Failimoni 1 - The Keyagana NT and 25 OT books

^1-2 Poloʼnamo Kalaisi Yesu agiʼalefeʼmo kalavusi huʼneʼnaeʼmo konagatimoʼmo Timotiʼeʼmo mani avoʼmo nekaoʼae. Laʼahauʼniya vekamo laʼagaeʼeʼmo lokaeka Goti aliʼyaʼamo neʼalina vekamo Failimonigagi laʼahauʼniya a kanomo Apiyagagi laʼagaeʼeʼmo lokaeno kamemo nehiya vekamo Akipasigagi nokafiʼmo aliʼa anupa huʼa maiʼnaya siosi vayaʼefenagi hutaʼa mani gemo avoʼmo nekaoʼae.

³ Afotimo Gotiʼe Ala kava netimo Yesu Kalaisiʼeʼmo fikumo lapa maeʼana lapamisaʼageno lapaipamoʼmo falu hino.

⁴ Konagatimoga Failimoniyo, huʼna, muki afinaʼmo kagaefeʼmo nunumuʼmo huʼna nekateʼnaeʼmo Gotiʼnimofekeʼmo hao ke heʼna nekatove.

⁵ Kagaemo muki apaote vayaʼaifeʼmo kahau kayamopafiʼmo kahauʼnigekaeʼmo Ala kava neʼmo Yesufekeʼmo kagesamo afika fatago huʼnana kavafeʼmo kava gemo huʼnageʼna afiteʼnaeʼmo Gotifekeʼmo hao ke heʼna nekatove.

⁶ Kagesamo afika fatago nehukaeʼmo muki vayaʼaina hapa maeka apamisanageʼapaeʼmo, Kalaisi Yesupiʼmo maiʼnigenoʼaeʼmo muki alagepa kavaʼamo aipafiʼmo haneʼniye, huʼa kagesayafeʼmo nunumuʼmo huʼna nekatove.

⁷ Kagaemo apaote vayaʼai apaipamo alika falu huka apatetekaeʼmo kahau kayamopafiʼmo kahauʼnigekaeʼmo alika lokiya vaika nelatanagetaeʼmo lusi kava huta lamogaga neʼaune.

⁸ Nagaemo Kalaisipiʼmo maiʼneʼnaeʼmo himamuʼaletiʼmo koli osuʼna kaha paiʼnaeʼmo, ani kavaʼmo hisana kavaʼmo haneʼniyanagi huvo, huʼna lokiya gemo huʼna afaʼa kaha paiguvaʼmonanafa

⁹ kahau kayamopafiʼmo kahauʼniya kavaʼmoʼmo alino he tino katesiyafeʼmo nahauʼnigeʼnaeʼmo ge huʼna nekatove. Nagaemo Poloʼnamo kosuna leteʼna Yesu Kalaisi agiʼalefeʼmo kalavusifiʼmo maiʼneʼnaeʼmo

¹⁰ Goti geʼaletiʼmo aliʼna ateʼnova mafaʼneʼnimo Onesimasifeʼmo ge huʼna neʼatove.

¹¹ Hogoteno alagepa huno kaha oʼmaeʼniyaʼmonanafa hemenimo nagaeʼe kagaeʼeʼmo alagepa huno laʼaha maesiya agufa vekamoʼmo maiʼniye.

¹² Nagaemo kagaetegamo visiyafeʼmo aliʼna atesugeno aeno atagineno egaiye. Naipafiʼmo nahauʼniyanagi afaʼa alika falu fala huka ato.

¹³ Alagepa faigoko gelefeʼmo kalavusifiʼmo maiʼnogenoʼaeʼmo kagae kaimuʼyaleʼmo eno nagaeʼeʼmo magokepi lokaeno maiʼneno naha maesiyafeʼmo nahauʼniye.

¹⁴ Nahauʼniyaʼmonanafa kagaefeʼmo ge huʼnaeʼmo, alika ategeno eno kagae kaimuʼyaleʼmo maiʼneno naha maeno, huʼna hisugeka alika atesanageno eno maiʼneno naha maesiyafeʼmo oʼnahauʼnifa kagaikageʼmo kagesamo afitekaeʼmo, afaʼa uno kaha maegaiye, huka hisanafeʼmo nahauʼniye.

¹⁵ Halate avalesanageno uno muki afinaʼmo kagaeʼeʼmo maige maige huno maisiyafeʼmo kataleneno aise afinaʼmo maiʼnifi, huʼna nagesamo neʼafuve.

¹⁶ Kalavusi aliʼyakamo neʼaliya vekamo magoʼe huno oʼalino afaʼa maiʼniya vekaeʼmo lahau layamopafiʼmo lahauʼniya konagatimo maiʼniyaʼmofeʼmo afaʼa alika falu fala huka ategane. Magoʼe huno konagaʼnimoʼmo maiʼniyaʼmonanafa ma mopafi konagakamoʼmo maige Ala kava netefeʼmo konagakamoʼmo maige huʼniyaʼmofeʼmo afaʼa alika falu fala huka atesana kavaʼmo haneʼniye.

¹⁷ Nagaefeʼmo nafaluʼnimogae, huka kagesamo neʼafisanana alika falu fala huka neʼnatana kava huka alika falu fala huka ato.

¹⁸ Agaemo kagaetegamo hosu kavaʼmo huʼnisifi kagaetegamo mago anonaʼamo haneʼnisifigeʼna nagaemo ani anonaʼalefeʼmo ataleʼna ategauvanagi agae agimo aeka kalo paeka ataleteka nagae nagimo avoʼmo kae malo.

¹⁹ Nagaemo Poloʼnamo mani gemo nagaiʼni nayapatiʼmo avoʼmo nekaeʼnaeʼmo anonaʼalefeʼmo afaʼa kamiguve, huʼna kaha nepauve. Kaha nepauvaʼmonanafa nagaetegamo anonakamo haneʼniyana kaunekameʼmae, huʼna hisuva agufa gemo haneʼniyaʼmonanafa ani agufa gemo afaʼa kaha opaiguve.

²⁰ Konagaʼnimogae, huʼna, Ala kava neʼmo agiʼalefeʼmo namogaga aisuvafeʼmo ani kavaʼmo huka naha mao. Kalaisipiʼmo maiʼnetaʼaeʼmo naipamo alika falu huka nato.

²¹ Geʼnimo afaʼa afigiye, huʼna huteʼna lole nagesamo oʼafiʼna magoke nagesamo afiteʼna mani gemo avoʼmo nekaove. Afiʼnovana kaha paiʼnova kavaʼmo huka aeka agaseka magoʼe huka alagepa kavaʼmo hugane.

²² Kagaemo nunumuʼmo nehananageno Gotiʼa afitenoʼaeʼmo kagaetegamo halate alino natesigeʼna visuvafeʼmo agava maiʼnove. Magoʼe kavafeʼmo huʼnaeʼmo, visuva afinaʼmo kagae nopiʼmo uʼna havaesuvafeʼmo mago aeka anagi maleʼnisana yapiʼmo nato.

^23-24 Epafalasiʼmo Kalaisi Yesutefeʼmo kalavusimo nagaeʼeʼmo magokepi lokaeno huʼniya vekamoʼmo ge kamamaeʼniye. Makiʼagi Alitakasiʼagi Nimasiʼagi Lukiʼagi huʼa nagaeʼeʼmo magokepi lokaeʼa aliʼyaʼmo neʼaliya vayaʼmogiʼeʼmo ge kamamaeʼnae.

²⁵ Ala kava neʼmo Yesu Kalaisiʼa fikumo lapa maeno nelapamiya kavaʼmoʼa lapakaeʼeʼmo magokepi lokaeno haneno. He, lama ge.