Filipai 1 - The Keyagana NT and 25 OT books

¹ Nagaemo Poloʼnaʼe Timotiʼeʼmo Yesu Kalaisi aliʼyaʼamo neʼaluʼa vekalaʼmo maiʼnetaʼa Poloʼnamo muki Filipai taonifiʼmo maiʼnaya vayaʼmo Kalaisi Yesupiʼmo maiʼnaya vayaʼmogitapaeʼmo mani gemo avoʼmo nekaove. Nagaemo muki lapaote vayafenagi konagatimogiteʼmo yagaiʼa neʼapataya vayatama vayafenagi mono aliʼyaʼmo neʼaliya nikeni vayafenagi huʼna mani gemo avoʼmo nekaove.

² Afotimo Gotiʼe Ala kava netimo Yesu Kalaisiʼeʼmo fikumo lapa maeʼana lapamisaʼageno lapaipamoʼmo falu hino.

Poloʼa nunumuʼmo huno apateʼniya gemae

³ Muki afinaʼmo lapakaefeʼmo nagesamo afiteʼnaeʼmo Gotiʼnimofeʼmo hao ke nehove.

^4-5 Lapakaemo hogote afinatetiʼmo Kalaisifeʼmo alagepa faigoko gemo aino atagu faesiyafeʼmo nagaeʼeʼmo afalu afalugana huta lokaeta maiʼnonaʼmofeʼmo muki afinaʼmo nunumuʼmo huʼna nelapateʼnaeʼmo namogaga neʼauve.

⁶ Gotiʼa lapaipafiʼmo aepa faino aliʼyaʼmo alime alime neʼesigeno Kalaisi Yesuʼa eminesiya afinaʼmo aliʼyaʼamo alino hano hugiye, huʼna lole nagesamo oʼafiʼna lokiya vaiʼna alagi nagesamo afiʼna neʼmauve.

⁷ Gotiʼa fikumo naha maeno namiʼnigeʼna kalavusifiʼmo maiʼneʼnaeʼmo alagepa faigoko geʼamo ha maesuvafeʼmo ge huʼna aliʼna lokiya vaiʼna neʼatove. Fikumo naha maeno namiʼniya kava huno fikumo lapa maeno nelapamigetaeʼmo magoke agufa aliʼyaʼmo aliteta muki afinaʼmo magoke laipa lagesamo aliʼnonaʼmofeʼmo lapakaefeʼmo alagepa huʼna nagesamo neʼafuve.

⁸ Yesu Kalaisiʼa lapakaefeʼmo hauʼniya kava huʼna lapakaefeʼmo lusi kava huno neʼnahaiye, huʼna nehugenoʼaeʼmo Gotiʼa afiteno naha maeno, lama gemo hiye, huno nehiye.

⁹ Nunumuʼmo huʼna nelapateʼnaeʼmo, Gotiyo, huʼna, apaipafiʼmo aliʼyaʼmo aligeʼapao alagepa huʼa afiteʼa alagepa huʼa aliʼa fako nehuʼapaeʼmo magoʼe huʼa hapau apayamopafiʼmo hapaino.

^10-11 Alagepa huʼa ageʼneʼa aliʼa fako nehuʼapaeʼmo hogote alagepa kavaʼmo ageteʼa akame hugae. Kalaisiʼa eminesiya afinaʼmo afole aisigenoʼaeʼmo oʼaniʼya kavaʼmo apaipafiʼmo ohanesigeka vaiʼmo oʼapamigane. Alagepa kavaʼmo Yesu Kalaisitetiʼmo apaipafiʼmo havai tenageno alagamo aenageʼa vayaʼmogi hale konali kavakamo ageteʼa kagikaleʼmo aliʼa asaga hiyo, huʼna nunumuʼmo huʼna nelapatove.

Poloʼa kalavusifiʼmo maiʼnigenoʼaeʼmo alagepa faigoko gemo aino atagu faeno uneno huʼniya gemae

¹² Konagaʼnimogitapae, huʼna, mani hisuva gemo afisayafeʼmo nahauʼniyanagi alagepa hutapa afiyo. Mani hanageke yaʼmo nagaeteʼmo afole aiʼniyaʼmofeʼmo alagepa faigoko gemoʼmo magoʼe huno aino atagu faeno uneno nehiye.

¹³ Muki ati vayaʼmogi Sisa noteʼmo yagaiʼa neʼataya ati vayanagi muki manileʼmo maiʼnaya vayanagi huʼa Kalaisi agiʼalefeʼmo kalavusifiʼmo maiʼniye, huʼa ago nageʼnae.

¹⁴ Kalavusifiʼmo maiʼnogeʼapaeʼmo asole konagatimogi nageʼnayaʼmofeʼmo lokiya vaiʼa maiʼneʼapaeʼmo Ala kava nefeʼmo magoʼe huʼa apakesamo afiʼa fatago nehuʼapaeʼmo koli osuʼa he tiʼa Goti geʼamo aeʼa hakalo huʼa hapa nepaiye.

¹⁵ Mago vayaʼmogi apaipa kafamo nahaeteʼa aeʼa nagasesayafeʼmo Kalaisifeʼmo ava gemo aeʼa hakalo huʼa hapa nepaigeʼa mago vayaʼamogi alagepa apaipafatiʼmo aeʼa hakalo huʼa hapa nepaiye.

^16-17 Ani vayapatiʼmo nagaefeʼmo hapauʼnigeʼapaeʼmo, alagepa faigoko geʼamo ha maesiyafeʼmo Gotiʼa alino ateʼniye, huʼa nageteʼa Kalaisifeʼmo ava gemo aeʼa hakalo huʼa hapa nepaiye. Alu vayaʼmogimo apaipafatiʼmo ge nosafa ala apakiʼapimo alisayafekeʼmo aeʼa hakalo huʼa hapa nepaiye. Kalavusifiʼmo maiʼnogeʼapaeʼmo, magoʼe huta hanageke yaʼmo amigune, huʼa apakesamo neʼafiye.

¹⁸ Afaʼa ina agufa kavaʼmo haneʼniye. Hosu apaipafatiʼmo Kalaisifeʼmo ava gemo aeʼa hakalo huʼa hapa nepaifi lama ge apaipafatiʼmo Kalaisifeʼmo ava gemo aeʼa hakalo huʼa hapa nepaisafigeʼa kanalene. Kalaisifeʼmo ava gemo aeʼa hakalo huʼa hapa nepaiyaʼmofeʼmo namogaga neʼauve. He, magoʼe huʼna namogaga aiguve.

¹⁹ Lapakaemo nunumuʼmo hutapa neʼnatayanageno Yesu Kalaisi Aunemeʼamoʼmo naha maeteno nagufamo alino katino nategaiye, huʼna afiʼnove.

²⁰ Hosu kavaʼmo huteʼna navagage hisiya kavafeʼmo alagi noʼnahaiye. Alagepa kavaʼmo huguve, huʼna naipamo kaliteʼna navayagunagu huʼna agava neʼmauve. Hogoteʼna Kalaisi agiʼaleʼmo muki afinaʼmo aliʼna asaga huʼnovanageʼna falisufi afaʼa maisufigeʼna hemeniʼeʼmo ani kavaʼmo huʼna aiseʼamo koli osuʼnovanageʼna agiʼaleʼmo aliʼna asaga hugesuve.

²¹ Afaʼa maisuvana Kalaisitefeʼmo afaʼa maiguve. Falisuvana akamelegatiʼmo magoʼe yaʼnimo aliguve.

²² Ma mopafiʼmo maisuvana magoʼe huʼna aliʼyaʼmo alisugeno magoʼe alagamo aegaiye. Na agufa kavafeʼmo nahauʼnifi huʼna oʼafiʼnove.

²³ Lole kavaʼmoʼa heno navayu hulino neʼviye. Ma mopamo ataleʼna uʼna Kalaisiʼeʼmo maisuva naipamo nekaliye.

²⁴ Faliteʼna uʼna Kalaisiʼeʼmo maisuva kavaʼmoʼa nagaiʼnilefeʼmo aeno agaseno hogote alagepa kavaʼmo haneʼniyaʼmonanafa lapakaetefeʼmo ma mopafi maiʼneʼnaeʼmo lapa maesuva kavaʼmoʼa ago aeno agaseʼniye.

²⁵ He, magoʼe hutapa Kalaisifeʼmo lapakesamo afita fatago nehutapaeʼmo lapamogaga aisaya kavaʼmoʼa ko sisiyafeʼmo uʼna lapakaeʼeʼmo lokaeʼna maiguve, huʼna ago afiʼnove.

²⁶ Halate uʼna lapakaeʼeʼmo lokaeʼna maiguvaʼmofeʼmo magoʼe hutapa Yesu Kalaisifeʼmo lapamogaga aisayafeʼmae.

²⁷ Lapakaemo magoke kavaʼmo hutapa Kalaisifeʼmo alagepa faigoko geʼamo akame hutetapa alagepa kavaʼmo hutapa maiyo. Maiʼnisageʼnaeʼmo lapakaetegamo uʼna lapakesufi olapakesufigeʼa mago vayaʼmogimo, oʼataleʼa magoke apaipa apakesamo aliteʼa Kalaisifeʼmo alagepa faigoko geʼalefeʼmo magokepi lokaeʼa maiʼneʼa kamemo nehae, huʼa lapava gemo huʼa naha paisageʼna afiguve.

²⁸ Kame vayatapieʼmo koliʼapimo osutapa lokiya vaita maiyo. Lapakaemo ani kavatetiʼmo, alagi afela hegae, hutapa alita apave lisageʼa agegae. Agegayaʼmonanafa lapakaemo agetapaeʼmo, lagufamo alino katino lategaiye, hutapa agesagenoʼaeʼmo Gotiʼa lapa maegaiyaʼmofeʼmae.

²⁹ He, Gotiʼa Kalaisifekeʼmo lapakesamo afita fatago hisaya kavaʼageʼmo fikumo olapamiʼnifa agaetefeʼmo lapakafu kisiya kavaʼeʼmo lapamiʼniye.

³⁰ Kame huʼnogetapa ago nageʼnae. Hemeniʼeʼmo kamemo nehugetapa nava gemo neʼafiye. Ani agufa kavaʼmo hutapa kamemo nehae.