Hatu maeno apate'niya gemae 6 - The Keyagana NT and 25 OT books

¹ Ala kava neʼmoʼa Mosesefeʼmo ha painoʼaeʼmo, Nagaemo hemenimo kini vekalegamo hisuva kavaʼmo agegane. Himamuʼniletiʼmo hisugeno apatalesigeʼa afaʼa ugae. Himamuʼniletiʼmo hisugenoʼaeʼmo mani agaiʼa kotetiʼmo alino hapa faino apatalesigeʼa ugae, huno ha paiʼniye.

² Gotiʼa Mosesefeʼmo magoʼe gemo huno ha painoʼaeʼmo, Nagaemo nagaiʼnigeʼmo Ala kava neʼmo maiʼnove.

³ Nagaemo Emalehamutegagi Aisakitegagi Yekoputegagi huʼna afole aiʼnogeʼa nageteʼapaeʼmo lokiyaʼamo haneʼniya Gotiʼa maiʼniye, huʼa nageʼnayaʼmonanafa nagiʼnimo Yihovaʼnaʼmae huʼa oʼafiʼnae.

⁴ Nagaemo apakaeʼe kotalakemo magokepi hu maleteʼnaeʼmo inagi nagaemo Kenani nofi vayaʼmo kalaga vayaʼmo uʼa maiʼnaya mopamo aliʼna apamiguve, huʼna hapa paiʼnove.

⁵ Isipi vayaʼaiteʼmo Isaleli vayaʼmogimo kalavusi aliʼyaʼmo neʼaliʼapaeʼmo yulagefa aiʼnaya gemo afiteʼnaeʼmo kotalakeʼnieʼmo nage okaniʼna nagesamo afiʼnove.

⁶ Kotalakeʼnieʼmo nagesa afiʼnovaʼmofeʼmo Isaleli vayaʼaifeʼmo ina ge huka hapa paiyo. Nagaemo Ala kava neʼmo maiʼnove. Nagaemo Isipi vayaʼaiteʼmo kalavusi aliʼyaʼmo neʼaliya kavapatiʼmo lapakufamo aliʼna katiʼna lapatege himamuʼniletiʼmo lapa maeteʼna kavaʼapimo aliʼna fako huʼna apateteʼnaeʼmo lusi kayoʼmo apamiteʼna hatu maeʼna lapatege huguve.

⁷ Nagaemo lapavalesugetapa nagaiʼni vayaʼnimo maisageʼnaeʼmo nagaemo Gotitapimoʼnamo maiguve. Ani afinaʼmo nagetapaeʼmo, Ala kava neʼmo Gotitimoʼmo Isipi kotegamo kana yaʼmo aliʼnonagenoʼaeʼmo hatu maeno lateʼniya Gotiʼmae, hutapa hugae.

⁸ Nagaemo Emalehamufenagi Aisakifenagi Yekopufenagi huʼna mopamo lapamiguve, huʼna hapa paiʼnova koteʼmo lapavaleliʼna uʼna ani mopamo lapamisugeno lapakaitapi mopamo hanegaiye. Ala kava neʼmoʼnageʼmae, huka hapa paiyo, huno ha paiʼniye.

⁹ Inagi Moseseʼa Isaleli vayaʼaifeʼmo ani gemo hapa paiʼniyaʼmonanafa oʼafiʼnae. Apakaemo kalavusi aliʼyaʼmo aliʼa maiʼnageno apaipamoʼmo kana huʼniyaʼmofeʼmo geʼamo oʼafiʼnae.

¹⁰ Ala kava neʼmoʼa Mosesefeʼmo ha painoʼaeʼmo,

¹¹ Isipi koteʼmo yagaiʼniya kini vekalegamo uka ha paikaeʼmo, Kagaemo Isaleli vayaʼmo apatalegeʼa kokaletiʼmo ataleʼa viyo, huka ha paiyo, huno ha paiʼniye.

¹² Moseseʼa hunoʼaeʼmo, Isaleli vayaʼmogimo geʼnimo oʼafiʼnayanageno haiya kava huno Feloʼmo geʼnimo afigiye. Navayamoʼmo kana huʼniye, huno huʼnigenoʼaeʼmo

¹³ Ala kava neʼmoʼa Moseseʼe Eloniʼefeʼmo hana painoʼaeʼmo, Isaleli vayaʼe Isipi koteʼmo yagaiʼniya kini vekaʼefeʼmo ina ge hutana hapa paiʼao. Isipi kotetiʼmo apavalelitaʼa visuʼafeʼmo Gotiʼa lekana paino laʼateʼniye, hutana hapa paiʼao, huno hana paiʼniye.

^14-30 Moseseʼe Eloniʼeʼmo nofi vayaʼanimogi apakiʼapimo haneʼniye.