Galesiya 6 - The Keyagana NT and 25 OT books

¹ Konagaʼnimogitapae, huʼna, mago hosu kavaʼmoʼa malage huno mago konagatapimoʼmo atafausigeno hosu kavaʼmo huʼnisigetapaeʼmo lapakaepatiʼmo Goti Aunemeʼamo alagepa huʼa akame nehisaya vayaʼmogimo yagu yaga gemo huʼa aliʼa alagepa huʼa ateyo. Lapakaeʼeʼmo lapamalageka hisagetapaeʼmo hosu kavaʼmo osisayafeʼmo lapakaitapileʼmo alagepa hutapa yagaiʼnetapaekeʼmo alita api aita ateyo.

² Konagatapimogimo neʼaliya kana yaʼmo alita hapa maegeʼapao Kalaisi muki keʼaepa geʼamo ago akame hugayanagi.

³ Mago vekamoʼmo hunoʼaeʼmo, ala nagi vekamo maiʼnove, huno agesamo neʼafisiyana ina agufa vekamo maiʼniyaʼmofeʼmo agaiʼaekeʼmo humi neʼate.

⁴ Neʼateyaʼmofeʼmo mukiʼamogi apamete apamete huʼa apakaiʼapi kavaʼapimo aliʼa fako huʼa agegeyo. Mago vekamoʼmo alagepa kavaʼmo nehisiyana agaemo alu vekaeʼmo, ago aeʼna agaseʼnove, huno agesamo oʼafino agaiʼa kavafekeʼmo amogaga aigiye.

⁵ Muki vayaʼmogimo apamete apamete huʼa apakaiʼapi aliʼyaʼapimo aligayaʼmofeʼmae.

⁶ Goti geʼamo neʼafiya vayaʼmogimo aliʼa apaya neʼmalaya tisa vayaʼapimo afalu afalu kavaʼmo huʼa alagepa yaʼapimo aliʼa fako huʼa apamigae.

⁷ Lapakaitapieʼmo humi olapateyo. Lapakaemo Gotifeʼmo afaʼa hutapa ami oʼmalegae. Haʼao, na agufa avina yaʼmo hakaleʼnisafigeno hagesigetapaeʼmo ani agufa neʼyaʼmo aligae.

⁸ Vayaʼmogimo atafa apaipamoʼmo nehaiya kavaʼmo nehisayana hosu neʼyaʼmo afole aisigeʼa aliteʼa faligae. Vayaʼmogimo Goti Aunemeʼamoʼmo hauʼniya kavaʼmo nehisayana alagepa neʼyaʼmo afole aisigeʼa aliteʼa maige maige huʼa maigae.

⁹ Alagepa kavaʼmo nehutaeʼmo alagi alagaʼmo olahaenageta oʼatalesunana hoyatifatiʼmo neʼyaʼmo afu lesiya afinaʼmo alagepa neʼyaʼmo aligune.

¹⁰ Hapa maesuna kaʼmo haneʼnisiyaʼmoʼmo muki vayaʼaina afaʼa hapa maegaunaʼmonanafa apakesamo afiʼa fatago nehaya afamo anagatimo magoʼe huta hapa maegaune.

Ge atupa gemo huʼniya gemae

¹¹ Hemenimo nagaemo avo kayoʼmo aliʼna nagaiʼnimo alopa avoʼmo nekaovanagetapa agetetapaeʼmo, Poloʼmo mani avoʼmo kaeʼniye, hutapa hugae.

¹² Amega apakufale kavafeʼmo amuse huʼa apatesageʼa ala apakiʼapimo alisayafeʼmo hapauʼniya vayaʼmogimo lokiya gefatiʼmo, lapakufamo lagaiyo, huʼa nehae. Kalaisiʼa malipu yosaleʼmo faliʼniya kavafeʼmo ava geeʼmo apaini huʼa oʼapatesayafeʼmo lapakufamo lagaiyo, huʼa nehae.

¹³ Apakufamo nelagaya vayaʼmogimo apakaiʼapimo keʼaepa gemo akame nosayaʼmonanafa lagaemo lakame nehae, huʼa ala apakiʼapimo alisayafeʼmo hapauʼnigeʼapaeʼmo, lapakufamo lagaiyo, huʼa nehae.

¹⁴ Nehayaʼmonanafa nagaemo mago kavatefeʼmo nagiʼnileʼmo aliʼna asaga huʼna nateteʼna namogaga aisufiye. Haʼao, alagi atalegeno hano hino. Nagaemo Ala kava netimo Yesu Kalaisiʼa malipu yosaleʼmo faliʼniya kavafekeʼmo naipafatiʼmo namogaga aiʼninageʼna hapa paisuva gegeʼmo haneʼniye. Gotiʼa malipu yosaleʼmo faliʼniya kavatetiʼmo atafa naipamo ago amagino ataleʼnigeʼna ma mopafi yaʼe amega apakufale kavaʼefeʼmo huʼnaeʼmo, ina agufa kavaʼmo malipu yosaleʼmo faligekana huno haneʼniye, huʼna nagesamo neʼafugeʼapaeʼmo ma mopafi vayaʼmogimo nagaefeʼmo huʼapaeʼmo, ina agufa vekamo malipu yosaleʼmo nili aiteʼa aliʼa he tiʼa ateʼnaya agufa vekagana huno maiʼniye, huʼa nehae.

¹⁵ Mani kavatefeʼmo huʼnaeʼmo, Kalaisi Yesupiʼmo maiʼnonaʼmofeʼmo lagufamo lagauʼnisupi olagauʼnisupi ina agufa kavaʼmo haneʼniye. Gotiʼa saufa vayaʼmo alo huno lateʼniya kavakeʼmo kanale kavaʼmo haneʼniye.

¹⁶ Gotiʼa mani avoʼmo nekaova gemo akame nehisaya vayaʼmo agaiʼa vayaʼmo muki lama ge Isaleli vayaʼaifeʼmo hau huno apatenageʼa apaipamoʼmo falu hino.

¹⁷ Ge atupa geʼnimo huʼnaeʼmo, vayaʼmogimo Ala kava neʼmo Yesutefeʼmo namagiʼnageno nagufaleʼmo nafuguʼmo haneʼniyanagi mago vekamoʼmo magoʼe huno hanageke yaʼmo oʼnamino.

¹⁸ Konagaʼnimogitapae, huʼna, Ala kava netimo Yesu Kalaisiʼa fikumo lapa maeno lapamino. He, lama ge.