Filipai 2 - The Keyagana NT and 25 OT books

Kalaisiʼa agaiʼa agiʼaleʼmo alino afepi ateʼnigeno Gotiʼa agiʼaleʼmo alino asaga huno ateʼniya gemae

¹ Lapakaemo Kalaisipiʼmo maiʼnagenoʼaeʼmo lapaipamo alino lokiya vaino nelapatefiye. Agaemo lagaefeʼmo hau ayamopafiʼmo hauʼniye, hutapa lapakesamo neʼafigenoʼaeʼmo lapaipamo alino he tino nelapatefiye. Lapakaemo Goti Aunemeʼamo magokepi alitetapa agaeʼeʼmo afalu afalugana huta lokaeta neʼmaifiye. Magokepi yuna lapaipa kalitapa konagatapieʼmo lapau lapayamopafiʼmo nelapaifiye.

² Magoke lapakesamo afiʼnetapa magoke agufa kavaʼmo huta lapau lapayamopafiʼmo lapaino. Magokepi alagepa huta lokaeta maiʼnetapa magoke lapaipa lapakesamo aligenoʼao naipafiʼmo namogaga aisuva kavaʼmo magoʼe huno havai teno.

³ Lapakaitapiekeʼmo lapakesamo afitapa lapakitapileʼmo alita asaga hisayafeʼmo mago kavaʼmo alagi osiyo. Lapakufamo alita afepi atetetapa konagatapieʼmo, alagepa vayaʼmogeʼa ago aeʼa lagaseʼa maiʼnae, hutapa lapakesamo afiyo.

⁴ Lapamete lapamete hutapa lapakaitapi yafekeʼmo lapakesamo oʼafitapa muki vayaʼai yaʼefeʼmo lapakesamo afitetapa hapa maeyo.

⁵ Kalaisi Yesuʼa agesamo afiʼniya kava hutapa lapaipafiʼmo lapakesamo afitapa maiyo.

⁶ Agaemo Gotiʼa aliʼniya agufa aipa agesamo aliʼnigeʼana magoke aiyaya vekalaʼmo maiʼnaʼaʼmonanafa ani agufa kavakeʼmo huʼna maiguve, huno agesamo oʼafino ataleʼniye.

⁷ Ala agiʼamo ataleno ma mopafi vekagana huno afole aiteno ala agimo oʼalino kalavusi aliʼyaʼmo neʼaliya vekagana huno hamaleʼniye.

⁸ Vayaʼmogi huʼapaeʼmo, ma mopafi vekageʼmo maiʼniye, huʼa ageʼnae. Agaiʼa agiʼaleʼmo alino afepi atetenoʼaeʼmo Goti geʼamo akame huteno faligane, huno huʼniya geleʼefeʼmo akame huteno uno haino hapaiʼniye. He, malipu yosaleʼmo falisiya kavateʼefeʼmo alagi akame huʼniye.

⁹ Ani kavaʼmo huʼniyaʼmofeʼmo Gotiʼa lusi kava huno alino asaga huno ateteno ala agiʼamo aeno agaseʼniya agiʼamo amiʼniye.

¹⁰ Amiʼniyaʼmofeʼmo muki kokuʼnapi vayanagi ma mopafi vayanagi ma mopamo afeʼalumelaga vayanagi huʼa apaleʼya faiʼneʼapaeʼmo

¹¹ Yesu Kalaisiʼa Ala kava neʼmo maiʼniye, huʼa huteʼa afotimo Goti agiʼaleʼmo aliʼa asaga hugae.

Alagepa kavaʼmo hutetapa ha le yakana hutapa maiyo, huno huʼniya gemae

^12-13 Gotiʼa agaiʼamo hauʼniyanageno amogaga aisiyafeʼmo lapaipafiʼmo aliʼyaʼmo neʼaliye. Lapakaemo alagepa kavafeʼmo lapaipa kalige huge hisayafeʼmo lapaipafiʼmo himamuʼaletiʼmo aliʼyaʼmo neʼaliyaʼmofeʼmo koli hutetapa atete nehutapaeʼmo aliʼyaʼmo aliyo. Nahauʼniya vayaʼnimogitapae, huʼna, Gotiʼa ani aliʼyaʼmo neʼaliyaʼmofeʼmo lapakufamo alita katita lapatetapa hano hiyo. Nagaemo lapakaeʼeʼmo magokepiʼmo lokaeʼna maiʼnova afinaʼmo lapakaemo akame huʼnaya agufa kavaʼmo hutapa hemenimo lapakaeʼeʼmo oʼmaiʼnovanagi magoʼe hutapa akame hiyo.

¹⁴ Muki kavaʼmo nehutapaeʼmo hosu lapaugosamo kaliʼnetapa hagalu hagalu hutapa ge oʼvaiyo.

^15-16 Vaiʼmo olapamisageno lapaipafiʼmo hosu kavatapimo ohaneʼnisiya Goti mafaʼneʼamo maigae. Lapakaemo hosu kavaʼmo nehaya vayaʼe hosu apaipa apakesamo neʼafiya vayaʼeʼmo maiʼnaya folagapiʼmo neʼmaiyaʼmofeʼmo lama gemokeʼmo afaʼa maisaya yaʼmo neʼapamiya geleʼmo atafautapa alagi huʼnetapa ha le yakana hutapa maiʼnetapaeʼmo ha le yaʼmo apamiyo. Lapakaemo ani kavaʼmo hutapa maiʼnisayana Kalaisi afinaʼmo afole aisigeʼnaeʼmo, nayamufa aliʼyaʼmo fikumo aliʼna ataleʼnove, huʼna osugufa namogaga aiguve.

¹⁷ Lapakesamo afita fatago huʼnetapaeʼmo alagepa kavaʼmo nehaya kavaʼmoʼa lapakaemo Gotiʼmo ofalini neʼamiya yakana huno haneʼniye. Namagisageʼna faliʼnaeʼmo kolaʼnimo lapakae ofalinileʼmo laki malesuvana namogaga aiteʼna lapakaeʼeʼmo magokepi lamogaga aigune.

¹⁸ Ani kavaʼmo afole aisigetapaeʼmo lapamogaga aitetapa nagaeʼeʼmo magokepi lamogaga aigetao.

Timotifeʼmo huʼniya gemae

¹⁹ Ala kava neʼmo Yesufeʼmo aliʼna amufa neʼamuvanageno aise afinaʼmo utesigeʼna Timotiʼmo aliʼna atesugeno lapakaetegamo uno lapaketenoʼaeʼmo eno lapava gemo huno naha paisigeʼna afiteʼnaeʼmo naipamoʼmo falu hugiye.

²⁰ Nagaeʼeʼmo lokaeʼa aliʼyaʼmo neʼaliya vayapatiʼmo mago vekamoʼa Timotigana huno oʼmaiʼniye. Agaiʼageʼmo alagepa hutapa maisayafeʼmo aipa kaliteno alagi nehaiye.

²¹ Muki vayaʼmogi Kalaisi Yesu aliʼyafeʼmo apakesamo oʼafiʼa apakaiʼapi aliʼyafekeʼmo apakesamo neʼafiye.

²² Nehayaʼmonanafa Gotiʼa Timotiʼmo amalageka hauʼnigeno alagepa vekamo afole aiʼnigetapaeʼmo lapakaemo ago ageʼnae. Mafaʼneʼapimogi afoʼapimogiʼeʼmo lokaeʼa aliʼyaʼmo neʼaliya agufa kava hutaʼa Timotiʼe nagaeʼeʼmo alagepa faigoko gelefeʼmo magokepi lokaetaʼa aliʼyaʼmo aliʼnoʼae.

²³ Haiya kava huʼna maiʼnisufigeʼna ageteʼnaeʼmo nahauʼnisiyaʼmoʼmo aliʼna atesugeno lapakaetegamo ugiye.

²⁴ Ala kava nefeʼmo aliʼna amufa neʼamuvanageno aise afinaʼmo utesigeʼna nagaiʼnimo lapakaetegamo visuvafeʼmo nagesamo afiteʼna agava neʼmauve.

Epafalonaitasifeʼmo huʼniya gemae

^25-26 Lapakaemo konagatimoʼmo Epafalonaitasiʼa naha maesiyafeʼmo alita ateʼnageno nagaetegamo eʼniye. Konagaʼnimoʼmo eʼnigetaʼaeʼmo nagaeʼeʼmo magokepi lokaetaʼa maiʼnetaʼa aliʼyaʼmo alige kamemo huge hutaʼa neʼmauʼae. Visiyafeʼmo oʼnahauʼniyaʼmonanafa uno lapakaemo lapakesiyafeʼmo lusi kava huno agesamo neʼafiyaʼmofeʼmo aliʼna atesugeno lapakaetegamo ugiye. Lapakaemo kaitaʼmo hauʼniye, huʼa huʼnaya gemo afiʼnayaʼmofeʼmo aipamoʼmo kana nehiye.

²⁷ He, ago falisiya agufa kaitaʼmo hauʼniyaʼmonanafa Gotiʼa hau huno ateʼniye. Agaefekeʼmo hau huno oʼateʼnifa nagaeʼeʼmo magoʼe huʼna kana yaʼmo oʼalisuvafeʼmo hau huno nateʼniye.

²⁸ Kaitaʼmo hauʼniyaʼmofeʼmo agetetapaeʼmo lapamogaga aisagenoʼaeʼmo naipamoʼmo falu hisiyafeʼmo nahauʼniyanageʼna aliʼna atesugeno lapakaetegamo ugiye.

^29-30 Agetetapaeʼmo, konagatimogae, hutetapa, lapamogaga neʼaitapa alita falu fala hutapa ateyo. Lapakaemo afagitega maiʼnayaʼmofeʼmo afaʼa eta naha oʼmaegayaʼmofeʼmo uʼna ha maegauve, huno huteno nagaetegamo eʼniye. Falisiya kavafeʼmo koli osuno Kalaisi aliʼyaʼaletiʼmo falisiya kavaʼmo huʼniyaʼmofeʼmo agiʼaleʼmo alita asaga huteta ani agufa vayaʼai apakiʼapileʼmo alita asaga hiyo.