Galesiya 5 - The Keyagana NT and 25 OT books

Afa vayaʼmo maiʼnayaʼmofeʼmo afa vayakeʼmo maiyo, huno huʼniya gemae

¹ Kalaisiʼa afa vayaʼmo maisunafeʼmo hatu maeno lateʼnigeta afa vayaʼmo maiʼnonaʼmofeʼmo ani kava huta lokiya vaita afa vayakeʼmo maigetao. Keʼaepa gemo afeʼalumelagamo aliʼa lapatesayafeʼmo nehayanagi halate kana huʼniya aliʼyaʼmo alitetapa kalavusifiʼmo oʼmaiyo.

² Inagi nagaemo Poloʼnamo ani gemo huʼna lapa nepauvanagi afiyo. Lapakaemo, keʼaepa gemo akame huta lagufamo lagaugune, hutapa hisayaʼmoʼmo Kalaisiʼa lapa oʼmaegaiye.

³ Nagaemo halate lokiya gemo huʼna lapa paiʼnaeʼmo, ehetapiye, huʼna, mago vekamoʼmo hunoʼaeʼmo, nagufamo lagauvo, huno nehisiyana muki keʼaepa geʼamo alagi akame huno hano hisiya kavakeʼmo haneʼniye.

⁴ Lapakaemo hutapaeʼmo, keʼaepa gemo akame nehuna kavatetiʼmo Goti aulagaleʼmo fatago vayaʼmo maigune, hutapa hisayana Kalaisiʼa ataletapa Gotiʼa fikumo lapa maeno nelapamiya kavategamo oʼmaitapa malaga vayaʼmo maiʼnae.

⁵ Inagi Gotiʼa hunoʼaeʼmo, naulagaleʼmo fatago vayaʼmo maiʼnae, huno laha paisiyafeʼmo Goti Aunemeʼaletiʼmo lagesamo afita fatago nehutaeʼmo lavayagunagu huta agava neʼmaune.

⁶ Kalaisi Yesupiʼmo maiʼnetaeʼmo lagufamo lagauʼnisupi olagauʼnisupigeno afaʼa laha oʼmaegaiyaʼmonanafa lagesamo afita fatago nehuna kavatimoʼmo lahau layamopafiʼmo lahauʼniya kavatetiʼmo aliʼyaʼmo alisiyaʼmoʼmo afaʼa laha maegaiye.

⁷ Hogotetapa Goti kateʼmo alagepa hutapa nagu nagu hutapa uʼnae. Lapakaemo lama gemo ago akame huʼnayana ina laʼmo halate lapatafauno maiʼniye.

⁸ Gotiʼa lapakaefeʼmo keya aeno ge huʼniya vekamoʼmo ani kavategamo heno lapavayu hulino oʼmeʼniye.

⁹ Falaova laʼnefafiʼmo kosisiya yaʼmo aiseʼamo aliʼa neʼatageno uneno nehigeno mukiʼamo aeno apafu leno ko nesiye.

¹⁰ Ala kava nepiʼmo maiʼnonaʼmofeʼmo alu lapakesamo oʼafigae, huʼna lole nagesamo oʼafiʼna magoke nagesamo neʼafuvaʼmonanafa ina laʼmo lapakesamo neʼafiya yaʼmo alino hosu huno nelapateya vekamo maiʼnisifigeno Gotiʼa anonaʼalefeʼmo amagigiye.

¹¹ Konagaʼnimogitapae, huʼna, hogoteʼna lapakufamo lagaiyo, huʼna hapa paiʼnovaʼmonanafa hemeniʼeʼmo ani agufa gegeʼmo huʼna aeʼna hakalo huʼna hapa nepauvesinana apaini huʼa noʼnataesine. Mani gemo hapa nepauvesinana Kalaisiʼa malipu yosaleʼmo faliʼniya kavafeʼmo ava geeʼmo hosu apaipamo okaliʼnaesine.

¹² Nagaemo lapakesamo aliʼa hosu huʼa nelapataya vayaʼmogi apakaiʼapi apakufamo lagausayafeʼmo nahauʼniye.

¹³ Konagaʼnimogitapae, huʼna, kalavusifiʼmo oʼmaitapa afaʼa maisayafeʼmo Gotiʼa lapakaefeʼmo ge huʼniye. Afaʼa maiʼnayaʼmonanafa fiku yanagetapa ani kavatetiʼmo lapakufamoʼmo hauʼniya kavaʼmo hisaya kaʼmo valitapa ategae. Valitapa oʼatetapa konagatapieʼmo lapau lapayamopafiʼmo lapauʼninagetapa hapa maeyo.

¹⁴ Muki keʼaepa gemo aepaʼamo magoke keʼaepa gefiʼmo haneʼniya gemoʼa hunoʼaeʼmo, kagaikaeʼmo kahau kayamopafiʼmo nekahaiya kava huka kahaopaleʼmo maiʼnaya vayaʼaifeʼmo kahau kayamopafiʼmo kahaino, huno huʼniya gemo akame huʼnisayana muki keʼaepa gemo akame hutapa hano huʼnae.

¹⁵ Huno huʼniyaʼmonanafa lapakaemo afela afugana hutapa hapaege kame hutapa apatege nehisayana ehetapiye, huʼna, lapakaitapiʼeʼmo fikumo alita hano hutapa lapatalegae.

¹⁶ Ani geeʼmo huʼnaeʼmo, Goti Aunemeʼamoʼmo hauʼnisiya kavaʼmo akame hutapa maigenoʼao atafa lapaipamoʼmo haʼye nehiya kavaʼmo afole aiteno ko osigiyanagi.

¹⁷ Atafa laipamoʼmo Goti Aunemeʼaeʼmo kame huno neʼategenoʼaeʼmo Goti Aunemeʼamoʼmo atafa laipaʼeʼmo kame huno neʼate. Kame huno neʼateyaʼmofeʼmo lapauʼnisiya kavaʼmo afaʼa osugae.

¹⁸ Goti Aunemeʼamoʼmo kaʼmo alino ho huno nelapatesiyaʼmoʼmo keʼaepa gemo aiyafiʼmo oʼmaiʼnae.

¹⁹ Muki vayaʼmogimo atafa apaipa apakesamoʼmo hauʼniya kavaʼmo ago ageʼnae. Ani kavaʼmo haneʼniyana veʼalavefatiʼmo kumai kavaʼmo huge mafaʼnefatiʼmo kumai kavaʼmo huge oʼaniʼya kavaʼmo huge apavagage osigeʼa kalamogi nehaya agufa kavaʼmo huge nehae.

²⁰ Aigofe gotiʼapimogitefeʼmo mono nehuʼapaeʼmo apaune kavaʼmo huge lusa kavaʼmo huge analisa apamagige apaini huʼa apatege ge vaige apaipa kafa hapaege apaipa lege apakaiʼapieʼmo apakesamo afige alu apaipa alu apaipamo kalige aliʼa fako huʼa apatege nehae.

²¹ Hosu apaipa kalige kamitimo apamagige lusi aniʼmo neteʼa negi nagi gemo huge lusi kava huʼa ogefage huʼa apavamusa valeʼa negi nagi huge magoʼe huʼa ani agufa hosu kavaʼmo huge nehae. Hogoteʼna lapa paiʼnovanageʼna hemenimo halate magoʼe gemo huʼnaeʼmo, ehetapiye, huʼna lapa nepauve. Afole oʼaiʼniya afinaʼmo hogoteʼna lapa paiʼnaeʼmo mani agufa hosu kavaʼmo nehaya vayaʼmogimo Gotiʼa yagaino neʼapateya kopiʼmo uʼa haiʼa mafaʼneʼapimogimo afoʼapimogi yaʼmo neʼaliya kava huʼa Gotitegatiʼmo hetamaʼapimo afaʼa oʼaligae.

²² Mani hosu kavaʼmo haneʼniyaʼmonanafa Goti Aunemeʼamoʼmo apaipafiʼmo alagagana huno alagepa kavaʼmo alino afole aino neʼate. Ani alagepa kavaʼmo haneʼniyana hapau apayamopafiʼmo hapauge apamogaga aige magoke apaipa apakesamo alige hosu kavaʼmo halate aeʼa atagaina huʼa osuʼa afaʼa maige yuna apaipa kaliteʼa hapa maege muki afinaʼmo oʼataleʼa alagepa kavaʼmo huge

²³ yagu yaga huʼa maige apaipa apakesaleʼmo alagepa huʼa yagaiʼa atege huʼa neʼmaiya kavaʼmo haneʼniye. Magoke keʼaepa gemoʼa mani kavaʼmo osiyo, huno huʼniya gemo ohaneʼniye.

²⁴ Kalaisi Yesu vayaʼamogimo atafa apaipa apakesagi atafa apaipafatiʼmo hapaʼye nehiya kavanagi huʼa aliʼa malipu yosaleʼmo nili aiteʼa aliʼa he tiʼa ateʼnae.

²⁵ Goti Aunemeʼamoʼmo afaʼa maisuna kavaʼmo alino lamiʼniyaʼmofeʼmo akame higetao.

²⁶ Vayaʼmogi lagitileʼmo aliʼa asaga huʼa latesayafeʼmo lagesamo oʼafita konagatimogimo hosu apaipamo kalisiya agufa himuʼnamu kavaʼmo huta laipa kafamo ohapaegetao.