Galesiya 2 - The Keyagana NT and 25 OT books

Poloʼe mago alu apa vayaʼeʼmo magoke apaipa apakesamo aliʼnaya gemae

¹ Inagi fotiniʼa kafugamo maiteʼnaeʼmo halate Yulusalemu taonifiʼmo Manamasiʼeʼmo Taitasiʼmo avalelitaʼa uʼnoʼae.

² Gotiʼa uvo, huno naha paiteno alino nave liʼnigeʼna ageteʼnaeʼmo uʼna haiʼnove. Haiʼna muki vayaʼai apaulagaleʼmo hapa opaiʼna ala apaki vayaʼaifekeʼmo alagepa faigoko gemo malaga nofi vayaʼaifeʼmo aeʼna hakalo huʼna hapa nepauva gemo aliʼa fako huʼa afisayafeʼmo hapa paiʼnove. Fiku yanageno aliʼyaʼmo aliʼnova kavaʼnimoʼmofi aliʼyaʼmo alisuva kavaʼnimoʼmofi huno neʼyaʼamo afole oʼaigiye, huʼna nagesamo afiʼnove.

³ Taitasiʼa navagi huʼniya vekamo Galiki nofi vekamo maiʼniyaʼmonanafa, Yu vayaʼmogita mono nehuna kava hutapa agufamo lagaiyo, huʼa laha opaiʼnayaʼmonanafa

⁴ mago vayaʼmo aigofe konagatimogimo agufamo lagausayafeʼmo hapauʼniye. Ani vayaʼmo kesi katetiʼmo lamata huliʼa eʼa alita anupa huta maiʼnona vayapiʼmo eʼa maiʼnae. Kalaisi Yesuʼa hatu maeno lateʼnigeta agaepiʼmo afa vayaʼmo maiʼnonageʼapaeʼmo kalavusi huʼa lateteʼa keʼaepa gemo afeʼalumelagamo aliʼa latesayafeʼmo eʼa lamata huʼa maiʼnayaʼmonanafa

⁵ Lama ge alagepa faigoko gemo lapakaetegamo afaʼa hanege hanege huno hanesiyafeʼmo lagaemo huʼnaya geʼapilefeʼmo he huta osuta geʼapimo alagi oʼafiʼnone.

⁶ Mago vayaʼmogi ala apakiʼapimo aliʼnayaʼmonanafa afaʼa ina agufa yane, huʼna huteʼna ani apakiʼapieʼmo nagesamo noʼafuve. Gotiʼa aliʼnaya apakiʼapilefenagi apakufalefenagi huno agesamo noʼafiye. Ani ala apaki vayaʼmogimo magoʼe gemo aliʼa naya oʼmaleʼnayaʼmonanafa

⁷ apakaemo ago ageʼnayana Gotiʼa Pitaʼmo Yu vayaʼaifeʼmo alagepa faigoko geʼamo aeno hakalo huno hapa paisiyafeʼmo lekana paino ateʼniya kava huno Poloʼmo malaga nofi vayaʼaifeʼmo alagepa faigoko geʼamo aeno hakalo huno hapa paisiyafeʼmo lekana paino ateʼniye, huʼa ago nageʼnae.

⁸ Gotiʼa himamuʼaletiʼmo Pitaʼmo lokiya vaino ateʼnigeno Yu nofi vayaʼaitegamo neʼviya kava huno Gotiʼa himamuʼaletiʼmo lokiya vaino nateʼnigeʼna malaga nofi vayaʼaitegamo neʼuve.

⁹ Ala apaki neʼapamiya vayaʼmo Yemisiʼagi Pitaʼagi Yoniʼagi huʼa nageʼnayana Gotiʼa Poloʼmo fikumo ha maeno amiteno mani aote aliʼyateʼmo avaleno ateʼniye, huʼa nageteʼapaeʼmo nagaeʼe Manamasiʼeʼmo afalu afalu kavaʼmo huʼa apayaʼmo laʼamiʼnae. Laʼamiteʼapaeʼmo, he kanalenagi utana malaga nofi vayaʼaitegamo aliʼyaʼmo aliʼagetao lagaemo Yu nofi vayaʼaitegamo uta aliʼyaʼmo aligune, huʼa laʼaha paiʼnae.

¹⁰ Ani kavatefeʼmo mago alu gemo osuʼnafa magoke gemo huʼapaeʼmo, lagaepatiʼmo kagemi yaʼapimo ohaneʼnisaya vayaʼaifeʼmo lanake okanitana hapa maeʼao, huʼa laʼaha paiʼnae. Ani kavaʼmo hisuvafeʼmo lusi kava huʼna nayamukiki nehuve.

Poloʼa Pitaʼmo alino api aino ateʼniya gemae

¹¹ Inagi Pitaʼa Atiyoki taonifiʼmo eno hosu kavaʼmo huʼniyaʼmofeʼmo agaefeʼmo aulagafiʼmo ge hauʼnove.

¹² Hogoteno malaga nofi vayaʼeʼmo magokepi lokaeno neʼyaʼmo neʼnigeʼapaeʼmo mago vayaʼmo Yemisitegatiʼmo eʼa avaʼyi huʼnagenoʼaeʼmo ani apakufamo lagauʼa neʼapataya vayaʼaifeʼmo koli huteno malaga nofi vayaʼmo apataleno uno aote maiʼniye.

¹³ Yu konagatimogi ani hosu kavaʼmo amega apakufamoʼmo hauʼniya kavaʼmo huʼa vayaʼaifeʼmo koli huʼnayaʼmofeʼmo Pitaʼeʼmo hosu kavaʼmo huʼniye. Manamasiʼeʼmo ayate aliʼnageno apakame huʼniye.

¹⁴ Nagaemo ageʼnovana lama ge mono kavaʼmo alagepa faigoko gemo akame huʼa alagepa kateʼmo oʼuʼnageʼna apaketeʼnaeʼmo muki vayaʼai apaulagaleʼmo Pitafeʼmo huʼnaeʼmo, Kagaemo Yu nofi vekamo maiʼnanaʼmonanafa Yu nofi vayaʼai kavaʼmo osuka malaga nofi vayaʼai kavaʼmo nehane. Na kava higekaeʼmo malaga nofi vayaʼmogimo Yu nofi vayaʼmogi nehaya agufa kavaʼmo hisayafeʼmo alika he tika apatesanafeʼmo nehane, huʼna ge hauʼnove.

¹⁵ Yu vayaʼmogi malaga nofi vayaʼaifeʼmo huʼapaeʼmo, hosu vayaʼmo mono nosaya vayaʼmo maiʼnae, huʼa nehayaʼmonanafa ani nofi vayapiʼmo oʼmaiʼnonageʼapaeʼmo Yu nofi vayapati itatimogimo aliʼa lateʼnageta Yu nofi vayaʼmo maiʼnone.

¹⁶ Lagaemo afiʼnonana Gotiʼa keʼaepa geʼamo akame nehaya kavatetiʼmo, naulagaleʼmo fatago vayaʼmo maiʼnae, huno hapa nopaiyaʼmonanafa Yesu Kalaisifekeʼmo apakesamo afiʼa fatago nehaya kavatetikeʼmo, naulagaleʼmo fatago vayaʼmo maiʼnae, huno hapa nepaiye, huta ago afiʼnone. Gotiʼa keʼaepa geʼamo akame nehuna kavatetiʼmo, naulagaleʼmo fatago vayaʼmo maiʼnae, huno laha opaigiyaʼmonanafa Kalaisifekeʼmo lagesamo afita fatago nehuna kavatetikeʼmo, naulagaleʼmo fatago vayaʼmo maiʼnae, huno laha paisiyafeʼmo lagaeʼeʼmo Kalaisifekeʼmo lagesamo afita fatago huʼnone. Gotiʼa muki vayaʼaifeʼmo hunoʼaeʼmo, keʼaepa geʼnimo akame hisaya kavatetiʼmo naulagaleʼmo fatago vayaʼmo maiʼnae, huno nosiyaʼmofeʼmae.

¹⁷ Gotiʼa Kalaisipiʼmo maiʼnonagenoʼaeʼmo, naulagaleʼmo fatago vayaʼmo maiʼnae, huno laha paisiyafeʼmo keʼaepa gemoʼa laha oʼmaegaiye, huteta atalesunageʼapaeʼmo, hosu vayaʼmo maiʼnae, huʼa hugayaʼmonanafa Kalaisiʼa hosu kavaʼmo hisuna kaʼmo valino lateʼnifiye. Ani agufa gemo osutapa alagi atalegeno hano hino.

¹⁸ Lagaemo heta halagape vaita ataleʼnona yaʼmo halate alita he tita atesunaʼmoʼmo hosu kavakeʼmo hugune.

¹⁹ Goti keʼaepa geʼamoʼmo alagi kamitimo namagiʼnigeʼna faliʼnove. Gotiʼa hauʼniya kavaʼmo hisuvafeʼmo keʼaepa geʼalefeʼmo ago faliʼnove.

²⁰ Inagi Kalaisiʼa malipu yosaleʼmo faliʼnigeʼnaeʼmo agaeʼeʼmo faliʼnovaʼmofeʼmo hemenimo afaʼa oʼmaiʼnovaʼmonanafa Kalaisiʼa nagaepiʼmo maiʼniye. Hemenimo ma mopafiʼmo maiʼneʼnaeʼmo Goti Mafaʼneʼaeʼmo nagesamo afiʼna fatago nehuva kavatetiʼmo afaʼa maiʼnove. Agaemo nagaefeʼmo hau ayamopafiʼmo hauʼnigeno falino nateʼniye.

²¹ Gotiʼa keʼaepa geʼamo akame nehaya kavatetiʼmo, naulagaleʼmo fatago vayaʼmo maiʼnae, huno hapa nepaiyesinana Kalaisiʼa afaʼa fikumo faliʼniyesine. Gotiʼa fikumo naha maeno namiʼniya yafeʼmo, afaʼa ina agufa yane, huteʼna nakameʼyamo oʼamiʼnove.