Filipai 4 - The Keyagana NT and 25 OT books

Ani kavaʼmo hiyo, huno huʼniya gemae

¹ Nahau nayamopafiʼmo nahauʼniya konagaʼnimogitapae, huʼna, lapakaefeʼmo lusi kava huno neʼnahaiye. Lapakaefeʼmo namogaga neʼauvanageno Gotiʼa lapakaetetiʼmo ala nagiʼnimo namigiye. Inagi Ala kava nepiʼmo lokiya vaitapa he tita maiyo.

² Yuvotigaʼe Sitakigaʼefeʼmo lanahao ke nehovanagi, lanakaemo Ala kava nepiʼmo maiʼnetanaeʼmo magoke lanaipa lanakesamo alitana maiʼao.

³ Goti aliʼyaʼamo nagaeʼeʼmo magokepi lokaeka neʼalina veʼnimogae, huʼna, Kagaefeʼmo kahao ke nehovanagi, ani lole atalaʼmo nagaeʼeʼmo alagepa faigoko gelefeʼmo magokepi lokaeʼana aliʼyaʼmo aliʼnaʼa atalaʼmo alagepa huka hana mao. Anakaegi Kilemeniʼagi muki vayaʼmo nagaeʼeʼmo magokepi lokaeta aliʼyaʼmo neʼaluna vayanagi huno apakiʼapimo Gotiʼa maige maige huʼa maisaya vayaʼai apakiʼapimo avoʼmo kae maleʼniya mukufiʼmo avoʼmo kae maleʼniye.

⁴ Ala kava nefeʼmo muki afinaʼmo lapamogaga aiyo. Halate lapamogaga aiyo, huʼna nehuve.

⁵ Yuna lapaipa kavaʼmo alitapa apave ligeʼa lapakeyo, Ala kava neʼmo ago eminesiya afinaʼmo alagi hogo nehiyanagi.

^6-7 Mago kavafeʼmo lapausoli osuta muki kavatefeʼmo nunumuʼmo hutapa afi neketapaeʼmo hao ke hetapa lapauʼnisiya yafeʼmo Gotifeʼmo ge huta afi gegenoʼao lapaipamo alino falu huno lapategaiye. Haiya kava huno laipamo alino falu huno nelatefi huta oʼageʼnonaʼmonanafa afaʼa alino falu huno lapatesiya kavaʼmoʼa Kalaisi Yesupiʼmo maiʼnayanageno lapaipa lapakesaleʼmo afaʼa yagaino lapategaiye.

⁸ Konagaʼnimogitapae, huʼna, geʼnimo huʼna hano hisuvafeʼmo huʼnaeʼmo, lapakaemo muki alagepa kavaʼe ala apakiʼapimo neʼapamiya kavaʼefeʼmo lapakesamo afifi hutapa maiyo. Lama ge kavanagi ani kavatefeʼmo agiʼaleʼmo aliʼa asaga huʼa neʼataya kavanagi fatago kavanagi oʼaniʼya ofaiʼniya kavanagi kanale kavanagi ala agiʼamo haneʼniya kavanagi hutapa lapakesa afifi hutapa maiyo.

⁹ Nagaemo aliʼna lapaya maleʼnogetapa alita lapaipafiʼmo maleʼnaya gemo akame hiyo. Nava gemo afiteta nehuva kavaʼmo ago nageʼnayanagi nakame higenoʼao Gotiʼa laipamo alino falu nehiya kavaʼmo aepa vekamoʼa lapakaeʼeʼmo magokepi lokaeno maino.

Poloʼa fikumo ha maeʼa amiʼnaya yaʼmo alitenoʼaeʼmo hapao ke heʼniya gemae

¹⁰ Yatala afinaʼmo utegetapa halate nagaefeʼmo lusi kava hutapa lapakesamo afitetapa mago yaʼmo fikumo naha maeta namiʼnageʼnaeʼmo Ala kava nepiʼmo lusi kava huʼna namogaga aiʼnove. Muki afinaʼmo nagaefeʼmo lapakesamo neʼafiyaʼmonanafa alita nave lisaya kaʼmo ohaneʼniye.

¹¹ Mago yafeʼmo kafu huʼneʼnaeʼmo mani gemo nehufiye. Haʼao, Kalaisiʼa alino naya maleʼnigeʼna haiya kava huʼna neʼmaufigeʼna vayaʼmogi naha maesayafeʼmo nagesamo oʼafiʼna afaʼa maiʼnove.

¹² Kafu hu afinaʼe magoʼe yaʼmo neʼaluva afinaʼeʼmo afaʼa maisuvafeʼmo afiteʼna ageʼnove. Muki afinaʼmo uʼneʼna huʼna neʼmauvategamo alu kava alu kavaʼmo afole neʼaigeʼnaeʼmo afaʼa maiʼnove. Alino naya maleʼnigeʼnaeʼmo naga netefi namu nepaefi kafu nehufi alopa yaʼmo aliʼnofi huʼna afaʼa maisuvafeʼmo ago afiteʼna ageʼnove.

¹³ Nagaemo Kalaisipiʼmo maiʼneʼnaeʼmo lokiya vaino neʼnateya himamuʼaletiʼmo muki kavaʼamo afaʼa huguve.

¹⁴ Ani gemo nehuvaʼmonanafa kana yaʼmo neʼaluva kavatefeʼmo alagepa kavaʼmo hutapa nagaeʼeʼmo afalu afalugana hutapa naha maeʼnae.

¹⁵ Filipai vayaʼmogitapamo ago afiʼnayana nagaemo hogote afinaʼmo alagepa faigoko gemo aeʼna hakalo huʼna lapa paiteʼna Masetoniya kotegamo ataleʼna uʼnogeʼapaeʼmo muki siosiʼale siosiʼaleʼmo maiʼnaya vayaʼmogimo namiteʼa alisayafeʼmo nagaeʼeʼmo afalu afalugana huʼa lokaeʼa aliʼyaʼmo oʼaliʼnagetapa lapakaekeʼmo nagaeʼeʼmo magokepi lokaeta aliʼyaʼmo aliʼnae.

¹⁶ Lapataleʼna uʼna Tesalonaika taonifiʼmo maiʼnogetapaeʼmo magoʼe yaʼmo muki afinaʼae afinaʼaeʼmo naha maetapa namiʼnae.

¹⁷ Nagaemo mago yaʼmo fikumo alisuvafeʼmo nagesamo noʼafufa lapakaekeʼmo akamelegati magoʼe yaʼmo alisayafeʼmo nagesamo neʼafuve.

¹⁸ Inagi muki namiʼnaya yaʼmo aliʼnogeno magoʼe yaʼnimo afaʼa haneʼniye. Epafalonaitasiʼa fikumo namiʼnaya yaʼmo alinineno namiʼnigeʼna alagi haiʼmo aliʼnove. Alagepa atumo neʼaiya ofalinimo haneʼnigeno Gotiʼa hauʼnigeno amuse huno nelapate.

¹⁹ Gotiʼnimoʼa Kalaisi Yesutetiʼmo asole yaʼmo maleʼniya yapatiʼmo lapakaemo muki kafu huʼnisaya yaʼmo fikumo lapamigiye.

²⁰ Afotimo Goti agiʼaleʼmo muki afinaʼae afinaʼaeʼmo alita asaga hulita vigetao. He, lama ge.

Geʼnimo alagi hano huʼniya gemae

²¹ Lapakaemo muki vayaʼmo Kalaisi Yesupiʼmo apaote vayaʼaifeʼmo ge apamamaeyo. Nagaeʼeʼmo lokaeʼa maiʼnaya konagatimogiʼeʼmo ge lapamamaeʼnae.

²² Muki apaote vayaʼmogi ge lapamamaeʼnayaʼmonanafa hogote gamani vekamo aliʼyaʼamo neʼaliya vayaʼmogiʼeʼmo magoʼe huʼa ge lapamamaeʼnae.

²³ Ala kava netimo Yesu Kalaisiʼa mukiʼamogitapamo fikumo lapa maeno lapamino. He, lama ge.