Galesiya 1 - The Keyagana NT and 25 OT books

¹ Nagaemo Poloʼnamo Goti apa vekaʼamo maiʼneʼnaeʼmo mani avoʼmo nekaove. Ma mopafi vayaʼmogi apa aliʼyateʼmo lekana paiʼa oʼnateʼnageno Gotiʼa mago vayaʼaitetiʼmo navaleno oʼnateʼniye. Yesu Kalaisiʼe Afotimoʼmo Yesu Kalaisiʼa faliʼniyatetiʼmo alino he tino ateʼniya Gotiʼeʼmo lekana paiʼana nateteʼana apa aliʼyateʼmo navaleʼana nateʼnaʼae.

² Nagaeʼe muki nagaeʼeʼmo magokepi lokaeʼa maiʼnaya konagatapimogiʼeʼmo Galesiya kotega alita anupa hutapa maiʼnaya siosiʼale siosiʼaleʼmo vayaʼaifeʼmo ge nelapamamaone.

³ Gotiʼa Afotimoʼe Ala kava netimo Yesu Kalaisiʼeʼmo fikumo lapa maeʼana lapamisaʼageno lapaipamoʼmo falu hino.

⁴ Gotiʼa Afotimoʼmo hauʼnigeno Kalaisiʼa geʼamo akame huno hemenimo ma mopafi kavategatiʼmo lagufamo alino katino latesiyafeʼmo hosu kavatilefeʼmo agufamo amiteno faliʼniye.

⁵ Goti agiʼaleʼmo muki afinaʼae afinaʼaeʼmo alita asaga huge huge huta maigetao.

Alagepa faigoko gemo magokeʼageʼmo haneʼniya gemae

⁶ Aise afinaʼmo utegetapaeʼmo Gotiʼa lapakaefeʼmo keya aeno ge huteno Kalaisitetiʼmo fikumo lapa maeno lapamiʼniya vekamo ataletapa alu faigoko gemo afisayafeʼmo uʼnageʼna nahau aiʼnove.

⁷ Alu alagepa gemo ohaneʼniyaʼmonanafa mago vayaʼmogimo alagepa faigoko gemo aliʼa aiʼa ataginovano gemo huteʼa lapakesamo nefaigetapaeʼmo lapausoli nehae.

⁸ Lagaemofi kokuʼnapatiʼmo eminesiya enisole vekamoʼmofi huta alagepa faigoko gemo lapa paiʼnona gemo ataleta alu faigoko gemo aeta hakalo huta lapa paisunana Gotiʼa alino laha faitalenageta alagi afela hesune.

⁹ Hogoteta ani gemo ago huʼnonanageʼna hemenimo halate magoʼe huʼna ani agufa gemo huʼnaeʼmo, mago vayaʼmogi ago lapa paiʼnonagetapa afitetapa aliʼnaya gemo osuʼa alu faigoko gemo lapa paiʼnisayaʼmoʼmo Gotiʼa alino hapa faitalenageʼa alagi afela heyo, huʼna nehuve.

¹⁰ Nagaemo vayaʼmogi amuse huʼa natesayafeʼmo nahaʼye nehigeʼna kahauya nehufiye. Haʼao, Gotikeʼmo amuse huno natesiyafeʼmo nahaʼye nehigeʼna kahauya nehuve. Hogoteʼna vayaʼaifeʼmo nagesamo afiʼnovaʼmonanafa hemenimo amuse huʼa natesayafeʼmo nahaʼye nehisigeʼna kahauya nehuvesinana Kalaisi aliʼyaʼamo oʼaliʼnovesine.

Poloʼa Goti apa vekaʼamo hamaleʼniya kavafeʼmo huʼniya gemae

¹¹ Konagaʼnimogitapae, huʼna, ma mopafi vayaʼmogi alagepa faigoko gemo aeʼna hakalo huʼna hapa nepauva gemo afoʼamogimo oʼmaiʼnae, huʼna lapa nepauva gemo alagepa huta afiyo.

¹² Nagaemo mago vekalegatiʼmo mani gemo oʼalige mago vekamoʼa alino naya oʼmalege huʼniyana Yesu Kalaisiʼa agaiʼageʼmo alino nave liʼnigeʼna ageteʼna afiʼnove.

¹³ Lapakaemo ago afiʼnayana Yu nofi vayaʼmogi nehaya kava huʼna mono huʼnova kavafeʼmo nava gemo ago afiʼnae. Nagaemo Goti siosi vayaʼalegamo lusi kava huʼna naini huʼna apateteʼna siosi vayaʼmo aliʼna hano huʼna apatalesuvafeʼmo huʼnove.

¹⁴ Nagaemo Yu nofi vayaʼmogi nehaya kava huʼna magoʼe huʼna huliʼna neʼuʼnaeʼmo nafaluʼnimogimo ago aeʼna apakaseʼna laginago vayaʼai gemo akame nehuʼnaeʼmo lusi kava huʼna nayamukiki huʼna maiʼnove.

¹⁵ Huʼna maiʼnovaʼmonanafa itaʼnimoʼmo alino oʼnateʼnigenoʼaeʼmo hogoteno Gotiʼa hauʼniya afinaʼmo agaiʼalefeʼmo ago lekana paino nateteno fikumo naha maeno namiʼniya kavatetiʼmo nagaefeʼmo keya aeno ge huʼniye.

¹⁶ Agaemo Mafaʼneʼaeʼmo ava gemo malaga nofi vayaʼaifeʼmo aeʼna hakalo huʼna hapa paisuvafeʼmo Gotiʼa hauʼniya afinaʼmo Mafaʼneʼamo naipafiʼmo alino nave liʼnigeʼna ageteʼnaeʼmo uʼna mago vayaʼeʼmo ge huge afige huʼna oʼmaiʼnove.

¹⁷ Nagaemo hogote apa vayaʼmo uʼna apakesuvafeʼmo Yulusalemu taonifiʼmo oʼuʼnovaʼmonanafa Alepiya kotegamo uʼna kaʼme koteʼmo maigeʼna halate aiʼna atagi neʼna Namasakasi taonifiʼmo eʼna maiʼnove.

¹⁸ Loleʼe magoʼe kafugamo utegeʼna Pitaʼmo uʼna agesuvafeʼmo Yulusalemu taonifiʼmo uʼna agaeʼeʼmo lole salemo maiteʼnaeʼmo

¹⁹ mago alu apa vayaʼamo oʼapakeʼnovaʼmonanafa Yemisiʼa Ala kava neʼmo aganaʼamoʼmo ageʼnove.

²⁰ Goti aulagaleʼmo maiʼneʼnaeʼmo aigofe gemo nosufa alagi lama gemo huʼna avoʼmo nekaove.

²¹ Henagaʼamo Siliya kotegaʼe Silisiya kotegaʼeʼmo uʼna maiʼnogeʼapaeʼmo

²² Yutiya kotega siosile vayaʼmo Kalaisipiʼmo maiʼnaya vayaʼmogimo naugosamo oʼnageʼnae.

²³ Oʼnageʼnayaʼmonanafa mago vayaʼmogi huʼapaeʼmo, ani vekamoʼmo aini huno lateteno apakesamo afiʼa fatago hisaya faigoko gemo alino hano huno atalesiyafeʼmo huʼniya vekamoʼmo hemenimo ani gemo aeno hakalo huno hapa nepaiye, huʼa hapa paiʼnageʼa afiteʼapaeʼmo

²⁴ nagaetetiʼmo Goti agiʼaleʼmo aliʼa asaga huʼa ateʼnae.