Galesiya 3 - The Keyagana NT and 25 OT books

Keʼaepa gemo akame nehaya kavaʼe apakesamo afiʼa fatago nehaya kavaʼefeʼmo huʼniya gemae

¹ Galesiya vayaʼmogitapae, huʼna, alagi lusi kava hutapa negi neʼmalae. Ina laʼmo negi nofiʼmo aeno lapamiʼnigetapaeʼmo lama gemo akame nosae. Lagaemo Yesu Kalaisiʼa malipu yosaleʼmo faliʼniya kavafeʼmo ava gemo lapaulagafatiʼmo ageʼnegekana hutapa afisayafeʼmo lapakae folagapiʼmo maiʼneta aeta hakalo huta ago lapa paiʼnone.

² Magoke kavafeʼmo ge huʼna lapafi gesuvafeʼmo huve. Lapakaemo keʼaepa gemo akame huʼnaya kavatetiʼmo Goti Aunemeʼamo aliʼnafi Kalaisifeʼmo ava gemo afitetapa lapakesamo afita fatago huʼnaya kavatetiʼmo aliʼnae.

³ Lapakaemo Goti Aunemeʼaletiʼmo aepa faiʼnayaʼmonanafa lagaitimo uta haita hapaigune, hutetapa negi neʼmalafiye.

⁴ Kanamo aliʼnageno Gotiʼa alagepa huno lapa maeʼniya kavaʼmo afa kavaʼmo haneʼninageno alagamo oʼaeʼnisifiye. Nagesa afuvana alagamo ago aeʼnegaiye.

⁵ Lapakaemo Goti keʼaepa geʼamo akame nehayaʼmofeʼmo Gotiʼa agaiʼa Aunemeʼamo alino lapamige lapaipafiʼe lapaopaleʼeʼmo aune kavaʼmo huge nehifi Kalaisifeʼmo ava gemo afitetapa lapakesamo afita fatago nehaya kavatetiʼmo aune kavaʼmo nehiye.

⁶ Emalehamuʼa ani kavaʼmo huno agesamo afino fatago huʼniye. Goti Mukufi avoʼmo kae maleʼniya gemoʼa hunoʼaeʼmo, Emalehamuʼa Goti geʼaeʼmo agesamo afino fatago huʼnigenoʼaeʼmo, naulagaleʼmo fatago vekamo maiʼnane, huno ha paiʼniye.

⁷ Huno ha paiʼniyaʼmofeʼmo apakesamo afiʼa fatago nehaya vayaʼageʼmo Emalehamu aginago vayaʼamo maiʼnae, hutapa lapakesamo afiyo.

⁸ Gotiʼa hogoteno apakeʼniyana malaga nofi vayaʼmogimo apakesamo afiʼa fatago hisageʼna apaketeʼnaeʼmo, naulagaleʼmo fatago vayaʼmo maiʼnae, huʼna hapa paiguve, huno apakeʼniye. Apaketeno hogoteno alagepa faigoko geʼamo Emalehamufeʼmo polomasi gemo huno ha painoʼaeʼmo, nagaemo kagaetetiʼmo muki nofi vayaʼmo aliʼna auleʼna apategauve, huno ha paiʼniye.

⁹ Ha paiʼniyaʼmofeʼmo Gotiʼa agesamo afino fatago huʼniya vekamo Emalehamuʼe apakesamo afiʼa fatago nehaya vayaʼeʼmo magoke agufa kava huʼa aulena vayaʼmo maiʼnae.

¹⁰ Goti Mukufiʼmo avoʼmo kae maleʼniya gemoʼmo hunoʼaeʼmo, Ina lagimo muki afinaʼmo muki keʼaepa geʼamo akame huʼa hano nosisafigeno Gotiʼa lifana huno neʼapate, huno huʼniyaʼmofeʼmo Goti keʼaepa gemo akame nehaya kavaʼapilefeʼmo aliʼa amufa amiʼnaya vayaʼaifeʼmo lifana huno apateʼniye.

¹¹ Goti Mukufiʼmo magoʼe huno avoʼmo kae maleʼniya gemoʼmo hunoʼaeʼmo, Gotiʼa apakesamo afiʼa fatago nehaya kavatetikeʼmo hunoʼaeʼmo, naulagaleʼmo fatago vayaʼmo maiʼnae, huno huʼniyaʼmofeʼmo ago afiʼnonana Gotiʼa keʼaepa geʼamo akame nehisaya kavatetiʼmo ani vayaʼaifeʼmo, naulagaleʼmo fatago vayaʼmo maiʼnae, huno nosiye.

¹² Goti aulagaleʼmo fatago vayaʼmo maisayafeʼmo Goti keʼaepa geʼamo akame nehaya kavaʼmoʼa Kalaisifeʼmo apakesamo afiʼa fatago nehaya kavatefeʼmo ohaneʼnifa alu kavaʼmo haneʼniye. Keʼaepa gemo akame nehaya kavatefeʼmo Goti Mukufiʼmo avoʼmo kae maleʼniya gemoʼmo hunoʼaeʼmo, Goti keʼaepa geʼamo akame nehaya vayaʼmo ani kavatetiʼmo ofaliʼa alagepa huʼa maigae, huno huʼniye.

¹³ Kalaisiʼa lagaetefeʼmo lifana vekamo hamaleʼniyaʼmofeʼmo Gotiʼa lifana huno ateʼnigeno Kalaisiʼa keʼaepa gemoʼmo lifana huno lateʼniya kavapatiʼmo miya faino hatu maeno lateʼniye. Goti mukufiʼmo avoʼmo kae maleʼniya gemoʼmo ani kavatefeʼmo hunoʼaeʼmo, Gotiʼa hosu kavaʼapilefeʼmo yosaleʼmo apaneʼmu aeʼa asai maleʼnaya vayaʼmo lifana huno neʼapate, huno huʼniye.

¹⁴ Gotiʼa Emalehamuʼmo alino auleno ateʼniya kava huno alu nofi vayaʼmogita alino auleno latesiyafeʼmo Kalaisiʼa hatu maeno lateʼniye. Gotiʼa polomasi gemo hunoʼaeʼmo, Nauneʼnameʼmo aliʼna lapamiguve, huno huʼnigeta Aunemeʼamo lagesamo afita fatago hisuna kavatetikeʼmo alisunafeʼmo hatu maeno lateʼniye.

Keʼaepa gemoʼmo Gotiʼa ani kavaʼmo huguve, huno huʼniya polomasi gemo aeno ati okaegaiye, huno huʼniya gemae

¹⁵ Konagaʼnimogitapae, huʼna, alagepa hutapa afisayafeʼmo ma mopafi kavafeʼmo huʼna aeʼna kalafefa gemo hugesuve. Ma mopafi vayaʼmogi mago kotalakemo hu maleteʼa apakiʼapimo avoʼmo kae maleʼnisayaʼmoʼmo mago vayaʼmogi afaʼa aeʼa kalo opaegae. Mago vayaʼmogi afaʼa aliʼa oʼatalege alu gemo aliʼa magokepiʼmo avoʼmo kaeʼa oʼmalege hugae.

¹⁶ Inagi Gotiʼa Emalehamufeʼmo, fikumo kaha maegauve, huno ha paiʼniya polomasi gemo aginago vekaeʼmo, kaha maegauve, huno ha paiʼniye. Gotiʼa Emalehamu aginago vayaʼaifeʼmo ani gemo hapa opaiʼnifa magoke aginago vekaeʼmo ani gemo ha paiʼniye. Ani magoke aginago vekamo Kalaisiʼmae.

¹⁷ Gotiʼa Kalaisitefeʼmo kotalakemo ago hu maleʼnigenoʼaeʼmo fo hataleti tetiʼa kafugamo utegeno Gotiʼa keʼaepa geʼamo alino Yu nofi vayaʼmo apamiʼniye. Ani gemo aepaʼaeʼmo huʼnaeʼmo, henagaʼamo afole aiʼniya keʼaepa gemoʼa hogoteno hu maleʼniya kotalakemo fikumo kaha maeʼna kamiguve, huno ha paiʼniya polomasi gemo alagi amagino oʼatalegaiye.

¹⁸ Vayaʼmogi Goti keʼaepa geʼamo akame nehaya kavatetiʼmo Gotitegatiʼmo aligae, huno hu maleʼniya yaʼmo aliʼnaesinana Gotiʼa fikumo kaha maeʼna kamiguve, huno ha paiʼniya polomasi geʼaletiʼmo afaʼa oʼaliʼnaesinaʼmonanafa Gotiʼa Emalehamufeʼmo, fikumo kaha maeʼna kamiguve, huno ha paiʼniya polomasi geletiʼmo fikumo ha maeno amiʼniye.

¹⁹ Gotiʼa mani keʼaepa geʼamoʼmo na agufa aliʼyaʼmo alisiyafeʼmo apamiʼniye. Gotiʼa keʼaepa geʼaletiʼmo kaʼmo akani maleʼnisigeʼa Yu vayaʼmogimo hosu kavaʼmo osisayafeʼmo polomasi geʼeʼmo alino magokepi lokaeno maleʼniye. Keʼaepa geʼamo haneme haneme neʼesigeno Emalehamu aginago vekamo emiʼnegaiye, huno agesamo afiʼniye. Gotiʼa ani aginago vekaeʼmo, fikumo kaha maeʼna kamiguve, huno polomasi gemo huno ha paiʼniye. Goti keʼaepa geʼamo enisole vayaʼai apavayafatiʼmo Moseseʼa folagapi vekaeʼmo ha paiʼnageno Yu vayaʼaifeʼmo hapa paiʼniye.

²⁰ Magoke vekaeʼmo fikumo kaha maeʼna kamiguve, huno ha paisiyaʼmoʼmo folagapi vekamo aliʼyaʼamo ohanegaiyaʼmofeʼmo Gotiʼa Emalehamufeʼmo, fikumo kaha maegauve, huno ha paiʼniya afinaʼmo folagapi vekamo oʼmaiʼnigenoʼaeʼmo hu maleʼniye.

Keʼaepa gemoʼmo hogoteno yagaino lateʼniya kavafeʼmo huʼniya gemae

²¹ Keʼaepa gemoʼa polomasi geeʼmo kamemo huno neʼatefiye. Ani gemo alagi atalegeno hano hino. Keʼaepa gemoʼa afaʼa maisaya yaʼmo alino apamiʼniyesinana ani keʼaepa gemo akame nehaya kavatetiʼmo naulagaleʼmo fatago vayaʼmo maiʼnae, huno huʼniyesine.

²² Huʼniyesinaʼmonanafa Goti mukufiʼmo avoʼmo kae maleʼniya gemoʼa hunoʼaeʼmo, hosu kavaʼmoʼa muki ma mopafi vayaʼmo kalavusi huno apateʼniye. Yesu Kalaisifekeʼmo apakesamo afiʼa fatago nehaya kavatetiʼmo fikumo hapa maeʼna apamiguve, huno hu maleʼniya yaʼmo apakesamo afiʼa fatago nehaya vayaʼmo alino apamisiyafeʼmo kalavusi huno apateʼniye.

²³ Hogoteta Kalaisifeʼmo lagesamo afita fatago osuʼnonagenoʼaeʼmo keʼaepa gemoʼa kalavusi huno lateme lateme neʼegenoʼaeʼmo Kalaisifeʼmo alagepa faigoko geʼaeʼmo lagesamo afita fatago hisuna gemo lagaeteʼmo afole aiʼniye.

²⁴ Afole aiʼniyaʼmofeʼmo keʼaepa gemoʼa Kalaisitegamo lavalelino uno latesigeta Gotiʼa lagesamo afita fatago hisuna kavatetiʼmo hunoʼaeʼmo, naulagaleʼmo fatago vayaʼmo maiʼnae, huno hisiyafeʼmo keʼaepa gemoʼa yagaino nelateya vekagana huno haneʼniye.

²⁵ Kalaisifekeʼmo apakesamo afiʼa fatago hisaya kavaʼmo afole neʼaisigenoʼaeʼmo yagaino nelateya vekamoʼa magoʼe huno yagaino olategaiye.

Goti mafaʼneʼamo maiʼnona kavafeʼmo huʼniya gemae

²⁶ Muki vayaʼamogitapamo Kalaisi Yesufekeʼmo lapakesamo afita fatago huʼnaya kavatetiʼmo Goti mafaʼneʼamo maiʼnae.

²⁷ Aniʼmo faleʼa neʼapataya kava huno Kalaisipiʼmo faleno lapateʼnigetapa Kalaisiʼa kukenamo vaigekana hutapa alita vaitetapa maiʼnae.

²⁸ Kalaisipiʼmo magoke aiyaya vayaʼmo maiʼnayaʼmofeʼmo mago vayaʼmo Yu vayaʼmo maige mago vayaʼmo alu nofi vayaʼmo maige huʼnone, hutapa osuge kalavusi aliʼyaʼmo neʼaliya vayaʼmo maige afa vayaʼmo maige huʼnone, hutapa osuge ve maige aʼne maige huʼnone, hutapa osuge hutetapa maiyo. Kalaisi Yesupiʼmo maiʼnetapaeʼmo magoke aiyaya vayaʼmo maiʼnae.

²⁹ Lapakaemo Kalaisi vayaʼamo maiʼnisayana Emalehamu aginago vayaʼmo maiʼnae. Mafaʼneʼapimogimo afoʼapimogi muki maleʼnaya yaʼapimo neʼaliya kava hutapa Gotiʼa fikumo kaha maeʼna kamiguve, huno ha paiʼniya polomasi geletiʼmo muki yaʼamo afaʼa aligae.