Hagai 1 - The Keyagana NT and 25 OT books

Hagaiʼa hogote afinaʼamo Goti geʼamo aeno hakalo huno hapa painoʼaeʼmo, he titapa Goti mono noʼamo kiyo, huno hapa paiʼniya gemae

¹ Kini vekamo Naliyasiʼa Pesiya koteʼmo lole kafugamo yagaiʼnigenoʼaeʼmo sigisi kaimo napa vani afinaʼmo Ala kava neʼmoʼa Hagaifeʼmo ha paiʼnigeno Hagaiʼa Gotitegati gemo alinineno aeno hakalo huno hapa nepaiya vekamoʼmo ani Goti gemo Silatili mafaʼnemo Selamamaliʼe Yosateki mafaʼnemo Yasuvaʼefeʼmo hana paiʼniye. Selamamaliʼa Yu vayaʼaiteʼmo yagaino neʼapateya vekagi Yasuvaʼa hogote vekamo mono huno neʼapateya vekagi huʼana maiʼnaʼae.

² Inagi Hagaiʼa ina ge huno aeno hakalo huno hana paiʼniye. Ala kava neʼmoʼa asole vayaʼaiteʼmo neʼyagaiya vekamoʼmo hunoʼaeʼmo, Isaleli vayaʼmogimo huʼapaeʼmo, Ala kava neʼmo mono noʼamo kisuna afinaʼmo afole oʼaiʼniye, huʼa huʼnae.

³ Ala kava neʼmoʼa Hagai avayafatiʼmo muki vayaʼaifeʼmo ani ge huno hapa paiʼniye.

⁴ Lapakaemo mani mono noʼmo ago ataleʼnageno hosuʼnigetapa alagepa yosaletiʼmo ki maleʼnaya notapifiʼmo maisaya afinaʼmo afole aiʼnifiye.

⁵ Notapifiʼmo neʼmaiyaʼmofeʼmo Ala kava neʼmo asole vayaʼaiteʼmo neʼyagaiya vekamoʼmo hunoʼaeʼmo, hosu kavatapiyeʼmo lapakesa afifi hutapa maiyo.

⁶ Lapakaemo asole avina yaʼmo hakaleʼnayaʼmonanafa aiseʼageʼmo leʼnigetapa alinitapa eʼnae. Neʼyaʼmo neʼnayaʼmonanafa lapamu osuʼniyaʼmofeʼmo lapaka teʼniye. Nofi alagafati anitapimo neʼnayaʼmonanafa lapamu osuʼniye. Kukena yatapimo alitapa vaiʼnayaʼmonanafa yasigeʼmo nelahapaiye. Aliʼyaʼmo neʼaliya vayaʼmogimo aliʼyaʼapiletiʼmo miyaʼapimo aliʼnayaʼmonanafa halo aiʼniya kupiʼmo ku ai maleʼnagenoʼaeʼmo malage huno hano nehiya kava huno uno hano nehiye, huno hapa paiʼniye.

⁷ Inagi Ala kava neʼmo asole vayaʼaiteʼmo neʼyagaiya vekamoʼmo ani gemo huno hapa paiʼniye. Nehaya kavatapieʼmo lapakesa afifi hutapa maiyo.

⁸ Lapakaemo uta haitapa avefatiʼmo alopa yosamo heʼya aitapa alinita emitetapa mono noʼnimo kisageʼnaeʼmo namogaga aiteʼna ala nagiʼnimo aliguve.

⁹ Lapakaemo asole yatimo afole aigiye, hutapa lapakesamo afiʼnayaʼmonanafa aise yaʼageʼmo afole neʼaiye. Ani aise yaʼmo alinitetapa notapifiʼmo maleʼnageʼnaeʼmo nagaemo fu huʼna haleʼna ataleʼnogeno uno lageso huʼniye. Na kava higeʼnaeʼmo ani agufa kavaʼmo huʼnove. Mukiʼamogitapamo lapakaitapi notapieʼmo lapakesamo neʼafiyaʼmonanafa nagaemo noʼnimo alagepa huno ohaneʼniyaʼmofeʼmae.

¹⁰ Ani kavaʼmo huʼnaya kavatetiʼmo kokuʼna kaʼmo akani maleʼnigeno lao yaʼmo emi noʼmeʼnigenoʼaeʼmo mopafiʼeʼmo akani maleʼnigeno neʼyaʼmo nohage.

¹¹ Nagaemo koʼmo oʼaiyo, huʼna huʼnogeno mopafinagi avelegagi muki hoyafiʼmo haneʼniya yaʼmo nofi hoyafinagi alivi yosa hoyafinagi muki hoyatapifinagi muki vayaʼaitegagi pulumaka anagaʼaitegagi sipisipi anagaʼaitegagi aliʼyatapilenagi huʼna lao yaʼmo aliʼna ataleʼnogeno emi noʼmeʼniye, huno hapa paiʼniye.

Muki vayaʼmogimo Ala kava neʼmo geʼamo akame huʼnaya gemae

¹² Inagi Silatili mafaʼnemo Selamamaliʼagi Yosateki mafaʼnemo Yasuvaʼa hogote vekamo mono huno neʼapateya vekagi muki Yuta vayapatiʼmo logufa vayanagi huʼa Ala kava neʼmo Gotiʼapimo geʼamo akame huʼnageno Ala kava neʼmo Gotiʼapimoʼmo Hagaiʼa alino ateʼnigeno Gotitegati gemo alinino eno aeno hakalo huno hapa nepaiya vekamo Hagaiʼmo hapa paiʼniya gemo afiteʼa akame huʼnae. Muki vayaʼmogimo Gotifeʼmo koli huteʼa geʼamo akame huʼnae.

¹³ Inagi Hagaiʼa Goti apa vekaʼamoʼmo Goti geʼamo hapa painoʼaeʼmo, Gotiʼa hunoʼaeʼmo, Nagaemo lapakaeʼeʼmo magokepi lokaeʼna maiʼnove, huno huʼniye, huno hapa paiʼniye.

¹⁴ Ani kavatetiʼmo Ala kava neʼmo Gotiʼa Silatili mafaʼnemoʼmo Yuta vayaʼaiteʼmo yagaino neʼapateya vekamo Selamamaliʼagi Yosateki mafaʼnemo hogote vekamo mono huno neʼapateya vekamo Yasuvaʼagi muki vayanagi huno alino he tino apateʼnigeʼapaeʼmo eʼa Gotiʼa asole vayaʼaiteʼmo neʼyagaiya Gotiʼapimo mono noʼamo aepa faiʼa kiʼnae.

¹⁵ Kini vekamo Naliyasiʼa Pesiya koteʼmo lole kafugamo yagaino apateʼnigenoʼaeʼmo sigisi kaimo tuveti fo afinaʼmo noʼmo aepa faiʼa kiʼnae.