Hagai 2 - The Keyagana NT and 25 OT books

Hagaiʼmo halate lole afinaʼmo Goti gemo aeno hakalo huno hapa painoʼaeʼmo, Saufa mono nopiʼmo Goti ha le konali yaʼamo afole aigiye, huno hapa paiʼniya gemae

¹ Seveni kaimo tuveti vani afinaʼmo Ala kava neʼmo Gotiʼa geʼamo alinineno aeno hakalo huno hapa nepaiya vekamo Hagaifeʼmo ha painoʼaeʼmo,

² Hemenimo kagaemo Silatili mafaʼnemoʼmo Yuta vayaʼaiteʼmo yagaino neʼapateya vekamo Selamamaliʼe Yosateki mafaʼnemo hogote vekamo mono huno neʼapateya vekamo Yasuvaʼefeʼmo ani gemo huka hana paiyo.

³ Hogote mono noʼmo ha le konali mono noʼnimo ageʼnaya vayapatiʼmo mago vayaʼmo afaʼa maiʼnafiye. Hemenimo ani mono noʼmo haiya kava hutapa ageʼnae. Hogote mono noʼnieʼmo lapakesamo afitetapaeʼmo hemenimo haneʼniya mono nofeʼmo ina agufa mono none, hutapa ageʼnafiye.

⁴ Ani kavaʼmo hutapa ageʼnayaʼmonanafa Selamamaligagi Yosateki mafaʼnemo hogote vekamo mono huka neʼapatana vekamo Yasuvagagi muki vayaʼmogitapaʼenagi huʼna huʼnaeʼmo lokiya vaitapa aliʼyaʼmo aliyo. Nagaemo lapakaeʼeʼmo magokepi lokaeʼna maiʼnovanagi aliʼyaʼmo aliyo, huʼna Gotiʼnamo asole vayaʼaiteʼmo neʼyagauva vekamoʼnamo mani gemo nehuve.

⁵ Akeyaʼvilagamo Isipi kotegatiʼmo ataletapa eʼnaya afinaʼmo lapakaeʼeʼmo kotalakeʼnimo ago hu maleʼnova geʼnilefeʼmo Nauneʼnameʼnimoʼmo lapataleno oʼuno lapakaeʼeʼmo magokepi lokaeno neʼmaiyaʼmofeʼmo koli osiyo.

^6-7 Ala kava neʼmo asole vayaʼaiteʼmo neʼyagaiya Gotitapimoʼmo hunoʼaeʼmo, Aise afinaʼmo utesigeʼna halate kokuʼnanagi ma mopagi solovala aninagi muki alu nofi vaya alu nofi vayanagi huʼna aiʼna hali hali hisugeʼa muki nofi vayaʼmogimo hapaʼye nehiya vekamo eno ani nopiʼmo maisigeno ani mono noʼnifiʼmo ha le konali yaʼnimo havaitegaiye, huʼna Gotiʼnamo asole vayaʼaiteʼmo neʼyagauva vekamoʼnamo ani gemo ago hu maleʼnove.

⁸ Muki kotegamo haneʼniya siluva yafanagi goli yafanagi huno nagaiʼni yaʼageʼmo haneʼniye, huʼna Gotiʼnamo asole vayaʼaiteʼmo neʼyagauva vekamoʼnamo mani gemo hu maleʼnove.

⁹ Mani henaga mono noʼmo ha le konali yaʼamoʼmo hogote mono noʼmo ha le konali yaʼamo ago aeno aga segaiye. Mani haopalegamo kame nehaya kavaʼmo aliʼna hano huʼna ataleteʼna nagaeʼeʼmo aliʼna nanu aeʼna apategauve, huʼna Gotiʼnamo asole vayaʼaiteʼmo neʼyagauva vekamoʼnamo mani gemo hu maleʼnove, huno hapa paiʼniye.

Hagaiʼa halate loleʼe magoʼe afinaʼmo Goti geʼamo aeno hakalo huno hapa paiʼniya gemae

¹⁰ Kini vekamo Naliyasiʼa Pesiya koteʼmo lole kafugamo yagaino apateʼnigenoʼaeʼmo naeni kaimo tuveti fo afinaʼmo Ala kava neʼmo Gotiʼa geʼamo alinineno aeno hakalo huno hapa nepaiya vekamo Hagaifeʼmo ha painoʼaeʼmo,

¹¹ Gotiʼnamo asole vayaʼaiteʼmo neʼyagauva vekamoʼnamo huʼnaeʼmo, Hemenimo kagaemo keʼaepa gelefeʼmo mono huʼa nelapataya vayaʼaifeʼmo ani gemo huka ge huka apafi go.

¹² Mago vekamoʼa Gotiʼmo ofalinimo amiʼnaya ameʼamo alino kukena yaʼafiʼmo maleteno alinino neʼvisigenoʼaeʼmo kukena atupaʼamoʼmo peleti mayaleʼmofi neʼyaʼmo kaeʼa maleʼnisaya yateʼmofi nofi alagafati aniteʼmofi olivi uvelileʼmofi alu neʼyateʼmofi huno ame alisiyaʼmoʼmo ani neʼyaʼmo aote neʼyaʼmo hamalegaifiye, huka ge huka apafi go, huno ha paiʼnigeno uno mono huʼa neʼapataya vayaʼaifeʼmo ge huno apafi geʼnigeʼapaeʼmo, haʼao, huʼa, ani kavaʼmo osugiye, huʼa ha paiʼnagenoʼaeʼmo

¹³ Hagaiʼa magoʼe huno ani gemo huno ge huno apafi geʼniye. Mago vekamoʼmo faliʼnisiya vekamo agufaleʼmo ame aliteno eno ani neʼyateʼmo ame alisiyaʼmoʼmo ani hosu neʼyaʼmo ofalinimo noʼamiya neʼyaʼmo hamalegaifiye, huno ge huno apafi geʼnigeʼapaeʼmo mono huʼa neʼapataya vayaʼmogimo huʼapaeʼmo he, huʼa, neʼyateʼmo ame alisiyaʼmoʼmo hosu neʼyaʼmo hamalegaiye, huʼa ha paiʼnae.

¹⁴ Hagaiʼa geʼapileʼmo aeno atagaina huno hapa painoʼaeʼmo, Ala kava neʼmoʼa hunoʼaeʼmo, Manileʼmo maiʼnaya vayaʼeʼmo naulagaleʼmo ani agufa kavaʼmo huʼa maiʼnae. Apakaemo muki aliʼyaʼmo neʼaliʼapaeʼmo aliʼyaʼapigeʼmo aliʼa hosu huʼa neʼatalae. Apakaemo neʼnamiya ofalinimo aliʼneʼapaeʼmo aliʼa hosu huʼageʼmo neʼatalae, huno huʼniye.

Gotiʼa vayaʼnimo hapa maesugeʼa alagepa huʼa maigae, huteno polomasi hu maleʼniya gemo hapa paiʼniya gemae

¹⁵ Hemenimo lapakesa afifi hume hume viyo. Hogotetapa mono noʼnimo aepa faitapa okiʼnaya afinaʼmo lapakaetegamo afole aiʼniya kavafeʼmo alagepa hutapa lapakesa afifi hutapa maiyo.

¹⁶ Lapakaemo mago neʼyaʼmo alitapa alu ai maleʼnaya yateʼmo utapaeʼmo loleʼe loleʼe kuʼmo aita havai tegaune, hutapa huʼnayaʼmonanafa lole kutalapiʼmo aiʼnae. Lapakaemo alopa tekifatiʼmo aniʼmo naya loleʼa samomo he fita havai tegaune, hutapa huʼnayaʼmonanafa loleʼe loleʼe samogeʼmo he fitapa havai teʼnae.

¹⁷ Nagaemo amuko yasimo aliʼna ateʼnogeno alinineno hoyatapifiʼmo aliʼnigenoʼaeʼmo kaita haugekana agufa kavaʼmo huʼnigeno falu tege hosuge ko aigekana huno koʼmopamo emineno neʼyatapimo amagiʼnigeno falu tege huʼnigetapa ageʼnayaʼmonanafa aita ataginetapa nagaetegamo oʼmeʼnae, huʼna lapa nepauve.

¹⁸ Lapakaemo mono noʼmo kisaya yafaʼmo faitapa ateʼnaya afinatetiʼmo eno hemenimo naeni kaimo tuveti fo afinaʼmo lapakaetegamo kana yaʼmo afole aiʼniya kavafeʼmo lapakesa afifi hutapa maiyo.

¹⁹ Hemenimo avina yaʼmo notapifiʼmo afaʼa haneʼnifiye. Nofiʼmoʼa alagamo oʼaege fiki yosamoʼmo alagamo oʼaege pamagalanati yosamoʼmo alagamo oʼaege alifi yosamoʼmo alagamo oʼaege huʼniyaʼmonanafa mani hemenimo aepa faiʼna aliʼna aulena lapatesugetapa alagepa hutapa maime maime ugae, huno hapa paiʼniye.

Hagaiʼa halate loleʼe loleʼe afinaʼmo Goti geʼamo aeno hakalo huno hapa paiʼniya gemae

²⁰ Halate ani tuveti fo afinakeʼmo Ala kava neʼmoʼa Hagaifeʼmo ani gemo huno ha paiʼniye.

²¹ Kagaemo Yu vayaʼaiteʼmo yagaino neʼapateya vekamo Selamamalifeʼmo ani gemo huka ha paiyo. Gotiʼnamo asole vayaʼaiteʼmo neʼyagauva vekamoʼnamo huʼnaeʼmo, Nagaemo kokuʼnateʼe ma mopaleʼeʼmo aliʼna uti uti aiʼna ategauve.

²² Nagaemo yagaiʼa neʼapataya gamani vayaʼmo hapa faiʼna apatalege alu nofi vaya alu nofi vayaʼmogi lokiyaʼapimo aliʼna hano huʼna atalege hosimoʼmo halaulino neʼvigeʼapaeʼmo kamemo nehaya talalaʼapimo aliʼna hosu huʼna atalege talalafiʼmo maiʼnaya ati vayaʼeʼmo kamemo huge kamemo nehaya hosileʼmo kamemo hisayafeʼmo haiʼa fai maiʼnaya vayaʼmo apamagisugeʼa asagauʼa aige nehisageʼapaeʼmo ani kavaʼmo huʼa apakaiʼapi konagaʼapimogimo naipeletiʼmo apaigae.

²³ Gotiʼnamo asole vayaʼaiteʼmo neʼyagauva vekamoʼnamo huʼnaeʼmo, Silatili mafaʼnemo Selamamaligamo aliʼyaʼnimo neʼalina vekamo lekana paiʼna kateʼnovaʼmofeʼmo ani afinaʼmo nayate linimo alagena yaʼnimo haneʼniya linigana huʼna aliʼna katesugeka himamuʼniletiʼmo ge hugane, huno ha paiʼniye.