Hatu maeno apate'niya gemae 8 - The Keyagana NT and 25 OT books

Eso anagaʼmo afole aiʼnaya gemae

¹ Seveniʼa afinaʼmo ago utegenoʼaeʼmo Ala kava neʼmoʼa Mosesefeʼmo ina ge huno ha paiʼniye. Kagaemo kini vekamo Felotegamo uka ani gemo huka ha paiyo. Ala kava neʼmoʼa, Vayaʼnimo afaʼa apatalegeʼa uʼa nagaetefeʼmo mono hiyo, huno huʼniye.

² Kagaemo apatalesanageʼa oʼvisayaʼmoʼmo muki Isipi koteʼmo asole eso anagaʼmo aiʼa atagu faesaya kayoʼmo lapamiguve.

³ Alopa aniʼmoʼmo asole eso anagaʼmo alino apatesigeʼa anipatiʼmo ataleʼa eʼa alopa nokafiʼmo uʼa haiʼa maige nehavana yapilagamo hipakafiʼmo uʼa haiʼa maige aliʼyakamo neʼaliya vayaʼmogi nopiʼmo uʼa haiʼa maige apakufaleʼmo uʼa haiʼa maige sitopufiʼmo uʼa haiʼa maige peleti mayamo nekaya yuvapafiʼmo uʼa haiʼa maige hugae.

⁴ Eso anagaʼmogimo kagae kagufaleʼmo uʼa haiʼa maige vayakamogi apakufaleʼmo uʼa haiʼa maige muki aliʼyakamo neʼaliya vayaʼmogi apakufaleʼmo uʼa haiʼa maige hugae, huka ha paiyo, huno ha paiʼniye.

⁵ Ala kava neʼmoʼa Mosesefeʼmo ha painoʼaeʼmo, Elonifeʼmo ha paikaeʼmo, hayopa kayokaletiʼmo aise anitenagi alopa anitenagi ani kotutenagi huka akoʼya huʼnegenoʼa asole eso anagaʼmo muki Isipi koteʼmo afole aiyo, huka ha paiyo, huno ha paiʼniye.

⁶ Inagi Eloniʼa muki aniʼafiʼmo ayaʼmo aeno hayo huʼnigenoʼaeʼmo asole eso anagaʼmo anipatiʼmo afole aiteʼa muki Isipi koteʼmo maiʼa havai teʼnae.

⁷ Hosu apaune vayaʼai himamuʼapiletiʼmo ani huʼniya agufa kavaʼmo huʼnageʼa asole eso anagaʼmo Isipi koteʼmo afole aiʼnae.

⁸ Kini vekamoʼmo Moseseʼe Eloniʼefeʼmo ge huʼnigeʼana eʼnaʼagenoʼaeʼmo anakaefeʼmo hana painoʼaeʼmo, Ala kava nefeʼmo nunumuʼmo hisaʼageno lagaetegatiʼmo eso anagaʼmo alino hapa faino apatalesigeʼnaeʼmo vayakamo afaʼa apatalesugeʼa uʼa Ala kava netefeʼmo ofalinimo hugae, huno hana paiʼniye.

⁹ Moseseʼa geʼaleʼmo aeno atagaina hunoʼaeʼmo, Nagaemo kagikaleʼmo aliʼna asaga huʼna katogi nunumuʼmo huʼna lapatesuva afinaʼmo lekana paiyo, Nagaemo kagaikagi aliʼyakamo neʼaliya vayanagi muki vayakagi huʼna nunumuʼmo huʼna lapatesugeno Ala kava neʼmoʼa lapakaetegatiʼe notapifatiʼeʼmo eso anagaʼmo alino hano huno apatalesigeʼa mago eso anagaʼmo alopa anipiʼmo uʼa maigae, huno ha paiʼniye.

¹⁰ Kini vekamoʼmo hunoʼaeʼmo, Egamae, huno huʼnigenoʼaeʼmo, Huʼnana kavaʼmo afole aigiye. Alu gotigimo Ala kava neʼmo Gotitimokana huʼa oʼmaiʼnae, huka agegane.

¹¹ Eso anagaʼmo kagaetegatinagi notapifilagatinagi aliʼya kamo neʼaliya vayaʼaitegatinagi muki vayakalegatinagi huʼa lapataleʼa apaune heʼa uʼa anipiʼmo maigae, huno ha paiʼniye.

¹² Inagi Moseseʼe Eloniʼeʼmo Feloʼmo ataleʼana uʼanaeʼmo Moseseʼmo Ala kava neʼmoʼa apavalelino Felotegamo eʼniya eso anagafeʼmo lokiya vaino Ala kava nefeʼmo nunumuʼmo huʼniye.

¹³ Nunumuʼmo huʼnigeno Ala kava neʼmoʼa Mosese gemo akame huno noʼapifiʼmo maiʼnaya esonagi kumategamo maiʼnaya esonagi hoyaʼapifilagamo maiʼnaya esonagi huno apamagiʼnigeʼa faliʼnae.

¹⁴ Faliʼnageʼa vayaʼmogi aliʼa anupa huʼa alu ai male alu ai male huʼnageno muki Isipi haopalegatiʼmo lusi hosu atumo aiʼniye.

¹⁵ Feloʼa agetenoʼaeʼmo hausoli huʼnigeno atete hauʼniya kavaʼamo hano huʼnigenoʼaeʼmo Ala kava neʼmoʼa hana paiʼniya kava huno agaiʼa aipa agesamo alino akani maleteno geʼanimo oʼafiʼniye.

Apakenopafi nama anagaʼmo afole aiʼnaya gemae

¹⁶ Ala kava neʼmoʼa Elonifeʼmo ina ge huka ha paiyo, huno huteno Mosesefeʼmo ha painoʼaeʼmo, Hayopa kayokamo kayapiʼmo aliʼneka aeka hayo huʼneka mumusopafiʼmo amagisanageno vayaʼaitegagi afu anagaʼaitegagi huno nama anagaʼmo muki Isipi koteʼmo afole aino, huno ha paiʼniye.

¹⁷ Eloniʼa hayopa kayoʼamo aliʼneno aeno hayo huno mumusopafiʼmo amagiʼnigeno apakenopafi nama anagaʼmo muki vayaʼai apakufalenagi muki alu afu alu afu anagaʼmogi apakufalenagi huno afole aiʼniye. Muki mumusopamoʼmo Isipi koteʼmo apakenopafi nama anagaʼmo aliʼa hamaleʼnae.

¹⁸ Apaune vayaʼmogimo himamuʼapiletiʼmo nama anagaʼmo afole aisayafeʼmo amalageka huʼa huʼnayaʼmonanafa nama anagaʼmo afole oʼaiʼnae. Ani nama anagaʼmo vayaʼai apakufalenagi alu afu alu afu anagaʼmogi apakufalenagi huʼa maiʼnae.

¹⁹ Apaune vayaʼmogimo Felofeʼmo ha paiʼapaeʼmo, Ani kavaʼmo Goti aya akoyaletiʼmo himamu kavaʼmo afole aiʼniye, huʼa ha paiʼnayaʼmonanafa Feloʼa Ala kava neʼmoʼa hana paiʼniya kavaʼmo huno aipa agesamo aino akani maleʼnigeno magoʼe huno geʼanimo oʼafiʼniye.

Kosi anagaʼmo afole aiʼnaya gemae

²⁰ Ala kava neʼmoʼa Mosesefeʼmo ha painoʼaeʼmo, Gotilamisiyapiʼmo he tika uka Feloʼmo anitegamo ugefeʼmo neʼesigetana fotu hutetanaeʼmo, Ala kava neʼmoʼa kagaefeʼmo ha paikaeʼmo, vayaʼnimo apatalegeʼa uʼa nagaetefeʼmo mono hiyo, huno naha paiʼniye, huka ha paiyo.

²¹ Apatalesanageʼa oʼvisayaʼmoʼmo asole kosi anagaʼmo aliʼna apatesugeʼa haleliʼa uʼeʼa huʼa kagae kagufaleʼmo hakalege aliyakamo neʼaliya vayaʼmogi apakufaleʼmo hakalege muki vayakamogi apakufaleʼmo hakalege notapifiʼmo uʼa haiʼa havaitege hugae. Kosi anagaʼmogi Isipi vayaʼmogi noʼapifiʼmo haleliʼa uʼa haiʼa havai tege maiʼnaya mopaleʼmo havai tege hugae.

²² Havaitegayaʼmonanafa nagaemo vayaʼnimo Goseni koteʼmo maiʼnayanageʼna aliʼna aote malesugeno ani afinaʼmo apakae mopaleʼmo oʼmaigae. Kagaemo ani kavaʼmo agetekaeʼmo, Ala kava neʼmo agaiʼageʼmo lagae koʼmo folagapiʼmo maiʼniye, huka nagesanafeʼmo ani kavaʼmo huguve.

²³ Nagaemo vayaʼnilegamo alu kavaʼmo huteʼna kagae vayaʼaitegamo alu kavaʼmo hisugeʼapaeʼmo alu vaya alu vayaʼmo maiʼnae, huʼa apakegae. Egamo ani alagena kavaʼmo afole aigiye, huno ha paiʼniye.

²⁴ Ala kava neʼmoʼa ani kavaʼmo huguve, huno huʼniya kavaʼmo huʼnigenoʼaeʼmo asole kosi anagaʼmo kini vekamo nopiʼmo haleliʼa uʼa haige aliʼyaʼamo neʼaliya vayaʼai nopiʼmo uʼa haige huteʼa muki Isipi kotegamo alagi aliʼa hosu huʼa ateʼnae.

²⁵ Inagi kini vekamoʼmo Moseseʼe Eloniʼefeʼmo ge huʼnigeʼana eʼnaʼageno hana painoʼaeʼmo, Lapakaemo mani kotekeʼmo maiʼnetapa Gotitapimoʼmo afumo amagitapa ofalinimo amiyo, huno hana paiʼniye.

²⁶ Moseseʼa hunoʼaeʼmo, Ani kavaʼmo hisunaʼmoʼmo kanale osugiye. Lagaemo Ala kava netimo Gotitimofeʼmo Isipi vayaʼmogi apaulagaleʼmo apaini huʼnigeʼa apavenatuʼnaʼmo heʼa neʼatalaya afu ofalinimo amisunageʼapaeʼmo hosu apaipamo kaliʼa lateteʼa yafa kayotetiʼmo olamagisafiye, huno huʼniye.

²⁷ Lagaemo loleʼe magoʼe afinaʼmo kaʼme kotegamo uta Ala kava netimo Gotitimoʼmo hiyo, huno laha paiʼniya kavaʼmo akame huta afumo amagita ofalinimo amigune, huno huʼnigeno

²⁸ Feloʼa hunoʼaeʼmo, Inagi afaʼa lapatalesugetapa kaʼme kotegamo utapa Ala kava neʼmo Gotitapimoʼmo afumo amagitapa ofalinimo amigayaʼmonanafa afagitegamo oʼutapa hogoʼaleʼmo uta maiʼnetapaeʼmo nagaeʼefeʼmo nunumuʼmo hutapa nateyo, huno ha paiʼniye.

²⁹ Moseseʼa geʼaleʼmo aeno atagaina hunoʼaeʼmo, Kataleʼna ugefeʼmo hisuva afinaʼmo Ala kava nefeʼmo nunumuʼmo hisugeno kosi anagaʼmo kagaetetinagi aliʼyakamo neʼaliya vayaʼaitetinagi muki vayakalegatinagi huno alino hapafaino apatalegaiyaʼmonanafa kagaemo lagaefeʼmo magoʼe huka aigofe gemo laha opaika vayatimo apatalegeʼa uʼa Ala kava neʼmo afumo amagiʼa ofalinimo amiyo, huno ha paiʼniye.

³⁰ Moseseʼa Feloʼmo ataleno uno Ala kava nefeʼmo ge hunoʼaeʼmo, kahaoke hovanagi kosi anagaʼmo alika hapafaika apatalo, huno nunumuʼmo huʼniye.

³¹ Ala kava neʼmoʼa Moseseʼmo huʼniya gemo afitenoʼaeʼmo Felotetinagi aliʼyaʼmo neʼaliya vayaʼaitetinagi muki vayaʼalegatinagi huno kosi anagaʼmo alino hapafaino apataleʼnigeno magoke kosiʼmo alagi oʼmaiʼniye.

³² Oʼmaiʼniyaʼmonanafa ani afinaʼeʼmo Feloʼa agaiʼa aipa agesamo aino akani maleʼniyaʼmofeʼmo afaʼa apataleʼnigeʼa oʼuʼnae.