Hatu maeno apate'niya gemae 7 - The Keyagana NT and 25 OT books

¹ Inagi Ala kava neʼmoʼa Mosesefeʼmo ha painoʼaeʼmo, afiyo, huno, nagaemo kini vekamo aulagaleʼmo kagaemo Gotigagana huʼna aliʼna hamaleʼna kateʼnove. Nepukamo Eloniʼmo Gotitegati gemo alinineno aeno hakalo huno hapa nepaiya vekagana huno maigiye. Kagaemo Elonifeʼmo ha paisana gemo alino kini vekaeʼmo ha paigiye.

² Nagaemo kagaefeʼmo huvo, huʼna kaha paisuva gemo Elonifeʼmo ha paigane. Eloniʼmo kini vekamo Felofeʼmo, Isaleli vayaʼmo apatalegeʼa kokaletiʼmo ataleʼa viyo, huno ha paigiye.

³ Ha paigiyaʼmonanafa nagaemo Felo aipa agesamo aliʼna akani maleʼneʼna asole noʼagaya agufa naune kavaʼmo Isipi koteʼmo huguve.

⁴ Gekamo oʼafisigeʼnaeʼmo naune kavaʼmo huguvaʼmonanafa nagaemo Isipi vayaʼmogi kavaʼapimo aliʼna fako huteʼnaeʼmo alopa kayoʼmo apamiteʼna himamuʼniletiʼmo muki Isaleli nofi vayaʼmo apavaleliʼna uguve.

⁵ Nagaemo Isipi vayaʼaina alopa kayoʼmo apamiteʼnaeʼmo apakae folagapatiʼmo Isaleli vayaʼmo apavaleliʼna visugeʼapaeʼmo Isipi vayaʼmogimo nagaefeʼmo Ala kava neʼmo maiʼniye, huʼa nagegae, huno ha paiʼniye.

⁶ Ala kava neʼmoʼa Moseseʼe Eloniʼefeʼmo hana paiʼniya gemo alagi akame huʼana huʼnaʼae.

⁷ Ani kini vekaeʼmo ha paiʼnaʼa afinaʼmo Moseseʼmo eitiʼa kafugamo maiʼnigeno Eloniʼa eiti taliʼa kafugamo maiʼniye.

Eloni hayopa kayoʼaeʼmo huʼniya gemae

⁸ Ala kava neʼmoʼa Moseseʼe Eloniʼefeʼmo hana painoʼaeʼmo,

⁹ Kini vekamoʼmo lanakaefeʼmo agesamo afino fatago hisiyafeʼmo hunoʼaeʼmo, lanaune kavaʼmo hisaʼageʼnaeʼmo lama ge vekalaʼmo maiʼnaʼae, huʼna agegauve, huno hisigetanaeʼmo Elonifeʼmo ha paigenoʼa ani kini vekamo aulagaleʼmo hayopa kayoʼamo mopafi yaga ausigenoʼaeʼmo nagaloʼyavemo alino hamaleno, huno hana paiʼniye.

¹⁰ Inagi Moseseʼe Eloniʼeʼmo kini vekalegamo uʼanaeʼmo Ala kava neʼmoʼa hana paiʼniya kavaʼmo huno Eloniʼmo kini vekamo aulagaleʼe aliʼyaʼamo neʼaliya vayaʼai apaulagaleʼeʼmo hayopa kayoʼamo mopafiʼmo yaga auʼnigenoʼaeʼmo nagaloʼyavemo alino hamaleʼniye.

¹¹ Kini vekamoʼmo ani kavaʼmo agetenoʼaeʼmo muki afiteʼa ageʼnaya vayaʼaifenagi hosu apaune vayaʼmogi himamuʼapiletiʼmo apaune kavaʼmo nehaya vayaʼaifenagi huno ge huʼnigeʼa eʼa himamuʼapiletiʼmo ani hunaʼa agufa apaune kavaʼmo huʼnae.

¹² Mukiʼamogimo hayopa kayoʼapimo yaga auʼnagenoʼaeʼmo nagaloʼyave anagaʼmo aliʼa hamaleʼnayaʼmonanafa Eloni nagaloʼyavemoʼmo apakae nagaloʼyave anagaʼmo hapaeno neʼniye.

¹³ Kini vekamoʼmo ani kavaʼmo ageʼniyaʼmonanafa Ala kava neʼmoʼa hana paiʼniya agufa kavaʼmo huno aipa agesamo aino akani maleʼnigeno huʼnaʼa gemo oʼafiʼniye.

Gotiʼa Isipi vayaʼaina hogote kayoʼmo aniʼmoʼa kolaʼmo ha maleʼniya kayoʼmo apamiʼniya gemae

¹⁴ Inagi Ala kava neʼmoʼa Mosesefeʼmo ha painoʼaeʼmo, Felo aipa agesamo agaiʼamo alino akani maleʼniyaʼmofeʼmo haʼao, huteno, Isaleli vayaʼmo apatalesigeʼa oʼugae, huno ha paiʼniye.

¹⁵ Netepiʼmo agaemo alopa anitegamo ugiyanagi hogotetana utana maiʼnetana fotu hiʼao. Nagaloʼyavemo alino hamaleʼniya hayopa kayokamo alinika uvo.

¹⁶ Kagaemo kini vekaeʼmo ha paikaeʼmo, Ala kava neʼmo Himulu vayaʼmogita Gotitimoʼmo alino natetenoʼaeʼmo kagaefeʼmo ina ge huka ha paiyo, huno naha paiʼniye. Vayaʼnimo apatalegeʼa kaʼme kotegamo uʼa nagaetefeʼmo mono hiyo, huka ha paiyo, huno naha paiʼniya gemo ago eʼna kaha paiʼnovaʼmonanafa ani kaha paiʼnova afinatetiʼmo eno hemeniʼeʼmo geʼnimo noʼafine.

¹⁷ Inagi Ala kava neʼmoʼa hunoʼaeʼmo, nagaemo hisuva kavatetiʼmo kagaemo nagekaeʼmo agaemo Ala kava neʼmo agaiʼageʼmo maiʼniye, huka nagegane. Afiyo, huʼna, Nagaemo aliʼnova hayopa kayotetiʼmo alopa aniteʼmo neʼamagisugenoʼaeʼmo kola aniʼmo alino hamalegaiye.

¹⁸ Alino hamalesigeʼapaeʼmo noyame anagaʼmo falisageno anipatiʼmo hosu atumo aisigeʼapaeʼmo Isipi vayaʼmogimo ani aniʼmo oʼnegae, huno naha paiʼniye, huka ha paiyo.

¹⁹ Ala kava neʼmoʼa Mosesefeʼmo ha painoʼaeʼmo, Elonifeʼmo ha paigenoʼa hayopa kayoʼamo aliteno uno muki alopa anitenagi muki aise anitenagi muki ani kotuteʼenagi huno hayopa kayoʼmo alino asagauno aliʼneno akoʼya hino. Aniʼmoʼmo kola aniʼmo alino hamalesigenoʼaeʼmo muki Isipi haopalegamo kolaʼageʼmo hanesigeno yosa yuvapafinagi yafa yuvapafinagi ani kepinagi huno kolaʼageʼmo hanegaiye, huno ha paiʼniye.

²⁰ Inagi Moseseʼe Eloniʼeʼmo Ala kava neʼmoʼa hana paiʼniya kavaʼmo huʼnaʼae. Eloniʼa kini vekamo aulagaleʼe aliʼyaʼamo neʼaliya vayaʼmogi apaulagaleʼmo hayopa kayoʼaletiʼmo alopa aniteʼmo amagiʼnigenoʼaeʼmo kola aniʼmo alino hamaleʼniye.

²¹ Muki noyame anagaʼmo faliʼnageno anipatiʼmo lusi kava huno hosu atumo aiʼnigeʼa Isipi vayaʼmogimo ani aniʼmo oʼneʼnae. Muki Isipi haopalegamo kolaʼmoʼmo havaiteʼniye.

²² Isipi kote apaune vayaʼmogimo himamuʼapiletiʼmo ani agufa kavaʼmo huʼnagenoʼaeʼmo Feloʼa aipa agesamo alino akaniteno geʼanimo oʼafiʼniye. Hogoteno Ala kava neʼmoʼa ani kavafeʼmo ava gemo huʼniye.

²³ Feloʼa noʼalegamo atagineno uʼniyaʼmonanafa ani kavaʼmoʼa aipafiʼmo aliʼyaʼmo oʼaliʼnigeno aipamo alino afe oleʼniye.

²⁴ Muki Isipi vayaʼmogimo alopa aniʼmo agiʼnafatiʼmo aniʼmo he fiʼa nesayafeʼmo kelimo kafiʼnae. Alopa anipatiʼmo he fiʼa nesaya agufa kavaʼmo osuʼniyaʼmofeʼmo kelimo kafiʼnae.

²⁵ Ala kava neʼmoʼa alopa aniteʼmo amagiʼnigenoʼaeʼmo seveniʼa afinaʼmo kola aniʼmo haneʼniye.