Himulu 10 - The Keyagana NT and 25 OT books

¹ Gotiʼa Yu vayaʼmo apamiʼniya keʼaepa gemoʼmo alagepa aune kavaʼmo ohaneʼnifa alagepa kavaʼmo Gotiʼa afole aigiye, huno hu maleʼniya kavaʼmo alino lave lisiyafeʼmo yegemo auneʼagana huno haneʼniye. Kafugaʼae kafugaʼaeʼmo afumo amagiʼa amiʼnayaʼmonanafa ani agufa ofalinimoʼa alagepa huʼa maige maige huʼa maisayafeʼmo Gotitegamo neʼvaya vayaʼmo alagi alino alagepa huno oʼapategaiye.

² Alagi alino alagepa huno apateʼniyesinana magoʼe huʼa Gotiʼmo ofalinimo alagi oʼamiʼnaesine. Mono huʼnaya vayaʼmo aeno kalo paeno apateʼniyesinana apakupi mafaʼnemoʼmo hosu kavaʼapimo haneʼniye, huno osuʼniyesine.

³ Huno osuʼniyesinaʼmonanafa ani agufa ofalini kavatefeʼmo muki kafugaʼae kafugaʼaeʼmo hosu kavaʼapieʼmo apake okaniʼa apakesamo afifi huʼa maiʼnae.

⁴ Pulumakamo kolaʼmoʼe mememo kolaʼmoʼeʼmo hosu kavaʼapimo afaʼa alino oʼatalegaiye.

⁵ Afaʼa alino oʼatalegaiyaʼmofeʼmo Kalaisiʼa ma mopafiʼmo eminenoʼaeʼmo, Afumo amagiʼa nekamiya kavaʼe ofalinimo nekamiya kavaʼefeʼmo alagi okahauʼniyaʼmofeʼmo nagufamo alo huka nateʼnane.

⁶ Kagaemo afumo amagiʼa hiʼyalamuteʼmo maleʼneʼa nekaya kavaʼe hosu kavaʼapilefeʼmo afumo amagiʼa nekamiya kavateʼefeʼmo amuse huka oʼapateʼnane.

⁷ O Gotiyo, huʼna, mukukafiʼmo nava gemo huka avoʼmo kae maleʼnane. Ani gelefeʼmo kahauʼniya kavaʼmo hisuvafeʼmo ago emineʼnove, huʼna huʼnove, huno huʼniye.

⁸ Hogoteno hunoʼaeʼmo, Afumo amagiʼa nekamiya kavanagi ofalinimo nekamiya kavanagi afumo heʼa hiʼyalamuteʼmo maleʼneʼa ata nekaya kavanagi hosu kavaʼapilefeʼmo nekamiya kavanagi huno okahauʼniyaʼmofeʼmo amuse huka oʼapateʼnane, huno ha paiʼniye. Ani kavaʼmo nehuʼapaeʼmo keʼaepa gemo akame nehayaʼmonanafa amuse osuʼniye.

⁹ Inagi henagaʼamo hunoʼaeʼmo, O Gotiyo, huno, kahauʼniya kavaʼmo hisuvafeʼmo emineʼnove, huno ha paiʼniye. Inagi Gotiʼa henagaʼamo afole aiʼniya kavaʼmo alino afole aino atesiyafeʼmo hogote kavaʼmo ago alino ataleʼniye.

¹⁰ Yesu Kalaisiʼa Gotiʼmo hauʼniya kavaʼmo huʼniyaʼmofeʼmo muki afinatefeʼmo magoke afinaʼmo agaiʼa agufamo amiʼniya ofaliniletiʼmo hosu kavatimo alagi aeno kalo paeʼnigeta laote alagepa vayaʼamo maiʼnone.

¹¹ Muki Yu vayaʼmogimo mono huʼa neʼapataya vayaʼmo he tiʼa maiʼneʼapaeʼmo muki afinaʼae afinaʼaeʼmo aliʼyaʼmo neʼaliʼapaeʼmo ani agufa ofalinimo amite amite huʼa maiʼnayaʼmonanafa ani agufa ofalinimoʼmo hosu kavaʼapimo alagi alino oʼatalegaiye.

¹² Huʼnayaʼmonanafa ani vekamoʼmo muki afinatefeʼmo magoke ofalinimo amiteno Goti lamaga haopaleʼmo fai maiʼniye.

¹³ Ani afinatetiʼmo Gotiʼa kame vayaʼamo alino aiyafiʼmo apatesiyafeʼmo agava neʼmaiye.

¹⁴ Agaemo magoke ofalinimo amiteno apavaleno apaoteʼmo apateteno alagi alino alagepa huno apateʼniyanageʼa alagepa huʼa maige maige huʼa maigae.

¹⁵ Agaemo ani kavatetiʼmo laha paiteno Aote Aunemeʼamoʼmo aeno hakalo huno laha painoʼaeʼmo,

¹⁶ Ala kava neʼmoʼa hunoʼaeʼmo, Ani kotalakemo afole aisiya afinaʼmo apakaeʼeʼmo hu malegauve. Keʼaepa geʼnimo apaipafiʼmo avoʼmo kae maleteʼna apakesafiʼmo aliʼna malegauve, huno hu maleʼniye,

¹⁷ huno huteno magoʼe gemo hunoʼaeʼmo, hosu kavaʼapiʼe keʼaepa geʼnimo amagiʼa ataleʼnaya kavaʼapileʼefeʼmo magoʼe huʼna nagesamo oʼafiʼna afaʼa nagekaniʼna atalegauve, huno huʼniye.

¹⁸ Gotiʼa hosu kavaʼapimo ago alino ataleʼniyaʼmofeʼmo hosu kavaʼapilefeʼmo halate amisaya ofalinimo alagi ohaneʼniye.

Koli osuta Goti haopaleʼmo vigetao, huno huʼniya gemae

¹⁹ Konagaʼnimogitapae, huʼna, ani gemo huʼniyaʼmofeʼmo koli osuta Yesu kolaʼaletiʼmo alagi aote mono nopiʼmo uta haigetao.

²⁰ Agaemo aeʼa akani maleʼnaya kena kitamo ago yakino lateʼniyanageta agufaletiʼmo saufa kaʼmo maige maige huta maisuna kaʼmo ago valino lateʼniyaʼmofeʼmae.

²¹ Siosi vayaʼaiteʼmo yagaino neʼapateya vekamo maiʼneno Ala kava netimo mono huno nelateya vekamo maiʼniyaʼmofeʼmo

²² lama ge laipamo kaliteta magoke laipa lagesamo alitetaeʼmo lagesamo afita fatago nehutaeʼmo Goti haopaleʼmo uta haigetao. Laipafiʼmo aino fuli fuli huno lateʼnigenoʼaeʼmo yuʼilaga vekatimoʼmo hosu kavatapimo haneʼniye, huno nosiye. Lagufaleʼmo alagepa anitetiʼmo faleno lateʼniyanagi uta haigetao.

²³ Ani kavaʼmo huguve, huno laha paiʼniya vekamoʼmo geʼamo amagino ataleteno alu gemo osugiyaʼmofeʼmo agava maiʼneta lavayagunagu nehuna kavatefeʼmo lole lagesamo oʼafita atafauta alagi huʼneta aeta hakalo higetao.

²⁴ Lagaemo alita he tita apatesunageʼapaeʼmo hapau apayamopafiʼmo hapauge alagepa kavaʼmo huge hisayafeʼmo konagatieʼmo lagesamo afifi huta maigetao.

²⁵ Mago vayaʼmo aliʼa anupa huʼa neʼmaiya kavaʼmo ataleʼnayaʼmofeʼmo oʼataleta alagepa kavaʼmo hiyo, huta hapa paisunageʼa laha paisageta huta alita anupa huta maigetao. Alopa hosu afinaʼmo neʼegetapa ageʼnayaʼmofeʼmo ani kavaʼmo magoʼe hutapa hiyo.

²⁶ Lagaemo lama gemo ago ageta alagepa huʼnonaʼmofeʼmo amagita atalesunafeʼmo, kanalene, huta hisunana hosu kavatimo aeno kalo paeno atalesiya ofalinimo alagi ohaneʼniye.

²⁷ Ohaneʼniyaʼmofeʼmo Gotiʼa agoti huno latesiya kavafekeʼmo koli huta agava maisuna kavaʼmo haneʼniye. Aipamo leno neʼapateyanageno kame vayaʼamo atamoʼmo leno pasaga ligiye.

²⁸ Muki vayaʼmogimo Mosese keʼaepa gemo ago amagiʼa ataleteʼapaeʼmo afa gemo haneʼniye, huʼa huʼnaya vayaʼmo ago faliʼnae. Agoti gemo neʼafiya yateʼmo lole vekalaʼmoganimofi loleʼe magoʼe vayaʼmogimofi huʼa apakaefeʼmo, hosu kavaʼmo huʼnae, huʼa huʼnageʼapaeʼmo hapau huʼa oʼapateʼa kamitimo apamagiʼnae.

²⁹ Inagi mago vekamoʼmo Goti Mafaʼneʼaeʼmo, ina agufa vekamae, huteno agiʼaleʼmo alino afepi atege kotalake kolaʼamo alino aote maleʼniya kolaʼaeʼmo ina agufa kolane, huno agesamo afige fikumo hapa maeno neʼapamiya Aunemeʼaeʼmo huno faipa huno atege huʼnisiyana anonaʼalefeʼmo magoʼe huno lusi kayoʼmo apamigiye, huʼa apakesamo afigae.

³⁰ Ala kava neʼmoʼa hunoʼaeʼmo, hosu kavaʼapimo anonaʼapilefeʼmo aeʼna atagaina huʼna kayoʼmo neʼapamuva vekamo maiʼnove, huno huʼniya vekamo ago ageʼnone. Magoʼe gemo hunoʼaeʼmo, Ala kava neʼmoʼa vayaʼamo alino fako huno apategaiye, huno hu maleʼniye.

³¹ Gotiʼa afaʼa neʼmaiya vekamo maiʼniyaʼmofeʼmo ayapiʼmo apatafauno maiʼnisiya vayaʼmogimo lusi kava huʼa koli hugae.

³² Hogotetapa maiʼnaya kavafeʼmo lapakesamo afita ho hiyo. Gotiʼa ha le yaʼamoʼmo lapaipafiʼmo aeno ha leʼnigetapa ageʼnae. Agetetapaeʼmo lusi hanageke yaʼmo aliʼnetapaeʼmo oʼataleta lokiya vaitapa lapayamukiki huʼnae.

³³ Lapakaefeʼmo vayaʼmogimo vayaʼai apaulagaleʼmo huʼa faipa huʼa lapateteʼa lapakaetegamo hosu kavaʼmo huʼnaya hanageke yaʼmo alige mani agufa kana yaʼmo aliʼnaya vayaʼeʼmo afalu afalugana hutapa neʼmaiya hanageke yaʼmo alige huʼnae.

³⁴ Nagaemo kalavusifiʼmo maiʼnogetapaeʼmo lapau hutapa nateʼnae. Kagemi yatapimo kumayaʼmo aliʼnagetapaeʼmo kanalene, hutapa huʼnae. Hogote kagemi yatimo kokuʼnapiʼmo okasalisiya kagemi yatimo haneʼniye, hutapa lapaipafiʼmo lapakesamo afiʼnayaʼmofeʼmae.

³⁵ Ani kavaʼmo hutapa maiʼnayaʼmofeʼmo oʼataletapa atafauta alagi hutapa maiyo, alopa miyatapimo aligae.

³⁶ Lapakaemo Gotiʼa hauʼniya kavaʼmo hutetapa lapamiguve, huno huʼniya yaʼmo alisayafeʼmo atafauta alagi hiyo.

³⁷ Ani kavatefeʼmo Goti mukufi gemoʼmo hunoʼaeʼmo, Aise afinaʼmo utesigeno eminesiya vekamo alagikeʼmo eminegaiye. Gemo afino oʼmaigifa malage huno eminegaiye.

³⁸ Inagi fatago vayaʼmo apakesamo afiʼa fatago nehaya kavatetiʼmo alagepa huʼa maigayaʼmonanafa mago vekamo halate ataleno aino atagi neno uʼnisiyaʼmoʼmo alagi aiseʼamo amuse huʼna oʼategauve, huno hu maleʼniye.

³⁹ Huno hu maleʼniyaʼmonanafa lagaemo ataleʼa aiʼa atagi neʼa uʼa afela heʼnaya nofi vayapatiʼmo oʼmaiʼnonaʼmonanafa lagaemo apakesamo afiʼa fatago huʼnageno apakupi mafaʼnemo alino katino neʼapateya nofi vayapatiʼmo maiʼnone.