiʼmo falisiya kavapatiʼmo afaʼa alino he tino ategaiye, huno agesamo afitenoʼaeʼmo aune kavaʼmo huno faliʼniyatetiʼmo halate avaleʼniye.

²⁰ Aisikiʼa agesamo afino fatago huʼniya kavatetiʼmo afole aisiya kavatefeʼmo Yekopuʼe Isoʼefeʼmo hunoʼaeʼmo, Gotiʼa alino auleno lanateno, huno hana paiʼniye.

²¹ Yekopuʼa agesamo afino fatago huʼniya kavatetiʼmo falisiyafeʼmo nehunoʼaeʼmo Yosefe mafaʼnelafeʼmo hunoʼaeʼmo, Gotiʼa alino auleno lanateno, huno hana paiteno hayopa kayoʼamo alino hayopa faino maiʼneno Gotifeʼmo mono huʼniye.

²² Yosefeʼa agesamo afino fatago huʼniya kavatetiʼmo falisiyafeʼmo nehunoʼaeʼmo Isaleli vayaʼaifeʼmo, Isipi kotetiʼmo ataletapa ugefe hisaya afinaʼmo kanolufatiʼmo nayamufaʼnimo alinitutapa kita nateyo, huno hapa paiʼniye.

²³ Moseseʼmo itaʼafoʼalaʼmoganimo aliʼana ateteʼanaeʼmo, alagepa mafaʼnemo maiʼniye, huʼana ageʼnaʼaʼmofeʼmo anakesamo afiʼana fatago huʼnaʼa kavaʼaniletiʼmo loleʼe magoʼe kaimo maisiyafeʼmo aliʼana fala kiʼana ateʼnaʼae. Anakaemo kini vekamoʼmo hu maleʼniya keʼaepa geʼamo amagiʼana atalesaʼafeʼmo koli osuʼnaʼae.

²⁴ Kini vekamo Felo aʼmafaʼnemoʼa Moseseteʼmo yagaino ateʼnigeno Moseseʼa ko sino alopa hetenoʼaeʼmo agesamo afino fatago huʼniya kavatetiʼmo hunoʼaeʼmo, Felo aʼmafaʼnemo mafaʼnemo oʼmaiʼnove, huno huʼniye.

²⁵ Agaemo Goti vayaʼaʼeʼmo magokepi lokaeno maiʼneno kana yaʼmo alisiyafeʼmo hauʼniyaʼmonanafa aise afinaʼmo hosu kavafeʼmo agufamoʼmo amogaga aisiya kavafeʼmo ohauʼniye.

²⁶ Agaemo Gotiʼa amisiya miyafekeʼmo agesamo afiʼniyaʼmofeʼmo Kalaisi agiʼalefeʼmo huʼa faipa huʼa natesaya kavaʼmo hogote kanale kavaʼmo haneʼnigeno Isipi koteʼmo haneʼniya kagemi yaʼe konali yaʼefeʼmo henaga yaʼmo ina agufa yaʼmo haneʼniye, huno agesamo afiʼniye.

²⁷ Kini vekamoʼmo aipamo leno ateʼniyaʼmonanafa Moseseʼa agesamo afino fatago huʼniya kavatetiʼmo koli osuno Isipi kotegatiʼmo ataleno uʼniye. Agaemo noʼagaya vekamo agetenoʼaeʼmo geʼaleʼmo oʼataleno atafauno alagi huno maiʼniye.

²⁸ Agesamo afino fatago huʼniya kavatetiʼmo Isipi vayaʼai yege mafaʼneʼapimo kamitimo apamagiʼniya enisole vekamoʼa Isaleli nofi vayaʼai yege mafaʼneʼapimo oʼapamagisiyafeʼmo Pasova kavaʼmo hutapa sipisipimo amagitapa kolaʼaletiʼmo notapimo kipa yosaleʼmo faleyo, huno hapa paiʼniye.

²⁹ Isaleli vayaʼmogi apakesamo afiʼa fatago huʼnaya kavatetiʼmo haesa solovala aniʼmo aino akaka vaeʼnigeno folagapiʼmo hau huʼniya mopaleʼmo uʼnae. Isipi kotega vayaʼmogimo apavegala aeli uʼapaeʼmo amalageka huʼa aniʼmo lakaeʼnagenoʼaeʼmo aniʼmoʼa ago aeno apati kaeʼniye.

³⁰ Isaleli vayaʼmogimo apakesamo afiʼa fatago huʼnaya kavatetiʼmo Yeliko taonifiʼmo uʼa seveniʼa afinaʼmo aiʼa vego huʼa neʼagenoʼaeʼmo yafa kegiʼyamo aino nakupaeno asagauno aiʼniye.

³¹ Lehepiʼa kumai a kanomoʼmo agesamo afino fatago huʼniya kavatetiʼmo apamasa hisaʼafeʼmo eʼnaʼa vekalaʼmo alino falu fala huno anateʼnigeʼapaeʼmo Isaleli vayaʼmogi apakesamo afiʼa fatago osuʼnaya vayaʼmo hapaeteʼa Lehepiʼmo afaʼa ateʼnageno maiʼniye.

³² Magoʼe huʼna apava gemo hisufiye. Nagaemo Gitiyoniʼagi Malakiʼagi Samisoniʼagi Yefetaʼagi Neviniʼagi Gotitegati gemo alini eʼa aeʼa hakalo huʼa hapa nepaiya vayaʼaifenagi huʼna apava gemo huʼna avoʼmo kaesuva afinaʼnimo ohane.

³³ Apakaemo apakesamo afiʼa fatago huʼnaya kavatetiʼmo alu nofi vaya alu nofi vayaʼai ati vayaʼapiʼeʼmo kamemo huʼa aeʼa apakaseʼnae. Apakaemo vayaʼai kavaʼapimo aliʼa fako huʼa apateʼnageʼapaeʼmo alagepa kavaʼmo huʼnae. Gotiʼa polomasi gemo hunoʼaeʼmo, fikumo lapa maeʼna lapamiguve, huno hu maleʼniya yaʼmo ago aliʼnae. Afela laiyonimogimo hapaesaya kavaʼmo huʼnayaʼmonanafa apakesamo afiʼa fatago huʼnaya kavatetiʼmo apavayamo alino akaniʼniye.

³⁴ Alopa atamoʼa leno pasagalisiya agufa atamo ago aeʼa yu heʼnae. Vayaʼmogi naipeletiʼmo apaiʼa kiʼa apatesayafeʼmo apaiʼnayana apaiʼa hatagauʼnae. Lokiya oʼvaiʼnaya vayaʼmogi lokiya vayaʼmo hamaleʼnae. Koli osuʼa lokiya vaiʼa kamemo huteʼa alu nofi ati vayaʼmo hapa faiʼa hapaetalageʼa uʼnae.

³⁵ Gotiʼa apakesamo afiʼa fatago huʼnaya kavatetiʼmo mafaʼneʼapimo faliʼnayatetiʼmo halate alino he tino apateʼnigeʼa itaʼapimogimo halate apavaleʼnae. Huʼnayaʼmonanafa magoʼamo apakafu kiʼnigeʼa faliʼnae. Kame vayaʼapimogimo huʼapaeʼmo, lapakaemo atalesayana afaʼa hatu maeta lapategaune, huʼa hapa paiʼnageʼapaeʼmo kanolufatiʼmo he tiʼapaeʼmo maige maige huʼa maisaya kavafeʼmo apakesamo afiteʼapaeʼmo, oʼatalegaune, huʼa huʼnae.

³⁶ Mago vayaʼmogimo apakesamo afiʼa fatago huʼnaya vayaʼaifeʼmo huʼa faipa huʼa apateteʼa nofi kayotetiʼmo apamagiʼnae. Mago vayaʼmogimo apakesamo afiʼa fatago huʼnaya vayaʼmo seli nofitetiʼmo kiʼa apateteʼa kalavusi huʼa apateʼnae.

³⁷ Yafa kayotetiʼmo apamagige sotetiʼmo apakufamo aliʼa vasagaliʼa atalege hosu kavaʼmo hisayafeʼmo apamalageka huge naipeletiʼmo apaiʼa kiʼa apatege huʼnae. Kukena yaʼapimo ohaneʼnigeʼa sipisipi agufamo aliʼa vaiʼa alige meme agufamo aliʼa vaiʼa alige huteʼa umenitata huʼnae. Kagemi yaʼapimo alagi ohaneʼnigeʼapaeʼmo apaini huʼa apateteʼa apakaetegamo hosu kavaʼmo huʼnae.

³⁸ Ma mopafi vayaʼmogimo apakaeʼeʼmo magokepi alagi lokaeʼa maisaya agufa kava osuʼnae. Nata vayaʼmo maiʼneʼa kaʼme kotega umenitata huʼa maige avelegamo umenitata huʼa maige yafa kapiʼmo uʼa maige kelifiʼmo uʼa lamiʼa maige huʼnae.

³⁹ Gotiʼa muki vayaʼamogimo apakesamo afiʼa fatago huʼnaya kavatetiʼmo naulagaleʼmo fatago vayaʼmo maiʼnae, huno huʼniyaʼmonanafa Gotiʼa polomasi gemo hunoʼaeʼmo, fikumo lapa maeʼna lapamiguve, huno hu maleʼniya yaʼmo oʼaliʼnae.

⁴⁰ Gotiʼa lagaefeʼmo hunoʼaeʼmo, aeno agaseʼniya yaʼmo lapamiguve, huno agesamo afiʼniye. Apakaiʼapigeʼmo apaoteʼmo uʼa haiʼa ohapaigafa lagaeʼeʼmo magokepiʼmo uta haita hapaisunafeʼmo agesamo afiteno hu maleʼniye.