Himulu 1 - The Keyagana NT and 25 OT books

Gotiʼa Mafaʼneʼaletiʼmo laha paiʼniya geeʼmo huʼniya gemae

¹ Akeyaʼvilagamo Gotiʼa agaiʼalegati gemo alini eʼa aeʼa hakalo huʼa hapa paiʼnaya vayaʼai apavayafatiʼmo laginago vayaʼaifeʼmo hapa paiʼniye. Alu afinaʼae alu afinaʼaeʼmo aise gemo hapa paite hapa paite huge alu kavatetiʼe alu kavatetiʼeʼmo hapa paige huʼniye.

² Hemenimo henaga afinaʼmo Mafaʼneʼaletiʼmo laha paiʼniye. Mafaʼneʼapimogimo afoʼapimogi muki yaʼapimo neʼaliya kava huno Mafaʼneʼamoʼmo muki yaʼamo alisiyafeʼmo ago lekana paino ateʼniye. Gotiʼa agaetetikeʼmo muki yaʼmo alo huʼniye.

³ Agaemo Gotiʼa ha le konali yaʼamo aeno ha legekana huno neʼmaiye. Agaemo Goti lama ge auneʼamo maiʼniye. Lokiya geʼaletiʼmo muki yaʼmo afaʼa hanesiyafeʼmo yagaino ateʼnenoʼaeʼmo agaiʼamo hosu kavatimo aeno kalo paeno ataletenoʼaeʼmo uno haino kokuʼnapi Gotiʼa anaga hogote vekamo yagaino neʼapateya vekamo lamaga haopaleʼmo fai maiʼniye.

Goti Mafaʼneʼamoʼmo enisole vayaʼmo ago aeno apakaseʼniya gemae

⁴ Ani kavaʼmo huno enisole vayaʼmo ago aeno apakaseno Gotiʼa ala agiʼamo amiʼniya agiʼamoʼmo apakiʼapimo ago aeno agaseʼniya kava huno aeno apakaseno maiʼniye.

⁵ Gotiʼa agaefeʼmo, Mafaʼneʼnimo maiʼnane. Hemenimo ago aliʼna kateʼnove, huno huteno magoʼe gemo hunoʼaeʼmo, Afoʼamoʼnamo maiʼnovanageʼna agaeteʼmo ani kavaʼmo hisugeno Mafaʼneʼnimo maiʼniyanageno nagaeteʼmo ani kavaʼmo hugiye, huno ha paiʼniyaʼmonanafa mago enisole vayaʼaifeʼmo ani agufa gemo huno hapa opaiʼniye.

⁶ Hapa opaiʼniyaʼmonanafa yege Mafaʼneʼamo ma mopafiʼmo alino atesigeno eminesiyafeʼmo mani gemo hunoʼaeʼmo, Muki enisole vayaʼmogitapamo agiʼaleʼmo alita asaga hutapa agaetefekeʼmo mono hiyo, huno hapa paiʼniye.

⁷ Enisole vayaʼaifeʼmo apava gemo hunoʼaeʼmo, Enisole vayaʼmo yasigana huno alo huno apateʼniye. Aliʼyaʼamo neʼaliya enisole vayaʼmo ata vaikana huno alo huno apateʼniye, huno huʼniye.

⁸ Huno huʼniyaʼmonanafa Mafaʼneʼaeʼmo hunoʼaeʼmo, O Gotiyo, huno, muki afinaʼmo alagi ofalika afaʼa maige maige huka maiʼneka yagaika apategane. Alagepa huka alika fako huka apateteka yagaika neʼapatane.

⁹ Kagaemo alagepa kavafekeʼmo kahauʼnigekaeʼmo gemo amagiʼa neʼatalaya kavafeʼmo kaini huʼnanageno Gotikamoʼmo uvelimo lakino kateʼnigekaeʼmo lusi kava huka kamogaga aiteka kafalukamogimo ago aeka apakaseka maiʼnane, huno huʼniye.

¹⁰ Magoʼe gemo hunoʼaeʼmo, Ala kava neyo, huno, aepa faiʼniya afinaʼmo ma mopamo alo huʼnane. Kagaemo kayatetiʼmo kokuʼnaʼmo alo huʼnane.

¹¹ Ma mopaʼe kokuʼnaʼeʼmo alagi hano hugiyaʼmonanafa kagaemo afaʼa maigane. Ma mopaʼe kokuʼnaʼeʼmo kukena yakana huno atafa hegaiye.

¹² Vayaʼmogimo kukena yaʼmo asagiʼa lo aeʼa maleteʼa saufa kukena yaʼmo neʼvaiya kava huka ma mopaʼe kokuʼnaʼeʼmo alika ataleteka saufa kokuʼnaʼe mopaʼeʼmo malegane. Maleganaʼmonanafa kagaemo mago alu kava huka oʼmaige ofalige huteka alagi maige maige huka maigane, huno hu maleʼniye.

¹³ Gotiʼa agaefeʼmo hunoʼaeʼmo, lamaga nahaopaleʼmo faika maime maime neʼugeʼnao kame vayakamo aliʼna kaiya afeʼalumelagamo apategauve, huno ha paiʼniyaʼmonanafa mago enisole vayaʼaifeʼmo ani agufa gemo huno hapa opaiʼniye.

¹⁴ Enisole vayaʼmo apauneʼapameʼe vayaʼmo maiʼneʼa Goti aliʼyaʼamo neʼaliya vayaʼmo maiʼnae. Gotiʼa fikumo hapa maeno apakufamo alino katino apatesiya vayaʼmo hapa maesayafeʼmo alino apateʼnigeʼa emineʼae.