Filipai 3 - The Keyagana NT and 25 OT books

¹ Konagaʼnimogitapae, huʼna, geʼnimo huʼna hano hugefeʼmo huvanagi henaga geʼnimo afiyo. Ala kava nefeʼmo lapamogaga aiyo. Lapa paiʼnova gemo halate lapa paisuvafeʼmo alagaʼmo oʼnahaeʼniyanageʼna lapa maesugetapa alagepa hutapa maisayafeʼmo lapa nepauve.

² Lapakaemo afela kalagana huʼa maiʼnaya vayaʼaifeʼmo ehetapiye. Apakaemo hosu aliʼyaʼmo alige apakufamo lagauʼa apateʼnaya kavatetiʼmo apakufamo aliʼa hosu huʼa apatege huʼnae.

³ Huʼnayaʼmonanafa lama ge alagena yaʼmo oʼaliʼnae. Lagaemo lama ge alagena yaʼmo laipafiʼmo aliteta Goti Aunemeʼaletiʼmo Gotifeʼmo mono huge Kalaisi Yesufeʼmo alopa gefatiʼmo huta lamogaga aige huta maiʼnonaʼmonanafa lagufaeʼmo lagesamo afiteta alita amufa oʼamiʼnone.

⁴ Alagepa kavatimoʼa afaʼa laha maeyesinana atafa naipaeʼmo aliʼna amufa amuvesine. Mago vayaʼmogi atafa apaipaeʼmo afaʼa aliʼa amufa amiʼnaesinana aeʼna apakaseʼnovaʼmofeʼmo atafa naipaeʼmo afaʼa aliʼna amufa amuvesine.

⁵ Naha maegaiye, huʼna nagesamo afuvesina agufa kavaʼmo haneʼniyana itaʼnimoʼmo alino nateʼnigeno magoke salemo utegeʼapaeʼmo nagufamo lagauʼnae. Nagaemo Isaleli vekamo maiʼneʼna Menisameni nofi vayapati vekamo maiʼnove. Muki naginago vayaʼmo Himulu vayaʼageʼmo maiʼnae. Hogoteʼna Falasi mono vekamo maiʼneʼna Yu vayaʼai keʼaepa gemo akame huʼnove.

⁶ Nagaemo huʼnaeʼmo, Goti aliʼyaʼamo aligesuve, huʼna huteʼna lusi kava huʼna nayamukiki huʼna siosi vayaʼaʼeʼmo kamemo huʼnove. Keʼaepa gemo alagepa huʼna akame huʼnogeʼa nageteʼapaeʼmo vaiʼmo oʼnamiʼnae.

⁷ Hogoteʼna ani agufa kavaʼmo huʼna maiʼneʼnaeʼmo, naha maegaiye, huʼna nagesamo afiteʼna amuse huʼnovaʼmonanafa Kalaisiʼa atafausuvafeʼmo, naha oʼmaeno natafauno nategaiye, huʼna nagesamo afiteʼna ataleʼnove.

⁸ Ataleʼnovanageʼna hemenimo huʼnaeʼmo, hogote yaʼmo aeno agaseʼniya yaʼmo Ala kava neʼnimo Kalaisi Yesuʼa ageʼna alagepa huʼna agesuvafeʼmo muki yaʼnimo ago ataleʼnove. Hosuʼniya neʼyaʼmo alini uʼa neʼatalaya neʼyakana huno haneʼniye, huʼna huteʼna Kalaisiʼa alisuvafeʼmo aliʼna yaga auʼna ataleʼnove.

⁹ Nagaemo keʼaepa gemo akame huteʼna nagaiʼni fatago kavaʼnimo aliʼnovanageno atupa afinaʼmo Gotiʼa nagesiyafeʼmo oʼnahauʼniye. Kalaisifekeʼmo nagesamo afiʼna fatago huʼnova kavatetiʼmo Gotitegatiʼmo fatago kavaʼamo aliʼnovanageno Gotiʼa Kalaisipiʼmo nagesiyafeʼmo nahauʼniye.

¹⁰ Nagaemo Kalaisina ageʼna alagepa huʼna agesuvafeʼmo neʼnahaiye. Faliʼniyatetiʼmo he tiʼniya himamuʼamoʼa naipafiʼmo aliʼyaʼmo alisigeʼna agegesuve. Kana yaʼmo aliʼniya kavatefeʼmo magoke agufa kava huʼna kana yaʼmo alisuvafeʼmo neʼnahaiye. Faliʼniyanageʼna atafa naipamo hano hisiyafeʼmo faliteʼna agaekana huʼna maigesuve.

¹¹ Atupaleʼmo uʼna avaʼyi huteʼna muki faliʼnaya vayapatiʼmo alagepa huʼna he tisuvafeʼmo amalageka huʼna nayamukiki nehuve.

Poloʼa atupaleʼmo uno avaʼyi hisiyafeʼmo nagu nagu huno uʼniya gemae

¹² Atupaleʼmo uʼna avaʼyi osuʼnove. Uʼna haiʼna ohapaiʼnovanageʼna atafausuvafeʼmo vegala aeʼna nagu nagu huʼna uʼna atafausuvafeʼmo Kalaisi Yesuʼa hogoteno natafauʼniye.

¹³ Konagaʼnimogitapae, huʼna, atafauʼnove, huʼna nagesamo oʼafiʼna mani magoke kavafeʼmo huʼnaeʼmo nakamelega eno neʼviya kavaʼmo nage kaniʼna ataleteʼna naulagatiʼmo neʼaya kavaʼmo alisuvafeʼmo ape huliʼna nagu nagu huʼna neʼuve.

¹⁴ Gotiʼa anaga kotegamo uʼna haiʼna maisuvafeʼmo Kalaisi Yesutetiʼmo nagaefeʼmo keya aeʼnigeʼna atupaleʼmo uʼna avaʼyi huteʼna hetamaʼnimo alisuvafeʼmo nayamukiki huʼna nagu nagu huʼna neʼuve.

¹⁵ Neʼuvaʼmofeʼmo alopa vayaʼmo uta haita hapaiʼnona vayaʼmogitamo ani kavaʼmo huta maigetao. Mago vayaʼamogitapamo alu lapakesamo neʼafisayaʼmoʼmo Gotiʼa mani kavaʼmo afaʼa alino lapave ligiye.

¹⁶ Alino apave ligiyaʼmonanafa alino lave liʼniya kavaʼmo akame huteta magoke laipa lagesamo aliteta magoke gemo akame higetao.

¹⁷ Konagaʼnimogitapae, huʼna, nehuva kavaʼmo nagetetapa ani kavaʼmo hutapa nakame hiyo. Ani kavaʼmo huta neʼmauna vayaʼmo lagetapa alagepa hutetapa lakame hiyo.

¹⁸ Mani hemenimo hisuva gemo muki afinaʼmo lapa paiʼnovanageʼna hemenimo halate magoʼe huʼna lapa paiʼnaeʼmo, Asole vayaʼmo Kalaisi kame vayaʼamo maiʼneʼa malipu yosaleʼmo faliʼniya kavafeʼmo ava gemo aeʼa ati nekae, huʼna huteʼna naunumo uno nelamigeʼna lapa nepauve.

¹⁹ Atupa afinaʼapimo Gotiʼa alino apagoʼya lagauno apatalesigeʼa alagi afela hegae. Apakaemo neʼyafekeʼmo lusi kava huʼa apakesamo neʼafiya yaʼmo gotiʼapimoʼae. Apavagage hisiya yafekeʼmo amuse huʼa neʼatae. Ma mopafi yatefekeʼmo apaipa apakesamo aliʼa atageno neʼviyaʼmonanafa

²⁰ lagaemo kokuʼnapi vayaʼmo maiʼneta kokuʼnapatiʼmo eminesiya vekamoʼa lagufamo alino katino nelateya vekamo Ala kava neʼmo Yesu Kalaisifekeʼmo lavayagunagu huta agava neʼmaune.

²¹ Agaemo ayamufaʼaletiʼmo muki yaʼe vayaʼeʼmo alino aiyafiʼmo apateteno yagaino apatesiya ayamufaʼaletiʼmo hosu lagufamo lokiya oʼvaino nekasaliya lagufamo agaiʼa agufagana agufa lagufamo ha le konali lagufamo alino hamaleno lategaiye.