Galesiya 4 - The Keyagana NT and 25 OT books

¹ Ani kavatefeʼmo magoʼe huʼna aeʼna kalafefa gemo hugesuve. Mafaʼneʼamoʼmo afoʼamo muki kagemi yaʼamo henagaʼamo aligiyaʼmonanafa ko osino aise mafaʼnemo maiʼnenoʼaeʼmo kalavusi aliʼyaʼmo neʼaliya vekagana huno maiʼniye.

² Aliʼyaʼamo neʼaliya vayaʼmogi ani mafaʼneleʼe kagemi yaʼaleʼeʼmo yagaiʼa ateme ateme neʼesagenoʼaeʼmo afoʼamoʼmo hu maleʼniya afinaʼmo afole aigiye.

³ Ani kava huta aise mafaʼnegana huta maiʼnetaeʼmo ma mopafi keʼaepa gemo afeʼalumelagamo kalavusifiʼmo maiʼnonaʼmonanafa

⁴ Gotiʼa hu maleʼniya afinaʼmo afole aiʼnigenoʼaeʼmo Mafaʼneʼamo alino ateʼnigeno emineʼniye. Mago ma mopafi a kanomoʼmo alino ateʼnigeno Yu keʼaepa gemo afeʼalumelagamo maiʼniye.

⁵ Agaemo keʼaepa gemo afeʼalumelagamo maiʼnona vayaʼmo miya faino hatu maeno latesigeta Gotiʼa alopa mafaʼneʼamo maisunafeʼmo Yu keʼaepa gemo afeʼalumelagamo maiʼniye.

⁶ Lapakaemo mafaʼneʼamo maiʼnayaʼmofeʼmo Gotiʼa Mafaʼneʼamo Aunemeʼamo alino ateʼnigeno emineno lapaipafiʼmo uno haino maiʼnigetapaeʼmo, Afo, Afotimogae, hutapa ge nehae.

⁷ Inagi kalavusi aliʼyaʼmo neʼaliya vayaʼmo magoʼe hutapa oʼmaiʼnafa Kalaisitetiʼmo Goti mafaʼneʼamo maiʼnetapa muki yaʼmo afoʼamo yaʼmo alisayafeʼmo mafaʼneʼamo maiʼnae.

Poloʼa Galesiya vayaʼaifeʼmo lusi kava huno agesamo afiʼniya gemae

⁸ Hogotetapa Gotiʼa oʼagetapa afaʼa maiʼnetapaeʼmo hosu apaune vayaʼmo aigofe gotitapimogi keʼaepa geʼapimo afeʼalumelagamo maiʼnetapa kalavusi aliʼyaʼapimo alita maiʼnayaʼmonanafa

⁹ hemenimo Gotiʼa ago ageʼnae, huʼna huguvaʼmonanafa Gotiʼa lapakeʼniye, huʼna hisuva gemo haneʼniye. Lapakeʼniyaʼmofeʼmo na kava higetapaeʼmo Gotiʼa ataletapa aita atagi netapa keʼaepa gemoʼmo afaʼa lapa oʼmaeno lokiya vaino olapatesiya gemo afeʼalumelagamo maisayafeʼmo lapauʼniye. Halate kalavusi aliʼyaʼmo neʼaliya vayaʼmo maisayafeʼmo nehafiye.

¹⁰ Lapakaemo sapati afinaʼmo akame huge saufa kai le kavaʼmo huge kafugamo hopa afina kavaʼmo huge hutetapaeʼmo aeto aeto hopa afinafeʼmo lusi kava hutapa lapakesamo neʼafiye.

¹¹ Lapakaefeʼmo nagesamo afiteʼna koli nehuʼnaeʼmo, apakaetegamo afa aliʼyaʼmo aliʼnofiye, huʼna nehuve.

¹² Konagaʼnimogitapae, huʼna, nagaemo hogoteʼna Yu vayaʼai keʼaepa gemo afeʼalumelagamo maigeʼna ataleʼna eʼna alu nofi vekamo lapakaekana huʼna maiʼnove. Lapao ke hovanagi ani kava huta nagaekana hutapa keʼaepa gemo afeʼalumelagamo oʼmaiyo. Nagaetegamo mago hosu kavaʼmo osuʼnae.

¹³ Hogoteʼna lapakaeʼeʼmo maiʼnova afinaʼmo kaitamo nahauʼnigeʼnaeʼmo visuva himamuʼnimo ohaneʼniyaʼmofeʼmo alagepa faigoko gemo aeʼna hakalo huʼna lapa paiʼnove.

¹⁴ Kana yaʼmo aliʼnogetapaeʼmo, hosu vekamo maiʼniye, hutetapa lapakameʼyamo oʼnamiʼnae. Mago enisole vekamoʼmofi Kalaisi Yesuʼmofi huno esigetapaeʼmo lusi kava hutapa alita falu fala hutapa atesaya agufa kavaʼmo hutapa alita falu fala hutapa nateʼnae.

¹⁵ Nagaemo lapakaeʼeʼmo maiʼnogetapaeʼmo lapamogaga aiʼnae. Na agufa kavaʼmo afole aiʼnigetapaeʼmo lapamogaga noʼaiye. Lapa maesiya agufa gemo huʼnaeʼmo, apakaemo afaʼa huʼnaesinana apaulagamo aliʼa katiʼa namiʼnaesine, huʼna hapa nepauve.

¹⁶ Lama gemo lapa nepauvaʼmofeʼmo kame vekatapigeʼmo hamaleteʼna maiʼnofiye.

¹⁷ Mago vayaʼmogi lapakae lapao vayaʼmo maisayafeʼmo lapakaetegamo apayamukiki nehayaʼmonanafa lapakesamo faisayafeʼmo nehae. Lapakaemo nataletapa lapayamukiki hutapa uta apakame hisayafeʼmo apayamukiki nehae.

¹⁸ Vayaʼmogi alagepa kavaʼmo hisayafeʼmo apayamukiki huʼa aliʼa apao yaʼmo nehisayana kanalene. Hogotetapa nagaemo lapao vekamo maisuvafeʼmo lusi kava hutapa nagaetegamo lapayamukiki huʼnayaʼmonanafa hemenimo lapakaeʼeʼmo oʼmaiʼnovaʼmofeʼmo oʼataletapa ani kavakeʼmo hutapa maiyo.

¹⁹ Nahauʼniya mafaʼneʼnimogitapae, huʼna, aʼnemogimo mafaʼnemo aliʼa atesayafeʼmo apakafu nekiya kava huʼna lapakaemo Goti mafaʼnemo hamalesayafeʼmo nagafu kiʼniyanageʼna Kalaisikana hutapa maisayafeʼmo halate magoʼe huno nagafu nekiye.

²⁰ Vaehae, huʼna, na agufa gemo lapa paigufi huʼna alagepa huʼna nagesamo afisuvafeʼmo lapakaeʼeʼmo uʼna maisuvafeʼmo nahauʼniye.

Selaʼe Hegaʼefeʼmo huʼniya gemae

²¹ Keʼaepa gemo afeʼalumelagamo maigune, hutapa nehaya vayaʼmogitapamo Moseseʼa avoʼmo kae maleʼniya keʼaepa gemo aepaʼamo oʼafiʼnafiye.

²² Ani gemoʼa hunoʼaeʼmo, Emalehamuʼa lole mafaʼnelaʼmo alino anateʼniye. Henaga aʼamoʼmo kalavusi aliʼyaʼmo neʼaliya a kanomo agiʼamo Hegaʼa mafaʼnemo alino atetegeno hogote aʼamo afa aʼmo agiʼamo Selaʼa mafaʼnemo alino ateʼniye.

²³ Kalavusi aliʼyaʼmo neʼaliya aʼmoʼa ma mopafi vayaʼmogita alita neʼapatona kava huno mafaʼnemo alino ateʼniyaʼmonanafa afa aʼamoʼmo Gotiʼa fikumo kaha maeʼna kamiguve, huno ha paiʼniya polomasi geletiʼmo mafaʼneʼamo alino ateʼniye.

²⁴ Mani gemo kalafefa gemo haneʼniye. Lole atalaʼanifeʼmo osuʼnifa lole kotalakelafeʼmo huʼniye. Gotiʼa mago kotalakemo keʼaepa geʼamo Moseseʼmo Sainai kotega avefiʼmo amiʼniye. Hegaʼa kalavusi aliʼyaʼmo neʼaliya mafaʼnemo alino ateʼniya kava huno mani kotalakemoʼa kalavusi aliʼyaʼmo neʼaliya mafaʼnemo alino neʼapate.

²⁵ Hegaʼa Sainai kotega avemo Alepiya kotega avemo auneʼamo maiʼniye. Sainai avemo haneʼniya kava huno hemenimo haneʼniya Yulusalemumo auneʼamo haneʼniye. Yulusalemuʼe Yulusalemu mafaʼneʼamogiʼeʼmo kalavusi aliʼyaʼmo neʼaliyaʼmonanafa

²⁶ kokuʼnapi Yulusalemu taonimoʼa afa akana huno haneʼneno muki vayaʼamogita itatimogana huno haneʼniye.

²⁷ Mani kavatefeʼmo Goti mukufiʼmo avoʼmo kae maleʼniya gemoʼa hunoʼaeʼmo, Anamo a kanomo mafaʼnemo alika oʼateʼnana a kanomogamo kamogaga aiyo. Mafaʼnemo alika oʼateʼnanageno kagafu okiʼniya a kanomogamo kamogaga aiteka alopa gefatiʼmo huvo. Na kava higekaene. Anauʼamoʼmo ataleʼniya akana huka maiʼnanaʼmonanafa veleʼmo maiʼniya a kanomo ago aeka agaseka asole mafaʼnemo alika apateʼnane, huno huʼniye.

²⁸ Inagi konagaʼnimogitapae, huʼna, Aisikiʼa fikumo kaha maeʼna kamiguve, huno ha paiʼniya polomasi geʼaleti mafaʼnemo maiʼniya kava huta polomasi geʼaleti mafaʼneʼamo maiʼnone.

²⁹ Agufaletiʼmo alino ateʼniya mafaʼnemoʼa Aunemeʼaletiʼmo alino ateʼniya mafaʼneʼaeʼmo aini huno ateʼniya kava huʼa hemenimo apaini huʼa nelatae.

³⁰ Nelatayaʼmonanafa Goti mukufiʼmo avoʼmo kae maleʼniya gemoʼmo, na agufa gemo huʼniye, huno huʼniye. Mani gemoʼa hunoʼaeʼmo, kagaemo kalavusi aliʼyaʼmo neʼaliya a kanoʼe mafaʼneʼaʼeʼmo alika hana faika anatalegeʼana viʼao. Kalavusi aliʼyaʼmo neʼaliya a kanomo mafaʼnemoʼe afaʼa maiʼniya a kanomo mafaʼnemoʼeʼmo afoʼanimo yaʼmo magokepi oʼaligaʼae, huno huʼniye.

³¹ Inagi konagaʼnimogitapae, huʼna, lagaemo kalavusi aliʼyaʼmo neʼaliya a kanomo mafaʼneʼamo oʼmaiʼnopa afaʼa maiʼniya a kanomo mafaʼneʼamo maiʼnone.