Hatu maeno apate'niya gemae 9 - The Keyagana NT and 25 OT books

Muki alu afu alu afu anagaʼapimo faliʼnaya gemae

¹ Ala kava neʼmoʼa Mosesefeʼmo uka kini vekaeʼmo ina ge huka ha paiyo, huno ha paiʼniye. Ala kava neʼmo Himulu vayaʼai Gotiʼapimoʼa hunoʼaeʼmo, Vayaʼnimo afaʼa apatalegeʼa uʼa nagaetefeʼmo mono hiyo, huno ha paiʼniye.

² Kagaemo magoʼe huʼka apatafauka maiteka apatalesanageʼa oʼvisayaʼmoʼmo

³ afiyo, huʼna, Ala kava neʼmoʼa kahaumo neʼnaya alu afu alu afu anagaʼmo pulumakagi hosigi nokigi kamogi sipisipigi memegi huʼna alopa kaita kayoʼmo apamisugeno kaita hapaugiye.

⁴ Ala kava neʼmoʼa Isaleli vayaʼmogi magoke afuʼapimo ofalisayafeʼmo alu afu alu afu anagaʼapigi Isipi vayaʼmogi alu afu alu afu anagaʼapigi huno alino fako huno apategaiye, huno ha paiʼniye.

⁵ Ala kava neʼmoʼa kaitaʼmo apamisiya afinaʼmo lekana painoʼaeʼmo Moseseʼa, Egamo Ala kava neʼmoʼa ani kavaʼmo hugiye, huno ha paiʼniye.

⁶ Inagi egamo Ala kava neʼmoʼa huguve, huno huʼniya kavaʼmo huʼnigeʼapaeʼmo muki Isipi vayaʼai alu afu alu afu anagaʼapimo faliʼnayaʼmonanafa Isaleli vayaʼai alu afu alu afu anagaʼapimo ofaliʼa afaʼa maiʼnae.

⁷ Ani afinaʼmo kini vekamo Feloʼa mago gemo huno ataleʼnigeno uʼnigeʼapaeʼmo Isaleli vayaʼmo magoke afuʼapimo ofaliʼniye, huʼa ha paiʼnayaʼmonanafa Feloʼa magoʼe huno agaiʼa aipa agesamo aino akani maleʼniyaʼmofeʼmo Isaleli vayaʼmo afaʼa apatalegeʼa oʼuʼnae.

Isipi vayaʼmogi apakufaleʼmo apausageʼmo apamaeʼniya gemae

⁸ Inagi Ala kava neʼmoʼa Moseseʼe Eloniʼefeʼmo hana painoʼaeʼmo, lanakaemo sitopufatiʼmo laʼnefamo katetana lanayapi alinitana kini vekalegamo viʼao. Utanaeʼmo kini vekamo aulagaleʼmo Mosesegamo ani laʼnefamo alika kokuʼnapilagamo yaga autalegeno uno haino.

⁹ Haitenoʼaeʼmo ani laʼnefamoʼmo mumusopamo alino hamaletenoʼaeʼmo muki Isipi mopaleʼmo maiʼnaya vayaʼmogi apakufaleʼe muki alu afu alu afu anagaʼmogi apakufaleʼeʼmo asagauno aiteno apausageʼmo apamaeteno aino apalo atino alopa apamuʼmo apalegaiye, huno hana paiʼniye.

¹⁰ Anakaemo sitopufatiʼmo laʼnefamo aliteʼana uʼana kini vekamo aulagaleʼmo he tiʼana maiʼneʼanaeʼmo Moseseʼa ani laʼnefamo alino yaga auno ataleʼnigenoʼaeʼmo kokuʼnapilagamo uno haiʼniye. Apausageʼmo vayaʼai apakufalenagi muki alu afu alu afu anagaʼmogi apakufalenagi huno apamaeteno aino apalo atino alopa apamuʼmo apaleʼniye.

¹¹ Hosu apaune vayaʼai apakufaleʼeʼmo apausageʼmo apamaeʼniyaʼmofeʼmo eʼa Mosese aulagaleʼmo he tiʼa oʼmaiʼnae. Hosu apaune vayaʼai apakufalenagi muki Isipi vayaʼai apakufalenagi huno apausageʼmo apamaeʼniye

¹² Oʼmaiʼnayaʼmonanafa Ala kava neʼmoʼa kini vekamo aipa agesamo aino akani maleʼniyaʼmofeʼmo Ala kava neʼmoʼa hana paiʼniya agufa kavaʼmo huno kini vekamoʼmo geʼanimo oʼafiʼniye.

Alopa koʼmopamo emineʼniya gemae

¹³ Inagi Ala kava neʼmoʼa Mosesefeʼmo, Gotilamisiyapiʼmo uka kini vekaeʼmo ina ge huka ha paiyo. Ala kava neʼmo Himulu vayaʼai Gotiʼapimoʼmo hunoʼaeʼmo, Vayaʼnimo apatalegeʼa uʼa nagaetefeʼmo mono hiyo.

¹⁴ Hemenimo apatalesanageʼa oʼvisayaʼmoʼmo nagaefeʼmo mago alu gotigimo agaekana huʼa ma mopafiʼmo oʼmaiʼnae, huka kaipafiʼmo alika kamalagika agesanafeʼmo himamuʼniletiʼmo magoʼe kayoʼmo kagaikagi aliʼyakamo neʼaliya vayanagi muki vayakagi huʼna muki vayaʼamo kayoʼmo lapamiguve.

¹⁵ Nagaemo kagaeʼe muki vayakaʼeʼmo alopa kayoʼmo lapamiʼnovesinana kagaeʼe muki vayakaʼeʼmo ago faliʼnaesine.

¹⁶ Faliʼnaesinaʼmonanafa nagaemo himamuʼnimo kagaetetiʼmo aliʼna apave lisugeʼapaeʼmo ma mopafiʼmo muki haopalegamo maiʼnaya vayaʼmo ala nagi vekamoʼnaeʼmo nava gemo aeʼa hakalo huʼa hapa paisayafeʼmo aliʼna he tiʼna kateʼnove.

¹⁷ Vayaʼnilefeʼmo kagaikageʼmo alika asaga huka kateteka apataleʼnanageʼa oʼuʼnae.

¹⁸ Inagi afiyo, huʼna, Egamo mani agufa kanaleʼmo alopa koʼmopamo aliʼna atalesugeno eminegaiye. Ani agufa koʼmopamo Isipi gamani vayaʼmogimo aepa faiteʼa yagaiʼa apateme eʼnaya afinatetiʼmo eno hemenimo maiʼnaya afinaʼeʼmo emiʼnoʼmeʼniya agufa koʼmopamo eminegaiye.

¹⁹ Eminegaiyaʼmofeʼmo muki alu afu alu afutapimo kahauleʼmo maiʼnisaya afumo hapafailita utapa noʼapifiʼmo anupa hutapa apateyo. Koʼmopamo eminenoʼaeʼmo muki kumatega maiʼnisaya vayaʼmogi apakufalenagi muki alu afu alu afuʼai apakufalenagi huno apamagisigeʼapaeʼmo faligayaʼmofeʼmae, huno naha paiʼniye, huno ha paiʼniye.

²⁰ Kini vekamo mago aliʼyaʼamo neʼaliya vayaʼmogi Ala kava neʼmoʼa huʼniya geeʼmo koli huteʼa aliʼyaʼapimo neʼaliya vayanagi muki alu afu alu afu anagaʼapigi huʼa apavaleliʼa eʼa nopiʼmo apateʼnae.

²¹ Apateʼnayaʼmonanafa kini vekamo mago aliʼyaʼamo neʼaliya vayaʼmogimo Ala kava neʼmoʼa huʼniya gemo oʼafiʼa aliʼyaʼapimo neʼaliya vayanagi muki alu afu alu afu anagaʼapigi huʼa kumategamo afaʼa apateʼnageʼa maiʼnae.

²² Ala kava neʼmoʼa Mosesefeʼmo ha painoʼaeʼmo, kayaʼmo kokuʼnategamo alika asagauliʼnegeno muki Isipi kotegamo koʼmopamo asagauno aino. Muki vayaʼaitenagi muki alu afu alu afuʼapilenagi hoyaʼapilegagi huno emineno apamagino, huno ha paiʼniye.

²³ Moseseʼa hayopa kayoʼamo alino asagauno kokuʼnategamo akoʼya nehigenoʼaeʼmo Ala kava neʼmoʼa alino alave huteno hakalu hisiya kavaʼmo huʼnigeno alave huteno mopafiʼmo aino atagu faeno uneno hugekana nehigenoʼaeʼmo koʼmopamo alino ateʼnigeno Isipi koteʼmo emineʼniye.

²⁴ Ani kava huno koʼmopaʼe ataʼeʼmo emineʼniye. Isipi gamani vayaʼmogimo aepa faiteʼa yagaiʼa apateme eʼnaya afinatetiʼe eno hemeni maiʼnaya afinaʼeʼmo eminoʼmeʼniya agufa koʼmopamo muki Isipi kotegamo emineʼniye.

²⁵ Koʼmopamo muki Isipi kotegamo emineno kumatega maiʼnaya vayanagi muki alu afu alu afu anagaʼapigi hoyaʼapigi muki yosagi huno apamagiʼniye.

²⁶ Muki Isipi kotegamo koʼmopamo emineʼniyaʼmonanafa Isaleli vayaʼmo Goseni haopalegamo maiʼnaya koteʼmo koʼmopamo emiʼnoʼmeʼniye.

²⁷ Kini vekamo Feloʼa Moseseʼe Eloniʼefeʼmo ge huʼnigeʼanaeʼmo eʼnaʼaʼageno hana painoʼaeʼmo, Hemenimo nagaemo hosu kavaʼmo huʼnove. Ala kava neʼmo fatago neʼmo maiʼniyaʼmonanafa nagaeʼe vayaʼniʼeʼmo hosu vayaʼmo maiʼnone.

²⁸ Magoʼe huno alopa hakaluʼmo osuge koʼmopamo emiʼno mege hisiyafeʼmo ge hutana nunumuʼmo hiʼao. Hemenimo alagi haiʼmae. Nagaemo lapatalesugetapa ugae. Manileʼmo magoʼe hutapa oʼmaigae, huno huʼnigeno

²⁹ Moseseʼa ha painoʼaeʼmo, Nagaemo mani taonifatiʼmo ataleʼna malagamo uʼna lamiʼnaeʼmo nayaʼmo aliʼna asagauliʼneʼna Ala kava nefeʼmo nunumuʼmo hisugeno kokuʼnapatiʼmo magoʼe huno hakalu osuge koʼmopamo emi noʼmege hisigekaeʼmo mani mopamo Ala kava neʼmo mopamae, huka kagesamo afigane.

³⁰ Afiganaʼmonanafa kagaeʼe aliʼyakamo neʼaliya vayaʼeʼmo Ala kava neʼmo Gotifeʼmo koli osugae, huʼna afiʼnove, huno ha paiʼniye.

³¹ Ani afinaʼmo aise yosamoʼmo akafuʼnaʼamo aiʼa halae huʼa kukena nefakaniya nofiʼmo alo nehaya yosaʼe mali hoyaʼapiʼeʼmo amagino alino hosu huno ataleʼniye. Mali neʼyaʼmo aeʼniyaʼmonanafa olege alu yosaletiʼmo nofiʼmo alo nehaya yosamoʼmo saufa anupamo malege nehigenoʼaeʼmo koʼmopamoʼmo amagino alino hosu huno ataleʼniye.

³² Viti alagagana agufa neʼyaʼmo henagaʼamo neʼyaʼamo neʼaeya yaʼmo haneʼniyaʼmofeʼmo amagiʼniye.

³³ Inagi Moseseʼa taonifatiʼmo Feloʼmo ataleno uno lamino malaga maiʼnenoʼaeʼmo ayaʼmo alino asagauliʼneno Ala kava nefeʼmo nunumuʼmo huʼnigeno kokuʼnapatiʼmo hakalu huʼniya kavaʼmo alagi hano huge koʼmopamo emineʼniya kavaʼmo alagi hano huge huʼnigeno magoʼe huno koʼmo oʼaiʼniye.

³⁴ Feloʼa ageʼniyana ko oʼaige koʼmopamo emi noʼmege hakalu osuge huʼnigeno agetenoʼaeʼmo halate magoʼe huno hosu kavaʼmo huʼniye. Agaiʼagi aliʼyaʼamo neʼaliya vayanagi huʼa apaipa apakesamo aliʼa akani maleʼnae.

³⁵ Felo aipa agesamo alino akani maleʼniyaʼmofeʼmo Ala kava neʼmoʼa Mosesefeʼmo ha paiʼniya kava huno Isaleli vayaʼmo apataleʼnigeʼa oʼuʼnae.